Mary Fielding Smith

Si Mary Fielding Smith, usa ka matinud-anon nga Santos nga babaye sa Ulahing mga Adlaw, nabiyaan uban sa pipila ka batan-ong mga anak samtang ang iyang bana nabilanggo sa Bilanggoan sa Liberty atol sa tingtugnaw niadtong 1838–39. Ang mga manggugubot misulong sa iyang panimalay, ug ang iyang anak nga lalaki hapit mamatay isip resulta sa pag-ataki. Isip asawa ni Hyrum Smith, si Mary nabiyuda sa dihang ang iyang bana gipatay didto sa Bilanggoan sa Carthage niadtong Hunyo 27, 1844. Siya ug si Emma Smith milahutay sa daghang mga pagsulay uban sa ilang mga bana, nga si Hyrum ug Joseph Smith. Karon, si Mary gidayeg isip usa sa labing lig-on nga mga pioneer sa unang mga tuig sa Simbahan.

Si Mary naminyo ni Hyrum Smith niadtong Disyembre 24, 1837. Ang unang asawa ni Hyrum, si Jerusha, namatay sa pagpanganak, ug si Mary ang miatiman sa gagmayng mga anak ni Hyrum isip iyang kaugalingon. Si Hyrum ug si Mary may duha usab ka mga anak, lakip si Joseph F. Smith, kinsa sa kaulahian nahimong ikaunom nga Presidente sa Simbahan.

Sa diha nga ang mga Santos mibiya sa Nauvoo ngadto sa Walog sa Salt Lake human si Joseph ug Hyrum gimartir, si Mary mihukom sa pagpanaw. Siya ug ang iyang pamilya gipauban ngadto sa naglakaw nga pundok, ug ang kapitan misulti kaniya nga siya makalangan lang sa uban ug dili kinahanglan nga mosulay sa malisud nga panaw. Si Mary mitubag, “mag-una pa ako ninyo ngadto sa walog ug dili mangayo og tabang bisan gani kanimo.”¹ Ang paglakaw namatud-an nga lisud, apan siya miabut uban sa iyang pamilya sa Salt Lake niadtong Septyembre 23, 1848, una og usa ka adlaw sa kapitan nga kinsa nagduha-duha kaniya.

Si Mary Fielding Smith nagpabilin nga matinud-anon hangtud sa katapusan sa iyang kinabuhi. Siya mibayad sa ikapulo, bisan sa iyang kakabus. Sa diha nga usa ka tawo misugyot kaniya sa dili angayan nga paagi nga dili lang siya motampo sa ikapulo sa mga patatas nga iyang gipatubo nianang tuiga, siya mitubag, “Maulaw ka sa imong kaugalingon. Ihikaw mo ba kanako ang usa ka panalangin? Ako nagbayad sa akong ikapulo, dili lang tungod kay kini usa ka balaod sa Dios, apan tungod kay ako nagpaabut sa usa ka panalangin pinaagi sa pagbuhat niini.”² Siya miugmad og umahan sa Walog sa Salt Lake ug gitudloan ang iyang mga anak sa ebanghelyo. Si Presidente Joseph F. Smith sa kaulahian miingon, “Iya akong gitudloan sa pagtahud, ug sa hiyas, ug kamatuoran, ug kaligdong ngadto sa gingharian sa Dios, ug siya nagtudlo dili lamang sa lagda kondili pinaagi sa ehemplo.”³