Alehda Ngehn Sarawi en wia ahmw Soun kaweid
Soangen kisakis kaselel wet kin kohieng irail kan me kin pwoson Sises Krais.Kisakiso iei Ngehn Sarawi.
Rahn Sarawi en Ihster wet, kitail kin tamanda Iasadahn Kauno Sises Krais oh sousou tehn me kahrehieng me pwoson kan ar koapworopwor rehn Krais pwehki ah powehdi mehla. I pil iang kamehlele duwehte Wahnpoaron Pohl, ninduwen Koht ketin “kaiasada Krais sang mehla ih pil mwomwen [Eh] pahn kamourkihda [paliweratail] Ngehno me kin ketiket [loaletail].”1
Komourkihda wewehki karehieng mour. Pwehki Krais kahrehieng paliweratail pwuralangehr mour mwurin mehlahn paliwar sang ni manaman en Sapwellime iasadahu, pwe en pil kamourkitailla, de en karehiong kitail en kak mourla sang mehlahn palingehn.2 Nan pwuhken Moses, kitail wadek duwen Adam lelohng nan kamourla wet: “Adam pepdaisla, oh Ngehn Sarawi en Koht ti powe, oh e apw ipwkihdi Ngehn Sarawi, oh ahpw komourda palingehn.”3
Soangen kisakis kaselel wet kin kohieng irail kan me kin pwoson Sises Krais. Kisakis wet iei Ngehn Sarawi me kitail alehdiero me Kadehde Kapw kahdanki “mour rehn Krais.”4 Dahme karehda ekeipak kitail kin sou kalahnganki soangen kisakis duwe met?
Rieiko, e inenen kapahi laud en “ahniki … Ngehn Sarawi en kaweidih kitail,”5 ninduwen soi me I pahn kasaledaht:
Nan ahnsou en mahwen en Koreahu, Ensign Frank Blair kin doadoahk en sounpei pohn sohp nan Sapahn.6 Pwehki sohpo e nohn tikitik en mie pein arail soun kaudok men, eri kapdino pekihda rehn brother Blair en welian iraildi wia emen soun kaudok, ni ah kasawiada me mwahnakapw menet aramas pwoson oh poadedi men, tohn sohpo pwon kin wauneki.
En Ensign nting dene: “Warat sohpo lelohng nan lapalahn melimel. Ilok kan ileilehki piht 45 [paisek limahu]. Ngehi me doadoahk en silasil pwohngo … ahnsou me ehu nait misihn siluhko mehla oh mie me pakairki me ehu paip ko pwal. Nait misihn riau luhwe, a ehu misihnko wie luhluwetla. Se miher nan lapalahn kahpwal.”
Ensgin Blair nekier ah ansoun silasil oh onopadahngehr pahn meir ah kapiden pa letelet ni ah wenihmwo. E peki, Ke ka menlau kapakap ki sohpet? Ei maing, Ensign Blair sapengala.
Nan ahnsouo, e kakete indahla kapakap mengei, Maing Sahm Nanleng, menlau kupwure warat sohp oh silei kiht sen deh lelohng kahpwal,” eri wendi meir. Ahpw, e kapakapki en ese ma mie mehkot me e kak sawaski pwe sohpo en deh ohla. Pasepeng en ah kapakapo, Ngehn Sarawi kamwekidada en kohla oh, kosoi ong kapdino oh esehda dahme wiawi. E diaradame kapdino songosong en diaradaia uwen ar pahn katangahki sohpo luhwen misihnko. Ensign Blair pwurala nan ah perehu pwehn pwurehng kapakapki.
E peki, “Dahme I kak wia pwehnkamwahuwiala kahpwal en misihnko?”
Pasepengo, Ngehn Sarawi mwenginingin me e anahne pidekseli pwehn kak dawih sohpo en kak diar dahme sapwung. Ih eri pwurala rehn kapdino oh peki ma e kak aluseli liki pohn sohpo. Eri, e pirehdiong ni lukepe sahl pwehn deh pihrieisang pohn sohpo, e ahpw kohieila nan melimelo.
Ni eh keskesihnen mwurin sohpo, e kilangada lapalahn pirepira ko ahnsou me e kin kohda sang nan sehdo ahnsou me sohpo kin pwopw pohn kumwukumw en ilok ko. Apwoat te me wie doadoahk, oh e kin piripir wuk. Mwurin ah diarada met, Esign Blair pil pwurehng kapakap. Pasepeng sansal me e alehdi me misihn mwahu me luwehdio e nohn doadoahk laud oh e anahne wawaila. Eri e pwurala rehn kapdino oh ndahiong me ihme anahne wiawi. Kapdino eri pwuriamweiki, nda me kaweid en soun misihno inda re pahn katanga en wuk, me ren kalaudehieng misihn luhwehu en wuk pwe ren kak tangasang melimelo. Ahpw, kapdino pilada kaweid en Ensign Blair, oh kawawaidi misihno. Nin sohrahnpeseng, sohpo pitila peipeier pohn sehd mwele.
Mwurinte awa riau, misihn mwahuo ahpw uhdi sohla doadoahk. Elep en angin misihn me luhwehdi, sohpo ahpw lelkihla ni wapo.
Kapdino ahpw ndahng Ensign Blair, “Ma kitail sohte kawawaidi misihno, misihno pahn ohla nan werengen melimelo.”
Ma sohte misihno, uhdahn re sohte pahn kak en katanga. Sohpo pahn kaketesepehlda oh duhla. Kapdino kalahngankiong ohpiser pwulopwul en Mwomwodiso wet oh nda me e kamehlele me ah idawehn en Ensign Blair kamwakid en Ngehn Sarawi kapitala sohpo oh towe kan.
Eri soai pwoatet kapwuriamwei. Mwein soang keper wet sohte pahn lelohng kitail, soai pwoatet kasalehda uwen kesempwal en koasoandihkan duwen mwomwen alehdi kaweid en Ngehn Sarawi ahnsou koaros.
Keiou, duwen alehdi kaudiahl, kitail anahne momourki soangen mour me pahn warohng en alehdi kamarain sang Ngehn Sarawi.Ensign Blair kin momourki mour mwakelekel oh kin loalopwoat. Ma kaidehn ih aramas peik men, e sohte pahn kak ahneki soangen koapworopworo en palingehn ni ah kapakapki sohpo oh alehdi soangen kaweid oaretik ko. Emenemen kitail anahne en kin wia uwen atail kak en kainene atail mour ong Sapwellimen Koht kosonned akan pwe kitail en kak ale kaweid sang Ih.
Ekeipak kitail sohte kak rongada ngihl sang nanleng pwehki atail sohte warohng. Koluhla oh peik iei ahl en warohng en kak pwurehng alehdi kaweid sansal sang Ngehno. Nan Kadehde Mering, lepin lokaia koluhla wewehki “en pwurala” de “sohpeila.”7 Ni ahnsou me ke kehn dohsang Koht, ihte me ke anahne wia, koluhla sang dihp, ni ahmw pahn koluhla oh sohpeilahng Sounkomouro, wasa ke pahn diar Ih awiawih iuk, wie kapkapahweihte. E kin ngoahngki sowesei iuk, oh ke anahnehte kapakap pwe ken kak pwurehng alehdi Sapwellime kaweid.8
Keriau, Ensign Blair sohte pekihte rehn Kauno en apwalih ah kahpwalo. E peki dahme en kak wia pwe en kamwahuwiala.Kitail anahne pil peki, “Maing, dahme I anahne wia pwe ien kak kamwahuwiala?” Kitail sohte pahn kin kihdahte atail kahpwal kantenan kapakapoh peki rehn Kauno en apwaliala ahpw kitail anahne nsenohki raprapahkien alehdi Sapwellimen Kauno sawas oh mwekid ki kaweid en Ngehno.
Kesiluh, mie padahk kesemwpwal nan soai en Ensign Blair. E kak wia soangen kapakap koapworopwor wet ma e sohte wiahier mwowehu oh alehdier kaweid sang Ngehno? Kaidehn ahnsou en melimel me ke pahn tamanda kisakis en Ngehn Sarawio oh medmedewe ia mwomwen eh pahn sowese iuk. E sansal me ohlpwulopwul menet idihdawehn koasoandi me e esehier mwowehu, iangahkieng ni ah kanekelahr ah doadoahk en misineri. Kitail anahne Ngehn Sarawio en ieiang kitail ahnsouhn soanoamwahu, pwe kapitie en sansal mwahu nan ahnsou en kahpwal laud akan.
Ekei kin medmedewe me e sohte mwahu kitail en kasik kaweid sang Ngehno rahn koaros pwehki “e sohte konehng Koht en kaweid ni mehkoaros,” pwe kitail de soakoahiekla.9 Ahpw, iren nan pwuhk sarawi wet, e kohieng misineri en mahs ko me peki rehn Joseph Smith en alehdi kaudiahl me konehngete ren pein peki. Nan ire tikitiko Kauno mahsanihong irail, ren kohdo ni wasahn doadoahk en misineri, oh ren “lamalampene oh ale kaweid sang rehi”10
Misineri pwukat mwahuki kaudiahl me pahn kasalehiong irail uhdahn wasa re pahn kohla ie. Re saik esehla alehdi pein ar kaweid . Kauno kahdanki mwekid wet iei me: soukautih. Mwein tohn mwomwohdiso mahso kin perenikihda me mie neirail soukohp mehlel ahpw e keper ohng irail pwe re sehse mwomwen ar pahn pein alehdi arail kaudiahl. Kahrepen atail pahn koakoahiekih pein kitail ni pali ngehn, pwe kitail en kak rong kapitien Kauno sang ni Ngehn Sarawi nan pein atail mour.
Alma panawih nah pwutangko en “ale kaweid sang Kauno ni ahmw wiewiahkan koaros.”11 Ni ahmw pahn wia met—me kitail kin kahdanki “momourki Ngehno”—iei lapalahn kalahngan ieu. E kin kameleilei oh wehwe mwahu iangahkieng wahn Ngehno, iei limpoak, popohl, oh meleilei.12
En Ensign Blair ah kak alehdakaudiahl kapitala ih oh iengehko sang melimel kepero. Mie ekei melimel kehlail nan rahn pwukat. Karasaras en Tuhke en mour13 nan Pwuhk en Mormon kasalehda kilel me sair kitail en ia mwomwen atail pahn poadoandoarla ni pali ngehn nan Sampah keper wet. Ouraman wet kosoia duwen mosul en ediniei rotorot pwepwengkda pwehn kawehla pali ngehn en tohn Mwomwodiso me weweid nan ahl en pwurala rehn Koht.14
Ni ehi wie medemewe kilelo, I medewehla kidelap en aramas kekeid pohn ahlo, ekei kolokol teng metehu, ahpw tohto me alialu pwakpwakihte nehn me alu mwohrail. Mwekid en pwihn me kin pwakpwakih wet me mengei. Ke kak alemengih mehteikan dahme re wia de medmedewe. Met doadoahk ohngete ahnsou en ketipin me sohte nohn kahpwal. Ahpw melimel en widing oh ediniei en likamw kin kohda ni sohte kasikpe. Nan soangen irair pwukat, ahmw ahnlahr ngilen Ngehn Sarawi inenen kesempwal ong roson en pali ngehn.
En Nihpai inou manaman wet “mehmen me pahn rong mahsen en Koht, oh … koledi teng … sohte pahn mwomwla; pil songosong kan oh ketiou kisiniei sang rehn me suwedo sohte kak karotengeirailla, en kaloweirailahng kamwomwla.”15
Ideidawehn lipwen nehn me alialu mwohmw nan ahlo sohte itar. Kitail sohte kak wiahte oh medmedewe dahme wiewiahn ekei; emenemen kitail anahne en kin mourki kaweid en Ngehno. Kitail anahne pein koledi metehu. Eri kitail ahpw pahn sohpeikihlahng Kauno mohngiong karakarahk, ese me E pahn ketin kahluwahkin kitail nin lime, oh ketkiong kitail pasepeng en atail kapakap kan.16 Ni mwaren Sises Krais, ahmen.