Ang Akong Cross-Stitch nga Gamayng mga Kabayo

Ako nag-cross-stitch og litrato sa duha ka gamayng mga kabayo nga gitrabaho nako sulod sa usa ka tuig. Hapit na kini mahuman sa dihang akong nadiskobrehan nga nasayop ko sa kolor sa usa sa gamayng mga kabayo. Tungod kay kini usa man sa posible nga kolor alang sa kabayo, wala nako mamatikdi ang akong sayop hangtud akong nakita nga ang kolor sa gamay nga kabayo milahi sa tupad nga mga kolor diha sa canvas.

Nasagmuyo ako. Daghang panahon ang akong nagahin sa pagtrabaho sa litrato, ug ang paghunahuna sa pagtang-tang sa tanang mga stitches sa sayop nga kolor makapaluya. Naghilak, akong giablihan ang basurahan ug gilabay ang litrato.

Milingkod ko sa may lamesa diin akong gibutang ang akong kahimanan sa pagtahi nga naguol sa pagkawala sa akong nindot nga litrato sa gamay nga kabayo ug nagpadayon sa laing mga proyekto. Apan dili ko makahimo—dili ko makatugot nga mawala ang proyekto nga gihagoan nako pag-ayo. Akong giablihan ang basurahan ug gikuha pagbalik ang panapton. Ako nakakita og hinigtan sa likod sa sayop nga kolor ug hinay nga gitang-tang kini. Gibali ang litrato, gisugdan nako sa pagkuha ang hilo.

Usahay ang pagkuha dali ra. Sa ubang higayon lisud usab kaayo. Dili ko makasiguro nga mabalik kon unsay akong nabuhat. Usahay kinahanglan nakong putlon ang hilo sa usa ka tahi kada higayon. Ang akong anak nga lalaki mipahayag nga siya gihasulan nga ako mousab sa tanan aron mahimong ensakto. Cross-stitched nga litrato ra bitaw ni.

Samtang nanangtang ko sa mga tahi, nagsugod ko sa paghunahuna sa paghinulsol ug unsa kini ka lisud sa pagkorihir sa mga sayop nga akong nabuhat. Ang tinuod nga paghinulsol nagkinahanglan og dakong tinguha, paghago, ug pag-antus, apan angay kini sa paningkamot.

Samtang nag-usab ako sa pagtahi sa kabayo, napahinumduman ako nga ang paghinulsol nakapahimo sa Pag-ula ni Jesus sa pagtang-tang sa mansa sa sala gikan sa akong kinabuhi ug nakatabang nako sa pagbag-o. Ang akong “paghinulsol nga mga gamay nga kabayo” nagbitay sa akong balay, usa ka malumo apan klaro nga pahinumdom sa pagbuhat unsa ang matarung, dili gayud mohunong kon ako masayop, ug mahinumdom nga pinaagi sa paghinulsol, ang Pag-ula maoy mohulip sa kulang.