Mga Ganti sa Pagtukod Pag-usab

Tungod kay ako nagpuyo sa Shanghai, China, ako adunay oportunidad uban sa grupo sa eskwelahan ngadto sa Probinsya sa Sichuan sa habagatang kasadpan sa China sa pagtabang og tukod sa mga balay alang sa mga biktima sa linog nga miguba sa dapit mga pipila ka tuig na ang milabay. Nagtrabaho kami pag-ayo sa pagpahimutang sa mga bika [bricks], pagpala sa mortar, pagtulod sa mga karetilya nga puno sa mga bika, ug pagtunol sa mga bika ngadto sa “naglinya” nga mga tawo. Pagkasunod adlaw ang akong likod nanakit, ug ang akong mga gwantis nangabuslot. Hinoon, ang biyahe usa ka dili makalimtan nga kasinatian alang nako ug nakapalig-on sa akong pagpamatuod sa akong kaugalingon ug sa indibidwal nga bili sa matag tawo, usa sa mga hiyas sa Young Women.

Samtang ako nagtrabaho pag-ayo kada adlaw, nakamatikod ko nga ang akong pagtuo sa akong kaugalingong bili mitubo. Nindot ang akong gibati sa akong kaugalingon tungod kay ako naghimo sa mga butang sa pagpanindot sa sitwasyon sa pagpuyo niadtong wala kaayoy swerte kay kanako.

Kami adunay oportunidad usab sa pagbisita og eskwelahan sa maong dapit. Sa dihang miabut mi, usa ka pundok sa gagmay nga mga bata ang nagdagan paingon namo. Sa dihang akong nakita kining talagsaong gagmay nga mga bata, nakaila ko sa ilang indibidwal nga bili usab. Matahum silang tanan nga mga anak sa Dios, ug akong gibati gayud nga Siya nahigugma ug nakaila sa matag usa kanila.

Sa hapit na mahuman ang among biyahe miadto kami sa usa ka resort, diin kami adto maniudto. Sa among pag-abut didto, bisan pa niana, among nasayran nga kini naguba sa linog. Mao kadto ang labing grabe nga pagkaguba nga akong nakita. Gusto kong mohilak. Ang mga kisame ug mga bong-bong sa mga building nangatagak, ang mga kahoy sa duol nangatumba, ug dihay kadaot bisan asa. Usa ka dakong bato miligid gikan sa bukid ug midasmag sa kilid sa usa ka building, nga maoy nakaingon nga nalusno ang kisame ug ang bong-bong. Dihay usa ka sapatos nga diha sa usa sa mga hagdanan.

Samtang naghunahuna ako niini ug sa kamatuoran nga ang mga tawo nangamatay niini nga katalagman, naningkamot ko sa pagsabut kon nganong gitugutan sa Langitnong Amahan nga mahitabo kini. Wala ba Siya mahigugma kanila? Dayon ako nakahinumdom sa unsay among nahisgutan sa klase sa Young Women ug nakaamgo nga oo, Siya nahigugma kanila. Nakaila ug nahigugma Siya sa matag usa kanila. Kadtong nangamatay nianang adlawa mao ang tanang mga anak sa Dios. Sa sinugdanan, mas nakapasubo kini kanako sa paghunahuna niana. Apan nakaamgo ako nga kining mga tawhana didto sa kalibutan sa espiritu ug sila makabalik ngadto sa Langitnong Amahan pag-usab. Kini nga hunahuna nakapahupay nako ug mihatag nako og pagbati sa kalinaw.

Nasayud ako nga ako anak sa Dios, nga adunay talagsaong indibidwal nga bili. Kitang tanan mga anak sa atong Langitnong Amahan, kinsa personal nga nakaila nato. Nahigugma Siya kanato uban sa gugma nga mas lawom ug mas lig-on kay sa mahunahuna ni bisan kinsa kanato. Kini nga pagsabut natanom pag-ayo sa akong kasingkasing samtang ako nagtrabaho ug nagserbisyo sa mga tawo kinsa nag-antus pag-ayo sa linog sa Sichuan.