Pag-inom og Maayo sa Buhi nga Tubig

Ang akong trabaho mopaadto kanako sa mga komunidad sa tibuok kalibutan diin ang mga tawo walay makuha nga limpyong tubig. Ang among grupo makig-alayon uban sa lokal nga mga gobyerno ug sa mga lumulupyo aron sa pagsangkap og mamintinar nga mga kapanguhaan sa lunsay, makapatunhay sa kinabuhi nga tubig sama sa mga puso ug mga himan nga makatigom sa tubig gikan sa tubod o ulan.

Kini nga mga proyekto sa tubig makahatag og dakong kalamboan sa kalidad sa kinabuhi. Ang panglawas molambo pag-ayo tungod kay ang limpyo nga tubig makapahunong sa pagtakboy sa sakit nga typhoid, kolera, ug uban pang mga sakit tungod sa hugaw nga tubig. Ang ekonomiya molambo usab tungod kay ang mga ginikanan ug mga bata kinsa gigahin sa una ang ilang panahon sa pagsag-ub og tubig karon mahimo nang motrabaho ug moeskwela. Gani sa mga komunidad nga adunay daghan ug nagkalain-laing mga problema, ang mga tawo sa kanunay moingon nga ang limpyong tubig mao ang ilang labing ganahan.

Ang Manluluwas migahin sa Iyang yutan-ong pangalagad sa panahon ug dapit diin ang mga tawo magsalig sa mga atabay para sa tubig. Iyang gitudloan ang babaye didto sa atabay pinaagi sa pag-ingon nga “bisan kinsa nga magainom sa tubig nga akong igahatag kaniya dili na gayud pagauhawon” (Juan 4:14), nagtudlo ba usab Siya nga ang Iyang ebanghelyo makapawala sa kauhaw—permanente—sa pinakauna gayud nato nga panginahanglan? Nagtuo ko niana.

Kanunay akong mapasalamaton sa usa ka babaye sa Kenya, Africa, kinsa nagtudlo kanako kabahin sa kaandam nga motrabaho aron makaangkon og tubig. Siya akong nahimamat sa usa ka pagsaulog human sa pagbutang og puso sa iyang komunidad. Uban sa pasalamat siya miingon kanako nga ang bag-ong puso makapamubo sa iyang siyam ka milya (14 km) nga biyahe matag adlaw ngadto sa usa na lang ka milya (1.6 km) nga biyahe aron sa pagsag-ub og tubig. Siya nalipay gayud sa mga oportunidad nga karon maiyaha na.

Dili ko kapugong sa paghunahuna kon unsay akong bation nga ako kinahanglang molakaw og usa ka milya aron sa pagsag-ub og tubig. Nahimuot ko nga iyang biyaan ang tanang buluhaton—gikan sa buluhaton sa balay ngadto sa pagtanom sa tanaman—kon siya mobiyahe na aron sa pagsag-ub og tubig. Siya nasayud nga dili niya makompleto ang ubang buluhaton kon wala kana nga tubig. Naghunahuna ko kon unsa kabug-at ang iyang palas-anon. Ang pag-alsa og tubig nagkinahanglan og kusog ug paglahutay. Apan, alang sa kaayohan sa iyang pamilya, andam siya nga molakaw og siyam ka milya matag adlaw aron sa pagkuha niini.

Naghunahuna ko nga kita kinsa makakuha og limpyong tubig gikan sa mga gripo sa atong balay usahay naglaum nga moduol kang Kristo uban sa samang kasayon sa pagliso sa gripo aron sa pagkuha og usa ka baso nga tubig. O kita ba andam nga mobiya sa ubang mga buluhaton, bisan gani sa importanting mga butang, aron sa pag-ila ni Jesukristo ug sa Iyang Amahan?

Nasayud ako nga ang atabay sa buhi nga tubig nga gitanyag sa Manluluwas dili gayud maughan ug kini lunsay ug makapatunhay sa kinabuhi. Kon kita moduol Kaniya uban sa walay sulod nga kupa, Siya mopuno niini, sa kanunay labaw pa sa atong kapasidad sa pagdawat. Siya sa tinuoray mao ang buhi nga tubig, usa ka pagpakita sa gugma sa Dios.