J. Reuben Clark Jr.: Usa ka Tawo nga Walay Samang mga Talento

Joshua Reuben Clark Jr. natawo sa Grantsville, Utah, niadtong Septyembre 1, 1871. Bisan tuod siya adunay gamay nga pormal nga edukasyon ug wala makatungha sa high school, ang iyang inahan nagtudlo kaniya, ug siya ganahan kaayo sa pagkat-on. Siya migradwar nga nanguna sa iyang klase sa University of Utah uban sa bachelor of science degree ug nagpadayon aron sa pagdawat og law degree sa Columbia University law school sa Siyudad sa New York.

Giminyoan ni Brother Clark si Luacine Annetta Savage sa Templo sa Salt Lake niadtong 1898, ug sila nahimong mga ginikanan sa upat ka mga bata.

Gamit ang iyang law degree ug malantip nga pangutok, si J. Reuben Clark Jr. nahimong usa ka inila sa propesyon sa legal ug sibil nga pagserbisyo nga nakapahimo kaniya nga mahinganlang U.S. ambassador sa Mexico niadtong 1930. Kana nga propesyon nahunong, hinoon, sa dihang si Brother Clark gipaluyohan isip Ikaduhang Magtatambag ngadto ni Presidente Heber J. Grant sa Unang Kapangulohan niadtong Abril 6, 1933. Bisan tuod siya usa ka high priest nianang higayona, siya dili usa ka General Authority. Siya naordinahan isip Apostol sa dihang pagkasunod siya gipaluyohan isip Unang Magtatambag ngadto ni Presidente Grant niadtong Oktubre 1934. Si Presidente Clark nagpadayon sa pagserbisyo isip magtatambag ni Presidente George Albert Smith ug Presidente David O. McKay.

Usa sa iyang daghang natampo ngadto sa Simbahan, kanang makita gayud mao ang ehemplo sa pagkamapainubsanon nga iyang gipakita sa dihang si David O. McKay nahimong Presidente sa Simbahan. Iyang gitawag si Presidente Clark nga mahimo niyang Ikaduhang Magtatambag. Tungod kay si Presidente Clark nakaserbisyo na isip Unang Magtatambag sa nangaging Unang mga Kapangulohan, ang pipila klaro nga naghunahuna nga siya nasilo, apan si Presidente Clark mipasabut: “Sa pangalagad sa Ginoo, dili mahinungdanon kon asang dapita ikaw mag-alagad apan kon sa unsa nga paagi. Diha sa Simbahan ni Jesukristo sa mga Santos sa Ulahing mga Adlaw, ang usa ka tawo molingkud sa katungdanan diin siya takus nga gitawag, sa katungdanan nga walay tawo nga mangayo ni mobalibad.”¹

Si Presidente Clark namatay niadtong Oktubre 6, 1961.