Ni soangen Mwohmw Tehiou
Ma kitail pahn men lella wasa sarawi, kitail en miniminpene, oh kitail anahne wia ehu.
Ehu mahn me keiou kaselel iei soangen lipahrourou iou me re kin kadahnki monarch. Ni aht mwemweit nan Mexico nan krismas iou pwe sen patehng en ahi pwoud peneinei, se kohla pwarek wasahn lipahrourou ehu, wasao, lipahrourou monarch rar kei kin koukousoanpene nan ansoun kepou. E inenen kaperen kilang soangen lingan e wia oh mwomwen atail pahn karasahiong kitail duwen miniminpene oh peikiong kosonned sarawi me Sapwellimen Kauno kapikipik kasalehdahr.1
Lipahrourou Monarch me kin koaiok en tetehk wasa re seiloak ie. Re kin doadoahngki ketipin pwe re en diar wasa re anahne pihrla ie. Nan ansoun tuhke masal, re kin pihrkihla mwail kid kei sang Mexico lel Canada, oh ni ansoun tepda kepou, re pwuredi wasa tuhke sarawi iou nanwel en Mexico.2 Re kin wia met nan pahr kaoros, emen emen kin kihpeseng ah kisin mehn pihr ah mwuri emen. Ni arail kin seiloak, re kin mwutumwutpene ninsoutik ka pohn tuhke, pwe re en kin kak doare irail sang lomwlomwur oh mahn keper kan.3
Mwutumwut en lipahrourou kin kadahnki kaleidoscope ni lokaian wai, pilehu wehwe, miniminpene.4E inenen lingan mehlel. Emen lipahrourou nan kaleidoscope kin mie ah lingan oh kin weksang mehteiko, mahn kesempwal oh lingan pwukat iei ehu me Samatail limpoak Nanleng kapikadahr en kak ahneki mour, kak seiloak, kaparapar, oh komourpen mour sang ni arail kin kokohseli sok pohn ehu wahnrohs oh pil mwuri ehu, kamware mehn kamasal wahnrohs. Oh, pwehki ehu lipahrourou ah weksang ehu, re kin doadoahkpene pwe sampah en kak lingan oh wahn.
Duwehte lipahrourou monarch, kitail pil seiseiloak en pwurala atail wasahn kousoan nanleng, wasa kitail pahn patpene rehn samatail oh inatail Nanleng.5 Duwehte lipahrourou, kitail ahneki koaiok sarawi kei me kin kak sewese kitail kaweid kitail nan mour wet, ma kitail pahn men audehda uwen laud en atail kapikipik kan.6 Duwehte irail, ma kitail dehkpene atail monhgiong kan,7 Kauno pahn doareikitailla “rasehng litok men me kin pwoalepene nah kan pahn peh ko”8 oh kamwahuih kitailla me pahn lingan mehlel duwehte kaleidoscope.
Kisin Serepein oh pwutak, peinakapw oh mwahnakapw pwulepwul kan, Riei lih oh ohl akan, kitail koaros ahnekipene seiloak wet. Ma kitail pahn men lella wasa sarawi, kitail en minimin pene, kitail anahne wia ehu. Kauno mahsanihong kitail, “Kumwail wia ehu; ma kumwail sohte pahn wia ehu eri kaidehn nei kumwail.”9
Sises Krais me wia karasaras keiou mwahu duwen ehu ong Seme Nanleng. Ira wia ehu te ni kahrepe tehiou, ni limpoak, oh ni doadoahk kan, ong sapwellime Iehros ah kapwaiada kupwur koaros me Seme ketin kupwurki.10
Ia mwomwen atail pahn kak idawehn Sapwellimen Kauno karasaras kaselel ong Seme oh pil ehu ong Ira koaros oh pil nanpwungatail?
Iren kaweid kaselel iou dierekehr nan Wiewia 1: 14. Kitail wadek, “Irail pwukat me wiahki ehu ni paoden kapakap, iangahki lih ako.”11
I leme me uhdahn e kesempwal ire me nda, “Ni mwohmw tehiou” ni ah kin pwarada nan pwuhken Wiewia, wasa kitail wadek me kosoia ihr me idawehn Sises Krais ni ansowohte, ketier nanleng oh pil iasadahr, oh pil alehdier kapai pwehki arail nannanti. E pil kesempwal, ni atail diarada soangen mwekidohte nanpwungen irail me pwoson nan sapwen Amerika, ni ansou me Kauno ketla oh padahk ong irail. “Ni mwohmw tehiou” me wehwehki wehwepene nanpwungerail, ehupene, oh soang koaros me patepene.
Ehu soang me irail me pwoson kan wia ni arail ehupene wasa riau koaros iei, irail kadehdeki Sises Krais, onopki sapwellimen Kauno mahsen nanpwungarail, oh padahk pene ni duwen limpoak.12
Irail me idawehnla Krais kan wia ehu ni kahrepe tehiou, ni limpoak, ni doadoahk. Irail ese ihs irail, Irail ese dahme irail konehng wia, oh irail wia nin duwen arail poakohng Kauno oh nanpwungarail. Irail iang duwehte lingan en kaleidoscope me mwekmwekid kohwei ni soangen mwohmw tehiou.
Ekei kapai me irail alehdi iei, irail direkihla Ngehn Sarawi, soang koapwuriamwei kei wiawihda nanpwungarail, mwomwohdisohu keirda, sohte uhpene nanpwungerail, oh Kauno kapai irailda ni soang koaros.13
Kitail kak ese me ihme irail nohk ehukipene pwehki sang ni pein arail likih Kauno. Irail karanihla Ih, oh irail wia soun kadehde kei ni duwen Sapwellime doadoahk sarawi, sang soang kopwuriamwei me E ketin malipeier, oh ni Ah iasadahr. Irail kilang oh doahke lipwen ohlahn nan lime kan oh aluweluwe kan, Irail ese ni soh peikasal me e wia Mesaia, oh Soundoar en sampah men. Irail ese me “Ih me pahn kak kamwahuihla, kameleilei, oh kihdo mour soutik.”14
Mendahte atail sohte kak kilangki pein mesetail ka Sounkomouro, kitail kak ese me E ketin Ieias. Ni atail kin karanihala Ih, ni atail rapahki pwe kitail en alehda pein atail kadehdeki Ngehn Sarawi pwehki Sapwellime doadaohk sarawi, kitail pahn kak wehwehkihla mwahu atail pwukoa; Sapwellimen Kauno limpoak pahn mih nan mohngiongitail;15 kitail pahn nantieng pwe kitail en iang kalinganpen atail peneinei, ward kan, oh kousapw kan; oh kitail pahn padahkpene nanpwungetail “ni soangen mwekid kapw oh mwahu douluhl.”16
Soang kopuriamwei kan kin wiawi ni ansou me Sapwellimen Koht serihkan kin doadoahkpene oh ale kaweid sang Ngehno, pwe irail en kak sewesehla irail kan me anahne sawas.
Kitail rongehr soai tohto duwen limpoakpene en nanpwungerail me kerenpene kan ni ansou me apwal kin pwarada. Ni karasepe ni ansou me Houston lel apwal en lapake laud nan pahr teio, aramas manokehla pein arail anahn kan oh kohla sawas. Emen presiden en pwihn en elder kan kadar pek sawas iou ong tohn ah wasahn kousoan ko, oh aramas 77 me waraniki pwoht kaunopada mwadang. Soun sawas ko kohseli wasa ohla kan nan arail wasahn kousoan ko oh pwokada tohn peneinei kaoros wahla ni wasahn kaudok kan, wasa irail koammoldi ie oh ale uwen sawas me irail kak alehdi. Tohn mwomwohdiso oh me sohte pil iang towe kan sawaskipene kahrepe tehiou.
Nan Santiago, Chile, presiden en Pwihn en Sawas en Lih inangihda en pein men sewesehla irail mehn Haiti kei, me sohte wia tohn wehi apw mwekid do nan ah wasahn kousoan-o. Ni ah tuhkieng irail kaun en prihsduhd kan, Ih oh ekei kaun kan pwungkihda me kaskuhl en lokaiahn Spanish pahn wiawiong irail me kohdo ko, en sewese irail en soandieng mwahu nan arail wasahn kousoan kapw ko. Nimenseng en rahn kaunop koaros, misneri kan kin kihpene tohn skuhl ngoang kei. pepehm en ehupene nan ihmwo wia karasaras mwahu kaperene ehu ong irail ni arail wia aramas kei me wekpeseng apw sawasawaspene.
Nan Mexico, tohn mwomwohdiso epwiki seiloangkihla uwen awa kei pwe irail en kak sewese aramas me ahnekihdi kahpwal en rerrer en sampah. Irail pwerkihla dipwisoun doadoahk, mesihn kan, oh limpoak ong mehn mperail ko. Ni ansou me soun sawas pwukat ah kohpene nan ehu wasahn kaudok-o awiawih ruwes, mayor en nan wasahn kousoan o Ixhuatan pilen mas kerkihdi ah kilang “limpoak mehlel en Krais” me sansalongehr.17
Met Kauno kihdo rehtail ansou mwahu en wehwe pene nan sounpwong koaros nan atail prihstud quorum kan oh Relief Society kan, pwe kitail en kak wia soun sawas mwahu me nsenoh mwekmwekid nan atail ward kan oh brans kan—wasa ehu me kitail koaros soangetehiou oh wasa kitail koaros mie anahnepetail.
Atail seiloak koaros wekpeseng, apw kitail alialu nahn ehute ahl. Atail ahl ka, sohte pid dahme kitail wiadahr de wasa kitail lelehr; apw e pid ia wasa kitail kohkohla ie oh dahme kitail songosongen wiahla, ni ehute. Ni atail kin kosokosoipene sang ni kaweidpen Ngehn Sarawio, kitail kak kilang wasa kitail mih ie oh wasa kitail anahne kohla ie. Ngehn Sarawio kiong kitail kilel iou me uhdahn pein mesetail ka sohte kak kilangada, pwehki “kaudial kan mwerpeseng rehtail,”18 oh ni ansou kitail kihpene kaudial wet, kitail kakehr kilangada soang kei.
Ni atail pahn doadoahkpene ni atail ehupene, atail kahrepe kan pahn anahne en rapahki oh wia kupwuren Kauno; atail ngoang pahn anahne en wia limpoak ehu me kitail kin pehmada rehn Kauno oh mehn mpetail kan;19 oh dahme kitail keiou pahn men wia, kitail en ngoangki atail doadaohk,20 pwe kitail en kak kaunopada ahl ong rahn kaperen me atail Sounkomouro pahn ketdo. Ihte kitail pahn kak wia kitail en mwekid ni “soangen mwohmw tehiou.”
Duwehte lipahrourou monarch, kitail ehupene oh doula nan atail seiloak ni kahrepe mwahu, emen emen kitail ahneki pein atail koaiok oh pwukoa, doadoahkpene pwe sampah wet en kak lingan oh mie wahn doadoahk—ehu kahk ni ansou iou oh ni momourki kosonned en Koht.
Atail Kaun Sises Krais inoukiong kitailehr me ni ansou me kitail kin kohkipene ni Mware, E Ketin ieiang kitail.21 I kadehdeki me E ieias oh E ketin iasadahr nimenseng kaselel en ansoun tuhke masal me duwehte rahnwet. Ih me iei Kaun Wasa Lapalahpie koaros, “Nahnmwarki en Nahnmwarki koaros, oh Kaun en kaun koaros.”22
Kitail en wia ehu rehn Samatailo oh Sapwellime Iehroso, ni atail aliale kaweid sang Ngehn Sarawi, I kapakapki ni karakarahk, ni mwaren Sises Krais, amen.