Pinaagi sa Gagmay nga mga Paagi

Nagtuo ko nga maayo ra akong gipangbuhat. Nakaserbisyo ko og misyon, nakagradwar sa kolehiyo, nakaangkon og full-time nga trabaho, ug sa katapusan mibalhin og apartment nga ako lang. Mosimba ko matag Dominggo ug usahay motambong sa mga kalihokan. Ako adunay daghang mga higala, dili minyo ug minyo, ug ako adunay daghang panahon sa pagbasa, akong paborito nga buhaton sa dihang bata pa. Apan bisan pa niining tanan nga mga kalihokan, mibati gihapon ko og kahaw-ang.

Sa Alma kapitulo 37, atong mabasa ang tambag ni Alma ngadto sa iyang anak nga si Helaman. Sa mga bersikulo 41–42, si Alma naghisgot kabahin sa pamilya ni Lehi ug sa Liahona. Siya mipasabut nga ang Liahona dili molihok kon “sila mga tapulan, ug makalimot sa pagbansay sa ilang hugot nga pagtuo ug kakugi” ug nga “sila wala mouswag diha sa ilang panaw; busa, sila nalangay diha sa kamingawan, o wala mopanaw sa usa ka linaktod nga agianan.” Ang pagbasa niining mga bersikulo nakatabang kanako sa pagkaamgo nga wala ko mouswag. Wala ako magbansay sa akong hugot nga pagtuo o nagkugi sa bisan unsang butang sa akong kinabuhi. Mihunong ko sa pagkab-ut og usa ka tumong. Nagpaabut lang ako nga adunay usa ka butang nga mahitabo.

Walay usa ka piho nga higayon diin ako naghimo og listahan ug nagsulat sa tanang butang nga akong kinahanglang buhaton. Hinoon, kadtong mga kausaban hinay-hinay nga miabut. Una, sayo ko nga mobangon ug mag-jogging o mag-ehersisyo. Sunod, nagsugod ko sa pagpangita og mga programa sa eskwelahan nga tingali makatabang kanako nga molambo sa akong trabaho o makahimo kanako sa pagpangita og lain. Nakakita ko og programa ug dayon migahin og panahon sa pagkuha sa gikinahanglang mga eksamin aron mo-apply. Ang pagtuon sa kasulatan ug pag-ampo nahimong mas importante alang kanako, ug naningkamot ko nga mogahin og panahon matag adlaw nga magbusog sa mga pulong ni Kristo ug magtinguha sa pagbati sa Espiritu. Mihimo ko og espesyal nga paningkamot nga mas maapil sa akong ward—bisan kon kini nagpasabut nga mosakripisyo sa akong personal nga panahon.

Sukad nga nagsugod ko og himo niining gagmayng mga kausaban, mibati ko nga mas malipayon. Mibati ko nga naglambo ug ang Langitnong Amahan naghatag kanako og bag-ong mga hagit. Makasagubang na ko niadtong mga hagit uban sa paglaum kaysa kahadlok o mawad-an sa kadasig. Nakakat-on ko nga kon kita mohunong sa pagtrabaho o pagbansay sa atong hugot nga pagtuo ug molihok sa usa ka direksyon, ang Langitnong Amahan dili makatabang kanato sa paglambo ug dili kita makaabut sa atong destinasyon. Mapasalamaton ko sa gagmayng mga kausaban sa akong kinabuhi nga nakatabang kanako nga makalantaw sa unahan.