?Mi Mi Stret Evriwan ia? Bae Mi Save Kasem Ples Ia?
If you will really try and will not rationalize or rebel—repenting often and pleading for grace—you positively are going to be “good enough.”
Ol dia sista mo brata, hem i wan bigfala blesing blong yumi kam tugeta blong ol wokman blong Lod oli tijim yumi. ? Hem i no wan gudfala samting blong luk olsem wanem Papa long Heven we i lavem yumi i stap lidim mo blesem yumi long ol plante wei? Hem i wantem yumi blong gobak long Hem.
Wetem plante lav mo sore we mi bin stap kasem taem we mi wan yang dokta we mi jes finis nomo long skul blong meresin, mo afta oli akseptem mi long trening blong ol dokta blong ol pikinini long wan program we kompetisen i hae. Taem mi luk ol nara dokta we mifala i stap long trening, mi filim olsem save blong mi i no inaf mo mi no rere gud olsem olgeta. Mi ting se i no gat wan wei nating we bae mi save kwalifae olsem olgeta narawan long grup.
Eli long nambatri manis blong mifala, mi stap sidaon long ples blong ol nes insaed long hospital let long wan naet, mi no stop blong mekem saen blong slip afta sarem ae smolsmol taem we mi stap traem blong fulumap fom blong wan smol boe we bae i kam slip long hospital from hem i kasem strong kof. Filing ia se mi no save mekem, i neva bin hapen long mi bifo. Mi no save olsem wanem blong tritim strong kof ia long wan pikinini blong 10 yia. Mi stat askem miwan se mi stap mekem wanem long ples ia.
Stret long taem ia, wan long ol eksperiens studen i putum han blong hem long solda blong mi. Hem i askem mi olsem wanem wok blong mi, mo mi talemaot wari mo ol fraet blong mi long hem. Ansa blong hem i jenisim laef blong mi. Hem i talem long mi se hem mo ol nara eksperiens studen oli praod long mi mo olsem wanem oli filim se bae mi kam wan top dokta. Blong mekem i sot, hem i biliv long mi long wan taem we mi no bin biliv long miwan.
Olsem eksperiens blong mi ia, plante taem yumi harem ol memba oli askem: ?“Mi mi wan man we mi gud inaf?” ? “Bae mi save kasem selestial kingdom?” Be yes, i no gat wan samting olsem “stret evriwan”. I no gat wan long yumi bae i save “kasem” o “risivim” fasin blong sevem yumiwan, be hem i nomol blong yumi askem yumiwan sapos yumi stret long wan wei we Lod bae i akseptem, we hem i wei we mi mi andastanem kwestin ia.
Samtaem yumi go long jos, yumi filim se yumi no inaf taem oli invaetem gud yumi blong jenis mo kam antap. Yumi tingting kwaet nomo se: “Mi no save mekem evri samting ia we oli tijim mi” o “Bae mi neva save kam gud olsem olgeta pipol ia.” Ating yumi filim semmak olsem we mi bin filim long hospital long naet ia.
Plis, ol brata mo sista blong mi we mi lavem, yumi mas stop blong komperem yumiwan wetem ol narawan. Yumi stap mekem yumi harem nogud taem yumi stap kompit mo komperem yumi wanwan. Yumi giaman long yumiwan mo stap jajem yumiwan tru long ol samting we yumi gat o no gat, mo tru long lukluk blong ol nara man.. Sapos yumi mas komperem yumi, bae yumi komperem yumiwan long laef blong yumi bifo mo hemia blong tedei—mo tu, laef we yumi wantem gat long fiuja. Lukluk we yumi sapos blong stap wari long hem, hem i lukluk blong Papa blong yumi long Heven long yumi. Plis askem Hem wetem wan ones hat wanem tingting blong Hem long yu. Hem bae lavem mo stretem yumi be bae i no blong mekem yumi lus hop; hemia i trik blong Setan.
Bae mi tok stret mo klia. Ansa blong ol kwestin ia: “? Mi mi stret evriwan ia?” “Bae Mi Save Kasem Ples Ia?” Ansa hem i : “ !Yes! Yu bae kam stret evriwan” mo “Yes, yu bae yu kasem ples ia, sapos yu gohed blong sakem sin mo no mekem eskius o go agens.” God blong heven Hem i no wan rafri we i nogat sore mo stap lukaotem eskius blong sakem yumi aot long gem. Hem, Hem i Papa blong yumi ia we i stret mo i lavem yumi, we i wantem, bitim eni narafala samting, blong evri pikinini blong Hem i gobak hom mo stap wetem Hem olsem ol famli we i no save finis!1 Plis biliv, mo plis tekem hop mo kamfot long trutok ia we i no save finis. Papa blong yumi long Heven i wantem yumi blong kasem ples ia! Hemia hem i wok mo glori blong Hem.2
Mi lavem fasin we Presiden Godon B. Hinkli i yusum blong tijim prinsipol ia. Mi bin harem hem i talem long plante kam tugeta olsem se, “Ol brata mo sista, !wanem we Lod Hem i wantem long yumi i blong yumi traem, blong yumi rili traem!” 3
“Rili traem” i minim se yumi wokhad wetem ful paoa blong yumi, luksave ol ples we yumi nid blong kam antap gud long hem, mo afta, yumi traem bakegen. Taem yumi stap gohed blong mekem hemia, yumi kam moa kolosap long Lod; yumi filim Spirit blong Hem moa, ,4 mo yumi kasem moa gladhat, o helpem long Hem.5
Samtaem, mi ting se, yumi no luksave se Lod i wantem tumas blong helpem yumi. Mi laekem ol toktok blong Elda Deved A. Bedna, we i talem se:
“Plante long yumi i andastanem i klia se Atonmen i blong olgeta we i mekem sin. Mi mi no biliv hemia tumas, be, yumi save mo andastanem se Atonmen i blong ol sent tu …
“… Atonmen i givim help long yumi blong go agensem mo ronwe long nogud fasin mo blong mekem mo kam gud. …
“ ‘… Hem i … tru long glad blong Lod we wanwan man … i kasem paoa mo help blong mekem olgeta gud wok we ating bae olgeta i no save mekem. … Gladhat ia i wan paoa we i save givim yumi raet ia …’ [Bible Dictionary, “Grace”; oli ademap italik] o help we i kam long heven long wanwan long yumi we i wantem tumas blong save go tru long selestial kingdom.” 6
Mo wanem we yumi nid blong mekem i blong kasem help ia we i kam long heven, hemia blong askem mo afta wokbaot long ol gudfala toktok we yumi kasem.
Gudfala nius hemi we, sapos yumi sakem sin wetem tru hat, ol sin blong yumi blong bifo bae i no save holemtaet yumi blong yumi kam olsem wan god. Moronae i talem long yumi abaot ol man blong brekem loa long taem blong hem: “Be evri taem we oli bin sakem sin mo bin lukaotem blong kasem fogivnes, wetem tru tingting, oli bin fogivim olgeta.”7
Mo Lod Hemwan i bin talem blong ol man we oli stap mekem sin se:
“Sapos hem i bin talemaot ol sin blong hem long fored blong yufala mo mi, mo i sakem sin wetem tru hat blong hem, hem bae yufala i fogivim, mo bae mi mi fogivim hem tu.”
“Yes, mo evri taem we ol pipol blong mi i sakem sin bae mi fogivim olgeta long ol fasin blong brekem loa blong olgeta agensem mi.”8
Sapos yumi sakem sin wetem tru hat, God bae i rili fogivim yumi, nomata yumi mekem semfala sin evri taem. Olsem we Elda Jefri R. Holan i talem: “Nomata hamas janis we yu ting se yu bin mestem, nomata hamas mistek yu filim se yu bin mekem … Mi testifae se yu no bin wokbaot i go longwe long mak blong tabu lav ia. Hem i no posibol blong yu draon i go daon olgeta long laet ia we i no gat en we i laet blong Atonmen blong Kraes we i stap saen.”9
I no minim nating se sin hemi oraet nomo. Sin, oltaem i gat ol panis blong hem. Sin, oltaem i givim trabol mo mekem man i harem nogud, tugeta, man we i stap mekem sin mo man we sin i spolem hem. Mo fasin blong sakem sin wetem wan tru hat i no isi. 10Antap long hem, plis andastanem se nomata God i tekemaot ol rong mo doti blong ol sin blong yumi taem yumi sakem sin wetem wan tru hat, Hem bambae i no save tekemaot ol panis blong ol sin ia kwiktaem nomo olsem. Samtaem oli stap wetem yumi blong ful laef blong yumi. Mo sin we i moa nogud nao hemi sin ia we wan man i plan blong mekem bifo hem i mekem taem hem i talem olsem se: “Mi save sin naoia mo sakem sin afta.” Mi bilivim se hemia hem i wan fasin blong jikim sakrifaes mo safring blong Jisas Kraes.
Lod Hemwan i talem se: “From mi Lod, mi no save lukluk long sin wetem wan smol pat we mi save akseptem”11
Mo Alma i talem se: “Luk, mi talem long yu, fasin nogud i neva bin mekem ol man i glad.”12
Wan long olgeta risen we toktok ia blong Alma hemi tru hem i taem we yumi gohed blong stap mekem sin, yumi stap tekem yumiwan i go longwe long Spirit, lusum hop blong gohed, mo afta stop blong sakem sin. Be mi ripitim, from Atonmen blong Sevya, yumi save sakem sin mo kasem fogivnes fulwan, long semtaem taem yumi sakem sin wetem wan tru hat.
Wanem we yumi no save mekem i wan eskius nomo be i no blong sakem sin. Be i no save wok nomo taem yumi givim risen long ol sin blong yumi taem yumi se: “God i save se hem i jes had tumas long mi, mekem se Hem bae i akseptem mi nomo olsem we mi stap.” “Rili traem” i minim se yumi gohed long hem kasem we yumi kasem standet blong Lod, mo standet ia i kam klia se yumi ansa ol kwestin blong kasem wan tempol rekomen.
Narafala samting we bae i mekem yumi stap longwe long heven mo seperetem yumi long help ia we yumi nidim naoia, hem i fasin blong go agens. Insaed long buk blong Moses, yumi lanem se God i bin sakemaot Satan long heven folem fasin blong go agens. 13Yumi mekem fasin blong go agens long ol hat blong yumi taem yumi talem se: “Mi no nidim God, mo mi no nid blong sakem sin.”
Olsem wan dokta we i wok long yunit blong ol bigfala sik blong pikinini, mi save se sapos man i no wantem tekem tritmen blong sevem laef, bae i lid i go long ded. Semmak olsem, taem yumi go agensem God, yumi stap talem no long wan help mo hop ia nomo, we i Jisas Kraes, we i lid i go long ded long saed blong spirit long en. I no gat wan long yumi i save mekem hemia long paoa blong hemwan. I no gat wan long yumi bae i save kam “gud evriwan,” be tru nomo long gudfala wok mo gladhat blong Jisas Kraes 14 be from God i respektem fridom blong joes, yumi no save sef sapos yumi no stap traem. Hemia nao hao we gladhat mo wok i wok tugeta blong gat balens. Yumi save gat hop ia long Kraes from Hem i wantem blong helpem mo jenisim yumi. Long ril laef, Hem i stap helpem yu finis. Stop smol taem mo luklukbak mo luksave help blong Hem long laef blong yu.
Mi testifae long yu se sapos yu rili traem mo bae yu no mekem eskius o go agens—sakem sin oltaem mo prea from gladhat, o help, blong Kraes—i tru, bae yu kam “gud evriwan,” Lod bae i akseptem yu; yu bae i go long selestial kingdom we God bae i mekem yu stret gud; mo bae yu kasem olgeta blesing mo glori mo glad we God i wantem blong wanwan long yumi ol dia pikinini blong Hem—yu mo mi i stap insaed. Mi testifae se God i laef mo i wantem yumi blong kam hom, long tabu nem blong Jisas Kraes, amen.