Brod, Committed na Ko

Duha ka managsoong lalaki ang mibarug ibabaw sa gamay nga pangpang nga nagdungaw sa lunsay nga mga tubig sa asul nga linaw. Kini mao ang usa ka inilang dapit nga kaambakan, ug ang managsoon kanunay nga maghisgot sa pagpangambak—usa ka butang nga nakita nila nga gibuhat sa uban.

Bisan tuod kon silang duha gusto nga moambak, walay usa kanila ang mouna. Ang kahabugon sa pangpang dili kaayo taas, apan alang sa duha ka batan-ong mga lalaki, daw ang distansya magkadugang sa diha nga sila mosugod na sa paghana og ambak—ug ang ilang kaisug dali nga mahanaw.

Sa katapusan, ang usa ka igsoon mibarug sa ngilit sa pangpang ug mihana na sa pag-ambak. Nianang higayuna ang iyang igsoon mihunghong, “Tingali kinahanglang maghulat na lang ta hangtud sa sunod ting-init.”

Apan, ang pagsugod og lihok sa unang igsoon nag-agni na kaniya sa pagpadayon. “Brod,” siya mitubag, “committed na ko!”

Siya mitampisaw sa tubig ug dali nga milutaw uban sa madaugon nga singgit. Ang ikaduhang igsoon misunod dayon. Human niana, silang duha nangatawa kabahin sa katapusang mga pulong sa unang batang lalaki sa wala pa moambak sa tubig: “Brod, committed na ko.”

Ang pasalig daw sama sa pag-ambak sa tubig. Bisan man kon kamo committed o dili. Bisan kon kamo nag-irog o nagbarug lang. Walay naa sa tunga-tunga. Kitang tanan nag-atubang sa mga panahon sa pagdesisyon nga makapausab sa tibuok natong kinabuhi. Isip mga miyembro sa Simbahan, kita kinahanglan gayud nga mangutana sa atong mga kaugalingon, “Moambak ba ako o magbarug lamang diha sa ngilit? Mopadayon ba ako o sulayan lamang ang temperatura sa tubig sa mga tudlo sa akong tiil?”

Ang pipila ka mga sala nahimo tungod kay nagbuhat kita og sayop; ang ubang mga sala nahimo tungod kay kita walay gibuhat. Ang pagkadili kaayo committed sa ebanghelyo ang mosangput sa pagkapakyas, pagkawalay kalipay, ug pagpakasala. Kini dili angay nga mahitabo kanato tungod kay kita mga katawhan sa pakigsaad. Kita naghimo og mga pakigsaad sa Ginoo sa dihang kita gibunyagan ug sa dihang misulod kita sa balay sa Ginoo. Ang mga lalaki naghimo og mga pakigsaad sa Ginoo sa dihang sila giorden ngadto sa priesthood. Walay butang nga mas importante kay sa paghupot sa pasalig nga atong gihimo uban sa Ginoo. Atong hinumduman ang tubag ni Raquel ug Lea ngadto ni Jacob sa Daang Tugon. Simple kini ug walay lipud-lipod ug nagpakita sa ilang pasalig: “Buhata ang tanan nga giingon sa Dios kanimo” (Genesis 31:16).

Kadtong kinsa dili kaayo committed maglaum lamang nga dili kaayo makadawat og mga panalangin sa pagpamatuod, hingpit nga kalipay, ug kalinaw. Ang mga bintana sa langit tingali dili kaayo moabli alang kanila. Dili ba binuang ang paghunahuna nga, “Mopasalig ko sa akong kaugalingon karon og 50 ka porsyento, apan inig pakita ni Kristo sa Ikaduhang Pag-anhi, mopasalig ko og 100 ka porsyento”?

Ang pasalig alang sa atong mga pakigsaad uban sa Ginoo mao ang resulta sa atong pagkakabig. Ang pasalig ngadto sa atong Manluluwas ug sa Iyang Simbahan nagpalambo sa atong kinaiya ug naglig-on sa atong espiritu aron kon ikahimamat nato si Kristo, Siya mogakos ug moingon, “Maayong pagkabuhat, maayo ug kasaligan nga ulipon” (Mateo 25:21).

Adunay kalainan tali sa katuyoan ug sa paglihok. Kadtong kinsa naghunahuna lamang sa pagpasalig mahimong makakita og pamalibad sa matag lihok. Kadtong kinsa tinuod nga mopasalig moharung sa ilang mga hagit sa tukma gayud ug moingon sa ilang kaugalingon, “Oo, kana mahimong usa ka maayo nga rason sa paglangay, apan mihimo ako og mga pakigsaad, ug mao nga akong himoon ang unsay akong gipasalig nga buhaton.” Gisiksik nila ang mga kasulatan ug kinasingkasing nga nagtinguha sa giya sa ilang Amahan sa Langit. Ilang gidawat ug gipalambo ang ilang mga calling sa Simbahan. Sila mitambong sa ilang mga miting. Ilang gihimo ang ilang home o visiting teaching.

Usa ka proverbio sa German nag-ingon, “Ang mga saad nahisama sa takdol nga bulan. Kon kini dili tumanon dayon, kini magkakunhod sa matag adlaw.” Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita mipasalig sa paglakaw diha sa dalan sa pagkadisipulo. Kita mipasalig sa pagsunod sa ehemplo sa atong Manluluwas. Hunahunaa kon sa unsa nga paagi ang kalibutan mapanalanginan ug mausab alang sa kaayohan sa dihang ang tanang mga miyembro sa Simbahan sa Ginoo magkinabuhi subay sa ilang tinuod nga potensyal—tinuoray nga nakabig ug mipasalig sa pagtukod sa gingharian sa Dios.

Sa pipila ka paagi, ang matag usa kanato kinahanglang modesisyon samtang nag-ambo sa tubig. Kini akong pangaliya nga kita makabaton og hugot nga pagtuo, makapadayon, makaatubang sa atong mga kahadlok ug mga pagduha-duha uban sa kaisug, ug moingon sa atong mga kaugalingon, “Committed na ko!”