Ang Pakigsaad Mahangturon

Sa dihang teenager pa ko, ang among presidente sa Young Women mihatag sa kada batan-on nga babaye og usa ka regalo: usa ka litrato sa templo. Siya naghisgut kanamo kabahin sa mga pakigsaad ug magpakabuhi nga limpyo. Dayon siya miawhag kanamo sa paghimo og tumong nga moadto sa templo sa umaabot nga adlaw.

Kinasingkasing nakong gisunod ang tambag niini nga sister ug mihukom nga himoong prayoridad ang pagpangandam. Walay templo sa Costa Rica nianang higayona, apan akong nasayran gikan sa akong bag-ong pagpabunyag unsa ang pakigsaad, ug ako naglantaw sa unahan sa oportunidad nga makahimo og dugang mga pakigsaad uban sa Ginoo.

Walay usa sa akong pamilya ang miyembro sa Simbahan nianang higayona, busa ang ebanghelyo wala gitudlo sa among panimalay. Sa gihapon, mihukom ko nga ako makakat-on sa mga baruganan sa ebanghelyo sa akong kaugalingon ug mosunod niini. Ang akong pagpangandam naglakip sa pagtambong og seminary, bisan kini gipahigayon sa sayo kaayo sa buntag. Kini naglakip nga dili makig-date hangtud mag-16 anyos ko. Ug kini nagpasabut nga mosunod sa balaod sa kaputli—siguradong usa ka butang nga dili inila o gani komon sa kadaghanan sa akong mga kaedad, apan usa ka butang nga nasayud ko nga akong buhaton tungod kay ako misaad sa Ginoo nga akong buhaton.

Ang pagtuon sa mga kasulatan, sa seminary ug sa akong kaugalingon, milig-on sa akong desisyon sa pagpuyo og putli, limpyo nga kinabuhi. Nakahinumdom ko nga pihong nadasig sa 2,000 ka batan-ong mga sundalo. Sama sa mabasa sa Alma 53:20–21, kining batan-ong mga lalaki “hilabihan ka walay kahadlok tungod sa pagkaisug, ug usab sa pagkakusgan ug pagkaabtik; apan tan-awa, kini dili mao ang tanan—sila mga tawo nga matinud-anon sa tanan nga panahon sa bisan unsa nga butang nga gisalig kanila. … Sila mga tawo sa kamatuoran ug kaligdong, kay sila gitudloan sa paghupot sa mga sugo sa Dios ug sa paglakaw sa matarung sa iyang atubangan.” Gusto kong magmatinud-anon sa mga butang nga gisalig kanako, lakip ang akong mga pakigsaad sa pagbunyag.

Nadugangan ang akong pagsabut sa mga pakigsaad sa dihang gitawag ako sa pagserbisyo sa El Salvador San Salvador East Mission. Sa dihang akong nadawat ang akong endowment sa templo, nakahunahuna ako sa Doktrina ug mga Pakigsaad 82:10: “Ako, ang Ginoo, mapugos sa pagtuman kon kamo mobuhat sa unsa nga Ako misulti, apan kon kamo dili mobuhat sa unsa nga Ako misulti, kamo dili makaangkon og saad.” Sa akong tibuok misyon, ang ideya sa pakigsaad—nga kita mobuhat sa atong bahin ug ang Ginoo mobuhat sa Iyaha—nakapadasig kanako sa pagbuhat sa akong pinakamaayo. Samtang ako kining gibuhat, ang akong mga kompanyon ug ako napanalanginan sa among buhat.

Ang akong misyon dugay na kaayo, apan ako nagpadayon sa pagkaplag og kalig-on gikan sa pagsunod sa akong mga pakigsaad. Napanalanginan ako sa pagserbsiyo og pito ka tuig sa Templo sa San José Costa Rica. Ang pagserbisyo isip usa ka temple worker nakahatag kanako og mga oportunidad nga sa kanunay makahinumdom sa mga pakigsaad nga akong gihimo. Nakakaplag ako og susamang mga pahinumdom diha sa pagserbisyo sa organisasyon sa Young Women, diin ako nakasulay sa pagtudlo sa kaimportante sa mga pakigsaad sama sa gitudlo sa akong mga lider kanako.

Ang paghupot sa atong mga pakigsaad sa kanunay dili sayon. Sama pananglit, daghang mga tawo ang naglantaw sa balaod sa kaputli (o, sa pipila ka kahimtang, relihiyoso nga pamatasan sa kinatibuk-an) nga karaan na. Maayo gani, wala ko mobati og dugang pagpamugos gikan niadtong dili sama nako og pagtuo o gikan sa dagan sa panahon. Ako naghinumdom sa akong gibati isip usa ka batan-ong babaye sa dihang ang among lider miawhag kanamo sa pagpangandam ug sa pagpuyo alang sa mga pakigsaad sa templo. Ang desisyon nga akong gibuhat sa una mao gihapon ang akong gisunod karon.

Lig-on akong makabarug sa akong mga desisyon tungod kay kini dili lang mga desisyon nga gihimo ra nako, para sa akong kaugalingon. Hinoon, kini mga desisyon nga akong gihimo isip kabahin sa pakigsaad uban sa usa ka mahigugmaong Langitngong Amahan. Dili igsapayan unsa ang isulti sa kalibutan. Misaad ko sa Dios nga akong sundon ang Iyang mga sugo. Mahitungod kini sa dungog. Ang mga pakigsaad nga akong gihimo sa bunyag ug ang mga pakigsaad nga akong gihimo sa templo balido karon sama niadtong adlaw sa dihang gihimo ko kini. Ang pakigsaad uban sa Dios mahangturon.

Ang paagi sa pagpuyo nga gisugo sa Dios kanato dili kanunayng sayon, apan mopamatuod ko nga kini posible. Kita makaangkon og pagsalig ug gahum pinaagi sa pagsunod sa atong mga pakigsaad, ug kita makasigurado nga ang Langitnong Amahan dili mobiya kanato nga mag-inusara. Uban Kaniya sa atong kiliran, kita makabuhat sa tanang butang (tan-awa sa Moroni 7:33).