Padahk nan Ihmw—mehkot Kaperen oh Pwukoah Sarawi
I kapakapki ni ngidingid sawas en nanleng ni atail nantiong en wia sounpadahk duwe Sises nan imwetail kan.
Ngehi oh ahi pwoud, Julie nainekier seri wenemen, oh solahr seri mih reht. Ia uwen ahi loaleidki nait serihko nan imwat. I loaleidki ahi kin esehla mehkot sang irail oh padahkih irail.
Rahnwet, I menkosoiong nohno pahpa kan oh koaros me men wiahla nohno pahpa. Tohto kumwail me wie kaikairada seri ansou wet. Ong ekei, ahnsouwih kerendohr. A me saik kan, mwein pahn kapahi en mwuhr. I kapakapki kitail koaros en wewehki uwen kaperen oh iei pwukoah sarawi en padahki seri.1
Nin duwen nohno pahpa, se padahkiong nait serihkan Koht Sahm oh Sapwellime, Sises Krais. Se sowese nait serihko tepin ar kapakap. Se kieng irail kaweid oh utung ahnsou me re pahn wiahda inou2 ahnsouhn pepdais. Se padahkiong irail kosonned akan en Koht. Se padahkih irail duwen Sapwellime koasoandi ong Sapwellime serihkan, oh se sowese irail en kak ese mwenginingen en Nehn Sarawi. Se kin soiahieng irail soukohp en mahs ako oh koangoangehkin irail en kin idawehn soukohp ieias akan. Se kin kapakapki arail kin pweidah kan oh patehng ihr nan arail insensuwed kan. Se kadehdehieng ong nait serihkau duwen kapahi kan en tehnpas sarawi, oh se nantiong kaunop irail mwahu ren papah oh kanekehla arail misin. Se padahkih irail ni limpoak ni arail uhd wiahla nohno pahpa. Ahpw—lel met—se sohte uhdi sang wia arail nohno pahpa.
Rahnwet, I men kitail en tamanda ahnsou kaperen kan rehn neitail serihkan nan imwetail kan.
Padahk en Soutik en Peneinei
Kitail tepki nan ahnsou en soutik en peneinei, ihme keiou kesempwal nan imwat ni ahi tikida. I sohte uhdahn taman padahngko ahnsou en soutik en peneinei, ahpw I tamtaman mesohte pak ehu me se sohte wia nan wihk ehu.3 I ese me e kesempwal rehn ahi nohno pahpa.4
I tamataman ehu me I perenikio kemwekid ensoutik en peneinei. Ipa pahn eker emen kiht pwe en songkin kit “Sosohngo.” E kieng kitireklahn kosoandihkei duwe met, “Keiou, kohla nan wasahn mwongehu kowe ritingada aispokso kowe ritingedi. Kowe tangala nan ahmw perehu ale sdakin sang nan ahmw usuhre. Kowe eri pwuredo, lus pak siluh, kowe inda, ‘Ipa, I wiahier!’”
I pereniki ni eh lelehr ahi ahnsou. I men kapwaiada koasoandi koaros ni pwung, oh I kesempwalki ahnsou me I kak inda, “Ip, I wiahier!” Kemwekid wet koakoahiekiehda oh kamengeieng seri limwekidikiden kak rong mwahu ansou me nohno de pahpa wia padahk en rongamwahu.
Preseden Gordon B. Hinckley padahngki: “Ma ke peikasalki kamwahupen soutik en peneinei, ke anahne song. Kihpene noumw serihkan, padahkih irail, kadehde ong irail, wadek pwuhk sarawipene oh perenpene.”5
Uhdahn pahn kin mie mehkot me pahn kerempwa soutik en peneinei.6 Ahpw, I peki rehmwail en powehdi amwail mehn keremwpwah kan oh wia soutik en peneinei me pahn keiou kesempwal—oh nantiong wia en mehkot kaperen.
Padahk en Kapakap en Peneinei
Kapakap en peneinei pil ehu ahnsou kaselel en padahk.
I pwungki mwomwen semen en Preseden N. Eldon Tanner ah padahkiong nan ahnsoun kapakap en peneinei. Preseden Tanner nda:
“I taman ehu soutiko ahnsou me se kelepwkidi ni ahnsou en kapakap, ahi pahpau patohwan ong Kauno, ‘Eldon wia mehkot me sohte mwahu rahnwet; e insensuwedki, ma komw kak makehng, e sohte pahn pwurehng wia.’
“Pwehki mwo e karehiengie ien deh pwurehng—e inenen mwahusang kamakam.”7
Ni ahi tikitik, ekei pak I kin pwangahki aht kin kalapw kapakap, I kin medemedewe, se sou apwtehn kapakap minit kei samwalahro?” Met, ni ei wialahr pahpa, I ese me kapakap en peneinei ahnsou koaros e sohte itar.8
I kin pwungki mwomwen Sahm Nanleng kin kapehse Sises Krais nin duwen Sapwellime Pwutak.9 I pereniki nda eden emenemen nait serihkan ni ei kapakap ni arail kin rongorong ahi kin patowahn ohngSahm Nanleng ia uwen ahi kin poakpoake irail. Likamwete sohte ehu ansou me mwahusang en kasale limpoak ong neitail serihkan sang ansou en kapakap rehrail de kapahi irailda. Ansou me peneinei kin kapakapene ni karakarahk, re sohte kak manokehla.
Onopadahng Padahk ahnsou koaoros
En nohno pahpa padahk duwehte awiawieng ansou en doadoahk. Kitail kin anahne onopada ansou koaros en kaskuhlih neitail seri kan pwehki kitail sehse ansou dah me pahn mie.
Kitailduwehte Sounkomouro, Sapwellime padahk kan sohte kalapw wiawi nan sinoakoahke ahpw wasa teikan, wasa ke mih ie rahn koaros ni ansou en mwonge rehn nah Wahnpoaronko, ni pwarer, de alialu limwahn tuhkehn pik.”10
Pahr samwalahrko, ahi nohnouehukieng riei pwutak laudo Matt, ah padahk kaselel riau, ehu ni ah limilim kopwe oh ehu ansou nan sdohsa tangahkilahng imwen winihn ngih. Ih ehu me I kin pwungki duwen ahi nohnou mwomwen ah kin onopadahr en padahkih nah serihkan.
Ah padahk en nohno men sohte uhdi. Ni ahi wia pisop men, ahi nohnou, me ansouo sounpar 78, indahngie me I anahne seisei. E ese me I anahne wia karasaras mwahu, oh e sohte suwedki indahngie. I poakpoakei iuk Ino!
Pwehki ngehi pahpa men, I kin pwerisekieng onopoh medemedewe audepen nan pwuhk sarawi pwe ien kak sapeng ansou me nei serihkan de wahn nei serihkan kin peidek.11 “Ekei ansou mwahu en padahk kin tepsang ni kalelepek kei de iren pwunod en emen nan peneinei.”12 Kitail kin rongorong nan ahnsou pwuko?13
I pwungki luhk en Woanpoaron Piter: “Kin onohnop ansou koaros ken kak kihla pasepeng ong aramas koaros [oh I kapatahieng, seri] me pahn idek kahrepen koapworopwor me ke ahniki.”14
Ni ei mwahnakapwo, ngehi oh ahi pahpau kin pereniki siai oh kilang ihs me pahn keiou kehlail. Se pahn kin padik pehn emen uwen kehlail koaros lao pahn masat kin kasalehda medek. E solahr mwomwen kaperen rahnpwukat, ahpw nan ansouo e kaperen. Mwurin aht kin siaio, Ipa kin kilang nan pwoaren meseika oh inda, “samwa, pehm kan kehlail pwa.” I koapworopworki pehmw kan pahn kin kehlail ahnsou koaros en deh doahke serepein pwulopwul men ni me sohte konehng. E kin apw panawihekiengie ien kin mwakmwakelekelte oh sowese mehteikan en pil duwehte.
Elder Douglas L. Callister ehuki met duwen ah pahpau: “Ni aht pwurupwurla nihmwo sang doadoahk ehu rahno ahi pahpau audahte nda, ‘I pwain ahi meirong rahnwet. I intingihdi “kalahngan en kupwuromwi” pohn teko. I inenen kalahnganki Kauno ah kin kapaiada atail peneinei.”
Elder Callister ahpw kapinga en ah pahpau padahngkan. “E padahkiongie wiewiahn peik oh mwomw sansal en loalopwoat.”15
I nda me mwekid mwahu ieu en pein medemedewe ekeipak, “Dahme I pahn padahngki, de dahme I wie padapadahngki, ong nei serihkan sang ni ahi mwokid kan oh wiewiahn peik?”
Padahk Ansou me Peneinei Onopki Pwuhk Sarawi
Onopene pwuhk sarawi nan peneinei iei wasa keiou mwahu en padahk mehlel nan ihmw.
Preseden Russel M. Nelson mahsanih, “Kaidehn pwe nohno pahapa en kehlailahteong mahsen en Kauno, ahpw re ahniki pwukoah sarawi sang Kauno en padahkiong neirail serihkan.”16
Ansou me ngehi oh Julie kakeirada nait serihkan, se kin nantiong wia en kin kaperen. Ehu pahro, se medewehda se pahn wadek Pwuhk en Mormon ni Spanish rehn nait serihkan. Kaidehn ihme karehda Kauno malipe emenemen nait serihka koaros en papahn misin nan wasa me kin lokaiahn Spanish? Es posible.
E inenen sairie ansou me Brother Brian K. Ashton ehukiengie duwen ih oh ah pahpa wadekpene ehu ehu teh en nan Pwuhk en Mormon nan ahnsou en sihnier nan high Skuhl. Brother Ashton pereniki pwuhk sarawi. E intingdier nan ah madmadaw oh nan kapehde. Ah pahpau padokedier weren tuhkehu ni ansou me brother Ashton pwulopwul, oh weren tuhkehu17 keirdahr kehlail nan kadehde en pwung. Brother Ashton pil wiahier rehn nah me laudko.18 A nah me sounpar waluho apwtehn idek reh, “Ipa, iahd ahi ansou en iang uhk wadek Pwuhk en Mormon?”
Karasaras en Padahk
A me keiou kesempwal en padahk en nohno pahpa iei atail karasaras. Kitail alehdier kaweid “en wia karasaras mwahu ong me pwoson kan, ni lokaia, ni koskosoi, ni limpoak, ni pali ngehn, ni pwoson, ni mwakelekel.”19
Nan seilok ieu me se ahpwten wia, ngehi oh Julie iang sarawi oh kilangada mwekid wet. Pwutak pwulopwul men, wia ah kapahrek mwohn mwesel en misin.
E nda, “Kumwail koaros kin medemedewe me ahi pahpa ohl mwahu men nan ihmw sarawi, ahpw …” E nenenla, oh Iapw men esedahr dahme e pahn nda mwuri. E doula oh nda, “ih ohl inenen mwahu nan imwat.”
Mwurin mwo, I kalahngankiong mwanakapw menetduwen ah kapinga ah pahpau. Iapw esehda me ah pahpau pisop en ward o. Mehndahte pisop menet kin papah ah ward ni loalopwoat, nah pwutak medmedewe me doadoahk en ah pahpau me keiou wad kin wiawi nan imwerail.20
Elder D. Todd Christofferson padahngki: “Mie atail ansou tohto en padahkih serih dih kokohdah kan, oh kitail anahne wia uwen atail kak koaros en madmadau oh song en isankiniraila. Mwohn mehkoaros, kitail anahne doulahte en koangoange oh sowese nohno pahpa kan ren mwahula oh ren wia sounpadahk lelepek kei … ni mehlel ni karasaras.”21
Ih mwomwen Sounkomour kin padahk.22
Nan pahr teio, ni aht wie seiseilongki aht mwemweitih nait me tikitik riemen, Julie kosoia se pahn wia pepdais me melahr akan ni temple en St. George oh San Diego. I kaulumki—loalei—medmedewe, “Se kin kohla nan temple aht wasao, a met kitail mwomweit. Kitail sou wia mehkot me konehng ong mwomweit?” Mwurin pepdais ko, Julie men kilel likin temple o. I pil kaulumki loalei. Ke kak medewe dahme wiawi mwuri—se kilel.
Julie mwahuki nait serihkan ren kin tamatamante mwomwen aht kin sowese aht peneinei en mahs akan, oh ngehi pil. Se sohte anahne mwohdpenehn padahk duwen kesempwal en tehnpas sarawi. Se kin momourki—kalahngan en nohno men me kin poakohng tehnpas sarawi oh kin mwahuki nah seri kan en pil wia soangen limpoak o.
Ansou me nohno pahpa kin utung nanpwungera oh kin wia mehn kahlemengih mwahu, serihkan kin alehdi kapahi poatopoat.
Kaimsekla
Ong kumwail me kin nantiong wia uwen amwail kak en padahk nan ihmw, I koapworopworki me ke pahn diar meleilei oh popohl nan ahmw wiewiahkan. Ma ke pehm me ke anahne kamwahuwiala wasa kan nan ahmw mour de anahne kaunopda mwahu, menlau wia ni karakahk nin duwen me Ngehno mwengininginkiong uhk oh nantiong kapwaiada.23
Elder L. Tom Perry mahsanih, “Roson en wehi, oh arail peren, arail pweidahkan, oh arail ohnopek koaros kin pwilsang wasatehkis me iei padahkih serihkan nan ihmw.”24
Ehi, imweio met solahr seri, ahpw I onopdahr oh ngoangki diar ansou mwahu en kaskuhlih nei seri me pwopwoudehr kan oh neirail serihkan, oh pil ehu rahn, ahi koapworopwor, pil neirail serihkan
I kapakapki ni ngidingid sawas en nanleng ni atail nantiong en wia sounpadahk duwe Sises nan imwetail kan. Ni mwaren Sises Krais ahmen.