Doktrin Blong Kraes

Atonmen blong Kraes i krietem ol kondisen we yumi save dipen long hem “ol gudfala wok, mo sore, mo gladhat blong Tabu Mesaea,”⁶ “stap stret gud long Kraes,”⁷ obtain every good thing,⁸ and gain eternal life.⁹ tekem evri samting we i gud, mo kasem laef we i no save finis.

Doktrin blong Kraes nomata wanem, hem i rod ia nao – wan rod ia nomo—we yumi kasem olgeta blesing we i stap finis blong yumi tru long Atonmen blong Kraes. Hem i doktrin blong Kraes we i letem yumi blong save gat paoa long saed blong spirit we bae i leftemap yumi long level blong yumi long saed blong spirit naoia, i go long level we bae yumi kam klin evriwan olsem Sevya.¹⁰ Abaot fasin ia blong bon bakegen, Elda D. Tod Kristofeson, i bin tijim se: “bon bakegen, i no semmak olsem we yumi bon long wan mama, be hem i wan fasin, i no wan taem we i hapen. Mo blong mekem folem fasin ia, hem i stamba tingting blong laef ia long wol ia.”¹¹

Naoia bae yumi tokbaot moa long wanwan long ol pat blong doktrin blong Kraes.

Nambawan, fet long Jisas Kraes mo Atonmen blong Hem. Ol profet oli bin tijim se fet i stat taem yumi harem toktok blong Kraes.¹² Ol toktok blong Kraes oli testifae abaot sakrifaes blong Hem we i pem praes mo i talem long yumi hao blong save kasem fogivnes, ol blesing, mo fasin blong kam olsem wan god.¹³

Afta we yumi harem ol toktok blong Kraes, yumi praktisim fet blong yumi taem yumi jusum blong folem ol tijing mo eksampol blong Sevya. ¹⁴ . Blong mekem hemia, Nifae i tijim yumi blong mas “hang fulwan long ol gud wok blong [Kraes], we i strong blong sevem man.”¹⁵ From Jisas Hem i bin wan God long laef bifo laef long wol ia,¹⁶ from hem i bin laef long wol we Hem i no mekem sin,¹⁷ mo long taem blong Atonmen blong Hem, hem i mitim ol kondisen blong jastis blong yu mo mi,¹⁸ nao Hem i gat paoa ia mo ol ki blong mekem i posibol blong evri man i kasem laef bakegen long ded,¹⁹ mo Hem i mekem i posibol blong sore i gat paoa ova long jastis, wetem kondisen blong man i mas sakem sin.²⁰ Taem yumi andastanem se yumi save kasem sore tru long ol gudfala wok blong Kraes, nao yumi save “gat fet we i mekem yumi sakem sin.”²¹ Blong yumi hang fulwan long ol gud wok blong Kraes, nao i minim se yumi trastem se Hem i mas mekem samting ia blong sevem yumi, mo blong yumi mas tekem aksen folem bilif blong yumi.²²

Fet tu i helpem yumi blong stop blong wari tumas long ol lukluk blong ol nara man long yumi, mo stat blong kea moa long wanem God i wantem blong yumi.

Nambatu, fasin blong sakem sin. Samuel, man blong Leman, i tijim, “sapos yufala i biliv long nem blong hem bae yufala i sakem evri sin blong yufala.”²³ Fasin blong sakem sin i wan gudfala presen we i kam long Papa long Heven tru long sakrifaes blong Wan Pikinini ia Nomo blong Hem we Hem i lavem. Hem i rod ia nao we Papa i bin givim long yumi, blong yumi save jenisim olgeta tingting, ol aksen mo yumiwan, blong mekem se yumi kam moa olsem Sevya. ²⁴ Hemia i no blong ol bigfala sin nomo, be hem wan samting we yumi mekem evri dei blong luklukbak long ol samting we yumi bin mekem long laef blong yumiwan mo jenisim²⁵ blong i helpem yumi winim ol sin blong yumi, rong blong yumi, eria we yumi no strong long hem, mo eria we yumi no kam antap gud long hem.²⁶ Fasin blong sakem sin i mekem se yumi kam ol “tru man blong folem Kraes,” we i fulumap yumi wetem lav ²⁷ mo i karemaot fasin blong fraet.²⁸ Fasin blong sakem sin hem i no wan bakap plan, long tingting se lukaot plan blong yumi blong kam klin evriwan i no wok. ²⁹ Fasin blong sakem sin evri taem hem i wan rod ia nomo we i save tekem i kam glad ia we i no gat en mo helpem yumi blong gobak stap wetem Papa blong yumi long Heven.

Tru long fasin blong sakem sin, yumi kasem fasin ia blong folem mo obei long ol tingting blong God. Be yumi no save mekem hemia nomo. Blong luksave gudfala fasin blong God mo se yumi nating nomo,³⁰ tugeta wetem hadwok blong yumi blong stretem yumi long tingting blong God,³¹ tekem gladhat i kam long laef blong yumi.³² . Gladhat “hem i help o paoa we i kam long heven, tru long lav mo sore blong Jisas Kraes … blong mekem ol gud wok, we sapos i no Hem, bae yumi no save mekem wetem paoa blong yumiwan.”³³ From fasin blong sakem sin hem i mekem yumi kam olsem Sevya, we yumi no save mekem yumiwan nomo olsem, yumi rili nidim gladhat ia blong Sevya, blong mekem ol jenis we yumi mas mekem long laef blong yumi

Taem yumi sakem sin, yumi tekemaot ol fasin blong yumi we i no stret mo gud, ol wiknes, ol rong wei, mo ol fraet blong yumi, mo jenisim wetem ol niu fasin mo bilif we bae oli tekem yumi go kolosap long Sevya mo helpem yumi blong kam olsem Hem.

Nambatri, hem i baptaes mo sakramen Profet Momon i tijim se ol fasfala frut blong fasin blong sakem sin i baptaes.”³⁴Blong yumi komplitim, fasin blong sakem sin i mas go tugeta wetem odinens blong baptaes. Olsem ol memba blong Jos, ol kavenan we yumi stap mekem long taem blong baptaes mo long ol nara samting olsem, yumi stap riniu taem yumi stap kakae sakramen.³⁵

Insaed long odinens blong baptaes mo sakramen, yumi kavenan blong kipim olgeta komanmen blong Papa mo Pikinini, blong oltaem tingbaot Kraes, mo wantem blong tekem nem blong Kraes (o wok blong Hem mo fasin blong Hem) ³⁶ long yumiwan ³⁷ Sevya, long saed blong Hem, i kavenan blong fogiv, o tekemaot ol sin blong yumi ³⁸ mo kapsaetem Spirit blong hem moa fulap long yumi.”³⁹ Kraes i promes blong mekem yumi rere from laef we i no save finis taem Hem i stap helpem yumi blong yumi kam moa olsem Hem.⁴⁰

Dakles D. Holms, Fas Kaonsela long Yang Man Jeneral Presidensi, i bin raetem: “ Odinens blong baptaes mo sakramen tugeta i risal mo proses blong stap bon bakegen. Long baptism, yumi berem olfala man long saed blong bodi ia mo kamaot long wan niu laef.⁴¹ Long sakramen, yumi lanem se jenis ia hem folem ol step, smol smol, wik afta wik, yumi jenis taem yumi sakem sin, mekem promes, mo tru long endaomen long saed blong Spirit yumi [kam olsem Sevya].”⁴²

Ol odinens mo ol kavenan oli wan mas insaed long doktrin blong Kraes. Taem yumi stap klin inaf blong stap kasem ol odinens blong prishud mo stap kipim ol kavenan we oli kam wetem, nao, paoa olsem hemia blong god i wok insaed long laef blong yumi.⁴³ Elda D. Tod Kristofeson i eksplenem se “paoa ia olsem hemia blong god i kam long wan man mo tru long paoa blong Tabu Spirit.”⁴⁴

Nambafo, hem i presen we i Tabu Spirit. Afta long baptaes yumi kasem presen ia we i Tabu Spirit tru long odinens blong konfemesen.⁴⁵ Presen ia, sapos yumi kasem, hem bae givim yumi raet ia blong gat wan God⁴⁶ olsem fren blong yumi oltaem mo bae yumi gohed blong kasem lav ia we i stap raonem Hem oltaem.

Olsem wan fren we i stap wetem yumi oltaem, Tabu Spirit i givim long yumi moa paoa o fulpaoa blong kipim olgeta kavenan blong yumi.⁴⁷ Hem i mekem yumi kam tabu,⁴⁸ we i minim se, hem i mekem yumi “fri long sin, kam klin evriwan, klin, mo tabu, tru long atonmen blong Jisas Kraes.”⁴⁹ Fasin ia blong kam tabu i no blong klinim yumi nomo, be tu hem i kavremap yumi wetem ol tabu presen blong spirit, o ol tabu fasin blong Sevya ⁵⁰mo i jenisim ol fasin blong yumi,⁵¹ mekem se yumi nomo wantem blong mekem nogud fasin.”⁵² Evri taem yumi stap akseptem Tabu Spirit i kam insaed long laef blong yumi tru long fet, long fasin blong sakem sin, long ol seves we i semmak long hemia blong Kraes, mo long ol nara stret mo gud wok, yumi stap jenis kasem taem we, wan step afta nara step, smolsmol i go, yumi kam olsem Kraes.⁵³

Nambafaef, hem i stap strong kasem en. Profet Nifae i tijim se afta we yumi kasem presen we i Tabu Spirit, yumi mas “stap strong kasem en, folem eksampol blong Pikinini blong God we i stap laef.”⁵⁴ Elda Del G. Renlan i tokbaot fasin blong stap strong kasem en olsem: “Yumi save kam klin evriwan taem yumi gogohed blong praktisim fet blong yumi long Kraes, sakem sin, kakae sakramen blong riniu olgeta kavenan mo olgeta blesing blong baptaes, mo kasem Tabu Spirit olsem wan fren we i stap oltaem wetem yu. Taem yumi mekem olsem, yumi kam moa olsem Kraes mo save stap strong kasem en, tugeta wetem evri samting ia.”⁵⁵

Long narafala toktok, taem yumi kasem Tabu Spirit mo ol jenis we Spirit i stap mekem long yumi, hem i bildimap fet blong yumi moa. Taem fet blong yumi i gro, hem i lidim yumi blong sakem sin moa. Taem we, olsem wan saen, yumi sakrifaesem hat blong yumi mo ol sin blong yumi antap long olta blong sakramen, Tabu Spirit i kam long yumi long wan level we i moa hae. Taem yumi kasem Tabu Spirit long wan level we i moa hae, hem i pusum yumi long rod blong bon bakegen. Taem yumi gogohed long rod ia mo kasem evri odinens blong sevem yumi mo ol kavenan blong gospel, yumi kasem “gladhat afta wan nara gladhat” kasem taem we yumi kasem fulwan.⁵⁶

Ol brata mo sista, taem yumi stap wokbaot folem doktrin blong Kraes long laef blong yumi, blesing long saed blong spirit mo long saed blong bodi bae i kam long yumi, iven long ol hadtaem blong yumi. Sloslo bae yumi holemtaet evri gudfala samting.”⁵⁷ Mi testifae se fasin ia i bin hapen mo stap gohed blong hapen long laef blong miwan, klaem lada i go, smolsmol i go.

Be moa impoten nao, yumi mas folem doktrin blong Kraes long laef blong yumi, from hemia nomo i save tekem yumi gobak long Papa blong yumi long Heven. Hem i wei ia nomo we yumi save akseptem Sevya mo kam olsem ol pikinini blong Hem.⁵⁸ Tru tok i we, wan wei ia nomo blong Hem i pemaot yumi long sin mo blong yumi muv i go fored long saed blong spirit, hem i blong praktisim doktrin blong Kraes long laef blong yumi.⁵⁹ Be Aposol Jon i tijim se “Man we i no stap folem ol tijing blong Kraes, God i no stap long laef blong hem.”⁶⁰ Mo Jisas Hemwan i talem long Olgeta Twelef Man blong Nifae, se sapos yumi no praktisim fet blong yumi long Kraes, sakem sin, baptaes, mo stap strong kasem en, bae oli katemdaon yumi tu mo sakem i go long faea, long ples we yumi nomo save aot bakegen.”⁶¹

So, ?olsem wanem nao yumi save praktisim doktrin blong Kraes moa fulwan long laef blong yumi? Wan wei hem i blong yumi mekem hadwok long tingting, blong mekem yumiwan i rere evri wik from sakramen, blong tekem sam taem blong prea from ol eria we yumi nid blong kam antap long hem. Yumi save tekem i kam long olta blong sakramen wan samting we i stap stopem yumi blong kam olsem Jisas Kraes. Yumi askem wetem fet from help, yumi askem ol presen blong spirit we yumi nidim, mo mekem kavenan blong kam antap long wik we i stap kam⁶² Taem yumi mekem olsem, Tabu Spirit bae i kam insaed long laef blong yumi long wan level we i moa hae, mo bae moa paoa i kam long yumi blong winim ol eria we i mekem yumi no klin inaf.

Mi testifae se Jisas Kraes i Sevya blong wol, mo Hem i wan nem ia nomo we i save sevem yumi.⁶³ Evri samting we i gud oli kam tru nomo long Hem.⁶⁴ Be blong rili “holemtaet evri gudfala samting,”⁶⁵ hemia wetem laef we i no save finis, yumi mas gogohed blong praktisim doktrin blong Kraes long laef blong yumi. Long tabu nem blong Jisas Krae, amen.