Soukohp kin Mahsenki Manaman en Ngehn Sarawi

Riei ohl ako oh lih ako, sohte lipilip wasa kumwail ket de patoh ie, I men wia ahi tungoal kaping kalahngan ni karakarahk ong amwail utuht aio. I pehm karakarahk oh sou itar en pwukoahki pwukoa kesempwal en welian Sounkomouro, Sises Krais. I kehn duwehta Moses, me wiahki pein ih aramas soakoaiek men oh wawai nan lokaia. I insenemwahukihla dahme Kauno mahseniongo:

“Ihs me kin wiahda ewen aramas? de ihs me kin kalohtengihala, de kasalengoponehla, de kamaskuniahlaaramas. Kaidehng Ngehi Kauno?

“Now therefore go, and I will be with thy mouth, and teach thee what thou shalt say” (Exodus 4:11–12; see also verse 10).

Limpoak oh utuht en ahi tungoal werek koaloalamwahwihiehla. E wia karasaras mwahu ong ngehi oh ahi peneinei nin duwen aramas kadek, aramas limpoak oh ah kin poadidi mehlel ong Kauno.I poakpoake ih sang ahi mohngiong unsek, oh I kalahnganki ah kadek, oh I kapingkalahnganki ah wia mehn kahlemengih mwahu ehu ong kiht.

Riei ko, I kadehdeiong kumwail me Presiden Russell M. Nelson iei soukop en Koht pohn Sampah. I sohte kin kilangada soangen kadek oh limpoak duwe ih. Mendahte I pehm soakoahiek nan malipilip sarawi wet, ah mahsen kan oh mas kadek ni ah kihong ie pwukoah wet karehiengie endirikihlalimpoak en atail Sounkomouro. Kalahngan en kupwuromwi maing presiden Nelson. Se utung komwi oh poakohng komwi.

E sou kapahi ieu met, eh mie atail soukohp akan, ohl sarawi kan oh soun kaudiahl kan pohn sampah nan rahnpwukat me kitail momour loale, me kin rapahki en ese kupwuren Kauno oh kin idawehn? E kansenamwahu en ese me kitail sohte kelehpw pohn sampah, Mehndahte kapwunod de kahpwal kan me kitail kin sohpaih nan mour. Eh mie atail soukohp wia kadehdepen limpoak en Koht ong Sapwellime serihkan. Re kin kasalehda inou kan oh uhdahn mwomwen Koht oh duwen Sises Krais ong Sapwellimera aramas akan. I wehwehkier mepwukat.

Sounpar eisek waluh samwalahro, presiden James E. Faust, sounsawas keriahu nan Presedensi Keiou ahnsouo, koahl ie oh ahi pwoud. E malipei kiht sen papahn misin presiden nan Portugal. E ndahiong kit me sounpwungte weneu mwohn se pahn tep. Mendahte ahtsohte onopada oh pehm soakoahiek, se pwungkihda malipilipo. Me se keieun pwunodiki ahnsouo aht pahn alehdi visa pwehn kak papah nan wehio pwehki mwowehu se wiaier oh se eselahr koadoahkepen ale mweimwei kinkin lella kereniong sounpwung waluh.

Presiden Faust apw idek ma mie aht pwoson pwe Kauno en wia manaman kapwuriamwei oh pwe sen kak kamwahuwiala kahpwal en visahko en kak mwadang nekila. Se sapengki, “ehi,” oh se ahpw tapiada koasoanehdi ahnsou karuaru. Se kaunopada doaropwe kan ong visa ko, wahda aht kisin peneineio, oh mwadang en kohla ni ohpis en koansoled. Lih kadek men tuhwong kiht wasao. Ni petehkpen nait doaropwe kan oh aht diarada dahme se pahn wia nan Portugal, liho ahpw idek, “Mehlel ieu ke pahn sewese tohn wehiet?” Se sapengki ni sohpeikasal, “ehi” oh kawehwehda me se pahn wiliandi Sises Krais oh kadehdehda duwen Ih oh sapwellime doadoahk pohn sampah. Se pwurala wasao mwurin wihk pahieu, alehdi nait visa ko, oh ahpw peidi ni wasahn doadoahk en misineri mwurinte wihk kei, duwen me soukohp en Kauno pekihda sen wia.

Riei ko, Sang nan kapin ahi mongiong, I kadehdehki me soukohp kin mahsenki manaman en Ngehn Sarawi. Re kin kadehdehda duwen Krais oh Sapwellime doadoahk sarawi pohn sampah. Re wiliapen kupwur en Kauno oh re malipilipda pwehn wiliandi Ih oh padahkiong kitail dahme kitail anahne wia pwehn pwurala patopato mwohn silangin Koht oh Sapwellime Iehros, Sises Krais. Meid pai kitail ni atail kin song atail pwoson oh idawehn arail padahngkan. Ideidawehn irail, kin kalaudehla atail peren oh katikitikiala mour ping, oh e kin kamangaila atail kapwahl kan, oh kin doarehla palingehnoh sinsilei kitail sang atail imwintihtio en rahn pwukat.

Rahn en Ihster wet, I kadehdehki me Sises Krais ketin ieias oh me E ketin kaweidih Sapwellime Mwomwohdiso pohn sampah sang rehn soukohp kei, ohl sarawi kei, oh soun kihla kaudiahl kei. I kadehdehki me Ih me Sounkomour oh Soundoar en sampah oh pwehki Ih kitail kak komourala oh waunla kohkohlahte mwohn silangin Koht. I poakohng Ih oh kapingki. I men idawehn Ih oh kapwaiada kupwure oh duwehla Ih. I patowahn mepwukat ni karakarahk ni mwaren atail Kaun, Sises Krais, ahmen.