Kitail Koaros en Nantihong
Amwail ineng en peikiong pahn laudla ni amwail pahn tamataman oh medemedewe laud dahme kumwail kehnehr nan rahn riau wet.
Riei ohl oh lih kempoak kan, ni atail pahn ritingedier kapokon poadoapoad wet, I iang kumwail kaping kalahngan ong Kauno pwehki Sapwellime kaweid lipwalipw me kitail alehier. Koul kan inenen kaselel oh kamarahraikitailda. Padahngkan sohte kaweid kitail te, ahpw e pahn wekidala-mour!
Nan kapokon sarawi wet kitail utung emen Keiou en Presidensi kapw. Ohl kesempwal riemen pil malipilipdahr ong nan Pwihn en Wahnpoaron Ehk Riemeno.
Met ehu koul kaselel me kawehwehdier mwotomwot pasapengpeng atail mour kapw, atail kahpwal, atail pwukoah kohkohla mwowe:
Kitail koaros en nantihong doadoahk en Kauno.
Pwe ma mour wet pahn imwsekla kitail kak ale katingpe;
Kitail en mahwenki kedlahs en pwung,
Kedlahs kehlail en pwung.
Dehr masak, menda ma imwintihtio lel kitail;
Komwad, pwe Kauno ieiang kitail.
Kitail sohte pahn rong dahme irail me dipan akan pahn kosoia,
Ahpw Kauno kelehpw me kitail pahn peikieng.1
I koangoangehkin kumwail en onopki padahngkan en kapokon wet—itar ma kumwail kapwkapwurehiong—nan erein sounpwong weneu kohkohdoht. Rapahki ni keneinei soangen wiepe kan me kumwail pahn kak iangahki padahk pwukat nan amwail soutik en peneinei kan, amwail padahk en rongamwahu, amwail kosoi kan ong peneinei oh kempoakepahmwail kan, oh iangahki amwail padahk ong me sohte iang atail mwomwohdiso wet. Aramas tohto pahn sapeng me mehlel kan me padahk ong irail sang nan kapokon wet ni limpoak. Oh amwail ineng en kapwaiada pahn laudla ansou me kumwail taman oh medewe dahme kumwail pehm nan erein rahn riau pwukat.
Kapokon Lap wet me pahn tapiada ehu koasoandi kapw en doadoahk en kalohk. Kauno ketin wiadahr soangen wiepe kesempwal kei me kitail pahn apwalihki emen emen kitail. Riei lih oh ohl akan—pahn tapiada papah mehteikan ni, wahu. Irail Pwihn en Ohl akan pahn kakehlailiada pein irail pwe irail en kak kapaiada mour en ohl, lih, oh serih kan wasa koaros nan sampah, Pwihn en Sawas en Lih pahn poupousehlahte arail kalohk ni limpoak, kihong pwukoah irail nohno pwulopwul kan pwe irail en kak patehng pwukoah kan me kohieng irail.
Aht iren kaweid ong sampah me mengei oh mehlel: se luke koaros sapwellimen Koht seri en kohdo rehn arail Sounkomour, alehdi kapai kan en tehnpas sarawi, ahneki popohl poatopoat, oh warohng mour soutuk.2
Lapalapala ni imwio anahne atail pwoson unsek met ong inou sarawi kan me kitail wiahda oh tiahk sarawi kan me kitail alehdi nan tehpas en Kauno. Met tahnpas sarawi 159 mie, oh ekei pil wihwiawi. Se men wiahda tehnpas sarawi karanaih wasa tohn Mwomwohdisoh diralahrie, Eri met se men pakairki koasoandi en tehnpas sarawi isuh me pahn wiawi. Tehnpas sarawi ko pahn mih Salta, Argentina, Bengaluru, India; Managua, Nicaragua, Cagayan de Oro, Philippines, Layton, Utah, Richmond; oh ehu kanihmw laud nan Russia.
Riei ohl oh lih akan, wiwihdahn tehnpas sarawi pwukat sohte pahn wekidala amwail mour, ahpw amwail ansou ong nan tehnpas sarawi me pahn. Ni ngehnohte, I kapai kumwailda en tehkada soahng kan me kumwail kak solahr wia pwe kumwail en kak pwurpwurala nan tehnpas sarawi. I kapai kumwail en ahneki peren laud oh limpoak nan ihmwamwail kan oh ineng kehlail en patehng amwail peneinei kohkohlate. I kapai kumwailda en ahneki pwoson laud rehn Kaun Sises Krais oh amwail ineng laud en idawehn Ih nin duwen Sapwellime tohn padahk mehlel.
I kapai kumwailda pwehn eimah kihda amwail kadehde, duehte me I wia met, me kitail pahn doulahr nan doadoahk en Koht Wasa Lapalahpie! Sises iei ih me Krais. Sapwellime Mwomwohdiso met, me E ketin kaweid kihong Sapellime sounpapah keidio, eri I kadehdeh, oh kasalehda ahi limpoak ong emen emen kumwail, ni lengleng kapai en Sises Krais, ahmen.