Papahki Manaman oh Mweimwei en Koht

Riei ohl ako, kalahngan en amwail loaloapwoatohng Kauno oh Sapwellime doahk sarawi. I inenen pereniki ahi patehng kumwail. Ni aht wialahr Presidensi Keiou kapw, se men kapingkihiong kumwail pwehki amwail kapakap kan oh amwail utuht. Se kapingki mwomwen amwail mour oh amwail papah Kauno. Amwail kin loaloapwoat ong amwail pwukoah kan oh amwail papah ni poadidi pil kesempwal nan amwail malipilip kan pil duwei kiht nan aht malipilip kan. Erein ahi papah nan mwomwohdiso wet, I esehla me e sohte lipilipil pwukoah da me aramas papahki. Dahme Kauno keiou kesempwaliki ia mwomwen emen eh kin papah.

I inenen kapingki Preseden Thomas S. Monson, me wiahiong ie mehn kahlmengih erein sounpar 50 samwa. Oh pil ah tungoal soun sawas akan, Preseden Henry B. Eyring oh Preseden Dieter F. Uchtdorf, uhdahn I kin waunekin ira. I kapingki ara papah Kauno oh Sapwellime soukohp. Ohl poadidi pwukat alehdier arail tungoal pwukoah kapw. Re wie doudoulahte papah ni pwersek oh ngoang. I wauneki oh poakpoake ira koaros.

Kapahi kaselel ieu met en papah nan Sapwellimen Kauno Mwomwodiso mehlel oh Pwung sang ni mweimwei oh manaman. Kapwurpwurdohn prihsduhd en Koht, iangahkieng kih kan en prihsduhd, mweimweiongehr souleng en mwomwohdiso wet kan me warohng kapahi lap akan en pali ngehn. Kitail kilang kapahi kan kohiengehr lih, ohl, oh serihkan en sampah.

Se kilangehr lih poadidi kan me kin wewehki duwen manaman me kisehn arail pwukoah kan oh kin wia inou sarawi oh tiahk sarawi teikan en tehnpas sarawi. Lih pwukat wewehki mwomwen ar pahn peki manaman en nanleng en sile oh kakehlailih arail pwoud oh neirail serih kan oh mehteikan me re poakohng. Lih pwukat inenen kehlail ni pali ngehn me kin kaun, padahk, oh kin padahk ni eimah nan arail malipilip kan ni manaman oh mweimwei en Koht!¹ I inenen ahniki kaping laud ohng irail!

Pil duwehte, kitail kilangehr ohl loalopwoat me kin nantihieng en warohng arail pwukoah kan en prihsduhd. Re kin kaweid oh papahki ar tohnmetei nin duwen kosoandi en Kauno ni limpoak, kadek, oh kanengamah. Re kin kapaiada, padahkih, sinsile, oh kakehlailih mehteikan sang ni manaman en prihsduhd me re kolokol. Re kin karehieng manaman kapwuriamwei ong me re kin papah ni ar pil kin apwapwalih mwahu pein ahr pwoud oh ar kisin peneinei tikitik. Re kin liksang me suwed oh wia Elder en Irael kelail kei.² I inenen kalahngankin irail!

Eri met, I kak kasalehda ehu iren mehn madamadau? Iet: Tohtolahr riatail ohl oh lih akan me sohte nohn wewehki duwen manaman oh mweimwei en prihsduhd. Mwomwerail kan kin kasalehda me re men liakotorohr oh wia pein insenerail sang ar men doadoahngki manaman en Koht en kapaiada Sapwellime serihkan.

I perki me e nohn tohto rietail ohl oh lih akan sohte kin kak doadoahngki arail pwung kan.³ Ni karasepe, ekei riatail ohl, mwomwen me re sohte wewehki dahkot prihsduhd oh dahme e kak wia. I pahn kawehwehiong kumwail karasaras kei ni sansal.

Me keren, I iang sarawi en kamadipw sarawi ieu oh mie kisin seri pahn kasarawi ohng ede oh ale kapahi en pahpa. Pahpa pwulopwulo kolada nah serio nan peh, kiheng ede, oh ahpw wia kapakap kaselel ehu. Ahpw e sohte kapaiada serio. Kisin seri serepein kaselelo alehdihte ede apw sohte kapahida. Elder meno, sohte wewehki wekpeseng en kapakap oh kapai en prihsduhd. Mweimwei oh manaman en prihsduhd me e ahniki, e kak kapaiada nah kisin seri pwelel o, ahpw e sohte wia. Udahn re katiasang nan ansoumwahu wet!

Ien pil kasalehda ekei karasaras. Kitail ese riatail ohl me kin kasarawiala lih akan ong pwukoahn kaun oh sounpadahk nan praimeri, nan Pwihn en Peinakapw, oh Relief Society ahpw sohte kapai irailda ni manaman ren kapwaiada arail pwukoahkan. Re kieng irailte ren kanaiong oh ia mwomwe. Kitail pil kilang pahpa warohng men sohte kapaiada pein ah werek oh ah tungoal serihkan me re keiou anahne. Manaman en prihsduhd kapwurpwurdohr pohn sampah, me tohto ohl akan oh lih akan kin lelohng nan kahpwal laud apw sohte kin alehdi kapahi mehlel en prihsduhd. E udahn kansensuwed! Kansensuwed me kitail kak kasohrehla.

Riei ohl ako, kitail kolokol prihsduhd sarawi en Koht! Kitail kolokol Sapwellime mweimwei en kapaiada Sapwellime serihkan. Medemedewe mahsen kaselelo me Kauno ketkihong kitail ni Ah mahsanih: “Mehmen me ke pahn kapaiada I pil pahn kapaiada.”⁴ Iei atail pwuhng en kapwaiada ni mwaren Sises Krais en kapaiada Sapwellimen Koht serihkan nin duwen kupwure ong irail. Steik presiden kan oh pisop kan, menlau tehk mwahu emenemen nan pwihn en ohl akan nan amwail wasahkan ren wewehki ia mwomwen kihda kapahi en prihsduhd—iangahkiheng ar pahn warohng oh anahnepen kaunop ni pali ngehn pwehn kak warohng ale manaman en Koht.⁵

Ong kumwail me kolokol prihsduhd koaros, I peki rehmwail en kaperenih souleng kan en kolokol kosonned akan, kaisihsol oh kapakap, onopki pwuhk sarawi, kaudok nan tehnpas sarawi, papah ni pwoson ninduwen ohl oh lih en Koht. Kitail kak sewese koaros en kilangki wasa ni pwoson ehu pwe ar peik oh wiewia pwung pahn kak karanih irailahng Sises Krais, karehiong irail ren insenemwahuki pepehm en Ngehn Sarawio me pahn kin ieiang irail, oh ahniki peren nan mour!

Kilelpen Sapwellimen Kauno mwomwohdiso pwung iei kin koasoandi mwahu ahnsou koaros, doadoahk me dokdoke emen emen Sapwellimen Koht serihkan oh arail peneinei kan.⁶ Pwehki Sapwellime mwomwodiso met, nin duwen atail wia Sapwellime soun papah kei pahn kin uhpahiong aramas men, duwehte me E ketin wiahier.⁷Kitail pahn papah ni Mware, doadoahngki Sapwellime manaman oh mweimwei oh Sapwellime kupwur kadek oh limpoak.

Nan Boston sounpar 60 samwalahrko, I esehla ia uwen manaman laud en wia doadoahk en papah nan pwungen aramas riemen. Ansouwo I wia toahkte men nan imwen wini laud en Massachusett—I kin doadoahk rahn koaros, ah nihpwong I kin doadoahk manda kommoal manda doadoahk, oh imwin wihk riau nan sounpwong koaros. E kin mwotomwot ahi ahnsou rehn ahi pwoud, oh nait seri kan, oh nan Mwomwohdiso. Eri, aht prans presiden kapwukoahkinie ien pwarek imwen Wilbur oh Leonora Cox oh e koapwoaroapwoarki me Brother Cox mwein pahn pwuredo sarawi. Ih oh Leonora, ira katengtengpenehr nan tehnpas sarawi.⁸ Ahpw, sounparehr tohto Wilbur sola iang sarawi.

Ngehi oh iengeio kohla ni imwarahu. Ni aht pidelong, Sister Cox kasamwo kihtlong ahpw,⁹ Brother Cox aluhla ni ehu pere oh ritingedi wenihmwo.

Ngehi aluhla ni wenihmwo ngehi letelet. Mwurin ansou kis, I rong ngilen ah pwangahki inda, “pidelong.” I retingada wenihmwo kilang Brother Cox mwomwohd limwahn dipwisou en radio kei. E isikada kene sikahu tepda simwoake. E sansal me e sohte pereniki ahi pwareko.

I kilengseli nan perehu ni ahi dahkihla oh inda: “Brother Cox, I kin men iang esehla duwen mwomwen doadoahk en radio. Ke pahn men padahkiong ie mwomwe? Ke pahn mahk, I sohte kak mih werei pwohnget, apw I kak pwuredo ehu rahn?”

E mwomwen peikasal kisin ahnsou, apw nda ehi. Ih wasa me I tepin kempoakepahki lahpo. I pwurala oh e padahkiengie. I tepda poakpoake oh wauneki ohl menet. Nan ahi kin wie pwarpwarek ohl menet, ah wia ohl mwahu men tepda sansal. Kiht oh aht werek kan uhd poakpene. Mwuri, aht peneinei apw keseula ehu wasa. Kaun en wasao me kin uhd doudoulahte pwapwarek peneinei en Cox.¹⁰

Ele mwein sounpar waluh sangete aht tepin tuhpenehu, miehda Steik en Boston.¹¹ Ke kak medemedewe ihs me tepin wiahla steik presiden? Ehi! Brother Wilbur Cox! Nan pahr kei mwuri, e pil wiahier doadoahk en misin presiden oh presiden en nan tehnpas sarawi.

Pahr kei mwuri, ni ahi miher nan Pwihn en Woahnpoaron Ehk Riemen, I kapwukoahki ien koasoanehdi ehu steik kapw nan Sanpete County nan Utah. Nan ahnsou en inerview o, I perenda ahi pwurehng tuhweng kempoakepahi Brother Cox! I alehdi pepehm en malipe en wiahla steik peitriark kapw. Mwurin ahi kasarawiala, se pwoaloapwaolpene oh sengseng. Aramas ko nan perehu sehse dahme ohl se wie sengsengki. Ahpw, kihte me ese. Oh sister Cox ese. Se sengsengki aht peren. Se loalehkihdi loalet seilok en limpoak oh weliakapw me tepsang sounpar 30 samwalahro, sang pwohng ehu nan imwerailo.

Soai pwoatet sohte ididi wasao. Peneinei en Brother oh Sister Cox keirda naineki seri 3 wahn neira silimeno meh 20, oh wahn riehko me 54. Kapatahieng wahn ara doadoahk en misineri epwiki kei, pil kid kei nan tehnpas sarawi, oh pil epwiki kei me alehdi kapai en peitriark, sang ni doadoahk en Wilbur Cox. Wiewiahn ih oh Leonora pahn doudoulahte kamwkamwahuwih diren dih kei en sampah.

Soangen wiewia mahu wet en Wilbur oh Leonora kin wiewiawi nan wihk koaros—koapwoaroapwoarki rahn koaros—nan mwomwohdiso wet. Soun papah lelepek kei en Kauno Sises Krais kin kapwaiada Sapwellime doadoahk, ni Sapwellime manaman oh mweimwei.

Riei ohl ako, mie wenihmw kei me kitail kak ritingada, kapai en prihsduhd me kitail kak kihda, mohngiong me kitail kak kamwahuwiala, katoutou me kitail kak kamararahda, mour me kitail kak doarehla, popohl me kitail kak wahdo nan imwen tohn mwomwohdiso wet kan—metakan koaros pwehki atail kolokol prihsduhd en Koht. Kitail iei ohl ako me “malipilipdahr oh me kaunopsangete tepin sampah nin duwen kupwurokong en Koht, nin duwen atail pwoson kehlail” en wia doadoahk wet.¹²

Pwongpwong wet, I luke emenemen kumwail en iangie kesihnenda nin duwen atail ohl pirien kei. Ni ansou me I pahn ekerada eden prihsduhd kan, menlau kesihnenda. Dihken kan, menlau kesihnenda! Sounpadahk kan, kesihnenda! Samworo kan! Pisop kan! Elder kan! Samworo lapalap kan, Peitriark kan! Isiakan! Wahnpoaron kan!

Ohl ako, kumwail kak menlau oh keskesihnente oh iang patehng atail pwihn pwehn koul koulki iretikitik koaros, “Rise Up, O Men of God.”¹³ Ni ahmw pahn kokoul, medewe ahmw pwukoah nin duwen Sapwellimen Koht sounpei kei en sawas kaunopada sampah ong Ketdo Keriau en Kauno. Atail pwukoah met. Atail ansou. I kadehdehda mepwukat ni lengleng en Sises Krais, amen.