Doadoahk en Papah
Kitail pahn tapiada ehu mwekid kapw oh mwekid sarawi pwehn apwapwalih oh papah meteikan.
Kalahngan en kupwuromwa, Elder Gong oh Elder Soares, amwa kasalehda nan kapehd karakarahk en amwa pwoson. Se kapingki mehlel kumwa oh amwa werek ko.
Maing riei ko, se kin epweniki rapahki kaweid sang rehn Kauno duwen wiepen aht kak sewese neitail souleng kan en kapwaiada kosonned en Koht, ahpw mehlel kosonned lap riau me keieu kesempwal iei poakohng Koht oh poakohng mehn mpatail kan.1
Erein sounpwong kei se wie raparapahki ia mwomwen aht kak kamwahwihala wiepen apwalih anahn kan en neitail aramas akan ni palingehn oh paliwar nin duwen kupwur en atail Sounkomour.
Se koasoanehdier me kitail solahr pahn wie sounpadahk en nan ihmw oh sounpadahk en pas duwen me kitail wehwehki. Ahpw, kitail pahn tapiada ehu mwekid kapw oh mwekid sarawi pwehn apwapwalih oh papah meteikan. Mwekid wet pahn kahdaniki “doadoahk en papah.”
Doadoahk en papah kin pweida mwahu sang rehn lih koahiek kan oh manaman kowahlap en prihsduhd. Kitail koaros anahne soangen silasil sang widing en me suwedo.
Elder Jeffery R. Holland sang pwihn en Wahnpoaron Ehk-Riemeno oh Sister Jean B. Bingham, Preseden Lap en Pwihn en Sawas en Lih, pahn kawehwe duwen ohl en prihsduhd oh lih en Pwihn en Sawas en Lih iangahki Peinakapw kan me alehdi arail pwukoah, pahn kapwaiada arail pwukoahn papah oh mwasamwasahn tohn Mwomwohdiso wet wasa koaros nin sampah.
Presedensi Keieu oh pwihn en Ehk-Riemeno kin ehukipene aht pwungki ara kaweid. Ni kaping oh mwurin kapakap tohto, kitail pahn tapiada mwekid kapw wet en Mwomwohdiso wet. Ni mwaren Sises Krais, ahmen.