Mi Vida, Mi Historia

Si Carmen natawo sa relihiyusong pamilya sa Siyudad sa Guatemala, Guatemala. Sa dihang siya nag-nuwebe anyos, ang mga sister missionary mitudlo sa iyang pamilya sa ebanghelyo. Siya nalingaw nga motambong sa Primary ug maghisgot og bag-ong pagbati sa kalipay sa iyang pamilya. Usa ka tuig ang milabay ang pamilya nabunyagan. Siya miingon, “Kini talagsaon, talagsaon nga panahon.” Siya nakahinumdom ni Presidente David O. McKay (1873–1970) nagbisita sa Guatemala niadtong 1954 ug nagtudlo sa mga bata kabahin sa baruganan sa ikapulo. Sa edad nga 17 siya gitawag sa pagserbisyo sa Central American Mission ug mapasalamaton nga mipakigbahin sa “paglaum sa mas maayo nga kinabuhi ug mahimong mag-uban hangtud sa kahangturan.”

Si Miriam lumad nga taga-Brazil. Sa dihang gusto niya nga moserbisyo og misyon, gikompleto niya ang mga dokumento para misyon. Pito ka semana ang milabay, uban sa iyang pamilya nga nagtapok sa balay, iyang gibasa ang sulat nga nagtawag kaniya ngadto sa Utah Salt Lake City Temple Square Mission. Siya miingon, “Sa dihang akong gibasa ang sulat, makapaikag nga ang akong pamilya misyagit sa samang paagi sa dihang ang team sa football sa Brazil naka-score. Nalipay sab ko, ug nasayud ko nga ang Ginoo ang nagpadala kanako.”

Sa wala madugay human matawo si Nelson sa Asunción, Paraguay, nahimamat sa iyang mga ginikanan ang mga misyonaryo. “Usa ka adlaw ang akong papa didto sa balkon sa balay ug nakakita nila ni Elder Higbee ug Elder Johnson apan siya wala masayud nga sila mga misyonaryo,” nahinumdom si Brother Mousqués. “Siya misugo sa akong igsoon nga babaye sa pagpagawas og duha ka mga lingkuranan tungod kay, siya miingon, ‘Kadtong batan-on nga mga lalaki mousab sa atong mga kinabuhi.’ Sa dihang ang mga misyonaryo nanuktok sa pultahan, iya kining giablihan ug miingon, ‘Sulod. Nagpaabut gyud kami ninyo.’ Ang akong amahan ug ang tibuok pamilya nagpamiyembro sa Simbahan.”

Si Robin nagtubo sa kalisud didto sa Ecuador, apan gusto niya nga mas molambo. Kausa, samtang nagtrabaho sa usa ka plantasyon 12 ka oras sa usa ka adlaw, siya nag-ampo para sa giya, ug mikilat atol sa iyang pag-ampo. Nakita kini ni Robin isip mensahe sa Dios nga ang kinabuhi adunay saad. “Nasayud ko nga ang akong mga pagbati gikan sa Dios,” mihinumdom si Robin. Iyang nasayran nga pinaagi sa hugot nga pagtuo, mausab niya ang iyang kinabuhi. Sa edad nga 16 mibiya aron motrabaho ngadto sa Guayaquil, diin siya nabunyagan. Ang padayon nga inspirasyon migiya kaniya ngadto sa Brigham Young University, diin natuman ang iyang ambisyon nga makabaton og edukasyon.

Si Sister Brock nakahinumdom nga namalandong sa kahulugan sa kinabuhi sa dihang singko anyos pa lamang siya. Sa dihang siya usa ka tinedyer sa Venezuela, ang mga misyonaryo mitudlo kaniya ug sa iyang pamilya sa ebanghelyo, ug sila nabunyagan. Puno sa hugot nga pagtuo, siya gitawag nga mahimong presidente sa Primary sa branch sa edad nga 16. Karon, human sa tibuok kinabuhi nga pagserbisyo, iyang naamguhan nga alang kaniya, “ang hugot nga pagtuo usa ka pagpili.” Siya mipasabut, “mipili ko nga butangan og luna ang Manluluwas sa akong kinabuhi. Nasayran nako nga ang Pag-ula mao ang labing talagsaon, dili hinakog nga buhat sa gugma alang sa tanang katawhan. Akong Manluluwas ug Manunubos, ang Tighatag sa kalinaw, nahimo nakong labing suod nga higala—makanunayon alang kanako.”

Si Lincoln nagpuyo uban sa iyang pamilya sa Santiago, Chile, hangtud nga ang iyang inahan namatay sa dihang siya 10 anyos pa. Pagkahuman, siya mipuyo uban sa iyang tiya ug tiyo. Sa dihang si Lincoln 18 anyos na, sila si Elder Barton ug Elder Bentley miabut sa balay sa iyang tiya ug tiyo. Ang tiya ug lola ni Lincoln diha-diha dayon midawat sa ebanghelyo, apan si Lincoln milikay sa mga misyonaryo. Usa ka buntag sa Dominggo, ang malumo niyang lola misulod sa iyang kwarto, gibira ang hapin sa higdaanan, ug miingon kaniya nga mosimba uban kanila. Nasurprisa sa dili kasagarang batasan sa iyang lola ug agi og pagtahud ngadto kaniya, mibangon ug misimba siya. Niadtong adlawa mibati siya og usa ka butang nga bag-o ug gamhanan diha sa iyang kalag nga nakapausab sa iyang kinabuhi. Sa wala madugay siya nahimong usa sa unang mga kinabig sa Simbahan sa Chile.

Sila si Luis ug Karla nagkita nga mga tinedyer pa sa Honduras. Nagsugod sila sa pag-date ug sa wala madugay nagminyo. Si Luis, dili miyembro sa Simbahan, midayeg sa mga ginikanan ni Karla, kinsa “mitratar sa usag usa uban sa pagtahud ug gugma, ug kini nakapadani kanako sa pagkat-on sa ilang mga mithi.” Sa wala madugay si Luis nabunyagan, ug sila si Karla ug Luis na-sealed saTemplo sa Siyudad sa Guatemala, Guatemala. Sa bag-o pa silang nag-30 anyos, naproblema sila sa ilang relasyon, ug si Karla milayas, nagpangutana kon ang ila bang kaminyoon sa tinedyer pa usa ka sayop. Si Luis nagpuasa ug nag-ampo ug naghangyo sa Dios sa “pagpabalik ni Karla sa balay, ug milampus Siya niini. Milampus siya niini.” Karon ang ilang kaminyoon nahimong mas lig-on sukad-sukad.

Si Noemí natawo sa Argentina, diin ang iyang pamilya nagpamiyembro sa Simbahan. Sila milalin sa Estados Unidos sa dihang tinedyer pa siya. Samtang ganahan kaayo siya isip usa ka Amerikana, siya mas malipayon kon siya makasinati sa kultura sa Argentina. “Sa Latin America, ang mga tawo mahigalaon kaayo. Paapilon dayon kamo nila; sila makighigala kaninyo; sila mo-fellowship kaninyo. Ganahan kaayo silang makig-uban sa pamilya ug sa mga higala, sa pagpangaon og lamiang pagkaon. Kana nindot kaayo, ug ang pagsinati niana nga bahin sa kultura usa ka butang nga dili gyud nako iilis sa bisan unsa nga butang.”

Sa Uruguay niadtong 1948, ang inahan ni Omar mitanyag sa iyang payong ngadto sa duha ka sister missionary nga Santos sa Ulahing mga Adlaw. Agig resulta, siya misugod sa pagpakig-istorya uban sa mga misyonaryo, ug sa wala madugay ang magulang nga babaye ni Omar nabunyagan. Natawo niadtong 1948, si Omar ang unang masuso nga gipanalanginan didto sa Uruguay Mission, nga na-open niadtong 1947. Si Omar ug ang iyang mga ginikanan nabunyagan sa dihang otso anyos na siya. Mga pipila ka tuig ang milabay giminyoan ni Omar ang iyang pinalangga, sila milalin ngadto sa Estados Unidos. Usa na ka tigsibya, si Omar nadawat sa Simbahan niadtong 1973 ug nahimong usa ka Spanish interpreter alang sa kinatibuk-ang komperensya.