Manaman kan en Prihsduhd
Kadaialahn prihsduhd sarawi me kumwail kolokol inenen kesempwal ong doadoahk en Kauno nan amwail peneinei kan oh nan amwail malipilip kan en Mwomwohdiso.
Riei ohl akan, kitail rongehr pakair kesempwal ehu sang Presiden Russell M. Nelson. Kitail rongehr kawehwe kesempwal kan sang Elder Christofferson oh Elder Rasband oh sang Presiden Eyring. Dahme pahn pwarada mwuri sang Presiden Nelson, pahn kapatahieng dahme kumwail, sapwellimen Kauno sounkaweid kan oh me kolokol prihsduhd kan, pahn wia met nan amwail pwukoa kan. Pwehn sewese met, I pahn pwurehng kawehwe ekei irehkan me pahsonehda prihsduhd me kumwail kolokol.
I. Prihsduhd
Melkisedek Prihsduhd iei manaman lap en Koht me patodahr pwehn kapwaiahda Sapwellime doadoahk pwehn wahdo mour soutuk ong aramas (tehk Moses 1:30). Nan 1829, e pwekpwekdahngehr pohn Joseph Smith oh Oliver Cowdery sang Wahnparon kan en Sounkomouro Peter, Seims oh Sohn (tehk D&C 27:12). E me sarawi oh manaman sang dahme kitail kak karasahieng.
Kih kanen prihsduhd iei me wia manaman kan me kin kaweid pwukoa en prihsduhd. Ihmekahrehda, ansou me Wahnparon ko patohwenda Melkisedek Prihsduhd pohn Joseph oh Oliver, irail pil patohwenong ira kih kan pwehn kaweid wiepen pwukoahu (tehk D&C 27 12–13). Ahpw kih en prihsduhd kan koaros sohte patohda ansouo. Kih oh kaweid kan koaros me anahne doadoahk ni imwilahn mwehiet (tehk D&C 128;18) kin kohda ehu ire ehu ansou ( iretikitik 21). Kih teikan patohda nan Tehnpas Sarawi en Kirtland sounpar isu mwuri (tehk D&C 110:11–16) Kih pwukat patohda pwehn kaweid pwukoa en prihsduhd kan me kapatapatehng ni ansouo, me rasehng pepdais en me melahr kan.
Prihsduhd en Melkisedek sohte wia mehn kasansal ehu de lengileng ehu. E wia manaman sarawi ehu me patohda ni likilik pwehn kapaiada sapwellimen Koht doadoahk ong Sapwellime aramas. Kitail anahne tamataman ansou koaros me ohl me kolokol prihsduhdkaidehnirail “prihsduhd kei.” E sohte pwung kitail pahn nda “prihsduhdko oh lihoko.” Kitail anahne nda “me kolokol prihsdohdko oh lihoko.”
II. Doadaohk en Papah ehu
Na kitail medewe met dahme Kauno Sises Krais ketin kasik sang kitail kan me kolokol Sapwellime prihsduhd—ia mwoamwen atail kin wahdo aramas Reh.
Presiden Joseph F. Smith padahngki me: “Dene Mwomwohdisou kokoudahr mwahu mehlel. Ahpw ihte me kerempwa dene pwihn kan sohte tehk mwahu pwukoa kan me irail anahne apwali. Ni ansou me pwihn kan pahn tehkada mehlel arail pwukoa, irail pahn loaleniong kapwaiahda arail pwukoa, oh doadoahk en Kauno pahn pwonte kehlaila oh manaman oh katapan nan sampa.”1
Presiden Smith pil kaparki me:
“Pwukoa kesempwal oh wahun kan me Koht ketkihda… nan ohpis kan en Prihsduhd Sarawi, sohte konehng en wia mehn kapwat me duwehte lengileng kan me patohda sang aramas; irail sohte wia mehn kapwat kei, de pil mehn kasansalepen koahiek, ahpw re wia malipilip kei ong pwukoa karakarahk ehu nan sapwellimen Kauno doadoahk me kitail kin papah. …
“… Kitail wie doadoahk pwehn kamaurla aramas, oh kitail anahne wehwehki me iei pwukoa wet me keieu kesempwal ong kitail. Ihmekahrehda, kitail anahne inangih tohnmeteikihla mehkoaros, ma mie anahnepe, pwehki atail poakong Koht, komourlahn aramas oh pweidahn wehin Koht pohn sampa.”2
III. Ohpis kan en Prihsduhd
Nan sapwellimen Kauno Mwomwohdiso, pwukoahn ohpis kan nan Melkisedek Prishduhd wekpeseng. Doctrine and Covenants kin kahdaneki ahi prihs kan presiden me kakaun kan oh sounpapah kan nan stake kan (tehk D&C 124: 134). E kin kahdaneki elder kan soun doadoahk kan nan ahi mwomwohdiso (tehk D&C124: 137)). Met iei ekei padahk kan me pid pwukoa teikan.
Ahi prihs men kin katanga oh apwalih mehkan me pid pali ngehn (tehk D&C 107: 10, 12). Oh ihme Presiden Joseph F Smith padahngki, “Ni en ohl emen ah kasarawihong ahi prihs, ohlo anahne medemedewe me e konehng … pwehn wiahda mehn kahlmengi mwohn me mah oh me pwulopwul kan me warehng, oh koasonehdi ih en wia sounpadahk en me pwung, kaidehnte ni koasoi ahpw sang ni karasaras—pwehn kihong me pwulepwul kan kamwahu pen karasaras en me mah, eri wiahla aramas emen me ahneki manaman nan wasa me e kin koukouson ie.”3
Nan pwukoah kan en elder, Elder Bruce R. McConkie en Pwihn en Ehkriemeno padahngki me: “Elder men wia emen tohn doadoahk en Kauno Sises Krais. … E kepwukoahieng en kin welwelian ah Kauno … ni eh kin wie papah aramas. E wia weliepen Kauno.”4
Elder McConkie kasohwe madmadau me dene e “wiahte emen elder.” Elder koaros nan Mwomwohdiso kolokol manaman en prihsduhd duwehte en Presiden en Mwomwohdiso … ,” e nda. “Dahmen elder? E wia soun silepe men, silepe men me kin apwahpwali pelinsihpw kan en Silepehnsihpw Mwahuo.”5
Nan pwukoa doadoahk kesempwal wet, nan pelin sihpw kan en Silepen sihpw Mwhauo, ohpis kan en ahi prihs oh elder sohte wekpeseng nan Melkisedek Prihsduhd. Nan i re laud 107 en Doctrine and Covenants, Kauno mahsani, Ahi prihs kan nan Melkisedek Prihsduhd ahneki pwung en apwalih kasarawi en pali ngehn kan, oh pil nan ohpis en elder [de pil nan ohpis en Prihsduhd en Aron] nin duwen kaweid sang presidensi (tehk D&C 107:10; pil tehk iretikitik 12).
Kosonned me keieu kesempwal ong me kolokol prihsduhd kan iei kosonned me soukohp Jacob padahngki nan Pwuken Mormon. Mwurin en ih oh rie ohl Joseph ara kasarawihong prihs oh sounpadahk kei ong aramas akan, e patohwen: “Oh se kasapwildahngehr ong Kuano aht ohpis, se pahn pein pwukoahki dipen aramas akan ma se sohte pwerisek padahkihong irail duwen mahsen en Koht” (Jacob 1:19).
Riei ohloko, atail pwukao kan ni atail kolokol prihsduhd inenen kesempwal. Ekei pwihn kan kak itarkihla koasondi en sampa kan me pid wiepen doadoahk oh kepwilwehn kair kan oh wiewia arail pwukoa teikan. Ahpw kitail me kolokol prihsduhd en Koht ahneki manaman sarawi me pil kin kakete apwalih mweimwei en pedelong nan wehin celestial en Koht. Kitail ahneki kahrepe oh pwukoa me Kauno ketin koasonehdi oh kasalehda ni tepdahn pwuken Doctrine and Covenants. Kitail anahne kalohkihong sampa “me aramas koaros kak koasoia ni mwaren Koht, Kauno, de Sounkomour en sampa;
Me aramas koaros kak koasoia ni mwaren Koht, Kauno, de Sounkomour en sampa;
Me pwoson pil kak lalaudla nan sampa;
Me ahi inou poatoapoato pahn kokouda;
Me unseklahn ahi rongamwahuo pahn kalohkda sang rehn me luwet oh mpahi kan lel ni idin sampa (tehk D&C 1:20–23).
Pwehn kapwaiada pwukoa sarawi wet, kitail anahne pwoson “kadaiala” atail malipilip kan en prihsduhd oh pwukoah kan (tehk D&C 84:33). Presiden Harold B. Lee kawehwehda wehwehn kadaiala prihsduhd: “Ni en emen eh ale oh kolokol prihsduhd, e wiahla tonleng men en Kauno. E anahne wiahki ah malipilipo me e wiewia en Kauno doadoahk. Iei duwen atail pahn kadaiala atail prihsduhd.”6
Ihmekahreda, riei ohloko, iaduwen ma Pein Kauno ketin peki rehmwail en sewese emen Sapwellime pwutak kan de serepein kan—me E ketin wiahier rehn Sapwellime ladu kan—kumwail pahn wia met? Oh ma kumwail wia, kumwail pahn wia Sapwellime ladu, “wiewia doadoahk en Kauno,” pwehki Sapwellime inou en sawas?
Presiden Lee pil padahngki pil ehu wiepen kadaiala prihsduhd: “Ni amwail pahn kihdi ehu tipwei kilahs pohn mehkoat e kin kalaudehla mekoato sang ma kumwail pein kilangki mesemwail: met iei ehu tipwei kilahs. Met … ma mie me kadaiala arail prihsduhd—mwo, kadaiala pwehn laudsang dahme irail tepin medewehieng oh uwen kesempwale me aramas kin medewe—iei mwoamwen amwail kin kadaiala amwail prihsduhd.”7
Iet ehu wiepen en emen me kolokol prihsduhd eh kin kadiala pwukoahn ah prihsduhd. I rongada met sang Elder Jeffrey D. Erekson, iengei nan ehu kapokon en stake nan Idaho. Ni eh wia elder pwulepwul me apwtehn pwopwoudda, inenen semwehmwe oh kekehn me e sohte pahn kak kanekehla keimwseklahn ah pahr en sukuhl nan college, Jeffrey koasonehdi en sohla iang sukuhl oh ale doadoahk kaselel ehu. Rahn kei mwuri presiden en pwihn en elder ko kohla ni imweho. Presiden en pwihn en eldero idek reh “Ke wehwehki kesempwal en kih kan en prihsduhd me I kolokol?” Ni en Jeffrey nda me e ese, presiden o ndahieng me sangete ah rongada me e solahr pahn iang sukuhl, Kauno ketin kalokehier nihpwong me e sohte kin meir pwe en ndahieng Jeffrey mepwukat: “Ni ei wia presiden en pwihn en elder ko, I kaweidihiuk ken dehr sohla sukuhl. Mepwukat pwilsang rehn Kauno ong uhk.” Jeffrey eri kanekehla ah sukuhl. Sounpar kei mwuri I tuong ni eh wialahr soun netnet pweida men oh rong ah ndahiong pwihn en ohl ehu me kolokol prihsduhd, “[Kaweid] wo wekidalahr ahi mour.”
Me kolokol prihsduhdo kadaiala ah prihsduhd oh malipilip, oh eri kahrehda “wekdekla laud” nan mour en emen seri en Koht.
IV. Prihsduhd nan Peneinei
Lel met, I kin wie padpadahngki pwukoah kan en prihsduhd nan Mwomwohdisoht. Met I pahn koasoia prihsduhd nan peneinei. I pahn tepkihda kih kan. Koasondi me dene manaman en prihsduhd kin kak doadoahk sangete ni mweimwei me kohsang rehn irail me kolokol kih kan wia ehu poahson en Mwomwohdisoht ahpw manaman en prihsduhd wet sohte kin irairdi nan peneinei.8 Pahpa men me kolokol prihsduhd me kin kakaun ah peneinei sang ni manaman en prihsduhd me e kolokol. E sohte anahne kaweid de mweimwei sang irail me kolokol kih en prihsduhd pwe en kak kaweid tohn ah peneinei, wia mihting en peneinei, kihda kapai en prihsduhd ong ah pwoud de nah seri, de kihda kapai en kakehlail ong tohn ah peneinei de mehteikan.
Ma pahpa kan kadaiala arail prihsduhd nan arail peneinei, e pahn kadaiala doadoahk en Mwomwohdisoht duwehte soahng teikan me irail kin wia. Pahpa kan me kolokol Melkisedek Prihsduhd anahne kapwaiada kosonned akan pwe irail pahn ale manaman en prihsduhd pwehn kapaiahda tohn arail peneinei. Pahpa kan anahne pil kakairada limpoak pene nan peneinei pwe tohn arail peneinei kan pahn kin men peki kapai sang arail pahpa kan. Oh nohno/pahpa kan anahne kangoange kapai en prihsduhd en wiawi nan peneinei.
En pahpa kan pwukoa “pahrekiong” en amwail pwoud kan, nin duwen me kalohk ehu en peneinei padahngki.9 Oh pahpa kan, ni amwail kin diar ansou mwahu pwehn doadoahngki manaman oh katep en amwail prihsduhd kan, wia met sang “ni kangoange, ni kanengamah, ni soisoi oh karakarahk, oh sang ni limpoak mehlel” (D&C 121:41). Doadoahk lap sarawi me pid manaman en prihsduhd me keieu kesempwal nan peneinei. Presiden Harold B. Lee patohwenda inou wet mwurinte eh wiahla Presiden en Mwomwohdisoht. “Sohte ansou ieu me manaman en prihsduhd me kumwail kolokol kin katapan duwehte ansou me kahpwal kin miehda nan peneinei, soumwahu doar, de mwekid kesempwal ehu me anahne en koasonsondi. Me patohier nan manaman en prihsduhd, iei manaman en Mwohnsapwo Koht, iei manaman me kin patohwenda manaman kan ma Kauno ketin kupwurki, ahpw pwe kitail en kak doadoahngki prihsduhd wet, kitail anahne warehng doadoahngki. Ma kitail sohte kak wehwehki koasondi wet kitail sohte kak ale kapai kan en prihsduhd kouwahlap wet.”10
Riei ohl akan, kadaialahn prihsduhd sarawi me kumwail kolokol inenen kesempwal ong doadoahk en Kauno nan amwail peneinei kan oh nan amwail malipilip en Mwomwohdiso.
I kadehde me Ih me ketin sapwellimaniki prihsdund wet. Pwehki Sapwellime lokolok en tomwo oh tohnmetei oh iasada, ohl oh lih koaros sohsokiher mour poatopoat oh ansou mwahu en ale mour soutuk. Emenemen kitail anahne pwoson oh nantieng wia atail pwukoa nan doadoahk lap en Koht, Samatail Soutuk, ni mwaren Sises Krais, amen.