បព្វជិតភាពអើរ៉ុន៖ ក្រោកឡើង ហើយប្រើអំណាចនៃព្រះ
ដោយ អាទ្រៀន អុកឆាវ
ទីប្រឹក្សាទីពីរក្នុងគណៈប្រធានយុវជនទូទៅ
បព្វជិតភាពត្រូវការការអនុវត្តដើម្បីសម្រេចបានលទ្ធផលល្អ ។ អ្នកត្រូវបានហៅឲ្យ « ក្រោកឡើង ហើយបញ្ចាំងពន្លឺចេញទៅ » មិនត្រូវលាក់ពន្លឺនៅក្នុងទីងងឹតនោះទេ។
ថ្មីៗនេះ ខ្ញុំបានទៅអាហ្រិកខាងត្បូងទៅសួរសុខទុក្ខផ្ទះមួយជាមួយនឹង ថាប៊ីសូ ជាជំនួយការទីមួយក្នុងកូរ៉ុមថ្នាក់សង្ឃក្នុងវួដ កាជីសូ។ ថាប៊ីសូ និង ប៊ីស្សពរបស់គាត់ ជាអធិបតី និងជាអ្នកកាន់កូនសោសម្រាប់កូរ៉ុម បានអធិស្ឋានសម្រាប់សមាជិកកូរ៉ុមដែលមិនសូវសកម្ម បានស្វែងរកការបំផុសគំនិតអំពីអ្នកដែលត្រូវទៅសួរសុខទុក្ខ និង ពីរបៀបដើម្បីជួយពួកគេ ។ ពួកគេបានទទួលការបំផុសគំនិតឲ្យទៅសូរសុខទុក្ខផ្ទះរបស់ ថេប៊ែឡូ ហើយពួកគេបានអញ្ជើញខ្ញុំឲ្យទៅជាមួយនឹងពួកគេ ។
នៅពេលដែលយើងបានដើរកាត់ឆ្កែយាមផ្ទះដ៏កាច យើងបានចូលមកដល់បន្ទប់ទទួលភ្ញៀវហើយបានជូបនឹង ថេប៊ែឡូ ជាយុវជនដែលគ្មានភាពស្វាហាប់ ដែលបានឈប់ទៅព្រះវិហារ ពីព្រោះគាត់រវល់ធ្វើការងារផ្សេងទៀតនៅថ្ងៃអាទិត្យ ។ គាត់ភ័យបន្ដិច ប៉ុន្ដែគាត់សប្បាយចិត្តដើម្បីទទួលយើង ហើយបានទាំងអញ្ជើញគ្រួសារគាត់ឲ្យមកចូលរួមជាមួយនឹងគាត់ដែរ ។ ប៊ីស្សពបានបង្ហាញសេចក្ដីស្រឡាញ់គាត់ចំពោះគ្រួសារនោះ ហើយមានបំណងចង់ជួយគាត់ឲ្យកា្លយគ្រួសារអស់កល្ប ជានិច្ច ដោយទៅផ្សារភា្ជប់នៅព្រះវិហារបរិសុទ្ធ ។ ដួងចិត្តពួកគេមានអំណរ ហើយយើងទាំងអស់គ្នាអាចមានអារម្មណ៍ដ៏ខ្លាំងពីវត្តមាននៃព្រះវិញ្ញាណបរិសុទ្ធបានជួយណែនាំគ្រប់ពាក្យ និង គ្រប់អារម្មណ៍ ។
ប៉ុន្ដែវាជាសម្ដីរបស់ ថាប៊ីសូ ដែលធ្វើឲ្យមានភាពខុសគ្នាក្នុងការសួរសុខទុក្ខនោះ។ ចំពោះខ្ញុំវាហាក់ដូចជាសង្ឃដ៏ក្មេងនេះកំពុងនិយាយភាសាទេវតា ជាសម្ដីដែលពេញដោយក្ដីស្រឡាញ់ដែលយើងទាំងអស់គ្នាអាចយល់បានទាំងស្រុង ប៉ុន្ដែជាពិសេស វាបានរំជូលចិត្តមិត្តភក្ដិគាត់ ។ គាត់បាននិយាយថា « ខ្ញុំរីករាយនឹងនិយាយជាមួយអ្នកខ្លាំងណាស់គ្រប់ពេលនៅព្រះវិហារ » ។ « អ្នកតែងតែនិយាយពាក្យល្អៗមកកាន់ខ្ញុំ ។ ហើយតើអ្នកដឹងទេថា ក្រុមបាល់ទាត់យើង ទាត់មិនសូវល្អទេឥឡូវនេះ ដោយសារយើងគ្មានអ្នក ។ អ្នកពិតជាពូកែលេងខ្លាំងណាស់ ។ »
ថេប៊ែឡូ បានឆ្លើយថា « ខ្ញុំសុំទោស »។ « ខ្ញុំនឹងមកលេងជាមួយអ្នកលើកក្រោយ » ។
ថាប៊ីសូ បាននិយាយថា « វាប្រាកដជាអស្ចារ្យ » ។ « ហើយតើអ្នកមានចាំពេលដែលយើងបានរៀបចំបម្រើជាអ្នកផ្សព្វផ្សាយសាសនាដែរទេ ? តើយើងអាចចាប់ផ្ដើមធ្វើវាម្ដងទៀតបានទេ ? »
ថេប៊ែឡូ បាននិយាយម្ដងទៀតថា « បាទ » ។ « ខ្ញុំចង់ត្រឡប់មកវិញ » ។
ប្រហែលជាភាពរីករាយដ៏ខ្លាំងបំផុតដែលខ្ញុំមានក្នុងនាមជាទីប្រឹក្សាម្នាក់ក្នុងគណៈប្រធានយុវជនទូទៅ គឺពេលឃើញអ្នកកាន់បព្វជិតភាពអើរ៉ុនជុំវិញពិភពលោកអនុវត្តសិទ្ធិអំណាចនៃបព្វជិតភាពអើរ៉ុន ។ ប៉ុន្ដែពេលខ្លះ ខ្ញុំក៏ធ្វើជាសាក្សីដោយក្រៀមក្រំ ថាយុវជនជាច្រើនមិនបានយល់ពីការល្អដ៏ច្រើនដែលពួកគេអាចធ្វើបានដោយមានអំណាចដែលពួកគេកាន់កាប់ ។
បព្វជិតភាព គឺជាអានុភាព និង សិទ្ធិអំណាចនៃអង្គទ្រង់ផ្ទាល់ដើម្បីធ្វើការនៅក្នុងការបម្រើដល់កូនចៅទ្រង់។ ឱ ! បើយុវជនទាំងអស់ អ្នកកាន់បព្វជិតភាពអើរ៉ុនគ្រប់រូប អាចយល់ច្បាស់ថា បព្វជិតភាពដែលគាត់កាន់ គឺជាកូនសោទាំងឡាយអំពីការបម្រើនៃពួកទេវតា ។ វាពិតជាអស្ចារ្យណាស់បើសិនជាពួកគេអាចយល់ថា ពួកគេមានកាតព្វកិច្ចដ៏ពិសិដ្ឋដើម្បីជួយមិត្តភក្ដិរបស់ពួកគេឲ្យមករកផ្លូវដែលនាំទៅរកព្រះអង្គសង្គ្រោះ។ វាពិតជាអស្ចារ្យណាស់ប្រសិនបើជាពួកគេដឹងថា ព្រះវរបិតាសួគ៌នឹងប្រទានអំណាចដល់ពួកគេឲ្យពន្យល់ការពិតនៃដំណឹងល្អដែលបានស្ដារឡើងវិញជាមួយនឹងភាពជាក់ច្បាស់ និង ភាពស្មោះត្រង់ដែលអ្នកដទៃនឹងទទួលអារម្មណ៍ពីភាពពិតដែលមិនអាចបដិសេធបាននៃព្រះបន្ទូលនៃព្រះគ្រីស្ទ ។
យុវជននៃសាសនាចក្រជាទីស្រឡាញ់ ខ្ញុំសូមសួរអ្នកមួយសំណួរដែលខ្ញុំសង្ឃឹមថាវានឹងដក់ជាប់ក្នុងដួងចិត្តរបស់អ្នក។ តើមានអំណាចណាអស្ចារ្យជាងអំណាចនៃបព្វជិតភាពរបស់ព្រះដែលអ្នកអាចរកបាននៅលើផែនដីនេះ ? តើមានអំណាចណាដែលអាចអស្ចារ្យជាងសមត្ថភាពក្នុងការជួយព្រះវរបិតាសួគ៌ារបស់យើងដើម្បីផ្លាស់ប្ដូរជីវិតរស់នៅរបស់មិត្តភក្តិរបស់អ្នក ដើម្បីជួយពួកគេដើរតាមផ្លូវនៃសុភមង្គលដ៏អស់កល្បជានិច្ចដោយការលាងសម្អាតអំពើបាប និង ការធ្វើខុសនោះ ?
ដូចជាអំណាចដទៃផ្សេងទៀតដែរ បព្វជិតភាពត្រូវការការអនុវត្តដើម្បីសម្រេចបានលទ្ធផលល្អ ។ អ្នកត្រូវបានហៅឲ្យ « ក្រោកឡើង ហើយបញ្ចាំងពន្លឺចេញទៅ » (គ&ស 115:5) មិនត្រូវលាក់ពន្លឺនៅក្នុងទីងងឹតនោះទេ។ មានតែអ្នកដែលក្លាហានតែប៉ុណ្ណោះដែលនឹងត្រូវបានរាប់បញ្ចូលទៅក្នុងចំណោមអ្នកជម្រើស ។ ខណៈដែលអ្នកអនុវត្តអំណាចបព្វជិតភាពដ៏ពិសិដ្ឋរបស់អ្នក សេចក្ដីក្លាហាន និង ជំនឿចិត្តរបស់អ្នកនឹងកើនឡើង។ យុវជនទាំងឡាយ អ្នកដឹងថា អ្នកបានធ្វើល្អបំផុតហើយនៅពេលដែលអ្នកនៅក្នុងការបម្រើដល់ព្រះ ។ អ្នកដឹងថា អ្នកសប្បាយជាងគេបំផុតនៅពេលដែលអ្នកចូលរួមដោយអន្ទះសាក្នុងប្រយោជន៍ល្អ ។ ចូរតម្កើងអំណាចបព្វជិតភាពរបស់អ្នកតាមរយៈការរស់នៅដោយស្អាតស្អំ និង សក្ដិសម ។
ខ្ញុំសូមនិយាយម្ដងទៀតហើយគាំទ្រសម្ដីដែលអ៊ែលឌើរ ជែហ្វ្រី អ័រ ហូឡិន បានចែកចាយទៅអ្នកកាលពីប្រាំមួយខែមុនពីវេទិកានេះ ។ គាត់បាននិយាយថា « ខ្ញុំកំពុងមើល ... យុវជន និង មនុស្សចាស់ដែលយកចិត្តទុកដាក់គ្រប់គ្រាន់ដើម្បីចុះឈ្មោះ និង ផ្តល់មតិអំពីការប្រយុទ្ធរវាងអំពើល្អ និង អំពើអាក្រក់ ។ យើងកំពុងធ្វើសង្រ្គាម» គាត់បានបន្ដថា « ... ខ្ញុំស្វែងរកសំឡេងដ៏រឹងមាំ និង លះបង់ជាងនេះ ជាសំឡេងដែលមិនត្រឹមតែប្រឆាំងនឹងអំពើអាក្រក់នោះទេ … , ប៉ុន្ដែជាសំឡេងដើម្បីរកការណ៍ល្អ សំឡេងដើម្បីដំណឹងល្អ ជាសំឡេងដើម្បីព្រះ » ( « យើងទាំងអស់គ្នាត្រូវបានចុះឈ្មោះ», Liahona and Ensign, ខែវិច្ឆិកា ឆ្នាំ 2011, 44, 47) ។
មែនហើយ អ្នកកាន់បព្វជិតភាពអើរ៉ុនទាំងអស់ យើងកំពុងនៅក្នុងសង្គ្រាម ។ ហើយនៅក្នុងសង្រ្គាមនេះ មធ្យោបាយដែលល្អបំផុតដើម្បីប្រឆាំងនឹងអំពើអាក្រក់ គឺជួយគាំទ្រភាពសុចរិតយ៉ាងសកម្ម ។ អ្នកមិនអាចស្ដាប់តាមពាក្យគ្រោតគ្រាត ហើយធ្វើជាមិនឮនោះទេ ។ អ្នកមិនអាចមើលតែម្នាក់ឯង ឬ ជាមួយនឹងអ្នកដទៃនូវរូបភាពដែលអ្នកដឹងថាវាកខ្វក់ ហើយធ្វើពុតជាមិនឃើញនោះទេ ។ អ្នកមិនអាចប៉ះពាល់រឿងមិនស្អាត ហើយធ្វើមិនដឹងថា វាគ្មានបញ្ហានោះទេ ។ អ្នកមិនអាចនៅស្ងៀមបានទេនៅពេលសាតាំងចង់បំផ្លាញអ្វីដែលត្រឹមត្រូវ និង បរិសុទ្ធនោះ ។ ផ្ទុយមកវិញ អ្នកត្រូវក្រោកឈរឡើងយ៉ាងក្លាហានចំពោះអ្វីដែលអ្នកដឹងថាវាពិត ! នៅពេលដែលអ្នកឮ ឬ ឃើញអ្វីៗដែលខុសនឹងបទដ្ឋានរបស់ព្រះអម្ចាស់ សូមចាំថាតើអ្នកជានរណា — គឺអ្នកជាទាហានក្នុងកងទ័ពរបស់ព្រះ ដែលអង្គទ្រង់ផ្ទាល់បានប្រទាននូវបព្វជិតភាពដ៏បរិសុទ្ធរបស់ទ្រង់ ។ គ្មានអាវុធណាអាចទប់ទល់នឹងសត្រូវ ដែលជាបិតានៃសេចក្ដីកុហកបាន ល្អជាងសេចក្តីពិតដែលនឹងចេញមកពីមាត់របស់អ្នក នៅពេលអ្នកអនុវត្តអំណាចនៃបព្វជិតភាពនោះទេ ។ មិត្តភក្តិជាច្រើនរបស់អ្នកនឹងគោរពអ្នកចំពោះសេចក្ដីក្លាហានរបស់អ្នក និង សេចក្ដីសុចរិតរបស់អ្នក ។ អ្នកខ្លះមិនគោរពទេ ។ ប៉ុន្ដែនោះមិនជាបញ្ហានោះទេ ។ អ្នកនឹងទទួលបានការគោរព និង ទំនុកចិត្តពីព្រះវរបិតាសួគ៌ ពីព្រោះអ្នកបានប្រើអំណាចរបស់ទ្រង់ដើម្បីសម្រេចគោលបំណងរបស់ទ្រង់ ។
ខ្ញុំសូមអំពាវនាវដល់គណៈប្រធានកូរ៉ុមបព្វជិតភាពអើរ៉ុនទាំងអស់ឲ្យលើកទង់ឥស្សរភាពឡើងជាថ្មីម្ដងទៀត ហើយរៀបចំ និង ដឹកនាំទាហានដ៏ច្រើនរបស់អ្នក ។ សូមប្រើប្រាស់អំណាចបព្វជិតភាពរបស់អ្នកដោយអញ្ជើញអ្នកដែលនៅជុំវិញអ្នកឲ្យចូលមករកព្រះគ្រីស្ទតាមរយៈការប្រែចិត្ត និង ពិធីបុណ្យជ្រមុជទឹក។ អ្នកបានទទួលបញ្ជា និង មានអំណាចពីព្រះវរបិតាសូគ៌ដើម្បីធ្វើកិច្ចការនេះ។
កាលពីពីរឆ្នាំកន្លងទៅ អំឡុងពេលទស្សនកិច្ចនៅ សាន់ទីអាហ្គូ ប្រទេស ឈីលី ខ្ញុំពិតជាស្ងើចសរសើរខ្លាំងចំពោះ ដានីយ៉ែល អូឡេត ជាយុវជនម្នាក់ដែលតែងតែជួយអ្នកផ្សព្វផ្សាយសាសនា ។ ខ្ញុំបានសុំគាត់ឲ្យសរសេរសំបុត្រមកខ្ញុំ ហើយដោយមានការអនុញ្ញាតពីគាត់ ខ្ញុំនឹងអានឲ្យអ្នកនូវផ្នែកខ្លះនៃអ៊ីម៉េលថ្មីៗរបស់គាត់ថា « ខ្ញុំទើបតែចូលដល់អាយុ 16 ឆ្នាំ ហើយនៅថ្ងៃអាទិត្យ ខ្ញុំត្រូវបានតែងតាំងជាថ្នាក់សង្ឃ ។ នៅថ្ងៃដដែលនោះ ខ្ញុំបានជ្រមុជទឹកឲ្យមិត្តភក្ដិខ្ញុំម្នាក់ ។ នាងឈ្មោះថា ខារ៉ូលីណា ។ ខ្ញុំបានបង្រៀនដំណឹងល្អដល់នាង ហើយនាងបានមកព្រះវិហារទៀងទាត់ ហើយថែមទាំងបានទទួលរង្វាន់ការអភិវឌ្ឍន៍ខ្លួនរបស់ក្រុមយុវនារីទៀតផង ប៉ុន្ដែឪពុកម្ដាយរបស់នាងមិនអនុញ្ញាតឲ្យនាងជ្រមុជទឹកនោះទេរហូតដល់ពួកគេស្គាល់ខ្ញុំ ហើយទុកចិត្តខ្ញុំសិន។ នាងចង់ឲ្យខ្ញុំជ្រមុជទឹកឲ្យនាង ដូច្នេះយើងត្រូវរង់ចាំរយៈពេលមួយខែរហូតមកដល់ថ្ងៃអាទិត្យ ពេលដែលខ្ញុំចូលដល់អាយុ 16 ឆ្នាំ ។ ខ្ញុំមានអារម្មណ៍ល្អខ្លាំងណាស់ដែលបានជួយមនុស្សល្អបែបនោះឲ្យទទួលពិធីបុណ្យជ្រមុជទឹក ហើយខ្ញុំមានអារម្មណ៍សប្បាយដែលខ្ញុំគឺជាម្នាក់ដែលជ្រមុជទឹកឲ្យនាង ។ »
ដានីយ៉ែល គ្រាន់តែជាយុវជនម្នាក់ក្នុងចំណោមយុវជនជាច្រើននៅលើពិភពលោកដែលរស់នៅតាមអំណាចដែលព្រះបានប្រទានឲ្យពួកគេ ។ យុវជនម្នាក់ទៀតឈ្មោះ លូអីស ហ្វីណាន់ដូ មកពី ហុនដូរ៉ាស ដែលបានដឹងថា មិត្តភក្ដិរបស់គាត់កំពុងតែដើរផ្លូវខុស ហើយក៏បានចែកចាយសក្ខីភាពរបស់គាត់ជាមួយនឹងមិត្តភក្ដិគាត់ ដែលពិតជាបានជួយជីវិតរបស់គាត់ ( សូមមើល « A Change of Heart » lds.org/youth/video ) ។ អូឡាវ៉ា មកពីប្រទេស ប្រេស៊ីល គឺជាគំរូមួយទៀត ។ អ្នកបម្រើអចិន្ដ្រៃយ៍ដ៏ពិតនៅក្នុងផ្ទះរបស់គាត់ ( សូមមើល គ. និង ស. 84:111 ) ។ Olavo បានបំផុសគំនិតដល់ម្តាយរបស់គាត់ឲ្យត្រឡប់មករកភាពសកម្មដ៏ពេញលេញវិញក្នុងសាសនាចក្រ (សូមមើលផងដែរ« Reunited by Faith » lds.org/youth/video ) ។ អ្នកអាចស្វែងរករឿងមួយចំនួនទាំងនេះ និង រឿងផ្សេងទៀតជាច្រើនដូចជារឿងទាំងនេះតាមគេហទំព័រយុវវ័យរបស់សាសនាចក្រ youth.lds.org ។ គ្រាន់តែស្វែងរកវាតាម Google ។ និយាយអញ្ចឹង អ៊ិនធើណិត ប្រព័ន្ធផ្សព្វផ្សាយរបស់សង្គម និង ប្រព័ន្ធបច្ចេកវិទ្យាផ្សេងទៀត គឺជាឧបករណ៍ដែលព្រះអម្ចាស់បានប្រគល់ឲ្យអ្នកដើម្បីជួយអ្នកអនុវត្តកាតព្វកិច្ចបព្វជិតភាពរបស់អ្នក និង ពង្រីកឥទ្ធិពលនៃសេចក្ដីពិត និង គុណធម៌ ។
យុវជនជាទីស្រឡាញ់ទាំងឡាយ នៅពេលអ្នកអនុវត្តបព្វជិតភាពអើរ៉ុន នៅក្នុងរបៀបមួយដែលខ្ញុំបានលើកឡើង នោះអ្នកកំពុងតែរៀបចំខ្លួនសម្រាប់ការទទួលខុសត្រូវពេលអនាគតរបស់អ្នក ។ ប៉ុន្ដែអ្នកកំពុងតែធ្វើច្រើនជាងនោះទៅទៀត ។ ដូចជា យ៉ូហានបាទីស្ទដែលជាអ្នកកាន់បព្វជិតភាពអើរ៉ុនដ៏គំរូ អ្នកក៏អាចរៀបចំផ្លូវសម្រាប់ព្រះអម្ចាស់ ហើយតម្រង់ផ្លូវរបស់ទ្រង់បានដែរ ។ នៅពេលអ្នកប្រកាសដំណឹងល្អនៃការប្រែចិត្ត និង ពិធីបុណ្យជ្រមុជទឹកយ៉ាងក្លាហាន ដូចជាយ៉ូហានបានធ្វើ អ្នកកំពុងតែរៀបចំប្រជាជនសម្រាប់ការយាងមករបស់ព្រះអម្ចាស់ហើយ ( សូមមើល ម៉ាថាយ 3:3; គ&ស 65:1–3 ; 84:26–28 ) ។ ជារឿយៗ អ្នកត្រូវបានគេបា្រប់ពីសក្ដានុពលដ៏អស្ចារ្យរបស់អ្នក ។ មែនហើយ ឥឡូវនេះគឺជាពេលវេលាដើម្បីប្រើប្រាស់សក្ដានុពលនោះ ហើយប្រើវាឲ្យអស់ពីសមត្ថភាពដែលព្រះបានប្រទានដល់អ្នកដើម្បីប្រទានពរដល់អ្នកផ្សេងទៀត នាំពួកគេចេញពីភាពងងឹត ហើយទៅក្នុងពន្លឺ និង រៀបចំផ្លូវទទួលព្រះអម្ចាស់ ។
សាសនាចក្របានផ្ដល់ឲ្យអ្នកនូវកូនសៀវភៅកាតព្វកិច្ចចំពោះព្រះទុកជាធនធានដើម្បីជួយឲ្យអ្នករៀន និង បំពេញកាតព្វកិច្ចរបស់អ្នក ។ សូមសិក្សាវាឲ្យបានញឹកញាប់ ។ សូមលុតជង្គង់ចុះ សូមចេញឆ្ងាយពីប្រព័ន្ធបចេ្ចកវិទ្យា ហើយស្វែងរកការណែនាំពីព្រះអម្ចាស់ ។ ហើយបន្ទាប់មកក្រោកឡើង ហើយប្រើអំណាចនៃព្រះ ។ ខ្ញុំសន្យាថា អ្នកនឹងទទួលបានចម្លើយពីព្រះវរបិតាដែលគង់នៅស្ថានសួគ៌ពីរបៀបដើម្បីដឹកនាំជីវិតរបស់អ្នកផ្ទាល់ និង ពីរបៀបដើម្បីជួយអ្នកដទៃ ។
ខ្ញុំសូមដកស្រង់ប្រសាសន៍ប្រធាន ថូម៉ាស អេស ម៉នសុន ថា ៖ « ចូរកុំបន្ទាបតម្លៃនៃឥទ្ធិពលដ៏ទូលំទូលាយនៃទីបន្ទាល់អ្នក ។ ... អ្នកមានសមត្ថភាពក្នុងការកត់សម្គាល់អ្នកដែលអ្នកផ្សេងមិនបានកត់សម្គាល់ ។ នៅពេលអ្នកមានភ្នែកដើម្បីមើល ត្រចៀកដើម្បីស្ដាប់ និង មានបេះដូងដើម្បីទទួលអារម្មណ៍ អ្នកអាចជួយ និង សង្រ្គោះអ្នកដទៃបាន » (« ចូរអ្នកក្លាយជាគំរូ » លីអាហូណា និង Ensign, ខែ ឧសភា ឆ្នាំ 2005, 115 ។
ខ្ញុំសូមធ្វើទីបន្ទាល់ចំពោះអ្នកថា អំណាចបព្វជិតភាពគឺពិត ។ ខ្ញុំបានទទួលទីបន្ទាល់ដោយការអនុវត្តន៍បព្វជិតភាពខ្លួនខ្ញុំផ្ទាល់ ។ ខ្ញុំបានឃើញអព្ភូតហេតុម្តងហើយម្តងទៀតកើតឡើងដោយអ្នកដែលមានអំណាចបព្វជិតភាពអើរ៉ុន ។ ខ្ញុំបានធ្វើជាសាក្សីដល់អំណាចនៃការបម្រើនៃពួកទេវតា នៅពេលដែលអ្នកកាន់បព្វជិតភាពអើរ៉ុនដ៏ស្មោះស្ម័គ្រនិយាយសម្ដីដែលបានបំផុសដោយព្រះវិញ្ញាណនៃក្ដីសង្ឃឹម នឹងបើកដួងចិត្តចំពោះអស់អ្នកដែលត្រូវការពន្លឺ និងក្ដីស្រឡាញ់ ។ នៅក្នុងព្រះនាមនៃព្រះយេស៊ូវគ្រីស្ទ ជាព្រះអម្ចាស់យើង អ្នកដឹកនាំយើង និង ជាព្រះអង្គសង្គ្រោះយើង ។ អាម៉ែន ។