Duha ka Siyudad ug Malumong Kalooy

Sama sa Nauvoo, Illinois, ang siyudad sa Natchez, Mississippi, USA, nahimutang sa taas nga pang-pang nga nag-ambo sa Mississippi River. Ang Unang mga Santos sa Ulahing mga Adlaw nga gikan sa England sa kanunay moagi sa Natchez padulong sa taas nga bahin sa suba gikan sa New Orleans ngadto sa Nauvoo. Sa pagkatinuod, niadtong 1844 gisunog sa usa ka grupo sa mga malditong tawo ang barko nga midunggo sa Natchez nga nagpasakay og pipila ka mga Santos sa Ulahing mga Adlaw.

Sa dihang miabut ko sa Natchez aron sa pagdawat og trabaho sa U.S. National Park Service, mibati ko og mga pagduha-duha ug kahadlok. Gibiyaan nako ang tanang komportable nga butang ug pamilyar ngari kanako didto sa Utah, ug sa dihang mibalhin ko niining bag-o ug daw dili pamilyar nga siyudad, mibati ko nga nawala ug nag-inusara.

Sa akong unang adlaw sa pagbansay, ang supervising ranger misugod pinaagi sa pagdala kanako ngadto sa mansyon nga panahon pa sa Civil War sa parke ug nagpakita sa matang sa guided tour nga sa dili madugay maoy akong buhaton. Sa dihang kami nahuman og libut sa unang andana, naglisud nako pag-ayo og hinumdom sa tanang mga detalye. Gikan sa gipabag-o nga kasangkapan sa French rococo ngadto sa English porcelain china, ang balay nga giadornuhan nagpakita sa kauswagan sa Habagatan—ug nasanapan gayud ako. Nakahunahuna nga kinahanglan pa namong tan-awon ang ikaduhang andana sa balay, nasanapan ko uban sa pagbati sa pagkawala sa kadasig ug kamingaw sa akong balay.

Samtang nagsaka kami sa labing nindot nga hagdanan, usa ka oil painting sa lungsod ang nakadani sa akong atensyon. Wala pa ni nako makita sukad, apan adunay usa ka butang nga pamilyar kabahin niini. Ang akong mga mata nakatutok ngadto sa hulagway sa dako nga building nga nahimutang sa may pang-pang sa lungsod, ug naila nako ang lapad nga pagkakurba sa sapa nga miliyok sa siyudad. Posible bang mao kini ang akong nahunahunaan?

Nangutana ko kon ang painting mao ba ang hulagway sa Nauvoo. Ang akong supervisor, natingala tungod sa akong pangutana, mitubag nga mao gayud. Sa wala madugay akong nahibaloan nga ang painting gipalit sa usa sa ulahing mga tag-iya sa balay tungod kay naghunahuna nga kini gipintal panahon sa tunga-tunga sa ika-19 nga siglo ug ang sapa nindot kaayong mihaum sa talan-awon sa Natchez.

Ang mga Santos kinsa miagi sa Natchez sa tunga-tunga sa pagpanglutos siguro mibati og dakong pagbati sa kahupayan ug pasalamat sa dihang sa katapusan sila miabut sa Nauvoo. Susama usab, nahupay ko sa dihang akong nakita ang painting sa Nauvoo sa mansyon sa Natchez. Ang pagtan-aw sa painting nakatabang kanako sa pagkasayud nga ang Langitnong Amahan nasayud sa akong sitwasyon ug mopanalangin kanako uban sa kalig-on sa pagbuntog sa akong kamingaw, kahadlok, ug mga pagduha-duha. Nasayud ko nga ang painting sa Nauvoo mao ang malumong kalooy sa Ginoo.