Ang Trabaho Usa ka Mahangturong Baruganan

Ang atong Langitnong Amahan ug si Jesukristo nagtrabaho aron sa paglalang sa mga langit ug yuta. Gilalang Nila ang adlaw, ang buwan, ug ang mga kabitoonan. Ilang gipundok ang mga dagat ug gihimo ang uga nga yuta ug ang mga tanom nga motubo. Dayon Ilang gilalang ang matag buhi nga butang diha sa dagat ug sa yuta. (Tan-awa sa Genesis 1; Moises 2.) Ang Ilang ehemplo nagpakita kanato nga ang trabaho importante sa langit ug sa yuta. (Tan-awa usab sa Juan 5:17; 9:4.)

Sa dihang ang Dios milalang sa lalaki ug babaye diha sa Iyang kaugalingong dagway, Siya mibutang kanila sa Tanaman sa Eden (tan-awa sa Genesis 1:26–27; 2:8). Sa wala madugay, sa diha nga sila gipapahawa sa tanaman, ang Ginoo miingon ngadto ni Adan, “Sa singot sa imong nawong magakaon ikaw sa tinapay” (Genesis 3:19). Sukad nianang panahona, Si Adan ug si Eva mitrabaho aron sa pagsangkap sa ilang kaugalingong mga panginahanglan ug sa mga panginahanglan sa ilang mga anak (tan-awa sa Moises 5:1).

Sukad sa panahon ni Adan ug Eva, ang trabaho mao na ang paagi sa pagkinabuhi kanatong tanan dinhi sa yuta. Kita magtrabaho aron sa pagsangkap alang sa atong pisikal, espiritwal, ug emosyonal nga kaayohan sa atong mga kaugalingon ug sa atong mga pamilya. Ang mga ginikanan naningkamot sa pag-establisar og mga panimalay diin ang mga baruganan sa trabaho gitudlo. Ang paghatag sa mga bata og mga buluhaton nga haum sa ilang mga abilidad ug ang pagdayeg sa ilang mga kalampusan makatabang kanila nga makabaton og positibo nga mga kasinatian sa trabaho. Agig resulta, sila makapalambo og lig-on nga kinaiya sa trabaho, usa ka maayong kinaiya, ug mahinungdanong mga kahanas.

Kita kinahanglan usab nga magtinguha sa pagpangita og maayong pagkabalanse tali sa trabaho ug sa pahulay. Sa unom ka adlaw matag semana, ang mga panalangin moabut kanato samtang atong hinumduman ang pagsagol sa trabaho ngadto sa mga kalihokan nga makapalagsik kanato. Sa mga Dominggo, bisan pa niana, ang Ginoo misaad og espesyal nga mga panalangin samtang kita mosunod sa Iyang sugo sa paglikay gikan sa atong temporal nga trabaho ug ibalaan ang Igpapahulay nga adlaw (tan-awa sa Exodo 20:9–11; D&P 59:9–19).

Ang trabaho mao ang kabahin sa plano sa atong Langitnong Amahan alang kanato didto sa langit ug dinhi sa yuta. Kon kita matarung, kita makabalik sa pagpuyo uban Kaniya. Didto kita padayon nga makabaton og mga kahigayunan sa pagtrabaho samtang nagtabang kita sa pagtukod sa gingharian sa Dios (tan-awa sa Moises 1:39).

Kita ang responsable sa pag-atiman sa atong mga kaugalingon ug sa atong mga pamilya.

1. Ang mga ginikanan adunay sagradong katungdanan sa pag-atiman sa ilang mga anak (tan-awa sa D&P 83).

2. Ang mga anak mapanalanginan samtang sila nag-atiman sa ilang nagkatigulang nga mga ginikanan (tan-awa sa 1 Timoteo 5:3–4, 8).

3. Kita kinahanglan nga motabang sa mga sakop sa atong mga paryente kon mahimo.

Mga panalangin ang moabut kanato isip resulta sa trabaho.

1. Atong mapalig-on ang atong mga kinaiya ug makapalambo og mga kahanas sa trabaho.

2. Atong bation ang hingpit nga kalipay sa plano sa Dios alang kanato dinhi sa yuta.

3. Kita mahimong mas andam ug mapaningkamuton sa kaugalingon samtang kita nagtigum og tulo ka bulan nga sangkap sa pagkaon, tubig, ug ubang mga kinahanglanon.