Mehkot Tikitik oh Mengei Kan

Riei ohl oh lih akan, duwehte kumwail, padahk kan, koul oh pepehm en ehupene me mie inenen sair ie oh kakehlailihie oh kamarainihieda. I kamehlele me kumwail pil iang ie kaping kalahngan ong riatail ohl oh lih akan ni arail wia tohn doadoahk en Kauno kakehlailihkinkitailda pepehm en ehupene me miehier.

I kaping kalahnganki ei pahn koasoi ong pokon wet ni rahn Sarawi oh Ihster wet. Rahn wet kitail ieiang souleng teikan kaukawawih Iasadahn Kauno Sises Krais. Ong towehkan en Mwomwohdiso en Sises Krais en Souleng en Imwin Rahn akan, Iasadahn Sises Krias me utungada atail pwoson.

Pwehki kitail kamehlele irehkan nan Pwuhk Sarawi oh Pwuken Mormon me pid Iasadahn Sises Krais, kitail pil kamehlele padahk tohto nan iren pwuhk sarawi kan me kitail koaros me momour pohn sampa pil pahn iasada. Iasadaho kiheng kitail dahme Wahnparon Peter koasoia “koapworopwor me momour” (1 Peter 1:3). Koapworopwor momour wet iei me kitail kamehlelehki me mehla sohte wia keimwseklahn atail mour ahpw e wia irair ehu nan en Sahm Nanleng pilahn kapai ong komourlahn Sapwellime kan. Pilahno koasonehdi kiewekla sang mour wet ong mour poatopoat. Me pahsone kiewekla wet iei kapelsalehdala oh iasada me kak wiawi pwehki Iasadahn Kauno oh Sounkomour me kitail kaukawawih ni rahn Sarawi oh Ihster wet.

Nan mahsen en koul kaselel pwoat me ntingda sang Eliza R. Snow, kitail kin koulki:

Pallahsang koasondi sarawio oh popohl, kitail kin pokonpene nan mihting kan, me iangahki kapokon wet, pwehn padahk ong oh kangoange emenemen.

Ni mensengo I medewehda ien doadoahngki iren peneu me Alma wiahiong nah pwutak Helaman, me ntingdi nan Pwuken Mormon: “Mehkot tikitik oh mengei kan me kin kapwarahda wah laud kan” (Alma 37:6).

Kitail kasukuhlkiher soahng tohto me tikitik oh mengei me wia kisehn rongamwahu en Sises Krais. Kitail anahne kataman me mwurin ansou reirei ehu kisin ape tikitik pwukat pahn kapwarahda mehkot laud tohto. Padahk tohto me pid ire wet wiawisangehr rehn Kaun Lapalap akan oh sounpadahk kaselel teikan. Ire wet me nohn kesempwal kahrehda I anahne kapwurehieng.

I kilangada mehkot me katamanehng ie manaman en mehkot tikitik oh mengei me wereilahr ni ei wie alialu ehu ni mensengo. Iet kilel me I aleo. Siment mosul oh kehlail en wasahn aluho pwalehr. Da mehkot laud oh kehlail pahn wasao me kapwalang? Soh, wasao pwal sang ni kalewen tuhke tikitik ehu me wie oasoasada wawai wasao. Iet pil ehu karasaras me I kilang pohn oapwoat ahl tohrohr.

Kilel

Saidwoak o pwal

Kilel

Pil ehu pwal nan saidwoako

Uwen kehlail en ape me kapwalang wasahn alu siment mosul ko inenen tikitik sohte kak sosohngdi ni ehu rahn de sounpwong, ahpw pwehki e wie momour ansou reirei e wiahla mehkot me inenen kehlail.

Eri uwen kehlaillahn mehkot tikitik oh mengei ni eh kin wiewiawi wereila e duwehte me kitail kasukuhlksangehr nan pwuhk sarawi kan oh sang soukohp ieias kan. Medewe kasukuhl en iren pwuhk sarawi me kitail alehier pwehn kahluwa atail mour kan. De medewe kapakap kan oh kapakap kelepwikdi kan en peneinei me Souleng en Imwin Rahn akan ahnlahr. Medewe ieiang seminary en me pwulepwul kan oh institute ong mwahnakapw oh peinakapw kan. Kemwekid pwukat kin mwomwen tikitik oh mengei, ahpw ni eh kin wiewiawie kin kakehlailih, pwekada oh kakairada palingenatail. Met wiawi pwehki ehuehu me tikitik oh mengei pwukat kin ehuohng Ngehn Sarawi, Sounkadehde me kin kamarainih kitail oh kahluwai kitail lahng me mehlelo me Presiden Eyring kawehwedahr.

Pilehu wiepen pwekada oh kakairada palingehn iei atail kin songosong en koluhkihla, mendahte ma kisin sapwung tikitik kei. Pein atail mehn kairoir kin sewesei kitail en kilang uwen atail sohitar and ia mwomwen atail kak mwahula. Songen koluhla wet kin anahne en wiawi mwohn atail kin ale kamadipw sarawi. Ekei ire me kitail anahne medewe nan irair en koluhla wet sansalehr nan koul wet “Have I Done Any Good?”

Mehlel mepwukat me tikitik, ahpw ni mehlel e wia mehn karasaras mwahu en dahme Alma padahkiheng nah pwutak Helaman: “Oh Kauno Koht ketin koadohke wiepe kan me kin kasalehda sapwellime pwukoa lap poatopoato; oh sang ni mwekid tikitik pwukat Kauno … komourla aramas tohto” (Alma 37:7).

Presiden Steven C. Wheelwright kawehweda en Alma padahk ngenin pwoatet ong ehu pokono nan Brigham Young University–Hawaii. “Alma kawewehiong nah pwutako me mehlel Kauno kin ketin wia mepwukat ma kitail kin pwoson Ih oh idawehn sapwellime kaweid tikitik oh mengei kan, E kin ketin kapaiakin kitail manaman tikitik kan rahn koaros oh mwurin ansou ehu mehkot kesempwal.”³

President Howard W. Hunter padahngki me “mwekid sohte katepe kan me kin kalap wiewiawi rahn koaros … ihme kin keieu sansalada nan mour en mehteikan, me rasehng soahng kan me sampah wiahkilahr mehkot kesempwal.”⁴

Ehu madmadau kehlail me duwehte padahk wet kohsang rehn Sounkoukosonned en mahs Senator Dan Coats sang Indiana, me ntingiedi “Ihte kaunopada me ong pilipil kesempwal me kak wekidala mour, de wehi, iei madmadau tikitik de koasondi me mwoamwen sohte katepe me kin kaunop kitailda pwe kitail en kak wiahda ehu koasondi me inenen kesempwal.”⁵

Madmadau de koasondi sohkatepe kan iangahki mwoamwen atail doadoahngki atail ansou, dahme kitail kin kilang nan delepeisin oh internet, dahme kitail kin wadek, mahlen oh koul me kitail kin kilekilang de rongorong nan atail ohpis oh nan imwatail kan, mehn kamwait kan oh atail kin koasonehdi kitail en mehlel. Pil ehu me tikitik oh mengei iei atail kin meleilei oh pereperen nan atail mwekid kan.

Me tikitik oh mengei mwahu pwukat sohte pahn kahrehda atail wiahda mehkot laud ihte ma kitail kin kalap wiewia me mwahu pwukat ansou koaros. Dene Presiden Brigham Young koasoia me “Atail mour kan kin wiawihkihda mwekid tikitik oh mengei kan me kin kasalehda ni ahr kapatpene, oh oralapiada mour unsek en ohl de lih emen.”⁶

Piripir en mehn kair kan oh kieweklahn tiahk kapelkitailpenehr oh pahn kaluetiala atail wiewia ma kitail sohte poden mwasmwasahn. Pwehn kak wenla mwowe oh alehdi mour soutuk, kitail anahne poden dadaur lel ni imwi. E pahn sawas ma kitail patehng ehu pwihn en aramas me wie seisei kohwei mwowe ni atail wia ehu pwihn. Pwehn kadaiala karasaras wet, uwen kehlail en ahdo, ma kitail uhdi sang atail seisei, kitail pahn peidihla ni kapin pihlo oh lel wasa me kitail pahn uhdahn lel ie ma kitail sohte nannantihla mwowe.

Mwurin ah soaiahda mwekid tikitik ehu me kahrehda mehkot laud, Nihpai ntingiedi me “Oh met se esehier me sang ni mehkot me tikitik Kauno kin ketin kak wiahkihda mehkot me laud” (1 Nephi 16:29). Karasaras wet pil pwarada nan Kadehde Mering. Kitail wadek wasao mwomwen en mehn Israel kan arail ale kahpwal sang sineik kei. Tohto me mehkihla en sineik ko ngalis irail (tehk Nempe kan 21:6). Ni en Moses eh kapakap peki sawas, e ale kaweid en wiahda “emen sineik, oh langahda ni apwoat tuhkehn.” Eri “mehmen me sineik kan pahn ngalispene en kak kilengdahng oh e ahpw pahn mwahula” (iretikitik 9). Mehkot me inenen tikitik ahpw imwsekla ni mehkot manaman! Ahpw ni en Nihpai ah kawehwe ansou me e padapadahngki karasaras wet ong irail kan me pelpelian Kauno, tetehn Kauno kaunopadahr ahl mengei pwoat me pahn kapitirailla, “pwehki mengei en ahlo, oh sohte pil apwale, a tohto me mehkilahr” (1 Nephi 17:41).

Karasaraso oh padahko katamanehng kitail me uwen mengei en ahlo de mengei en doadoahko sohte kak wehwehki me e sohte kesempwalong kitail en men wia me pwung.

Pil duwehte mwekid en sapeik tikitik kan de atail sohte kin wia wiewia pwung tikitik kan kak kahrehiong atail wiahda sapwung laud kan me kitail sohte konehng wia. Ehu karasaras pato nan Mahsen en Eripit kan. Pwe sohte me kak sohngada kasuwed kan ong paliwaratail sang apwot sika, de ehu kep en sakau de ehu maru de wini suwed. Ahpw mwurin ansou ieu, kitail kak tengala nan mepwukat. Tamataman ohlahn wasahn aluo sang ni oasoasadahn kalewen tuhke tikitik ehu. Ihte me mehlel, paisuwed me kin pwaradahsang atail alahle mehkot me kitail kak ahnla oh tengala ie, rasehng wini suwed me kin kawehla paliwaratail de kasdo suwed me kin kasaminehla atail madmadau, kin kak sohte wiawi ma kitail sohte ale de sair douluhl.

Sounpar kei samwalahro, President M. Russell Ballard kawehwehiong tohn kapokon lap o “ia mwomwen mehkot tikitik oh mengei eh kak suwediong oh kawehla ahn emen aramas mour.” E padahngki me: “Duwehte kisin dereht luwet me kin pidipidpene, mwuri e kin wiahda kisin sahl ahtikitik oh mwuri sahl laud, kisin pwidik en sahl pwukat kin patpene kin kak apwal en ohla. Kitail anahne tehk mwahu soahng tikitik oh mengei kan me kin kak kalaudehla palingenitail.” E nda, “Pil, ni ansouohte kitail anahne tehk mwahu pwe sehdan kin kak doadoahngki mehkot tikitik oh mengei en kaweid kitail ong nan kahpwal oh kasongsong.”⁷

Presiden Wheelwright patohwenda ire ehu me duwehte met ong ehu pokon nan BYU–Hawaii. “Atail sohte kin kapwaiahda me tikitik oh mengei kan me kin kaluwetehla pwoson, kauhdi manaman, oh kalohmwatih eri kauhdi atail mwekmwekid kolahng Kauno oh Sapwellime wehi kitail eri weliankihda atail raprapahki wehin Koht ki soahng kaperen kan en sampa.”⁸

Pwehn irehdi kekeirdahn wiewia suwed kan me kin kauwehla keirdahn palingenitail, kitail anahne idawehn loiloi tikitik en ngehno me pid me tikitik oh mengei kan. Elder David  A. Bednar kawehwe nan ehu Kapokon en Lih nan BYU me: “Kitail kak kasukuhlki duwen sampa oh kesempwal en pali ngehn sang ni wiepen … dingiding en pihl ong nan pwehl me inenen wawai, eh weksang widek de kakus pil laud ong wasa me ele sohte anahnepe.

E kawwehwe me: “Dingiding en pil me sohte kin uhdi kin kihrla mehlel nan pwehl oh kalamwuri pwehlo ni uwe ehu me kahrehda tuhke kan kin pweida. Met me duwehte ma kumwail oh ngehi kin tengedi oh poden alahle dingiding kan en ngehno eri kalewen rongamwahuo kak kihrla loal nan atail mour, kak pahsonda kehlail oh teng oh kak kapwarahda wah lingan oh iou.”

E doula koasoia me, “Audaud en me tikitik oh mengei en pali ngehn kin wahdo mehkot laud kin tengedi oh poatopoat, koaloalehla kaudek oh weliakapw mwuledek ong Kauno Sises Krais oh Sapwellime rongamwahuo.”⁹

Soukohp Joseph Smith padahngki me koasondi wet patohier ni koasoi oh miehier nan Doctrine and Covenants. Aramas en dehr wiah me irail mehkot tikitik kei; pwe me dir me pid souleng kan me kin liki mepwukat (Tehk D&C 123:15).

Me pid arail tepin songosong en kauwada Mwomwohdisoht nan Missouri, Kauno ketin kaweid ren kanengama pwe mehkoars uhdahn pahn pweida ehu ansou (Tehk D&C 64:32). I eri ketkihda padahk kaselel wet, eri dehr pwangahkihda wiewia me mwahu, pwe kumwail koaskoasone pahson en doadoahk laud ehu. Oh me tikitik kan me kin tihengodo mwohn me laud o (Tehk D&C 64:33).

I kamehlele me kitail koaros men idawehn en Presiden Russell M Nelson kehkehlik en wenla mwowe “pohn ahl en inouo.”¹⁰ Atail koasondi en wia met pahn kehlailkihla atail poden kapwaiahda “me tikitik kan” me kitail kaskuhlkihsangehr rongamwahu en Sises Krais oh sounkaweid kan en Mwomwohdisoht. I kadehdeki Ih oh peki Sapwellime kapai ong koaros me kin raprapahki en kekeid pohn Sapwellime ahl en inou ni mwaren Sises Krais, amen.