E Le Ni o le Lalolagi
O le tu atu o se tagata o le Ekalesia a Keriso e mafai ona faatogafiti i le lalolagi i ona po nei, ae e mafai ona tatou i ai i lenei lalolagi e aunoa ma le faatosinaina ai.
Pe ua e fesili ea po o fea e sau ai le faaupuga lea “i le lalolagi ae le ni o le lalolagi”? E tele atu i le na o se anavatau po o se faaaogaina poto o sooupu—na sau moni lava mai ia Iesu Keriso.
Vaai faalemafaufau i le po ao lumanai Lona Faasatauroga. Sa ia feiloai ma Ana Aposetolo, ma mulumulu o latou vae, na aoao atu i latou, ma faatautaia le faamanatuga. I se tasi taimi i le po, sa Ia tatalo leotele ai i Lona Tama mo le Au Aposetolo:
“Ou te le ole atu ina ia e ave ese ia te i latou i le lalolagi, a ia e tausi ia te i latou ina ne’i leaga.
“E le ni o le lalolagi i latou, faapei o a’u foi ou te le so le lalolagi a’u. …
“Faapei ona e auina mai au i le lalolagi, ua faapea foi a’u ona auina atu o i latou i le lalolagi” (Ioane 17:15–16, 18).
Sa soifua le Faaola lava Ia i Lona soifuaga atoa i le lalolagi ae e le o so le lalolagi. Ua faaosoosoina o ia, ae Na te lei faamatuu atu i faaosoosoga. Ia aloese mai mea leaga. Sa latou mafuta faatasi ai ma soo ma tagata talitonu faapea foi ma tagata agasala ma le pepelo. O ia o se faataitaiga ia i latou uma.
Ae Na te lei tuua Ona soo ma se agaga, “Afai sa ou faia, e mafai foi ona outou faia.” Nai lo lena, sa agaalofa o Ia. Sa ia tatalo ia fesoasoani le Tama ia te i latou. Ae e lei tatalo o Ia mo le luitau ia aveese mai ia i latou. I le taimi o Lona olaga i le lalolagi ma e ala i Ana perofeta o aso nei ma aposetolo, na aoao mai ai le Faaola e taua mo i tatou le avea ma faatosinaga mo le lelei i le lalolagi.
O loo feagai pea lava ia talavou mai le salafa o le lalolagi ma luitau a o latou feofeoai i alasavali o a’oga, fegalegaleai ma uo, ma auai i gaoioiga faaopoopo. Ae o le i ai o le Faaola i o latou autafa, ma le talalelei i o latou loto, o le a latou maua ala e tausisia ai i latou mai le avea ma ni o o le lalolagi. Faitau pe faapefea ona filifili nisi o i latou e mulimuli i faataitaiga a le Faaola.
Ia Punouai ma le Naunautai
Pe a ou feagai ma faaosoosoga, ou te fesili ifo ia te au lava, “O le a se Mea e fai e Iesu?” po o le “Pe o lenei mea o le a ou latalata atili ai i le malo selesitila?” Ou te alu i le seminare i taeao uma e ui lava ina ua ou lelava lava, aua e fesoasoani ia te au e tuputupu ae ai faaleagaga. O le faitauina o au tusitusiga paia, ma se faamoemoe e aoaoina se mea fou po o se mea e mafai ona fesoasoani ia te au e avea ai ma se tagata lelei atu, o se punavai o le taitaiga e fesoasoani ia te au. Pe a tatou tausia le aso Sapati ia paia ma o atu i a tatou gaoioiga, e mafai ona sili atu lo tatou faatoilaloina o Satani. Pe a tatou punouai i le Alii, e mafai ona Ia fesoasoani ia i tatou i tulaga faigata uma tatou te ui atu ai.
Brenda H., 17, Minesota, ISA
To Mai le Malosi mai Isi
Ou te tausia o‘u tulaga faatonuina e ala i le auai i gaoioiga faatasi ma au uo i le ekalesia. E moni ou te valaaulia uo le lolotu i gaoioiga ina ia mafai ona latou vaai ma malamalama pe aisea ou te manao ai e tausia nei tulaga faatonuina. O o‘u matua ma lo’u tuagane matua o ni faataitaiga lelei ia te au. E tele a’u uo lelei e lē auai i le Ekalesia o ni faataitaiga maoae foi ia te au. E tele o latou uiga lelei ou te fia atinaeina mo au lava.
Celina W., 15, Siamani
Tautala Atu
I Tenimaka, e faitaulia eseese pe afai e te alu i le lotu, le inu, ma i ai tulaga faatonuina maualuga. Ae sa ou iloaina foi afai e te le matamuli e talanoa e uiga i tulaga faatauaina o loo e tu ai, e vave lava ona maua le tele o le faaaloalo mai lau tupulaga. Ua ou vaai e manatu tagata e manaia pe a vaavaaia e isi i latou faapena.
Ema K., 18, Tenimaka
Faasusulu Atu Lou Malamalama
I ni nai tausaga ua mavae, sa auai ai la‘u au lakapi i se taamilosaga e atoa se vaiaso. O lona uiga e fitu aso e alu ese ai mai le aiga, matua, ma taitai o le Ekalesia. Aua matou te auai i le aoga a le Ekalesia, o lea la o tagata uma i la matou au o tagata o le Ekalesia. Toetoe o afiafi uma o lena vaiaso, e pati ai isi ’au i le matou faletalimalo i o latou potu ma musika leotetele, sisiva, fai inuga, ma ulaula, ma feei i upu matuia i le tasi i le isi. Sa faapotopoto la matou au i se potu mo la matou suesuega masani o tusitusiga paia ma faigalotu i le afiafi. Sa ou lagona le fiafia e fai le mea sa‘o e aunoa ma le faatonuina e o matou matua. Ina ua uma ona matauina i matou e isi ’au ma le ofo, sa latou faaaloalogia i matou. Sa leai se pisa pe a latou iloaina ua fai a matou faigalotu i le afiafi. Sa foliga mai ua latou fiafia i mea sa matou faia, ma o nisi sa oo lava ina auai faatasi ma i tatou e faitau tusitusiga paia ma tatalo faatasi.
Matou te lei mālō i le tauvaga i lena vaiaso, ae sa matou manumalo i se isi itu. Sa mafai ona faasusulu atu lo matou malamalama, ma e ala i la matou faataitaiga, na suia ai loto ma mafaufau.
Elisara E., 20, Samoa