E Matuai Tauia Lava Le Seminare!
E ono manaomia ai se ositaulaga, ae ua iloa e nei talavou e mafai ona avea le seminare ma se faamanuiaga.
O le a se mea e tasi ua tutusa ai le autalavou a le Au Paia o Aso e Gata Ai i le lalolagi atoa? O i latou o tamaiti aoga seminare! E auai talavou i le seminare i le tele o auala eseese. O nisi e feala mai i le 5:00 i le vaveao e o muamua i le aoga, a o isi e auai i le va o le a latou vasega masani o a‘oga. I tulaga e le masani, o nisi tamaiti aoga e o atu i le faaiuga o vaiaso pe faaaoga le Skype e faatino ai.
Tusa lava pe ua latou ositaulagaina le moe po o taaloga soka i le faaiuga o vaiaso ae e silia ma le, 390,000 talavou i le lalolagi atoa e auai ma le fiafia i le seminare. O a latou tala nei e uiga i faamanuiaga o le seminare:
“Ou te le manatu i ai faapea ua laitiiti ai a’u itula o le moe; ae ou te manatu i ai o se itula ou te saunia ai a’u lava faaleagaga.”
Megan C., 17, Kalefonia, ISA
“Ona o le seminare, ua faamalosia tele ai la‘u molimau, ma ua i ai so’u malamalama mautinoa i tusitusiga paia. O la‘u molimau i le taulaga a le Faaola i Ketesemane ua malosi atu ona o le seminare.”
Vina C., 17, Hong Kong, Saina
“O le seminare o se nofoaga ou te mafai ona ou lagonaina ai pea lava le Agaga. I lo‘u aiga e na o au le tagata auai e toaga, ae matuai lagolagoina lava au e o’u matua. Ona o le seminare, ua ou matua tuputupu ae ai lava.”
Amanda L., 17, Iuta, ISA
“O le Seminare e te tu mausali ai mo mea o loo tutupu i le aso. Afai ou te manatu ua mapuna a’e ni mafaufauga leaga, e mafai ona ou manatu e uiga i le lesona o le seminare. E faateleina i tala atu o le seminare.”
Eric G., 15, Ipswich, Egelani
“E sili ona taua le alu i le seminare, aua e mafai ona tatou aoao atili e uiga i la tatou Ekalesia ma fausia ai lo tatou sootaga ma le Tama Faalelagi. O le mafuaaga ou te fiafia ai i le seminare e mafai ona ou iloa atili ai e uiga i le talafaasolopito o le Ekalesia ma iloaina e moni le talalelei ma o Iesu Keriso ma le Tama Faalelagi e alolofa ia te au!”
Breck M., 17, Kentucky, ISA
“Ou te fiafia i seminare aua e fesoasoani ai ia te au e faia faaiuga. I vasega, ou te lagonaina le Agaga o le Alii ma i ai se faamautuuga o le talalelei lenei a Keriso. E leai se mea o le a le fiafia ai i ai. Ou te iloa o a‘u suesuega i nei tausaga e fa o le a fesoasoani ia te au e auauna atu i se misiona.”
Karolina O., 16, João Pessoa, Pasila