Nunot sa donasyon sa Simbahan nga 50 ka mga makina sa pagpanahi ngadto sa Ministry of Social Welfare sa Fiji niadtong 2010 ug sa umaabut pa nga donasyon sa lain nasad nga 50, ang pagpaningkamot sa kaugalingon ug ang mga kahigayunan sa panarbaho mitubo alang sa kababayen-an nga nagpuyo sa bukirang bahin sa Fiji.

Ang mga donasyon sa mga miyembro sa Simbahan ngadto sa pundo sa humanitarian nakapahimo sa Simbahan nga makab-ot ang panginahanglan sa tibuok kalibutan uban sa mga proyekto sama sa mga donasyon sa makina sa pagpanahi. Ang mga representante sa Simbahan nakigtambayayong uban sa mga baryo ug mga lider sa gobyerno aron masabtan ang lokal nga mga kahimtang ug mahatagan og katumanan ang mga gipangandoy sa mga sakop sa komunidad.

“Ato kining gihimo ug ang mga proyekto nga sama niini tungod kay kita mga sumusunod ni Jesukristo,” Elder Taniela B. Wakolo, Area Seventy, miingon diha sa usa ka pakighinabi uban sa Fiji Times. “Atong hugot nga pagtuo nangulo kanato sa … pagbuhat og kaayohan diha sa kalibutan.”

Niadtong Nobyembre 9, 2010, upat ka bulan sa wala pa ang makagusbat nga linog sa Japan, si Yoji Sugiyama, miyembro sa Fujisawa Japan Stake, nakadawat og usa ka taas-taas nga level sa Ganti sa Sagrado nga Bahandi alang sa iyang dalaygon nga mga serbisyo ngadto sa iyang nasud.

Isip sakop sa Foreign Ministry sulod sa mga katuigan, si Brother Sugiyama dako kaayo og kalambigitan sa paghikay sa mga kasabutan ug pagserbisyo isip embahador alang sa Japan.

Si Brother Sugiyama nakaamgo nga ang Ginoo mihatag kanatong tanan sa mga kahigayunan nga makabuhat og maayo sa atong kaugalingon nga palibot. Siya miingon, “Ang Ginoo usahay mohatag kanato og mga kalisud aron atong makaplagan ang atong panginahanglan. Kon wala kadtong mga panginahanglan ug mga kahigayunan sa pagkaplag og maayong mga solusyon, ang katawhan dili mouswag ug walay kalipay dinhi niining kalibutan.”

Dul-an sa usa ka bilyon ka tawo sa yuta nakulangan sa magamit nga limpyo nga tubig, usahay moresulta sa mga sakit nga dala sa tubig sama sa cholera, kalibanga, ug tipos. Apan sukad sa 2002, ang Simbahan nakatabang na sa pito ka milyon ka mga tawo diha sa kapin 5,000 ka mga kumunidad nga makabatonog limpyo nga tinubdan sa tubig. Ang video Tubig mao ang Kalipay, anaa na sa Iningles sa news.lds.org, mopasundayag sa estorya sa mga Hinabang sa LDS naghatag og limpyo nga tubig ngadto sa baryo sa Sierra Leone.