Rod we I Stret Evriwan we I Go long Hapines

Ol brata mo sista blong mi, we yufala i stap long ples long Konfrens Senta mo raon long wol, mi glad tumas long janis blong serem ol tingting blong mi wetem yufala long moning ia.

Fiftitu yia i pas, long Julae 1964, mi kasem wan wok blong go mekem long Niu Yok Siti long taem we oli holem Wol Eksibisen. Eli, long wan moning, mi visitim Momon Pavilion long eksibisen ia. Mi kasem longwe stret bifo oli soem muvi blong Jos Man i stap lukaotem hapines we i tokbaot plan blong fasin blong sevem man, mo naoia muv ia i popula long Jos. Mi sidaon long saed blong wan yang man we, ating, i gat 35 yia. Mitufala i storian smol. Hem i no memba blong Jos. Nao laet i go daon, mo muvi i stat.

Mifala i lisin long voes blong man we i toktok taem hem i askem bigfala kwestin ia: ?Mi mi kam wea? ?From wanem mi stap long wol ia? ?Bae mi go wea taem mi aot long laef ia? Evri sora oli open gud blong harem ol ansa, mo evri ae oli stap luk skrin we i soem ol pikja. Oli soem laef blong yumi bifo laef long wol ia, mo oli eksplenem from wanem yumi kam long wol. Mifala i luk we oli soem wan olfala bubuman we i aot long laef long wol, mo i glad bakegen blong mitim ol famli blong hem we oli bin go fastaem long hem long spirit wol.

Afta long naes wei ia blong tokbaot plan we Papa long Heven i gat long yumi, olgeta man oli kwaet mo go wanwan, plante, we mesej ia i tajem olgeta. Yang man ia long saed blong mi i no girap. Mi askem sapos hem i laekem sot muvi ia. Hem i glad tumas mo ansa: “!Hemia nao trutok!”

Plan blong Papa blong yumi blong yumi stap hapi mo blong Hem i sevem yumi, ol misinari blong yumi oli stap serem raon long wol. I no evriwan we oli harem tabu mesej ia bae oli akseptem mo tekem long laef blong olgeta. Be, ol man mo ol woman evri ples, semmak olsem yang fren blong mi long Eksibisen long Niu Yok, oli stap luksave trutok ia, mo oli stanap long rod ia we bae i lidim olgeta i gobak sef. Laef blong olgeta i jenis blong oltaem.

Wan we i nid blong stap insaed long plan ia, hem i Sevya blong yumi, Jisas Kraes. Sapos i no gat sakrifaes blong Hem we i pem praes, evri samting bae oli lus. Be, hem i no inaf blong stap biliv nating long Hem mo misin blong Hem. Yumi nid blong wok mo lanem samting, lukaotem mo prea, sakem sin mo kam gud moa. Yumi nidim blong save ol loa blong God mo laef folem olgeta. Yumi nid blong kasem ol odinens blong Hem we i sevem man. Taem yumi mekem olsem nomo, bae yumi kasem tru hapines we i no save finis.

Yumi gat blesing blong gat trutok. Yumi gat wok ia blong serem trutok. Bae yumi laef folem trutok blong yumi save kasem evri samting we Papa i putum i stap blong yumi. Hem i no mekem samting we i no blong gud blong yumi. Hem i talem yumi: “Hemia wok mo glori blong mi—blong mekem man i nomo save ded mo i kasem laef we i no save finis.”¹

Dip insaed long sol blong mi mo wetem evri tingting we i stap daon, mi testifae long bigfala presen ia we i plan we Papa i gat blong yumi. Hem i wan rod ia nomo we i stret evriwan we i lidim yumi long pis mo hapines, long wol ia mo long wol we i stap kam.

Ol brata mo sista, mi livim wetem yufala, lav mo blesing blong mi, mo mi mekem hemia blong klosem miting long nem blong Sevya mo Ridima blong yumi, we i Jisas Kraes. Amen