Kisakis Kesempwal kan sang Koht

Riei ohl oh lih akan, kitail apwtehn iang ehu kapokon sarawi, doadoahk ehu me koasoandier nan Pwuhk Sarawi ansou me mehn Israel en kawa ko kin pokonpene pahn sihlahngin Kauno oh kauwawih Sapwellime kapai kan.¹ Kitial paiamwahuki atail wie momour nan ansou ehu me doadoahk wet kapwurpwurdohr sang Soukohp Joseph Smith.² I koangoangei kumwail en ntingiedi nan noumwail pwuhk kan amwail pepehm kan me pid doadoahk sarawi wet me kumwail iangehr towehda.

Me keren kitail rahnmwahwih kepoakepatail oh soukohp, Presiden Thomas S Monson. Tetehn kitail pahn laloidki ih, kitail kaping mwuledek pwe Kauno ketin malipedahr emen soukohp kapw, Presiden Russell M. Nelson, pwehn kakaun Sapwellime Mwomwohdiso. Ni meleilei oh koasoandi mwahu kitail tapiadahr ehu irair kapw nan poadopoad en atail Mwomwohdiso. Met wia ehu kisakis kesempwal sang Koht.

Ni en emenemen kitail utungada Presiden Nelson ni atail kauwada pehtail kan, kitail wialahr sounkadehde kei mwohn Koht oh pwungkihla me ih me konehng peusehla mwurin Presiden Monson. Ni atail kauwada pehtail kan, kitail inoukihda me kitail pahn oke ah mahsen ni eh kin ale kaweid sang Kauno.

Kauno mahsaniher:

“Kumwail pahn kin oke sapwellime [wehwehki en Presiden en Mwomwohdisoht] mahsen kan oh kosonned akan me e pahn kihong kumwail ni eh kin ale mepwukat. … ;

“Pwe ah mahsen me kumwail pahn ale, duwehte me kin pwilsang rehi, ni kanengamah oh pwoson.”³

I esehki atail soukohp-presiden kapwo dauliher sounpar 60. I iangehr ih papah nan Pwihn en Ehkriemeno ki erein sounpar 33 oh I wia emen sounkadehde me limen Kauno me kaunopadahr ih en wiahla atail wahnpoaron me kakaun oh soukohp pwehn apwalih kih kan koaros en prihsduhd sarawi pohn sampah. Emenemen kitail en utungada ih ni mehlel oh sapwellime sounsawas kan oh idawehn arail kaweid. Kitail pil kasamwo Elder Gong oh Elder Soares me towedahr Pwihn en Wahnparon Ehkriemeno.

Mwurin Iasadahn Sises, mwekid ehu me kitail kaskasarawi ni wihk en Ihster wet, E ketin pwarehng Sapwellime tohnpadahk kan oh mahsanih, “Kumwail popohl, duwen Sahmo eh ketin kadariehdo,ih duwen ei pahn kadarkumwailwei.”⁴ Mwasahn mwekid riauo—Koht kadar Sapwellime Ieroso. Ieroso kadar Sapwellime ladu kan ohl oh lih en sampah—pwehn kapwaiada Sapwellimara doadoahk.

Kitail sohte anahne pwuriamweiki ni atail esehda me irail kan me malipilipdahr en wia doadoahk en Kauno sohte wia aramas unsek kei. Soai tohto nan pwuhk sarawi me oaritikiada duwen ohl oh lih me maliplipdahr sang Koht pwehn kapwaiahda doadoahk laud ehu—sapwellimen Samatail Nanleng pwutak oh serepein mwahu kei—malipilipdahr pwehn wia arail pwukoah kan nan Mwomwohdiso, nannantiong en wia arail kak koaros, ahpw sohte emen irail me unsek. Met iei ih duwen kitail rahnwet.

Nin duwen luwet kan oh soh itar kan en aramas, ia mwomwen atail kin doula mwowe oh sewese oh utungada emenemen? E kin tepda nan pwoson—uhdahn pwoson mehlel Kauno Sises Krais. Pwoson Sounkomouro me wia tepin koasoandi nan padahk oh rongamwahu en Krais.

Sounpar kei samwalahro I patohla nan Sahpw Sarawi. Ni aht daudaulih wasahn wiahda kadiring ehu, kaun en BYU Jerusalem Center peidek rehi ma I kilangehr weren kadiring ehu. I saikinte, kiht eri uhdi. E kasalehiong ie weren kadiring kei sang nan wasahn wiahda kadiringo. Irail inenen tikitik mehlel.

Ngehi eri tamanda en Sises padahko: “Kumwail en ese pwe ma mie pwoson rehmwail, mehda ma e pahn uwehte weren kisin kadiring kis, kumwail pahn kak ndahng nahna wet, ‘Tohrekweisang met, tohrekla mwo,’ a e pahn wiawi. Kumwail pahn kakohng mehkoaros.”⁵

Ma atail pwoson uwehte kisin weren kadiring ehu, Kauno kak sewesei kitail en kamwakid nahna kan en kamwaros oh peikasal nan doadoahk kan me mih mwohtail ni atail papah seri en Koht kan, iangahki atail peneinei kan, tohn Mwomwohdisoht, oh irail kan me saikinte iangala Mwomwohdisoht.

Riei ohl oh lih akan, atail mour kak direkihla pwoson, popohl, peren, koapworopwor, oh limpoak ni atail kin pwoson Krais ni mehlel—tetehn pwosono uwehte weren kadiring kis.

Elder George A. Smith tamanda kaweid kei me Soukohp Joseph Smith kihong ih. “E ndahng ie I en dehr mwarosala, tetehn soangsoangen kahpwal kan kapeliepene. Ma I kihrla nan pwoahr me keieu loal nan Nova Scotia oh nahna en Rocky Mountain koasokehda pohi, I sohte anahne mwarosala ahpw tengetengedi, doadoahngki pwoson oh ahneki eimah oh ni imwio I pahn uhdahn powehdi mehkoaros.”⁶

Kitail anahne tamataman en Pohl kehkehliko: “I kakohng mehkoaros sang ni manaman me Krais kin ketikihong ie.”⁷ Ni atail esehla met e wia ehu kisakis kesempwal sang Koht.

Me patehng kisakis kan me I koasoiahier, iet pil ekei. Met I pahn koasoia pil ekei kisakis en rahn en Sapad, kamadipw sarawi, papah mehteikan, oh kisakis soh weliepe sang Koht atail Sounkomouro.

Manaman en rahn en Sapad iei dahme kitail kin ale nan kaudok oh ni imwatail iei peren, popohl oh kansenamwahu en pepehm Ngehn en Kauno ni sohte me kerempwa.

Me tohto me kin mweidehng irail en mihmi pohn internet nan neirail sehl pwohn kan—sikirihn kan dakdaker meserail kan nihrahn oh nihpwong oh mehn rongorong kan uhsang nan salengarail kan eri perehla kisin ngihl tikitik en Ngehno. Ma kitail sohte diar ansou me kitail sohte pahn perehla salengatail, kitail sohte kak rong kepitien Ih me mahsanih, “Nennenla oh ese me iei ngehi Koht.”⁸ Sohte mehkot sapwung ni atail kin doadoahngki dipwisou en mwehi kapw wet me kepikpikda sang rehn Kauno, ahpw kitail anahne doadoahngki ni pwung. Tamataman kisakis en rahn en Sapad.

Kapai en ale kamadipw sarawi nan kaudek en kamadipw sarawi sohte konehng en wia mehkot me kitail kin wia ni seulamalam de mehkot me kitail ahnla wia. Minit te 70 nan erein wihko pwon me kitail kin uhdi oh diar meleilei, popohl, oh peren nan atail mour kan.

Ale kamadipw sarawi oh kalipwelipwa atail inou kan wia kilel ehu sang rehtail ong Kauno me kitail kin tamataman Ih ansou koaros. Sapwellime Tomwo wia kisakis kesempwal ehu sang Koht.

Papah sapwellimen Sahm Nanleng aramas akan wia ansou mwahu ehu en idawehn karasaras en Sapwellime Ieros Kempoakeho ni atail papah emenemen.

Ekei ansou en papah koasoandier—nan atail peneinei, atail malipilip kan en Mwomwohdiso, oh iang patehng pwihn en sawas kan nan wasahn kousoan kan.

Tohn Mwomwohdiso kan—ohl oh lih akan—sohte konehng peikasal—ma irail men iang usuhs eng nan pwukoahn wehi nan arail wasahn kousoan. Mie anahnepen atail madamadau kan rahn wet oh ong atail sukuhl kan, kahnihmw kan oh atail wehi kan. Wasa me democracy momourie, e wia atail pwukoa en tohn wehi en usada ohl oh lih me mehlel kan me men iang papah.

Miehte ansoun papah kan me sohte koasoandi—sohte mie pekipekpe—oh kin dierek ni atail kin pengla oh tuhong mehteikan nan mour wet. Tamataman Sises padahkihong loaiero me kitail anahne poakehng Koht oh mehn mpatail kan duwe kitail ni eh karasarasiki olen Sameria mwahuo.⁹

Papah kin langahda wenihmw ehu me elehieng kitail en wehwehkihla duwen mour oh doadoahk en Krais. Pwuhk sarawi padahngki me E ketdohn papah. “duwehte Nein Aramas me ketdo, kaidehn pwe aranas akan en papah, a pwe en papah aramas akan oh pwe en tohnmeteikihla moure, pwe me ngeder en maiauda.”¹⁰

Peter ele kawehwehda keieu mwahu duwen en Sounkomouro pwukoa nan lepin lokaia limau ni eh koasoia Sises, “E ketiseli wasa koaros, ketin wiahda me mwahu.”¹¹

Kauno Sises Krais iei kisakis me keieu kesempwal sang Koht. Sises mahsanih, “Ngehi me ahl, ngehi me mehlel, ngehi me mour, sohte me kak kolahng Semei ma soh ngehi.”¹²

Nihpai kawehwehda kesempwal en atail Sounkomouro ni eh koasoia me, “Se kin koasoia Krais, se kin pereniki Krais, se kin padahngki Krais, se kin kokohpki Krais, oh se kin ntingiedi nin duwen aht kokohp kan pwe nait serihkan en kak ese ia wasa irail kak diar mahkpen diparail kan.”¹³ Kitail anahne kolokol Krais nan poahsoan en atail mour kan ansou koaros oh wasa koaros.

Kitail anahne tamataman me iei Mware me kin pwarada nan atail wasahn kaudok kan; kitail pepdaisla ni Mware; oh kitail katengtengdi, kasarawihla, kapaida, oh katengtengpene nan pwopwoud ni Mware. Kitail ale kamadipw sarawi oh inoukihda en pwekadahng pohtail Mware—oh wiahla Souleng mehlel kei. Keimwsekla, kapakap en kamadipw sarawio peki kitail en “tamataman ih ansou koaros.”¹⁴

Ni atail kaunopehng Rahn Sarawi en Ihster lakapw, kitail anahne tamataman me Krais me keieu unsek. Ih me Sounkopwung mehlel, Weliepatail poatopoat, Soundoar kapai, Silepensihpw Mwahu, Mesaia, Kempoakepatail mehlel oh pil me tohto. Iei Ih me wia kisakis keieu kesempwal ong kitail sang Samatailo.

Nan atail mour en tohnpadahk, mie atail anahn tohto, madmadau, oh pwukoa tohto. Ahpw, ekei mwekid kan anahne en kin wia poahsoan en atail towe Mwomwohdisoht. “Ihme” Kauno ketin mahsanih, “ahneki pwoson oh koadohki pwukoa me I kihong uhkehr; sewese me luwet pwekada peh kan me mwotoudi, oh kakehlaka nehn me luwet kan.”¹⁵

Met iei Mwomwohdiso me kin mwekmwekid! Iei mwomwohdiso mehlel! Met iei rongamwahu mehlelo me kitail kin sewese, pwekada oh kakehlaka irail me anahne sawas ni palingehn oh paliwar. Pwehn wia met, kitail anahne pwarek irail. oh sewese irail,¹⁶ pwe arail kadehdekan en arail pwoson Sahmo oh Sises Krais oh Sapwellime Tomwo pahn angkehdi nan arail mohngiong kan.

Kauno en ketin sewese oh kapai kitailda pwehn kesempwaliki atail wia tohn Sapwellime Mwomwohdiso kapwurpwurdohu. I kapakapki kitail en poakehng sapwellimen Sahm Nanleng serihkan koaros oh kak kilang arail anahn kan oh kak men sapeng arail peidek kan oh madmadau kan me pid rongamwahuo ni mwohmw sansal oh sapan kan me pahn kalaudehla wehwepene oh sapan pene nanpwungatail.

I kadehde me Sises Krais iei atail Sounkomour. Dahme kitail pahn kasukuhlki nan kapokon lap wet pwildohng kitail ni kamarain sang wahnpoaron kan, soukohp kan, sang Kaun Lapalap kan oh riatail lih akan me wia Opisihr Lap akan nan Mwomwohdisoht. I kapakapki ni karakarahk, popohl oh meleilei en Kauno en ieiang emenemen kitail ni mwaren Sises Krais, amen.