Stap Serem Gospel we I Kambak
Wanem we yumi singaotem “memba misinari wok” i no wan program, be i wan fasin blong soem lav mo go givhan long olgeta we oli stap raonabaot long yumi.
I.
Kolosap long en blong seves blong Hem long wol ia, Sevya blong yumi, Jisas Kraes, i givim oda long ol disaepol blong Hem: “Yufala i mas go long ol man long olgeta ples long wol, blong pulum olgeta oli kam man blong mi,”(Matiu 28:19) mo “Yufala i mas go long evri ples long wol, yufala i talemaot gud nius blong mi long olgeta man” (Mak 16:15). Evri Kristin man i gat komanmen ia blong serem gospel wetem evriwan. Plante oli singaotem hemia “bigfala wok we God i givim.”
Olsem we Elda Neil L. Andersen i bin talem long sesen long moning, ol Lata-dei Sent oli stap long medel blong ol pipol ia we oli gat moa komitmen long bigfala responsabiliti ia. Yumi mas gat, from se yumi save se God i lavem evriwan long ol pikinini blong Hem, mo long ol las dei ia, Hem i putumbak impoten save mo paoa blong blesem evri pikinini ia. Sevya i tijim yumi blong lavem evri brata mo sista blong yumi, mo yumi givim ona long tijing ia taem yumi serem testemoni blong yumi mo mesej blong gospel we i kambak long evri nesen, famli, lanwis mo pipol (luk long D&C 112:1). Hemia wan impoten pat blong mining blong stap wan Lata-dei Sent. Yumi luk hemia se i wan spesel janis we yumi glad long hem. ?Wanem moa bae yumi glad long hem bitim blong serem ol trutok blong taem we i no save finis wetem ol pikinini blong God?
Tedei, yumi gat plante tul i stap blong serem gospel, we i no bin gat long ol jeneresen bifo. Yumi gat TV, Intanet, mo sosol media janel. Yumi gat plante gudfala mesej blong tokbaot gospel we i kambak. Yumi gat Jos we plante nesen oli save gud. Yumi gat bigfala namba blong ol misinari. ?Be yumi yusum evri tul ia fulwan? Mi biliv se plante bae oli talem no. Yumi wantem blong wok gud moa blong mekem tabu responsabiliti blong talemaot gospel we i kambak long ful wol.
I gat plante gudfala tingting blong serem gospel we bae i wok long wanwan stek o kantri. Be, from se yumi wan Jos we i stap long ful wol, mi wantem tokbaot sam tingting we bae i wok long evri ples, stat long ol niu yunit i go kasem ol strong wan, stat long ol kalja we oli stap akseptem gospel blong Jisas Kraes i go kasem ol kalja mo nesen we oli no laekem relijin. Mi wantem tokbaot sam tingting we yu save serem wetem ol man mo ol woman we oli biliv strong long Jisas Kraes, mo tu wetem olgeta we oli neva harem nem blong Hem, wetem olgeta we oli glad nomo wetem laef blong olgeta naoia be oli wantem kam gud moa.
?Wanem nao mi save talem we bae i save helpem yu blong serem gospel nomata wanem situesen we i stap? Yumi nidim help blong evri memba, mo evri memba i save help, from se i gat plante smol wok blong mekem taem yumi stap serem gospel we i kambak wetem evri kantri, famli, lanwis mo pipol.
Yumi evriwan i save se i impoten blong memba i mas tekpat long misinari wok blong save mekem man i jenisim laef mo i stap long Jos. Presiden Thomas S. Monson i talem: “Naoia i taem blong ol memba mo ol misinari oli kam tugeta … mo oli wok long plantesen blong Lod blong tekem ol sol oli kam long Hem. Hem i bin mekem rere ol rod blong yumi serem gospel long plante defren kaen wei; mo bae Hem i helpem yumi long ol wok sapos yumi wok wetem fet mo mekem wok ia i hapen.”1
Blong serem gospel we i kambak i laef Kristin diuti mo spesel janis blong yumi. Elda Quentin L. Cook i rimaenem yumi: “Misinari wok, i no jes wan long ol 88 ki long wan piano we oli plei long hem wanwan taem; hem i wan stamba ki long wan ful melodi we i pulum sora, we oli nid blong plei long hem oltaem truaot long laef blong yumi sapos yumi stap holemtaet gud komitmen blong yumi long Kristin fasin mo gospel blong Jisas Kraes.”2
II.
I gat trifala samting we evri memba i save mekem blong help blong serem gospel, nomata wanem situesen oli laef mo wok long hem. Yumi evriwan i mas mekem olgeta samting ia.
Faswan, yumi evriwan i save prea blong tingting blong wantem help long impoten pat blong wok blong fasin blong sevem man. Evri hadwok i stat wetem hat we i wantem.
Seken, yumiwan, yumi save obei ol komanmen. Ol memba we oli fetful mo stap obei oli olgeta witnes ia blong trutok we oli save winim tingting blong man, mo oli luk se gospel we i kambak i impoten. Iven moa impoten, i ol fetful memba bae oli gat Spirit blong Sevya oltaem wetem olgeta, blong lidim olgeta taem oli lukaot blong tekpat long bigfala wok blong serem gospel blong Jisas Kraes we i kambak.
Nambatri, yumi save prea blong kasem insperesen long wanem yumi save mekem long situesen blong yumiwan blong serem gospel wetem ol narawan. Hemia i defren blong stap prea from ol misinari, o blong stap prea from ol samting we narawan i save mekem. Yumi mas prea from wanem we yumi, yumi save mekem. Taem yumi prea, yumi mas tingbaot se ol prea from kaen insperesen ia bae oli gat ansa sapos yumi mekem wan komitmen—wan samting we ol skripja oli singaotem se, tingting we i wantem, o wetem ful tingting long hat. Prea wetem wan komitmen blong tekem aksen folem insperesen we yu kasem, mo promesem Lod se sapos bae Hem i givim insperesen blong yu toktok long wan abaot gospel, bae yu go mekem.
Yumi nidim Lod blong i lidim yumi from se, long eni taem, sam oli rere, mo sam oli no rere blong kasem sam moa trutok long saed blong gospel we i kambak. Yumi no mas putum yumiwan olsem ol jaj we i talem se huia i rere mo huia i no rere. Lod i save hat blong evriwan long ol pikinini blong Hem, mo sapos yumi stap prea blong kasem insperesen, bambae Hem i helpem yumi faenem olgeta we Hem i save se oli “stap rere blong harem toktok blong God” (Alma 32:6).
Olsem wan Aposol blong Lod, mi askem strong long evri memba mo famli insaed long Jos blong prea blong Lod i helpem olgeta blong oli faenem ol man mo woman we oli rere blong kasem mesej blong gospel we i kambak blong Jisas Kraes. Elda M. Russell Ballard, i givim impoten advaes ia we bae mi talem: “Trastem Masta. Hem i Gudfala Man blong Lukaot long Sipsip. Hem i save ol sipsip blong Hem. … Sapos yumi no joenem wok, plante we oli sapos blong harem mesej blong Restoresen, bae yumi pasem olgeta i stap. … Ol prinsipol oli simpol nomo—prea, yuwan mo wetem famli, blong gat ol janis blong mekem misinari wok.”3 Taem yumi stap soem fet blong yumi, ol janis ia bae oli kam, mo ansa bae i stret nomo. Bae oli kamkamaot nomo from lav we yumi gat long ol brata mo sista blong yumi.”4
Mi save se hemia i tru. Mi ademap promes blong mi se, wetem fet long help blong Masta, bae Hem i lidim, givim insperesen long yumi, mo bae yumi glad long wok ia blong lav. Bae yumi kam blong andastanem se sakses blong serem gospel, hem i blong invaetem ol pipol wetem lav, mo stret tingting blong wantem helpem olgeta, nomata ansa blong olgeta.
III.
Hemia sam samting we yumi save mekem blong serem gospel long fasin we i wok gud.
-
Yumi nid blong tingbaot se “ol pipol oli lanem samting taem oli rere blong lanem samting, i no taem we yumi rere blong tijim olgeta.”5 Wanem we yumi intres long hem, olsem sam moa impoten doktrin tijing long Jos we i kambak, i no wanem we ol narawan oli gat intres long hem. Ol narawan oli wantem ol risal blong doktrin, be i no doktrin. Taem oli stap lukluk i go, o gotru long ol wok we gospel we i kambak blong Jisas Kraes i stap mekem long laef blong yumi, bae oli filim Spirit mo oli stat blong gat intres long doktrin. Bae oli kam blong gat intres tu taem oli stap lukaotem moa hapines, kam kolosap long God, o andastanem gud moa stamba tingting blong laef.6 From hemia, yumi mas lukaot gud mo prea blong luksave samting, mo olsem wanem blong save intres blong wan narawan. Hemia bae i dipen long plante samting, olsem situesen long wan narawan mo rilesensip blong yumi wetem olgeta. Hemia i wan gudfala topik blong toktok raon long hem long ol kaonsel, kworom, mo Rilif Sosaeti.
-
Taem yumi toktok long ol narawan, yumi nid blong tingbaot se wan invitesen blong lanem moa abaot Jisas Kraes mo gospel blong Hem, i moa gud bitim blong invaetem wan blong lanem moa abaot Jos7 blong yumi. Yumi wantem ol pipol oli jenisim laef i kam long gospel. Hemia nao bigfala rol blong Buk blong Momon. Ol filing abaot Jos oli kam afta we wan i jenisim laef blong hem i kam long Jisas Kraes; i no kam bifo. Plante we oli gat tu tingting long ol jos, be oli lanem moa abaot lav blong mi long Sevya. Putum ol fas samting oli kam faswan.
-
Taem yumi wantem tokbaot gospel we i kambak long ol pipol, yumi mas mekem long wan wei we i tru, wetem ful lav mo wari long man o woman ia. Hemia i hapen taem yumi stap traem blong helpem ol narawan wetem ol problem we oli faenem o taem yumi wok wetem olgeta long ol komuniti seves aktiviti, olsem blong givhan long man we i safa, kea long ol pua man, mo olgeta we oli gat nid, o leftemap kwaliti blong laef blong ol narawan.
-
Ol hadwok blong yumi blong serem gospel, i no mas stop long ol fren mo olgeta we yumi wok wetem olgeta. Long taem blong Olimpik, mifala i lanem se i gat wan LDS taksi draeva long Rio de Janeiro, we i pulum ol kopi blong Buk blong Momon long seven defren lanwis mo i stap givim olgeta long huia i glad blong ridim. Hem i singaotem hemwan: “Misinari Taksi Draeva.” Hem i talem: “Ol smol rod blong Rio de Janeiro oli misin fil blong mi.” 8
Clayton M. Christensen, we i gat fulap eksperiens olsem wan memba misinari, i talem se “ova long ol las twante yia, mifala i luk se i no gat eni samting i joen bitwin rilesensip blong tu pipol mo posibiliti blong wan i intres blong lanem abaot gospel.”9
-
Ol wod bisoprik oli save plan from wan spesel sakramen miting we oli askem ol memba blong tekem samfala pipol we oli intres blong kam. Ol memba blong wod oli no glad tumas blong tekem olgeta pipol we oli save long kaen miting olsem from se oli wantem luk se wanem bae oli tokbaot long miting bae i gat gud plan long hem mo i ripresentem gud Jos.
-
I gat plante janis blong serem gospel. Eksampol, long las sama, mi kasem wan hapi leta blong wan niu memba we i bin lanem abaot gospel we i kambak from se wan skul fren blong hem i ringim hem abaot wan sik we hem i gat. Hem i raetem: “Tingting blong mi i open tru long wei we hem i presentem hem long mi. Afta sam manis blong lanem samting wetem ol misinari, mi kasem baptaes. Laef blong mi i kam gud moa nao.”10 Yumi evriwan i save se plante laef bae oli kam gud moa tru long gospel we i kambak. ?Yumi stap go faenem olgeta?
-
Ol yang memba blong yumi oli laekem mo smat wetem ol sosol media, we i givim olgeta spesel janis blong toktok wetem ol narawan abaot gospel. Taem hem i stap tokbaot taem ia we Sevya i bin kamaot long ol man blong Nifae, Momon i raetem: “Hem i tijim mo givhan long ol pikinini … mo hem i mekem tang blong olgeta, blong oli save toktok” (3 Nifae 26:14). Tedei, bae yumi talem se Hem i mekem fingga blong olgeta i save toktok. !Yufala i gohed, ol yut!
Blong serem gospel i no wan hevi wok, be i wan glad. Wanem we yumi singaotem memba misinari wok i no wan program, be i wan fasin blong gat lav mo faenem man blong helpem olgeta. Hem i wan janis blong testifae olsem wanem yumi filim abaot gospel we i kambak blong Sevya. Olsem we Elda Ballard i tijim: “Wan bigfala pruf we yumi jenisim laef mo hao yumi filim abaot gospel long laef blong yumiwan, i glad blong yumi blong serem gospel ia wetem ol narawan.”11
Mi testifae abaot Jisas Kraes, we i Laet mo i Laef blong Wol (luk long 3 Nifae 11:11). Gospel laet blong Hem we Hem i bin putumbak, oli saenem rod blong yumi long wol ia. Atonmen blong Hem i givim yumi stret save abaot laef afta long ded mo paoa blong gogohed i go from taem we bae yumi nomo save ded. Mo Atonmen blong Hem i givim yumi janis blong kasem fogivnes from ol sin blong yumi mo, anda long bigfala plan blong God long saed blong fasin blong sevem man, blong yumi kwalifae from laef we i no save finis, we i presen we i bigwan moa long evri presen blong God (luk longD&C 14:7). Long nem blong Jisas Kraes, amen.