Blong Hem Tu, I Kam Strong
Mi prea se bae yumi girap mo mekem koling blong yumi blong leftemap ol narawan blong oli rere from ol bigfala seves blong olgeta.
Mi filim se mi gat blesing, blong stap long miting ia wetem olgeta we oli kasem prishud blong God. Strong tingting ia, fet, mo seves we i no selfis blong grup ia blong ol man mo ol boe, i wan merikel blong tedei. Mi toktok tedei, long olgeta we oli kasem prishud, ol olfala mo ol yangfala, we oli yunaet wetem ful hat long seves long Masta Jisas Kraes.
Lod i givim paoa blong Hem long olgeta long evri prishud ofis, we oli klin inaf blong wok long ol prishud diuti blong olgeta.
Wilford Woodruff, olsem Presiden blong Jos, i tokbaot eksperiens blong hem long evri ofis blong prishud:
“Mi bin harem fas toktok we mi eva bin harem, insaed long Jos ia nao. Long nekis dei blong hem, mi kasem baptaes. … Oli odenem mi i kam Tija. Misin blong mi i stat stret afta. … Mi go tru ful misin ia olsem wan Tija. … Long konfrens, oli odenem mi i kam Pris. … Afta we oli odenem mi i kam Pris, oli sendem mi long misin long Saot blong kantri. Hemia long taem we ol lif oli foldaon long tri, long yia 1834. Mi bin gat wan kompanion wetem mi, mo long stat, mitufala i no gat mane o klos. Mi bin travel longwan lelebet mo prijim Gospel, mo mi bin baptaesem plante we mi no bin save konfemem insaed long Jos, from se mi mi wan Pris nomo. … Mi bin travel blong wan longfala taem blong prijim Gospel bifo oli bin odenem mi, i kam Elda. …
“[Naoia] Hem i samples fiftifo yia nao we mi memba blong Olgeta Twelef Aposol. Mi bin travel wetem hemia mo ol nara kworom blong siksti yia; mo mi wantem talem long asembli ia se, mi kasem sapot tru long paoa blong God taem mi bin stap long ofis blong wan Tija, mo speseli taem mi bin stap wok long plantesen olsem wan Pris, semmak olsem long taem we mi stap olsem wan Aposol. I no gat samting i defren long wok ia, sapos yumi stap mekem wok blong yumi nomo.” 1
Rod blong i posibol blong gat naes spirit ia i semmak long evri ofis i stap long toktok blong Lod we i tokbaot Aronik Prishud we i “pat” long Melkesedek Prishud.2 Toktok ia, pat, i minim se tufala i joen. I impoten blong tufala prishud ia i joen blong kam paoa mo blesing we hem i save kam, long wol ia mo oltaem, from se “mo i no gat stat blong ol dei, mo i no gat en blong ol yia.”3
Fasin blong tufala i joen i simpol nomo. Aronik Prishud i mekem ol yang man oli rere blong kasem wan paoa we i moa tabu.
“Paoa mo atoriti blong prishud we i moa hae, o Melkesedek Prishud, i blong holem ol ki blong evri blesing blong jos long saed blong spirit—
“Blong gat spesel janis ia blong kasem ol sikret blong kingdom blong heven, blong gat ol heven oli open long olgeta, blong toktok long jeneral asembli mo jos blong Fasbon, mo blong stap glad blong toktok long God mo stap wetem God Papa, mo Jisas, we i man blong toktok from niu kavenan.”4
Olgeta prishud ki ia, i gat wan man nomo i stap yusum olgeta evriwan long sem taem, hem i Presiden mo prisaeding hae pris blong Jos blong Lod. Afta, taem Presiden i givimaot wok, evri man we i holem Melkesedek Prishud, i save kasem atoriti mo spesel janis ia blong toktok mo tekem aksen long nem blong Hem we I Gat Olgeta Paoa. I no gat en long paoa ia. Hem i lukaotem laef mo ded, famli mo Jos, i lukluk long huia God Hemwan mo wok blong Hem we i no save finis.
Lod i stap mekem rere man we i kasem Aronik Prishud finis blong kam wan elda we i givim seves wetem fet, paoa mo fasin blong talem tangkyu wetem Melkesedek Prishud we i gat glori.
Long ol elda, dip fasin blong talem tangkyu i wan samting blong mas gat blong plei blong olgeta long ful prishud seves. Bae yufala i tingbaot taem blong yufala olsem wan dikon, wan tija, o pris olsem wan taem we olgeta we oli kasem hae prishud oli putum han i kambak long yufala, blong leftemap yufala mo pusum yufala long prishud wokbaot blong yufala.
Evri man we i kasem Melkesedek Prishud i gat ol kaen memori olsem, be ating, fasin blong talem tangkyu ia, i go daon wetem ol yia. Hop blong mi i blong laetem faea bakegen long filing ia wetem wan strong tingting blong givim, long yufala evriwan, semfala kaen help ia we yufala i bin kasem long wan taem.
Mi tingbaot wan bisop we i stap mekem mi olsem se mi kasem ful paoa finis blong kam huia mi insaed long prishud paoa. Hem i singaotem mi wan Sandei, taem mi bin wan pris yet. Hem i talem se hem i nidim mi blong stap olsem kompanion blong hem blong visitim sam memba blong wod blong mifala. Hem i talem olsem se mi nomo nao, mi wan hop ia nomo blong mekem ol samting oli kam gud. Hem i no nidim mi. Hem i gat ol gudfala kaonsela long bisoprik blong hem.
Mifala i bin visitim wan wido we i no gat mane mo kaekae. Hem i wantem mi blong helpem hem blong kasem hat blong wido ia, blong givim jalenj long wido blong hem i raetem mo yusum wan bajet, mo promesem wido se bae hem i save girap i kasem wan ples ia we bae hem i save lukaot long hemwan bakegen, be tu, bae hem i save helpem ol narawan.
Afta long hemia, mitufala i go leftemap tingting blong tu smol gel we tufala i gat wan had situesen. Taem mitufala i stap lego tufala, bisop i talem kwaet long mi se: “Tufala pikinini ia bae tufala i neva fogetem se yumitu bin kam.”
Long nekis haos, mi bin luk olsem wanem blong invaetem wan lesaktiv man blong hem i kambak long Lod taem mitufala i talem long hem se ol memba blong wod oli nidim hem.
Bisop ia, hem i wan we i kasem Melkesedek Prishud, mo i stap openem ae blong mi, mo stap pusum mi tru long eksampol blong hem. Hem i bin tijim mi blong gat paoa mo strong paoa long tingting blong go eni ples blong mekem seves blong Lod. Bisop ia, hem i go finis blong kasem praes blong Hem, be mi stap tingbaot hem yet, from se hem i kam daon blong leftemap mi, long wan taem we mi no bin gat eksperiens olsem wan Aronik Prishud. Longtaem afta, mi bin lanem se hem i bin luk mi long wan fiuja prishud rod we i gat moa bigfala responsabiliti, we i minim se i bitim visen we mi gat abaot miwan bakegen.
Papa blong mi i bin mekem sem samting long mi. Hem i gat eksperiens mo hem i bin wan waes man we i kasem Melkesedek Prishud. Long wan taem, wan Aposol i bin askem hem blong hem i raetem wan sot toktok abaot pruf long saens long saed blong yia blong planet ia, wol. Hem i raetem gud, mo i save se sam we bae oli ridim, bae oli gat strong filing se wol ia i yangfala nomo bitim wanem we saens i pruvum.
Mi tingbaot yet we papa blong mi i givim wanem we hem i bin raetem mo talem long mi se: “Hal, yu gat waes tingting blong spirit blong save sapos bae mi sendem hemia i go long ol aposol mo ol profet.” Mi no tingbaot gud se pepa ia i bin talem wanem, be mi no save fogetem long hat blong mi, bigfala tangkyu we mi filim blong wan hae man we i holem Melkesedek Prishud i luk waes tingting long spirit insaed long mi, we miwan mi no save luk.
Wan naet, sam yia afta, afta we oli odenem mi i kam Aposol, profet blong God i ringim mi mo askem mi blong ridim wan samting we oli bin raetem abaot doktrin blong Jos. Hem i bin spendem naet blong ridim ol japta blong wan buk. Hem i laf smol mo talem: “Mi no save ridim evri samting ia. I no stret blong yu stap spel taem we mi mi stap wok.” Mo afta, hem i yusum kolosap ol semfala toktok we papa blong mi i bin talem sam yia bifo: “Hal, yu nao yu mas ridim hemia. Bae yu save sapos i stret blong oli pablisim o nogat.”
Semfala paten ia blong wan we i kasem Melkesedek Prishud i stap openem ae mo givim tras i bin kam long wan naet long wan festivol blong givim toktok, we Jos i sponsarem. Mi gat 17 yia, mo oli askem mi blong toktok long wan bigfala grup. Mi no gat wan tingting nating se oli wantem wanem aot long mi. Oli no givim wan topik long mi, mekem se mi rere long wan toktok we i bitim wanem we mi bin save abaot gospel. Taem mi bin stap toktok, mi luksave se mi mekem wan mistek. Mi save tingbaot yet se, afta we mi finis toktok, mi gat wan filing i go daon insaed long mi, se mi mekem nogud.
Nekis mo las spika, i bin Elda Matthew Cowley blong Kworom blong Olgeta Twelef Aposol. Hem i wan man we i save toktok—we ful Jos i laekem hem. Mi tingbaot se mi stap lukluk hem; mi stap sidaon long jea blong mi long saed blong pulpit.
Hem i stat wetem wan voes we i gat paoa. Hem i talem se toktok blong mi i bin mekem hem i filim se hem i stap long bigfala konfrens. Hem i smael taem hem i stap toktok. Ol nogud filing blong mi ia oli go lus, mo afta, tras i kam, se wan dei, bae mi kam huia hem i ting se mi mi kam finis.
Memori blong naet ia i stil lidim mi blong lisin gud taem wan Aronik Prishud i stap toktok. From samting ia we Elda Cowley i bin mekem blong mi, oltaem mi stap lukluk fored blong mi harem tok blong God. Wanwan taem nomo mi hare nogud, mo plante taem mi stap sapraes, mo mi mas smael olsem Elda Cowley i bin mekem.
I gat plante samting i save help blong mekem ol yang brata oli kam strong moa blong girap long wok blong prishud, be i no gat wan samting we i gat moa paoa bitim blong helpem olgeta blong developem fet mo tras ia se oli save yusum paoa blong God long prishud seves blong olgeta.
Fet mo tras ia bae i no save stap wetem olgeta from wan eksperiens ia nomo we oli bin gat, taem we wan we i kasem Melkesedek Prishud mo i gat talen i bin leftemap olgeta. Paoa blong save yusum ol paoa ia, bae oli mas praktisim tru long plante wei blong soem tras, we i kam long olgeta we oli gat moa eksperiens long prishud.
Olgeta we oli kasem Aronik Prishud, bae oli nidim tu, evri dei mo evri aoa, blong Lod Hemwan i leftemap tingting mo i stretem olgeta tru long Tabu Spirit. Hemia bae i kam long olgeta taem bae oli jusum blong gohed blong stap klin inaf from Tabu Spirit ia. Bae i dipen long ol joes we bae oli mekem.
From hemia nao yumi mas tij wetem eksampol, mo wetem testemoni se ol toktok blong hae Melkesedek Prishud lida, King Benjamin, oli tru.5 Oli ol toktok blong lav we oli talem long nem blong Masta, we prishud ia i blong Hem. King Benjamin i tijim wanem yumi mas mekem blong gohed blong stap klin gud blong kasem ol toktok we i leftemap tingting mo i stretem yumi we oli kam long Lod:
“Mo blong endem, mi no save talem long yufala evri samting we yufala i save mekem sin long hem; from i gat plante defren wei mo plante fasin, hem i plante tumas mekem se mi no save kaontem olgeta.
“Be hemia nomo mi save talem long yufala, se sapos yufala i no lukaotem gud yufalawan, mo ol tingting blong yufala, mo ol toktok blong yufala, mo ol wok blong yufala, mo holem ol komanmen blong God, mo gohed long fet blong wanem we yufala i bin harem long saed blong taem we Lod bae i kam, go kasem en blong laef blong yufala, yufala i mas ded. Mo nao, O man, tingbaot, mo no ded.”6
Yumi evriwan i save gud long ol spia blong enemi blong stret mo gud fasin, we oli stap sakem olsem wan strong win i kam agensem olgeta we oli holem prishud, mo yumi lavem tumas. Long yumi, oli olsem ol strong soldia, we oli bin singaotem olgeta ol boe blong Hileman. Oli save laef long wo, semmak olsem ol yang soldia ia oli bin mekem, sapos oli kipim olgeta oli sef, olsem we King Benjamin i bin askem strong olgeta blong mekem.
Ol boe blong Hileman oli no bin gat tu tingting. Oli bin faet wetem strong tingting mo oli kamaot wina from se oli bin bilivim toktok blong mama blong olgeta.7 Yumi save andastanem paoa blong fet blong wan mama we i gat lav. Ol mama oli givim bigfala sapot long ol boe blong olgeta tedei. Yumi, ol man blong prishud, yumi save mo mas ademap samting long sapot ia wetem strong tingting blong mekem wok ia we Hem i givim se taem yumi stap jenisim laef, bae yumi sakem han i go daon blong mekem ol brata blong yumi oli kam strong moa.8
Prea blong mi i we, evri man we i holem Melkesedek Prishud, bae i akseptem janis we Masta i givim:
“Mo sapos eni man, long medel blong yufala, i strong long Spirit, hem i mas tekem wetem hem, hem ia we i no strong, blong man ia i kam antap wetem fasin blong no stap flas, blong hem tu, i kam strong.
“From hemia, tekem wetem yufala olgeta we oli odenem olgeta long prishud we i moa daon, mo sendem olgeta fastaem blong mekem ol apoenmen, mo blong mekem rere long rod, mo blong oli go long ol apoenmen we yufalawan i no save go long olgeta.
“Luk, hemia nao rod we ol aposol blong mi, long ol dei blong bifo, oli bin bildimap jos blong mi i kam long mi.”9
Yufala, ol prishud lida mo papa blong Aronik Prishud, yufala i save wokem ol merikel. Yufala i save helpem Lod blong fulumap grup blong ol fetful elda wetem ol yang man we oli akseptem singaot blong go prijim gospel, mo mekem hemia wetem tras. Bae yufala i luk se plante we yufala i bin leftemap mo toktok long olgeta oli stap fetful, oli naf blong mared long tempol, mo long en, olgeta bakegen oli leftemap mo mekem rere ol narawan.
Bae i no tekem sam niufala aktiviti program, sam niufala buk blong tij, o moa gud sosol media. Bae i no nidim moa bitim wanem we yu save finis. Promes mo kavenan blong prishud i givim yu paoa, atoriti, mo daereksen. Mi prea se bae yufala i go hom mo stadi gud long promes mo kavenan blong prishud we i stap long Doktrin mo Ol Kavenan, seksen 84.
Yumi evriwan i hop se moa yangfala man bae i gat ol eksperiens blong Wilfod Wudrof, we, olsem wan we i bin holem Aronik Prishud, i bin tijim gospel blong Jisas Kraes wetem paoa blong jenisim laef blong man.
Mi prea se bae yumi girap mo mekem wok blong yumi blong leftemap ol narawan blong mekem olgeta oli rere from seves blong glori blong olgeta. Mi talem tangkyu, wetem ful hat blong mi, long ol pipol ia we oli bin leftemap mi mo oli bin soem long mi olsem wanem blong gat lav mo leftemap ol narawan.
Mi testifae se Presiden Thomas S. Monson i stap holem evri ki blong prishud long wol ia long taem naoia. Mi witnes se, ova long wan laeftaem blong seves, hem i bin wan eksampol long yumi evriwan, blong stap go aot leftemap ol narawan olsem wan we i holem Melkesedek Prishud. Miwan, mi talem tangkyu long wei we hem i bin leftemap mi mo i bin soem long mi olsem wanem blong leftemap ol narawan.
God we i Papa, i stap laef. Jisas, Hem i Kraes. Hemia i Jos mo kingdom blong Hem. Hemia hem i prishud blong Hem. Mi save hemia miwan tru long paoa blong Tabu Spirit. Long nem blong Masta Jisas Kraes, amen.