Tru Tingting Insaed long Hat blong Sol
Evri taem blong prea, hem i wan tabu taem we yumi spendem wetem Papa blong yumi, long nem blong Pikinini, tru long paoa blong Tabu Spirit.
Long ol trabol blong laef long wol ia, yumi neva stap yumiwan blong mekem ol wok oli hapen, blong faet agensem ol hadtaem, blong fesem enemi o ol kwestin we i no gat ansa. Jisas Kraes i bin tij wetem wan parabol se man “i mas prea oltaem, we oli no letem tingting blong olgeta i foldaon.” Hem i tokbaot wan jaj we i no gat ona long God mo i no wantem save long man. Evri taem, wan wido i kam long fored blong hem, i plis long hem blong i mas mekem wan samting blong givimbak long enemi blong hem. Blong smol taem, jaj i no lukluk long hem. Be from hem i fetful mo hem i askem oltaem, nao jaj i tingting se, “be from woman ia i stap mekem tumas trabol long mi olsem, mi mas stretem problem blong hem. Sapos no, bae hem i stap kam luk mi gogo hem i mekem mi slak olgeta.”
Nao Jisas i eksplenem:
“?Be olsem wanem long God? ?Yufala i ting se ol man blong hem we hem i jusum olgeta, oli save krae long hem long dei mo long naet, he hem i no save stretem problem blong olgeta?
“Mi talem long yufala, God bae i kwik blong givhan long ol man blong hem …”
Nao Lod i askem kwestin ia: “Be taem mi, Pikinini blong Man, mi kambak long wol ia bakegen, ?bae mi save faenem plante man we oli bilif long mi o nogat?”1
Prea i wan nid blong save developem fet. Taem Lod i kam bakegen, ?bae Hem i save faenem wan pipol we i save olsem wanem blong prea wetem fet, mo i rere blong Hem i sevem olgeta? From “olgeta man we oli singaot long … nem blong [Masta] bambae [hem i] sevem olgeta.”2 Yumi ol pikinini blong wan Papa long Heven we i gat lav, mo yumi save gat gud komunikesen wetem Hem taem yumi sap prea “wetem wan tru hat, wetem tingting we i tru blong wantem save, wetem fet long Kraes,”3 mo afta, mekem folem ol ansa we yumi kasem tru long ol toktok blong Tabu Spirit. Wetem fet, yumi stap prea, yumi stap lisin, mo yumi stap obei blong yumi save lanem blong kam wan wetem Papa mo Pikinini.4
Wan prea blong fet i openem rod blong kasem ol bigfala blesing we heven i sendem i kam. Sevya i tijim:
“Sipos yufala i wantem samting, yufala i mas gohed blong askem, nao bambae yufala i save kasem, mo yufala i mas gohed blong lukaot, nao bambae yufala i save faenem, mo yufala i mas gohed blong kilkilim doa, nao bambae doa i save open long yufala.
“Man we i stap askem samting, oltaem hem i save kasem samting ya. Mo man we i stap lukaotem samting, oltaem hem i save faenem samting ya. Mo man we i stap kilkilim doa, oltaem doa i save open long hem.”5
Sapos yumi wantem se bae yumi mas kasem samting, nao yumi mas askem samting, lukaotem samting, mo kilkilim doa. Taem hem i bin stap lukaotem trutok, Josef Smit i ridim long skripja: “Sapos wan long yufala i no gat waes, hem i mas askem long God blong i givim waes long hem, nao God bambae i save givim long hem, from we fasin blong God, hem i no save tok nogud long man we i askem samting long hem, hem i stap givim ol samting long ol man long gladhat blong hem.”6 Blong ansarem prea blong hem wetem fet, ol heven oli bin open. God, Papa mo Pikinini blong Hem, Jisas Kraes, Tufala i kamdaon long glori mo toktok long Josef Smit, mo statem dispensesen ia blong taem blong evri wok blong God i kamtru. Long yumi, ol merikel hiling, o strong proteksen, tabu save, bigfala fasin blong fogiv we i mekem yumi fri, mo gudfala pis, oli samfala ansa we oli kam long yumi taem yumi stap talem tru tingting we i stap insaed long sol blong yumi7 wetem fet.
Yumi prea long Papa blong yumi, long nem blong Jisas Kraes, tru long paoa blong Tabu Spirit, mo long wei ia, yumi toktok long olgeta trifala memba blong Godhed long prea blong yumi.
Yumi stap prea long Papa long Heven, mo Hem nomo, from se Hem i “God long heven, we i no gat en mo we i no save finis, i stap blong oltaem i go kasem oltaem … , i man we i mekem heven mo wol, mo evri samting we i stap insaed long olgeta.” Olsem Krieta blong yumi, Hem i givim ol komanmen ia se yumi “mas lavem hem mo wok blong hem, wan God ia nomo we i laef mo i tru, mo hem nao bae hem i mas wan man ia nomo we [yumi] mas wosipim.”8
Taem yu stap prea long Papa long Heven wetem fet, “bae hem i leftemap tingting blong yufala long ol hadtaem blong yufala, … mo yufala i save kakae gud long lav blong hem.”9 Presiden Henri B. Aering i bin serem se ol prea blong papa blong hem long taem we hem i stap faet agensem kansa i tijim hem fulap samting long saed blong rilesensip bitwin God mo ol pikinini blong Hem:
“Taem sobodi i kam bigwan, mifala i luk hem long moning, i nildaon long saed blong bed. Hem i slak tumas blong gobak long bed blong hem. Hem i talem se hem i bin stap prea blong askem Papa blong hem long Heven se from wanem hem i mas safa tumas be hem i stap traehad blong kam gud. Hem i talem se kaen ansa ia i bin kam: ‘God i nidim ol boe we oli gat strong tingting.’
“Mekem se hem i stap olsem soldia kasem en, i trastem se God i lavem hem, i lisin long hem, mo bae i leftemap hem. Hem i bin gat blesing blong lanem taem hem i yang, mo blong neva fogetem se God we i gat lav i stap kolosap nomo tru long prea.”10
Yumi stap prea long nem blong Jisas Kraes from Kraes bae i sevem yumi, mo “i no gat wan narafala man nating we i save sevem yumi, from we olbaot long wol ya, God i no givim nem blong wan narafala man nating long yumi, we hem i stap yusum blong sevem yumi.”11 Yumi kam long Papa long tabu nem blong Jisas Kraes12 from se Hem i loya blong yumi long fored blong Papa mo Hem i stap toktok from yumi.13 Hem i bin safa, blad i ron, mo i ded blong givim glori long Papa blong Hem, mo toktok blong Hem we i gat sore from yumi i openem rod blong wanwan long yumi i kasem pis long laef ia, mo long laef we i no gat en long wol we bae i kam. Hem i no wantem yumi blong safa longtaem o stap strong long ol tes bitim we i nid. Hem i wantem se yumi tanem yumi long Hem mo letem Hem i karem ol trabol blong yumi, i hilim hat blong yumi, mo i klinim sol blong yumi tru long paoa blong Hem blong klinim yumi. Yumi no wantem blong talem nogud nem blong Hem long ol toktok we yumi stap ripripitim. Ol tru prea we yumi givim long tabu nem blong Jisas Kraes, oli soemaot lav we yumi givim, tangkyu we i no save finis, mo strong tingting blong yumi blong gohed blong prea semmak olsem Hem i bin prea, blong yumi mekem olsem we Hem i bin mekem, mo blong kam huia Hem i stap naoia.
Yumi prea tru long paoa blong Tabu Spirit from se “Hem we i askem tru long Spirit, i askem folem tingting blong God; taswe, God i mekem olsem we hem i askem.”14 Taem yumi prea wetem fet, Tabu Spirit i save lidim ol tingting blong yumi blong ol toktok blong yumi oli stret long tingting blong God. “No askem, we i blong mekem yufala nomo i harem gud, be askem samting wetem wan strong tingting we i no save muvmuv, blong bae yufala i no foldaon long eni temtesen, be se bae yufala i wok blong God we i tru mo i stap laef.”15
“Hem i impoten blong yumi mas save olsem wanem blong prea, be tu, i impoten blong yumi save hao blong kasem ansa blong prea blong yumi, blong luksave samting, blong tingting i open, blong save luk wetem klia visen, mo blong andastanem wetem klia tingting, wanem God i wantem mo stamba tingting blong Hem abaot yumi.”16
Presiden Aering i bin serem: “Sam prea blong mi i gat ansa. Ol ansa ia oli bin klia gud taem wanem mi wantem i stap mo mi wantem tumas blong save wanem we God i wantem. Long tetaem ia nao ansa blong Papa long Heven we i gat lav i toktok i kam long maen, tru long kwaet smol voes mo mi raetem long hat blong mi.”17
Taem Sevya i go insaed long Garen blong Getsemane, sol blong Hem i hevi long harem nogud from bae Hem i ded. Long trabol taem ia, wan nomo we Hem i save toktok long Hem, i Papa blong Hem. Hem i prea i talem se: “Sapos yu save mekem plis yu tekemaot ol samting ia we oli stap mekem mi harem nogud tumas.” Be Hem i ademap: “Be yu no mekem olsem we mi mi wantem, yu mekem olsem we yu nomo yu wantem.”18 Nomata we Hem i no gat sin, Sevya i kasem wok ia blong “i harem nogud long ol soa blong bodi mo fulap hadtaem, mo temtesen blong evri kaen,” wetem ol sik mo ol rabis samting blong ol pipol blong Hem. “Hem i harem nogud long saed blong bodi blong mit mo bun mekem se hem i save tekem long hem, ol sin blong ol pipol blong hem, blong mekem se hem i save tekemaot ol sin blong olgeta folem paoa blong hem ia we i mekem man i go fri.”19 Tri taem Hem i prea, “Papa yu mekem olsem we yu yu wantem.”20 Hadtaem ia i no kamaot long Hem. Tru long wan fetful prea wetem tingting we i stap daon, God i mekem Hem i kam strong blong gohed mo mekem tabu misin blong Hem i hapen, blong Hem i rere blong sevem yumi, blong yumi save sakem sin, biliv, obei mo kasem ol blesing blong taem we i no save finis.
Ol ansa we yumi kasem long prea, maet oli no wanem yumi wantem. Be long taem blong trabol, prea blong yumi oli kam wan laen blong lav mo kaen sore. Long taem we yumi stap prea, bae yumi kasem paoa blong gohed mo mekem evri samting we Hem i odenem yumi blong mekem. Long olgeta Senta blong hem we oli stap laef long denja taem, Lod i talem: “From hemia, leftemap tingting blong hat blong yufala …; from we evri samting we i laef i stap long han blong mi; stap kwaet mo save se, mi, mi God.”21
Nomata yumi stap prea long praevet, wetem ol famli blong yumi, long jos, insaed long tempol, o wanem ples yumi stap long hem; nomata yumi prea wetem hat fulap long sore mo spirit we i wantem sakem sin mo i wantem fogivnes, o wetem waes blong heven, o wetem paoa blong stap strong, yumi prea oltaem wetem ful hat we i lukluk long God oltaem from gudlaef blong yumi mo gudlaef blong olgeta raon long yumi. Ol tru tingting blong hat, yumi talem wetem spirit blong talem tangkyu from ol plante blesing, mo tangkyu from ol lesen blong laef we oli draon insaed long hat blong yumi, wetem fet we i stap strong long Kraes, wetem “stret mo klin hop,” “mo wan lav blong God mo blong evri man.”22
Prea i wan presen we i kam long God. Yumi neva nid blong filim se yumi lus o stap yumiwan. Mi testifae se evri taem blong prea i wan tabu taem we yumi spendem wetem Papa blong yumi, long nem blong Pikinini, tru long paoa blong Tabu Spirit. Long tabu nem blong Jisas Kraes, amen.