Kilang iet Ohlo!
Irail kan me kin raparapahki ahl en kilang Ohlo kin diarada ahl en kowohng peren laud oh doarehla arail mour sang kahpwal en sohla ahniki kopworopwor.
Riei ohl oh lih akan, kempoakepahi kan, I inenen kapingki ahi kak patehng kumwail nan kapokon lap kaselel wet. Ngehi oh Harriet iang kumwail pereperen ni atail utungadahr Elder Gong oh Elder Soares ohpil riatail ohl oh lih kei me malipilipdahr nan kapokon lap wet.
Mehlel I udahn laloidki kempoakepahi Presiden Thomas S. Monson, I poakpoake, utung, oh pahn sewese soukohp oh Presiden, Russell M. Nelson, oh sapwellime sounsawas kan.
I pil kalahnganki oh wauneki e pil pahn pwurehng doadoahk ong riei kempoakepahi kan nan Pwihn en Wahnparon Ehkriemeno.
Me laudsang mepwukat, I inenen kapingki oh pereniki ahi wia tohn Mwomwohdiso en Sises Krais en Souleng en Imwin Rahn-akan, me million en ohl, lih, oh seri kin nanantiong wasa me re mihmi ie—sohte lipilipil dah arail pwukoah—oh nannantiong sang nanarail mohngiong kan pwe irail en papah Koht oh Sapwellime aramas akan, kawada wein Koht.
Rahnwet wia rahn sarawi ehu. E wia rahn sarawi en Ihster, ansou me kitail kin kataman nimenseng kaselel en rahn me Sounkomouro kalewehdi mehla1 oh pwourdahsang nan sousouo.
Rahn me Keieu Wadawad nan Poadoapoad
E kerente Ahi idek nan internet, “Rahn da me keieu wad nan poadoapoad?”
Pasapengko, me kopwuriamwei oh ehu soahng ma ke pahn medewe oh pahn kiong uhk madamadau laud, Ehu rehrail, dene rahn me prehistoric asteroid kawada Yucatan Peninsulahu; de nan 1440, Johannes Gutenberg kanekehla na misihn en doaropwehu; oh pil nan 1903 rahn me pirien en Wright ko kasalehieng sampa me mehlel aramas kak pihr.
Ma ihte peidek wet me pahn wiawihieng uhk, dahme ke pahn nda?
Nan ahi madmadau ahi pasapengo udahn sansal.
Pwe kitail en diar mehnia rahn me keieu kesempwal nan poadoapoad, kitail kak pwurala oh medewe ninsoutiko nan mwetuwel en ketsemeni ansou me Sises Krais kelepwidi oh loulou oh ketkihda pein Ih pwe en kamaiauei kitail dahsang nan dipatail kan. Ansou me e ketin wihwia soangen lokolok en tohnmetei wet ni palinwere oh palingene nta keredihsang nan pwoaren kilin Sises Krais de pil Koht. Pwehki Sapwellime limpoak, E ketkiong kitail mehkoaros pwe kitail en pil ale koaros. Sapwellime tohnmetei sarawio, apwal en wehwehki, ihte ma kitail pahn pehm nan atail mohngiong oh madmadau, pahn katamanehng kitail wen pweipwand laud me kitail wiahieng Krais ong ni Sapwellime kisakis sarawio.
Mwurinte pwohngo, Sises ahpw uh mwohn irail kaun en mwomwohdisoh kan oh kaun en government kan irail ahpw kapailoke Ih, keme, oh mweidala pwe en kamakamala. E langada lokolok ni lohpwuo lao, ansou reirei, “e imwsekla.”2Kahlepe ahpw neknekdier nan sousou. Oh eri, menseng en kesiluh en rahn, Sises Krais, Sapwellimen Koht Ieias, ahpw solahr mih nan sousou ni Ah ketin iasadahr ni lingaling kouwahlap.
Ei, mie soangen kemwekid kei me mie nan poadoapoad me inenen kaselel me pid kesempwal en wehi de aramas akan. Ahpw kapata pene koaros, re sohte kak pahrekiong kesempwal en dahme wiawi ni tepin menseng en rahn sarawi en Ihstero.
Dahme wiahda Sapwellimen Sises Krais tohnmeteio oh iasadao wiahki mwekid keieu kesempwal nan poadoapoad—kehlail sang mahwen kan en sampah, melimel kehlail kan, oh wekdeklahn mour me kin dierek da sang saientis kan?
Pwehki Sises Krais, kitail kak pwurehng mour.
Pasapeng kak dierek ni soahng laud riau, me apwal ong kitail en kak powehdi me emen emen kitail sohsohpai.
Keieu, kitail koaros pahn mehla. Mehnda ma ke pwulopwul, masamwahu, kehlail, de iawen ahmw lelepek, ehu rahn ahmw mour pahn kohsang. Kempoakepahmw oh peneinei kan pahn sengiseng kin uhk. Ahpw re sohte kak kapwureiukodo.
Ahpw, pwehki Sises Krais, ahmw mehla sohte pahn poatopot. Ehu rahn ngenimwen pahn pwurehng patehng palinweremwen. Palin weremwen pahn iasada oh sohte pahn mehla,3oh ke pahn momour poatoapot, solahr medek oh kahpwal en palinwar.4
Met pahn wiawi pwehki Sises Ih me Krais, me tohnmeteikihla Sapwellime mour oh pil pwurehng ale.
E ketin wia met ong irail kan me kamehlele Ih.
E wia met ong irail kan me sohte kamehlele Ih.
E wia met pil ong irail kan me kin kapailoke, kepitki, oh kahukihla Mware.5
Pwehki Sises Krais, kitail kak kousoanla rehn Koht
Keriau, kitail koaros wiadahr dihp. Dipatail kan pahn karehda atail sohte kak mihmi rehn Koht, pwehki “sohte mehkot samin kak pidolong nan wein Koht.”6
Dahme pweida, ohl, lih, oh seri koaros solahr warohng uh mwohn Silahngih—ihme, lao Sises Krais, Sihmpwul sohte dipe, meirongkihla Sapwellime mour pwe en pwainda dipatail kan. Pwehki sohte dipen Sises, E kak pwainla atail pweipwand oh wia kopwung en ngehn koaros me iangahki kowe oh ngehi.
Sises Krais pwainlahr dipatail kan.
Dihp koaros.
Rahn keieu kesempwal nan paodoapoad, Sises Krais ritingadahr wenihmw en mehla oh ketkihsangehr dahme kin perepereh kitail sang en pidolongala wasa sarawi oh pere sarawih kan en mour soutuk. Pwehki atail Kaun oh Sounkomour, kowe oh ngehi alehier kisakis keieu kaselel oh soh pweipwei—mendahte dahme kitail wiadahr, kitail kak koluhla oh idawehn ahl me kolahng wehi lingan celestial glory, me pahn audaudki seri en Sahm Nanleng kan.
Dahme kitail pereperenki
Ih met me kitail kin kawawih Rahnsarawi en Ihster—kitail kin kawawih mour!
Pwehki Sises Krais, kitail pahn iasadahsang mehla oh pwolehdi irail kan me kitail poakpoake nan pehtail, pilen masatail pahn keredi pwehki peren oh direkihla kalahngan. Pwehki Sises Krais, kitail pahn wiahla arams ekei me momour poatoapoat, nan sampah ehu me sohte imwi.
Pwehki Sises Krais, dipatail kan sohte pahn irihrlahte; ahpw kitail pahn ale mahkepe.
Kitail kak mwakelekelada oh lapalapala.
Sarawi.
Pwehki atail Sounkomour limpoako, kitail kak nim sang ni utuhnpihl me kin kihda mour soutuk.7Kitail kak kousoanla nan tehnpas lingan en atail Nahnmwarki me pahn poatoapoatete, ni lingan me kitail sohte kak karasahda oh peren unsek.
Kitail “Kilang Ohlo”?
Mehndahte soahng pwukat koaros, me tohto nan sampah rahn pwukat sohte men tehk de sohte kamehlele kisakis kesempwal me Sises Krais ketkiong kitail. Irail kak rong rongen Sises Krais ese duwen Ih mih nan poadoapoad, ahpw re sohte kilang Ih nin duwen ihs Ih ni mehlel.
Ni ahi kin medewe met, I tamanda Sounkomouro ah uh mwohn kepina en Rohm, Pontius Pilate, awahkei mwohn en Sounkomouro ketin pwoula.
Pilate kasawihier Sises sang ni soangen wiewiah kan en sampah. Mie ahn Pilate doadoahk e pahn wia, oh e wia mehkot apwal riau: soun rik daksis ong mehn Rohm oh wia soun kameleilei. Oh met irail Kaun en mehn Suhs kan wadohng ih ohl emen me dene e wiahda sapwung pali koaros.8
Mwurin ah kapeidakehr, Pilate ahpw pakairki, “I diarada me sohte dipe.”9 Ahpw e men kapwaieng nsenen irail kau me kedipa, eri Pilate ahpw ekerdo lapalap en pali en tiahk irail en mweidada oh kasaledekiala emen aramas ansou en pahsopa. Irail sohte pahn mweidehng en kasaledekiala Sises ahpw mwersuwed oh lipirap Barabbas?10
Ahpw pokono kin wie weriweriki en lapwahda Barabbas oh kalohpwuala Sises
“Pilate idek, “pwehda?” “Dahme suwed [me] e wiahda”
Ahpw ehute arail kalaudehla arail werwer. “Kalohpwuala ih!”11
Pwe en kansenamwahuki pokono, Pilate ruwese nah ohl akan pwe irail en kaloke Sises.12Ih met me re wiahng kohkohlahsang ni Ah olahr oh nta kawelahr. Irail kepitki, oh pwilikidiong elintek pohn tapwi, oh kalikawiekihda likou puhp poh reirei ehu.13
Met me Pilate leme me ihme pahn kansenamwahuiedi pokono iei nta. Pwe irail en kak poakehla ohlo. Pilate nda, “Kilang, I wadohr ohlet mwohmwail,” “oh kumwail en ese me sohte sapwung ehu I diarada reh. … Kilang iet Ohlo!”14
Sapwellimen Koht Iehros ni e wia aramasla uh mwohn aramas en Serusalem kan.
Irail kak kilang Sises, ahpw irail sohte kilang Ih ni mehlel.
Sohte pwoaren masarail mehn kilang.15
Ni soangen mwohmwohte, kitail pil iang luk ong en “kilang ohlo.” Pilipil me pid Ih wekpeseng nan sampah. Soukohp en mahs oko oh met kadehdeh me Ihme Sapwellimen Koht. I pil wia met. E wia mehkot kesempwal emen emen kitail en pein esehla. Eri, ma ke kin medewe mour oh Sapwellimen Sises Krais doadoahk, dahme ke kin kilang?
Irail kan me kin raparapahki ahlo en kilang Ohlo kin diarada ahl en kowohng peren laud oh doarehla arail mour sang kahpwal en sohla ahniki kopworopwor.
Eri, ansou me ke kin toutoukihla kahpwal oh nsensuwed, kilang ohlo.
Ma ke pepehm me ke salongala de kelkelehpw, kilang ohlo.
Ansou me sohla ahmw koapworopwor, kelekelehpw, peikasal, medekila, de luwetala, kilang ohlo.
E pahn apwalihiuk mwahu.
E pahn kamwahuihiukala, oh kiong uhk kahrepen ahmw seiloak. E pahn ketkidiong pohmw Sapwellime Ngehno oh audehkihda ahmw mohngiong peren me sohte pahn uhdi.16
E kin ketkiong “manaman pohn irail me kin lipwongmas akan; oh ong irail kan me sohte kehlail e kin kakehlailih irailda.”17
Ansou me kitail kilang Ohlo ni mehlel, kitail kin esehla Ih oh rapahki pwe en kin kainene atail mour ong Sapwellime. Kitail koluhla oh nantiong en kamwahuiala mwomwatail oh atail karanih Ih en wie lalaudla nan rahn koaros. Kitail koapworopworki Ih. Kitail kasalehiong atail limpoak sang ni atail kin kapwaiada Sapwellime kosonned kan ni atail pahn kolokol atail inou kan.
Oh pil ehu, kitail en wiahla Sapwellime tohnpadahk.
Sapwellime marain kin audehla pali ngenitail. Sapwellime kalahngan kin pwok kitailda. Atail toutou kan kin marahrahda, atail peren kin laudla. Ansou me kitail kin kilang Ohlo ni mehlel, mie inou ehu ong kitail me pahn kiong kitail ineng oh sewesei kitail kahpwal oh kasongsong en seiloak en mourwet. Medewe dahme nekier kitail kak kilangada me mie kairekdi sarawi ehu, kisin mwahi kan kasaledahr me dahme kin wiawihieng uhk ke pahn esehla kahrepe.18
Ansou me ke pahn alehda Sapwellime tohnmeteio, wiahla Sapwellime tohnpadahk, oh mwuri ke ahpw kaimwsekala ahmw seiloak, dahme pahn wiawihong ahmw kahpwal akn me ke powehdi nan mourwet?
Irail pahn sohla.
Dahme pahn wiawihong ahmw nsensuwed kan, irail kan me kin pitihiuk, kahpwal akan me ke kin sohpai?
Sohla.
Lokolok, loalohla, kapwunod, namenek, oh medek, me ke alehier?
Sohla.
Manoknokla.
E pahn wia mehkot kopwuriamwei ma “kitail koasoaiki Krais, pereniki Krais, padahngki Krais, kokohp duwen Krais … pwe neitail serihkan en kak ese mehn sawas dah me re pahn rapahki pwe irail en kak alehki mahkepen diparail kan”?19
E pahn wia mehkot ma kitail nantiong sang nan atail mohngiong unsek en kilang Ohlo ni mehlel?
Riei ohl oh lih akan, I men kadehdehiong kumwail me ih rahn me keieu kesempwal nan poadoapoad iei rahn me Sises Krais, Sapwellimen Koht Iehros ieiaso, kalewehdi mehlao oh dipen Sapwellimen Koht serih kan koaroso. Oh rahn me keieu kesempwal nan ahmw mour oh ahi iei rahn me kitail esehla me kitail pahn “kilang ohlo”; ansou me kilang ihs Ih ni mehlelo; ansou kitail alehda Sapwellime manaman en tomwo sang nan atail mohngiong oh madamdau unsek; ansou me kitail kakapwa peren oh kehlail, kitail inoukihda en idawehn Ih. I koapworopworki me rahno pahn leledo me pahn kopwkopwuripwuriong nan atail mour.
I kiong kumwail ahi kadehdeh oh kapai me ansou me kitail pahn “kilang ohlo,” kitail pahn diarada popohl, oh peren nan mour wet oh mour nan sampah me pahn kohdohu. Ni mwar sarawi en Sises Krais, amen.