Tiahk Sarawi kan en Komour Pahn Wadohng Kitail Marain Lingan.
Towehda tiahk sarawi kan oh wahuneki inou kan me patehng pahn wadohng kumwail marain kouwahlap oh silasil nan sampah rotorot wet.
Riei Ohl oh Lih akan, I iang kumwail kapingki rongamwahuo de padahk en Kraiso.
Kempoakepahi men kalelapak rehn Elder Neil L. Andersen, me ansouo wia emen Isiakan ko, duwen ah pepehm ni eh mahsen mwohn aramas 21,000 nan Wasahn Kapokon lapo. Elder Andersen, ahpw sapengki, “Kaidehn aramas 21,000 me kahrehieng uhk omw saloh; Ohl 15 me mwohd mwurimw.” I kouruhr ansouo, ahpw I pehm ansouet. I poakohng mehel oh utung ohl ehk-limmen pwukat nan arail pwukoah en soukohp, ohl sarawi, oh soun kihda kaudiahl kan.
Kauno mahsanihieng Eipraam me pwehki nah seri ko oh pwehki prihstuhd, peneinei koaros en sampah pahn kapaikihda “kapai kan en Rongamwahuo … oh iangahki mour soutuk” (Abraham 2:11; pil tehk iretikitik 2–10).
Kapai kan en inou pwukat en rongamwahuo oh prihstuhdo kopwurupwurodohr sampah, oh nan pahr 1842, Soukohp Jospeh Smith apwalialahr inou sarawiet ong ekei te irail ohl oh lih akan. Emen irail iei Mercy Fielding Thompson. Soukohpo mahsaniheng, “[Inou sarawi] wet pahn kapwureiukasang nan rotorot oh kapwureiukalahng nan marain.”1
Rahnwet I men oaralapki tiahk sarawi kan en komour—me pahn wadohng kumwail oh ngehi marain kouwahlap.
Tiahk Sarawi kan oh Inou kan
Nan True to the Faith kitail kin wadek: “Tiahk sarawi ieu wia ehu tiahk sarawi, mwekid kesempwal ehu me ihr me ahneki mweimwei kin wia. Tiahk sarawi kan [me] kesempwal ong kitail en waunla kohkohlahte … kadaniki tiahk sarawi kan en komour. Mepwukat iei pepdais, kasarawiala en towe mehlel, kasarawihlahng ong Melchizedek Prihstuhd (ong ohl akan), tiahk sarawi kan en nan tehnpas sarawi, oh katengetengpene en pwopwoud.”2
Elder David A. Bednar padahngki, “Tiahk sarawi kan en komourla oh waunla kohkolahte kin epwella nan Sapwellimen Kauno Mwomwohdiso kopwurupwurodohu … wiawihkihda ahl kan me aledier mweimwei me kapai kan oh manaman akan en nanleng kan kak kapwilipwilodo loale ong nan ehu ehu atail mour kan.”3
Duwehte pali riau en ehu sent mwaramwer, tiahk sarawi kan en komour kin iangodo inou kan en Koht. Koht ketin inoukiheng kitail kapai kan ma kitail kin wahuniki inou pwuko ni pwoson.
Soukohp Amulek kalohki me met iei ansou en kaunopada tuhong Koht (tehk Alma 34:32) . Ia duwen atail kin kaunopada? Sang ni warohng alehda tiahk sarawi kan. Kitail anahne pil, nan sapwellimen Presiden Russell M. Nelson mahsen kan, “Kolokolete inou kan ong Kauno.” Presiden Nelson pil uhsehla, “Ahmw poadidi ong idawehn Sounkomouro sang ni ahmw kin wiewiahieng Ih inou kan oh mwuri kolokol inou pwuko pahn wiahda ansou mwahu ong kapai en palingehn koaros oh ansou mwahu me mie ong ohl akan, lih kan, oh seri kan wasa koaros.”4
John oh Bonnie Newman, duwehte pali tohtohn kumwail, iangehr alehdi kapai kan en palingehn me Presiden Nelson inoukidahro. Ehu Rahn Sarawio, mwurin eh iang nah seri silimeno sarawi, Bonnie ndahieng John, me kaidehn tohn Mwomwohdiso, “I sohte kak kelehpw wia met. Ke uhdahn anahne medewehda ma ken iang kiht kohla sarawi de ke pein pilada ehu sarawi me kitail kak patpene oh towehda, ahpw seri kat anahne ese me arail pahpa pil kin poakohng Koht.” Rahn Sarawi en mwurio oh Rahn Sarawi koaros mwurin mwo, John sohte towehda te; e pil papah, kesengki piano ong ward tohto, branch kei, oh Primary kan sounpar kei. I ahniki ansou mwahu en patehng John nan mihting nan Epreil 2015, oh nan tuhpeneo, se koasoaia me wiepe me keieu mwahu me e kak kasalehda ah poakohng Bonnie iei en wahla Bonnie nan tehnpas sarawi, ahpw mwo sohte kak wiawi lao e pepdaisla.
Mwurin eh ieiang Mwomwohdiso en Sises Krais en Souleng en Imwin Rahn akan erein soupar 39, John ahpw pepdaisla nan 2015. Sounpar ehu mwuri, John oh Bonnie eri katengetengpene nan Tehnpas Sarawi en Memphis Tennessee, sounpar 20 mwurin Bonnie aledier pein ah tiahk sarawi. Neira pwutak me sounpar 47, Rohpehr ahpw ndahki ah pahpao, “Pahpa inenen keirda sangehr eh alehdier prihstuhdo.” Bonnie kapatahieng dene, “John kin ansou koaros wia emen aramas peren oh nsenamwahu, ahpw aliale tiahk sarawi kan oh wahuniki inou kan inenen kalaudehla ah karakarahk.”
Tomw en Krais oh Sapwellime Karasaras
Sounpar tohto samwalahro, Presiden Boyd K. Packer kepehmkiher me, “Wiewia mwahu ahpw sohte tiahk sarawi kan en rongamwahuo sohte pahn doarehla de kawawihala aramas.”5 Ni mehlel, kitail sohte anahnete tiahk sarawi kan oh inou kan pwe kitail en pwurala rehn Samatailo, ahpw kitail pil anahne douluhl Sapwellime Iehroso, Sises Krais, oh Sapwellime Tomwo.
Nahnmwariki Benjamin ketin padahngki me ihte rehn Krais oh sang ni mwaren Krais me komourla kin kohkihdo rehn aramas (tehk Mosiah 3:17; pil tehk Articles of Faith 1:3).
Sang ni Sapwellim Tomwo, Sises Krais ketin doareikitaillahr sang ni lipwalipw akan en Pwupwulahn Adam oh elehieng kitail en kak koluhla oh waunla kohkohlahte. Sang ni Sapwellime ieias, E ketin wiadahr karasaras pwe kitail en alehda tiahk sarawi kan en komour---me “kasalepen manaman en Koht sansaldahr” (D&C 84:20).
Mwurin Sounkomouro eh ketin alehdi tiahk sarawi en pepdais pwehn “apwaliala soahng mehlel koaros” (tehk 2 Nephi 31:5–6), Sedan ahpw kasongosong Ih. Duwehte mwo, atail kasongosong kan sohte kin imwisekla mwurin pepdais de katengetengpene, ahpw aliale tiahk sarawi kan oh kin wahuneki inou kan me patehng kin kiheng kitail marain kaselel oh kiheng kitail kehlail en soikala oh powehdi kasongosong kan.
Mehn Kepehm
Aiseia kohpadahr me nan keimwseklahn rahn akan, “sampah pil iang saminlahr … pwehki irail … wekidalahr tiahk sarawio” (Aiseia 24:5; pil tehk D&C 1:15).
Ehu mehn kepehm me duwehte mwo, kasansalongehr Soukohp Joseph Smith, me ekei “kin karaniala [Kauno] sang ni kilin ewerail kan …[oh]re kin padahngki kosonned akan en aramas, me kin sair mour mwahu, ahpw re kin kahmahmkihla mehlel en manaman en Koht me mehlelo” (Joseph Smith—History 1:19).
Pohl pil kepehmiki me kidalap pahn kin “liksansalamwahuki mwomwen atail palien lamalam, ahpw kahmahmki katepe… kalekeiukasang aramas pwukat” (2 Timothy 3:5). I en pil kopwurehieng, kalekeiukasang soangen aramas pwukat.
Kidalapen soahngen mehnkerempwa oh kasongosong en mour duwelahr “kidien wel” (Madiu 7:15). Silepen sihpw mwahu me pahn kaunopada, doare, oh kepehmki sihpw kan oh tohn mwomwohdiso ansou me kidien wel pwukat kohkohdo (tehk Sohn 10:11–12). Duwehte sawasepen silepen sihpw kan me kin songosong alasang mour mwahu en Silepen Sihpw Mwahuo, kitail sohte wia silepen sihpw mwahu ongete pein atail mour ahpw en duwehte mour en mehteikan? Sang ni kaweid en soukohp akan, aramas sarawi kan, oh sounkihda kaudiahl akan me kitail apwtehn utungada, oh pil manaman oh kisakis en Ngehn Sarawio, kitail kak kilang kidien wel kan ar kohkohdo ma kitail kin tehk mwahu oh onopada. Me wekisang mwo, ni atail wia silepen sihpw soukauti en pein atail mour oh mour en mehteikan, kahpwal kin pwarada. Soukautiheng tetehk atail pwukoah kak imwikihla kahpwal en atail mour de mour en mehteikan. I luke emen emen kitail en pein wia silepen sihpw me loaloapwoat.
Pehm oh Kadehde
Kamadipw sarawi iei ehu tiahk sarawi me kin sewesei kitail en usehlate wiewia dahme pwung, oh kin warohng tungoale wia kadehde me kitail wie kolokolete inou kan me kadokodokalahng tiahk sarawi kan koaros. Sounpar kei samwalahro, ni ansou me ngehi oh ahi pwoud Anita, wiewia aht pwukoah nan Arkansas Little Rock Mission, I ahpw kohla pwe I en patehng mesneri pwulopwul riemen oh padahkseli. Nan ansoun padahko, riat mwahnakapw mwahu me se padapadahkohngo koasoaia, “I pwarewehngehr amwail sarawio; dahme kumwail anahnehki tungoale pilawa oh nim pihl Rahn Sarawi koaros? Nan aht mwomwohdisohu, se kin wia pak riau nan ehu pahr, Easter oh Christmas, oh mwo inenen wehwe mwahu.”
Se ehukiheng me se koasoandieng sen kin “kalap tuhpene pwe sen kin tungoale piawa oh wain” (Moroni 6:6; pil tehk D&C 20:75). Kiht eri wadek ni ngihl laud Madiu 26 oh 3 Nephi 18. E sapengki me e saikinte wehwehki kesempwalpe.
Kiht eri ehukiheng mehn karasaras pwukat: “Medewehla me ke iang pidada ehu ohlahn sidohsa. Ke inenen ohla oh lipwongmasala. Aramas emen ahpw tang wasao, oh kilangada omw lipwongmasalahr, e ahpw padikada nempe en mwekid karuaru, 911. Sawasepemw eri lella oh kowe pwurehng kehnda wasa.”
Se idek rehn pwutak menet, “Ni omw kakehr wehwehkihda soahng kan me kapekapel uhk, soangen peidek dahnge me ke pahn ahniki?”
E sapengki, “I pahn men ese duwen ei lella mwo oh ihs me diar ie. I pahn men kalahngankiheng rahn koaros pwehki e kamouriehla.”
Se ehukiheng pwutak mwahu menet duwen Sounkomouro eh ketin kamourkitailla oh duwen atail anahne kaping kalahngankiheng rahn koaros, rahn koaros, rahn koaros!
Kiht eri idek, “Wehwehki me E ketin tohnmeteikihla Sapwellime mour ong kowe oh kiht, ia uwen omw kin men tungoale pilawao oh pihlo me wia kasalepen Kahlepeo oh Ntaiho?”
E koasoaia, “I wehwehkiher, I wehwehkiher, ahpw ehutehr. Amwail mwomwohdisohn sohte kaperen duwehte aht.”
Ong mwo se ahpw sapengki, “Dahme ke pahn wia ma Sounkomouro Sises Krais aluhlong nan ahmw wenihmwo?”
E koasoaia, “Ansouohte, I pahn kelipwekihdi.”
Se idek, “Kaidehn ih men me ke kin pehm ni omw kin pidelongala nan imw sarawi kan en Souleng en Imwin-rahn akan---meleilei ong Sounkomouro?”
E koasoaia, “Mwahu, met I wehwehkier.”
E iang sarawi ni rahn Sarawi en Ihstero oh pil kin pwurupwurala.
I luke emen emen kitail en kalelapak rehtail, “Mehnia rehn tiahk sarawi kan, iengahki kamadipw sarawi, me I anahne ale, oh mehnia inou kan me I anahne wia, kolokol, oh wahuneki?” I inoukihda me kin wia tiahk sarawi kan oh wahuneki inou kan me patehng pahn wadohng kumwail marain kouwahlap oh silasil nan sampah rotorot wet. Ni mwaren Sises Krais, amen.