?Bambae Mifala I Save Go long Hu?
Long en, wanwan long yumi i mas ansarem kwestin blong Sevya: “?Yu tu, yu wantem gowe long mi?”
Sam yia i pas, famli blong mi mo mi i bin visitim Holi Lan. Wan long ol samting we mi tingbaot gud aot long trip ia i wan visit i go long Rum Antap long Jerusalem, we i ples blong Las Sapa.
Taem mifala i bin stanap long ples ia, mi rid long olgeta long buk blong Jon japta 17, ples we Jisas i prea long Papa blong Hem from ol disaepol blong Hem:
“Mi stap prea from olgeta ia …blong oli save stap wan nomo, olsem we yumitufala i wan nomo.
“Mi no prea from olgeta ia nomo, mi prea tu from ol man we bambae oli save bilif long mi from tok blong olgeta.
Blong olgeta evriwan oli save stap wan nomo Papa. Laef blong yu i joen gud long laef blong mi, mo laef blong mi i joen gud long laef blong yu.”1
Ol toktok ia oli tajem mi bigwan taem mi bin ridim olgeta mo mi bin stap prea long tabu ples ia, se bae mi save stap wan wetem famli blong mi, mo wetem Papa blong mi long Heven mo wetem Pikinini blong Hem.
Ol gudfala rilesensip blong mifala wetem ol famli, ol fren, Lod mo Jos blong Hem we i kambak, oli ol samting we oli moa impoten long laef. From ol rilesensip ia oli impoten tumas, yumi mas lukaotgud long olgeta, mas protektem mo fidim gud.
Wan long ol stori we i brekem hat long skripja i hapen blong plante long ol disaepol blong Lod oli faenem i had blong akseptem ol tijing mo doktrin blong Hem, mo plante “oli gowe long hem, oli nomo biaen long hem bakegen.”2
Taem ol disaepol ia oli gowe, Jisas i tanem Hem long Olgeta Twelef mo askem: “?Yufala tu i wantem gowe long mi?3
Pita i ansa:
“Masta. ?Bambae mifala i save go long hu? Yu nomo yu gat ol tok blong laef ia we i no save finis.
“Mo mifala i bilif finis long yu. Mifala i save finis we yu yu Tabu Man blong God.”4
Long tetaem ia, taem ol narawan oli stap lukluk long wanem we oli no save akseptem, Ol Aposol oli jusum blong lukluk nomo long wanem oli stap biliv long hem mo save, mo long en, oli bin stap wetem Kraes.
Afta long hemia, long dei blong Pentekos, Olgeta Twelef oli kasem presen we i Tabu Spirit. Oli kam strong long witnes blong olgeta long Kraes, mo oli stat blong andastanem moa fulwan ol tijing blong Jisas.
Tedei, samting i no defren. Long sam, invitesen blong Kraes blong biliv mo stap, i wan had samting we i stap yet—o i had blong akseptem. Sam disaepol oli traehad blong andastanem wan polisi o wan tijing blong Jos. Ol narawan oli wari long sam samting long histri blong yumi, o long fasin we i no stret gud long sam memba mo lida, blong bifo o blong tedei. Be stil, i gat sam oli faenem i had blong laef folem wan relijin we i askem plante samting. Laswan, sam oli “taed blong mekem gud samting.”5 From ol risen ia mo sam moa, sam memba blong Jos oli lelei long fet blong olgeta, oli stap askem olgetawan sapos oli sapos blong folem olgeta ia we “oli gobak mo nomo biaen” long Jisas.
Sapos eniwan long yufala i stap godaon long fet blong yufala, mi askem semfala kwestin we Pita i bin askem: “?Bambae yufala i go long hu? Sapos yu jusum blong go inaktiv o blong aot long Jos blong Jisas Kraes blong Ol Lata-dei Sent we i kambak, ?bae yufala i go wea,? ?Bae yufala i mekem wanem? Desisen ia blong nomo wokbaot wetem ol memba blong Jos mo ol lida we Lod i jusum, bae i spolem laef long longfala taem, mo man i no save luk naoia. Maet i gat sam doktrin, sam polisi, sam pat blong histri we i putum kwestin long fet blong yu, mo maet yu filim se wan wei nomo blong stretem trabol insaed long yu naoia i blong nomo wokbaot wetem olgeta Sent. Be sapos yu laef longtaem olsem mi, bae yu kam blong save se i gat wan rod blong ol samting oli stretem olgetawan nomo. Wan niu wei blong lukluk, o wan revelesen bae i save givim niu laet long wan poen. Tingbaot. Restoresen i no bin hapen long wan taem nomo, be i stap gohed blong hapen naoia.
Neva lego ol bigfala trutok we oli kamkamaot tru long Profet Josef Smit. Neva stop blong rid, tingting hevi, mo praktisim doktrin blong Kraes we i stap insaed long Buk blong Momon.
Neva mestem blong givim semmak taem long Lod tru long ol ones taem blong traem blong andastanem wanem we Lod i soemaot. Olsem we dia fren mo wok fren blong mi, Elda Neal A. Maxwell i bin talem wan taem, “Yumi no mas ting … se from se yumi no save eksplenem, nao i no gat eksplenesen from.”6
So, bifo yu mekem joes long spirit we i gat denja, blong yu aot, mi leftemap tingting blong yu blong yu stop, yu tingting gud bifo yu gowe long wanem we i bin tekem yu, long fas ples, blong gat wan testemoni abaot Jos we i kambak blong Jisas Kraes. Stop mo tingting gud long wanem yu bin filim long ples ia, mo from wanem yu bin filim. Tingting gud abaot ol taem we Tabu Spirit i bin testifae long yu long saed blong trutok we i no save finis.
?Weaples nao bae yu go long hem blong faenem ol nara man we oli serem semfala bilif ia long wan Papa mo Mama long Heven we Tufala i stap tijim yumi blong gobak long ples we Tufala i stap long hem?
?Bae yu go wea blong oli tijim yu abaot wan Sevya we i bes fren blong yu, we i safa i no from sin blong yu nomo, be from “evri kaen soa, hadtaem mo temtesen” blong “mekem se insaed blong hem i save kam fulap long sore, long saed blong bodi blong mit mo bun, mekem se hem i save, long saed blong bodi blong mit mo bun, olsem wanem blong helpem ol man blong hem long saed blong ol samting blong olgeta we oli no strong long hem”7 mo mi biliv se i tokbaot tu fasin blong lusum fet?
?Bae yu go wea blong lanem moa abaot plan we Papa long Heven i gat blong yumi gat hapines mo pis we i no save finis, wan plan we i fulap wetem ol rod, ol tijing, mo lidasip blong laef blong yumi long wol ia mo blong taem we i no save finis? Tingbaot, plan blong fasin blong sevem man i givim mining, stamba tingting mo daereksen long laef ia.
?Bae yu go wea blong faenem wan oganaesesen strakja blong Jos we i ditel mo kam long insperesen, we tru long hem, yu kasem ol tijing mo sapot blong ol man mo woman we oli gat strong komitmen blong wok blong Lod, mo wok blong yu mo famli blong yu?
?Bae yu go wea blong faenem ol profet mo ol aposol we oli stap laef, we God i singaotem olgeta blong givim yu wan nara ples blong kasem advaes, andastaning, kamfot mo insperesen from ol jalenj blong taem blong yumi?
?Bae yu go wea blong faenem ol pipol we oli laef folem ol valiu mo standet we i stap we yu serem mo wantem pasem i go long ol pikinini mo apupikinini blong yu?
Mo ?bae yu go wea blong gat gotru long glad we i kam tru long ol odinens mo kavenan blong sevem man insaed long tempol?
Ol brata mo sista. Blong akseptem mo stap laef folem gospel blong Kraes i wan jalenj. Oltaem i wan jalenj, bae i stap yet olsem wan jalenj. Laef i olsem ol man blong wokbaot we oli wokbaot i go antap long stip hil folem wan rod we i had. I stret mo nomol blong spel wanwan taem long rod ia, blong pulum win, blong luk se yumi folem stret rod mo luklukbak long spid blong yumi. I no evriwan we i nid blong stop smol long rod ia, be i no gat wan samting i rong sapos yumi mekem sapos situesen blong yumi i mekem se i gat nid from. Hem i save kam wan gud samting blong mekem blong olgeta we oli tekem ful janis ia blong kam niu mo kasem moa paoa wetem wota blong gospel blong Kraes.
Denja i kam taem wan i jusum blong kamaot long rod ia we i go long tri blong laef.8 Samtaem, yumi save lan, mo stadi, mo save, mo samtaem yumi mas biliv, gat tras mo stap hop.
Long en, wanwan long yumi i mas ansarem kwestin blong Sevya: “?Yufala tu i wantem gowe?”9 Yumi evriwan i bin lukaotem ansa blong yumi long kwestin ia. Long sam, ansa i isi; long sam narawan, hem i had. Mi no priten se blong save from wanem fet blong save biliv i kam isi moa long sam bitim ol narawan. Mi jes glad nomo se mi save se ol ansa oli stap ia oltaem, mo sapos yumi lukaotem olgeta—sapos yumi rili lukaotem wetem tru tingting mo wetem stamba tingting tru long wan prea blong hat—bambae yumi faenem ol ansa ia long ol kwestin blong yumi taem yumi gohed blong folem rod blong gospel. Long seves blong mi, mi save sam we oli bin gowe mo oli kambak afta long tes blong fet blong olgeta.
Tru hop blong mi, i we bae yumi invaetem moa pikinini blong God blong faenem mo stap long gospel rod ia, blong mekem se olgeta tu, oli “kakae frut ia, we i gud bitim ol narafala frut.”10
Prea blong hat blong mi i we, bae yumi leftemap tingting, akseptem, andastanem, mo lavem olgeta we oli stap traehad wetem bilif blong olgeta. Yumi no mas lego nating eniwan long ol brata mo sista blong yumi. Yumi evriwan i stap long ol defren ples long rod ia, mo yumi nid blong givhan long wanwan long yumi.
Semmak olsem we yumi sud openem han blong yumi wetem spirit blong welkamem ol niu konvet, yumi tu, yumi mas akseptem mo sapotem olgeta we oli gat kwestin mo oli stap godaon long fet blong olgeta.
Blong yusum wan nara haed toktok, mi prea se eniwan we i tingting blong kamaot long “Olfala Sip Saeon,” we God mo Kraes, Tufala i stap stiarem, bae yumi stop smol, mo tingting gud bifo yumi kamaot.
Plis, save se nomata ol bigfala strong win mo wef oli stap kilkilim olfala sip ia, Sevya i stap antap long sip mo i save stopem hariken ia long tok blong Hem: “!Yu stap kwaet!.” Be kasem taem ia, yumi no mas fraet, mo yumi no mas gat fet we i muvmuv, mo save se iven “win mo wota i stap harem tok blong hem.”11
Ol brata mo sista. Mi promesem yufala long nem blong Lod se bae Hem i neva lego Jos blong Hem, mo bae Hem i neva lego eniwan long yumi. Tingbaot ansa blong Pita long kwestin mo toktok blong Sevya:
“Masta. ?Bambae mifala i save go long hu? Yu nomo yu gat ol tok blong laef ia we i no save finis.”
“Mo mifala i bilif finis long yu. Mifala i save finis we yu yu Tabu Man blong God.”12
Mi testifae se “bae i no gat wan narafala nem we bae oli givim, o wan narafala wei, o fasin we fasin blong sevem man i save kam long ol pikinini blong ol man, tru mo long nem blong Kraes nomo.”13
Mi testifae tu se Jisas Kraes i bin singaotem ol aposol mo ol profet long taem blong yumi, mo i putumbak Jos blong Hem wetem ol tijing mo ol komanmen olsem “wan sef ples long taem blong strong win, mo long taem blong bigfala nogud kros” we bae i kam sapos ol pipol blong wol oli no sakem sin mo oli no gobak long Hem.14
Mi testifae tu se Lod “i askem olgeta evriwan blong kam long hem mo tekempat long gud fasin blong hem; mo hem i no tanem baksaed blong hem long eniwan we i kam long hem, blak mo waet, slef mo fri, man mo woman; … mo evriwan i semmak long God.”15
Jisas i Sevya mo Ridima, mo gospel blong Hem we i kambak bae i lidim yumi sef i gobak long ples blong Papa mo Mama blong yumi long Heven sapos yumi stastap long rod blong gospel mo folem ol wokbaot blong Hem. Long hemia mi testifae long nem blong Jisas Kraes, amen.