ក្រុមគ្រួសារនៅក្រោមសេចក្ដីសញ្ញា
ដោយប្រធាន ហិនរី ប៊ី អាវរិង
ទីប្រឹក្សាទីមួយនៅក្នុងគណៈប្រធានទីមួយ
គ្មានអ្វីដែលបានមក ឬនឹងមានមកក្នុងគ្រួសារអ្នក សំខាន់ជាងពរជ័យនៃការផ្សាភ្ជាប់នោះទេ ។
ខ្ញុំមានអំណរគុណដែលបានជួបជុំជាមួយអ្នករាល់គ្នានៅក្នុងការប្រជុំនេះ ដែលអ្នកកាន់បព្វជិតភាពនៃព្រះនៅលើផែនដីទាំងអស់ ត្រូវបានអញ្ជើញឲ្យចូលរួម ។ យើងមានពរណាស់ ដែលមានប្រធាន ថូម៉ាស អេស ម៉នសុន ធ្វើជាអធិបតី ។ ក្នុងនាមជាប្រធាននៃសាសនាចក្រ គាត់គឺជាបុរសម្នាក់ដែលនៅរស់ ដែលមានការទទួលខុសត្រូវចំពោះកូនសោទាំងឡាយ ដើម្បីផ្សាភ្ជាប់ក្រុមគ្រួសារ និងពិធីបរិសុទ្ធបព្វជិតភាពទាំងអស់នោះ ដែលចាំបាច់ដើម្បីទទួលបានជីវិតដ៏អស់កល្បជានិច្ច ជាអំណោយទានដ៏ពិសេសបំផុតនៃអំណោយទានទាំងអស់របស់ព្រះ ។
មានឪពុកម្នាក់ដែលធ្លាប់អសកម្ម បានត្រឡប់មកវិញ កំពុងស្ដាប់នាយប់នេះ ដោយសារគាត់ចង់ដឹងប្រាកដអំពី ការផ្សាភ្ជាប់ដោយអស់ពីដួងចិត្ត ។ គាត់ និងភរិយាស្រឡាញ់កូនតូចៗពីរនាក់របស់ពួកគេ កូនប្រុសម្នាក់ និងកូនស្រីម្នាក់ ។ ក៏ដូចជាឪពុកម្ដាយផ្សេងទៀតដែរ គាត់អាចស្រមៃមើលឃើញអំពីសុភមង្គលនៅស្ថានសួគ៌ នៅពេលគាត់អានពាក្យទាំងនេះ ៖ «ហើយទំនាក់ទំនងដែលមាននៅក្នុងចំណោមពួកយើងនៅទីនេះយ៉ាងណា នោះក៏នឹងមាននៅក្នុងចំណោមយើងនៅទីនោះយ៉ាងនោះដែរ គ្រាន់តែរួបរួមដោយសិរីល្អដ៏នៅអស់កល្បជានិច្ច គឺជាសិរីល្អដែលយើងពុំមានការពិសោធន៍នៅពេលឥឡូវនេះប៉ុណ្ណោះ» ។ 1
ឪពុកនោះដែលកំពុងស្ដាប់ជាមួយយើងនាយប់នេះ ដឹងអំពីផ្លូវទៅកាន់គោលដៅដ៏រុងរឿងនោះ ។ វាពុំងាយស្រួលទេ ។ គាត់បានដឹងរួចទៅហើយ ។ វាត្រូវការសេចក្ដីជំនឿទៅលើព្រះយេស៊ូវគ្រីស្ទ ការប្រែចិត្តពិត និងការផ្លាស់ប្ដូរនៅក្នុងដួងចិត្តគាត់ដែលបានកើតឡើង ដោយសារប៊ីស្សពចិត្តល្អម្នាក់ ដែលបានជួយគាត់មានអារម្មណ៍ទទួលការអភ័យទោស ដោយក្ដីស្រឡាញ់របស់ព្រះអម្ចាស់ ។
ការផ្លាស់ប្ដូរដ៏អស្ចារ្យ បានបន្ដមាននៅពេលគាត់បានទៅព្រះវិហារបរិសុទ្ធទទួលអំណោយ ទានពិសិដ្ឋ ដែលព្រះអម្ចាស់បានពិពណ៌នា ចំពោះអ្នកទាំងឡាយដែលទ្រង់បានអនុញ្ញាតនៅក្នុងព្រះវិហារបរិសុទ្ធដំបូង ក្នុងគ្រាកាន់កាប់ត្រួតត្រានេះ ។ គឺនៅក្នុងទីក្រុងខឺតឡង់ រដ្ឋអូហៃអូ ។ ព្រះអម្ចាស់មានបន្ទូលអំពីរឿងនោះថា ៖
«ដូច្នោះដោយហេតុនេះហើយ យើងបានប្រទានបញ្ញត្តិមួយដល់អ្នកថា អ្នករាល់គ្នាត្រូវទៅរដ្ឋអូហៃអូ ហើយនៅទីនោះ យើងនឹងប្រទានក្រិត្យវិន័យមួយដល់អ្នក ហើយនៅទីនោះ អ្នកនឹងត្រូវបានទទួលព្រះចេស្ដាមកពីស្ថានសួគ៌
«ហើយចេញពីទីនោះ ... ត្បិតយើងមានកិច្ចការដ៏ធំរក្សាទុក ត្បិតសាសន៍អ៊ីស្រាអែលនឹងត្រូវបានសង្គ្រោះ ហើយយើងនឹងនាំពួកគេទៅកន្លែងណា តាមព្រះហឬទ័យរបស់យើង ហើយគ្មានអំណាចឯណានឹងឃាត់ទប់ដៃយើងបានឡើយ» ។ 2
មិត្តដែលទើបសកម្មវិញរបស់ខ្ញុំ និងអ្នកកាន់បព្វជិតភាពទាំងអស់ កិច្ចការអស្ចារ្យដែលត្រូវធ្វើ គឺត្រូវដឹកនាំដើម្បីការសង្គ្រោះដល់អ៊ីស្រាអែលមួយផ្នែក ដែលយើងមាន ឬនឹងមានការទទួល ខុសត្រូវ គឺជាគ្រួសាររបស់អ្នក ។ មិត្តរបស់ខ្ញុំ និងភរិយារបស់គាត់ ដឹងថា ដើម្បីសង្គ្រោះគ្រួសាររបស់អ្នក គឺតម្រូវឲ្យមានការផ្សាភ្ជាប់ដោយអំណាចនៃបព្វជិតភាពមិលគីស្សាដែក នៅក្នុងព្រះវិហារបរិសុទ្ធដ៏ពិសិដ្ឋនៃព្រះ ។
មិត្តខ្ញុំសុំឲ្យខ្ញុំធ្វើការផ្សាភ្ជាប់ ។ គាត់ និងភរិយា ចង់ធ្វើឲ្យរួចរាល់ឲ្យបានឆាប់ ។ ប៉ុន្តែក្នុងពេលដ៏រវល់នៃសន្និសីទទូទៅខិតជិតមកដល់ ខ្ញុំបានចេញទៅជួបគូស្វាមីភរិយា និងប៊ីស្សពរបស់ ពួកគេ ដើម្បីធ្វើការជាមួយលេខាខ្ញុំ រកកាលបរិច្ឆេទដ៏ល្អបំផុត ។
ចូរគិតមើលថាខ្ញុំរំភើបចិត្ត និងរីករាយប៉ុណ្ណា នៅពេលឪពុកនោះប្រាប់ខ្ញុំ នៅក្នុងសាសនាចក្រថា បានរើសថ្ងៃផ្សា ភ្ជាប់រួចហើយ គឺថ្ងៃទី 3 ខែមេសា ។ នោះគឺជាថ្ងៃមួយនៅក្នុងឆ្នាំ 1836 ដែលអេលីយ៉ា ព្យាការីដែលបានប្រែរូប ត្រូវបានបញ្ជូនឲ្យមកព្រះវិហារបរិសុទ្ធខឺតឡង់ ដើម្បីប្រគល់អំណាចនៃការផ្សាភ្ជាប់ដល់យ៉ូសែប ស្ម៊ីធ និងអូលីវើរ ខៅឌើរី ។ កូនសោទាំងនោះ មាននៅក្នុងសាសនាចក្រសព្វថ្ងៃនេះ ហើយនឹងបន្ដទៅជារៀងរហូត ។3
វាគឺជាសិទ្ធិអំណាចដ៏ទេវភាពដូចគ្នាដែលត្រូវបានប្រគល់ឲ្យដោយព្រះអម្ចាស់ ទៅកាន់ពេត្រុស ដូចដែលទ្រង់បានសន្យា៖ «ខ្ញុំនឹងឲ្យកូនសោនៃនគរស្ថានសួគ៌ដល់អ្នក បើអ្នកនឹងចងទុកអ្វីៗនៅផែនដី នោះនឹងត្រូវចងទុកនៅលើស្ថានសួគ៌ដែរ ហើយបើអ្នកនឹងស្រាយអ្វីៗនៅផែនដី នោះនឹងត្រូវស្រាយនៅស្ថានសួគ៌ដែរ» ។ 4
ការត្រឡប់មកវិញរបស់អេលីយ៉ា បានប្រទានពរដល់មនុស្សទាំងអស់ដែលកាន់បព្វជិតភាព ។ អែលឌើរ ហារ៉ូល ប៊ី លី បានប្រាប់យ៉ាងច្បាស់ នៅពេលគាត់បានថ្លែងក្នុងសន្និសីទទូទៅដោយដកស្រង់ប្រសាសន៍ប្រធាន យ៉ូសែប ហ្វីលឌីង ស្ម៊ីធ ។ សូមស្ដាប់ដោយប្រុងប្រយ័ត្នថា ៖ «ខ្ញុំកាន់បព្វជិតភាព បងប្អូនប្រុសនៅទីនេះ កាន់បព្វជិតភាព យើងបានទទួលបព្វជិតភាពមិលគីស្សាដែក-- ដែលអេលីយ៉ា និងព្យាការីដទៃទៀតកាន់ ព្រមទាំងពេត្រុស យ៉ាកុប និងយ៉ូហានកាន់ផងដែរ» ទោះជាយើងមានសិទ្ធិអំណាចដើម្បីជ្រមុជទឹកក្ដី, ទោះបីយើងមានសិទ្ធិអំណាចដើម្បីដាក់ដៃលើសម្រាប់អំណោយទាននៃព្រះវិញ្ញាណបរិសុទ្ធ និងដើម្បីតែងតាំងអ្នកដទៃ ហើយធ្វើនូវរឿងទាំងអស់នោះក្ដី បើគ្មានអំណាចនៃការផ្សាភ្ជាប់ទេ យើងពុំអាចធ្វើអ្វីបានឡើយ ត្បិតវានឹងគ្មានសិទ្ធិអំណាចចំពោះពិធីបរិសុទ្ធដែលយើងបានធ្វើឡើយ» ។
ប្រធានស្ម៊ីធ បានបន្ដថា ៖
«ពិធីបរិសុទ្ធដែលខ្ពស់ជាង ពរជ័យដ៏អស្ចារ្យជាង ដែលសំខាន់ចំពោះការតម្កើងឡើងនៅក្នុងនគរនៃព្រះ... អាចទទួលបានតែនៅក្នុងកន្លែងជាក់លាក់... ។ គ្មានបុរសណាមានសិទ្ធិដើម្បីធ្វើពិធីបរិសុទ្ធទាំងនេះទេ លើកលែងតែគាត់បានទទួលសិទ្ធិអំណាច ដើម្បីធ្វើវាមកពីបុរសដែលកាន់កូនសោទាំងឡាយប៉ុណ្ណោះ …
« …គ្មានបុរសណាដែលនៅលើផែនដីនេះ មានសិទ្ធិដើម្បីទៅ ហើយបម្រើនៅក្នុងពិធីបរិសុទ្ធណាមួយនៃដំណឹងល្អបានទេ លុះត្រាតែប្រធាននៃសាសនាចក្រ ដែលកាន់កូនសោអនុញ្ញាតឲ្យ ។ គាត់បានផ្ដល់សិទ្ធិអំណាចដល់យើងជាអ្នកកាន់បព្វជិតភាព គាត់បានដាក់អំណាចនៃការផ្សាភ្ជាប់នៅក្នុងបព្វជិតភាពរបស់យើង ដោយសារគាត់កាន់កូនសោទាំងឡាយនោះ» ។5
ការអះអាងមានដូចគ្នានោះ មកពីប្រធាន ប៊យដ៍ ឃេ ផាកកឺ នៅពេលគាត់សរសេរអំពីអំណាចនៃការផ្សាភ្ជាប់ ។ ពេលដឹងថាពាក្យទាំងនេះជាការពិត វាជាការលួងលោមចិត្តចំពោះខ្ញុំ ដូចជាវានឹងមានចំពោះគ្រួសារ ដែលខ្ញុំនឹងផ្សាភ្ជាប់ឲ្យនៅថ្ងៃទី 3 ខែមេសា ៖ «ពេត្រុសកាន់កូនសោទាំងឡាយ ។ ពេត្រុសកាន់អំណាចនៃការផ្សាភ្ជាប់ … ដើម្បីចង ឬផ្សាភ្ជាប់នៅលើផែនដី ឬដើម្បីស្រាយនៅលើផែនដី ហើយនឹងនៅស្ថានសួគ៌ ។ កូនសោទាំងនោះ ជារបស់ផងប្រធានសាសនាចក្រ-- ធ្វើជាព្យាការី, អ្នកមើលឆុត និងអ្នកទទួលវិវរណ ។ អំណាចនៃការផ្សាភ្ជាប់ដ៏ពិសិដ្ឋនោះ មាននៅក្នុងសាសនាចក្រនាពេលនេះ ។ គ្មានអ្វីដែលអ្នកទាំងឡាយណាដែលដឹងពីសារៈសំខាន់នៃសិទ្ធិអំណាចនេះ គិតថាពិសិដ្ឋជាងនោះទេ ។ គ្មានអ្វីមានការការពារយ៉ាងដិតដល់ជាងនេះទេ ។ មានបុរសពីរបីនាក់ប៉ុណ្ណោះ ដែលកាន់អំណាចនៃការផ្សាភ្ជាប់នេះ នៅលើផែនដី --នៅក្នុងព្រះវិហារបរិសុទ្ធនីមួយៗ គឺមានបងប្អូនប្រុសដែលបានទទួលអំណាចនៃការផ្សាភ្ជាប់ ។ គ្មាននរណាអាចទទួលបានទេ លើកលែងតែមកពីព្យាការី, អ្នកមើលឆុត និងអ្នកទទួលវិវរណៈ និងប្រធាននៃសាសនាចក្រ នៃព្រះយេស៊ូវគ្រីស្ទនៃពួកបរិសុទ្ធថ្ងៃចុង ក្រោយ» ។6
ពេលអេលីយ៉ាបានមក គាត់មិនគ្រាន់តែប្រគល់បព្វជិតភាពប៉ុណ្ណោះទេ ប៉ុន្ដែក៏បង្វែរដួងចិត្តផងដែរ ៖ «វិញ្ញាណ, អំណាច និងការហៅរបស់អេលីយ៉ា គឺដើម្បីឲ្យអ្នកមានអំណាច ដើម្បីកាន់កូនសោ នៃវិវរណៈ, ពិធីបរិសុទ្ធ, ព្រះបន្ទូល, អំណាច និងអំណោយទាននៃភាពពេញលេញនៃបព្វជិតភាពមិលគីស្សាដែក និងនៃនគររបស់ព្រះនៅលើផែនដី និងដើម្បីទទួលបាន និងធ្វើនូវពិធីបរិសុទ្ធទាំងអស់ ដែលជារបស់ផងនៃនគររបស់ព្រះ ដើម្បីបង្វែចិត្តរបស់ឪពុកទៅកូន ហើយបង្វែចិត្តកូនទៅឪពុក ទោះជាអ្នកទាំងឡាយដែលនៅស្ថានសួគ៌ » ។ 7
អារម្មណ៍នៃការបង្វែចិត្តនោះ គឺមាននៅក្នុងខ្លួនមិត្តរបស់ខ្ញុំ និងគ្រួសារគាត់រួចទៅហើយ ។ វាអាចនឹងមានចំពោះអ្នកនៅក្នុងការប្រជុំនេះ ។ អ្នកអាចឃើញក្នុងចិត្តអ្នក ដូចជាខ្ញុំ អំពីមុខមាត់របស់ឪពុក ឬម្ដាយរបស់អ្នក ។ ប្រហែលជានឹកគិតអំពីបងប្អូនស្រីប្រុស ។ ឬក៏អាចគិតអំពីកូនប្រុស ឬកូនស្រីផងដែរ ។
ពួកគេអាចនឹងនៅក្នុងពិភពវិញ្ញាណ ឬរស់នៅឆ្ងាយពីអ្នក ។ ប៉ុន្តែក្ដីអំណរកើតមកពីអារម្មណ៍តភ្ជាប់នឹងពួកគេនោះ គឺត្រូវបានសន្យា ពីព្រោះអ្នកអាចចងភ្ជាប់នឹងពួកគេដោយពិធីបរិសុទ្ធបព្វជិតភាព ដែលព្រះនឹងគោរព ។
អ្នកកាន់បព្វជិតភាពមិលគីស្សាដែក ដែលជាឪពុកក្នុងគ្រួសារដែលបានផ្សាភ្ជាប់ហើយ ត្រូវបានបង្រៀនអំពីអ្វីដែលពួកគេត្រូវធ្វើ ។ គ្មានអ្វីដែលបានមក ឬនឹងមានមកក្នុងគ្រួសារអ្នក សំខាន់ជាងពរជ័យនៃការផ្សាភ្ជាប់នោះទេ ។ គ្មានអ្វីសំខាន់ជាងការគោរពដល់សេចក្ដីសញ្ញាអាពាហ៍ពិពាហ៍ និង គ្រួសារ ដែលអ្នកបានធ្វើ ឬនឹងធ្វើនៅក្នុងព្រះវិហារបរិសុទ្ធរបស់ព្រះទេ ។
របៀបដើម្បីធ្វើដូច្នោះគឺប្រាប់យ៉ាងច្បាស់ ។ ព្រះវិញ្ញាណបរិសុទ្ធនៃសេចក្ដីសន្យា តាមរយៈការប្រតិបត្តិ និងការពលិកម្មរបស់យើង ត្រូវតែផ្សាភ្ជាប់សេចក្ដីសញ្ញាព្រះវិហារបរិសុទ្ធរបស់យើង ដើម្បីទទួលបាននៅក្នុងបរលោកនាយ ។ ប្រធាន ហារ៉ូល ប៊ី លី បានពន្យល់អំពីអត្ថន័យរបស់វា ដើម្បីត្រូវបានផ្សាភ្ជាប់ដោយព្រះវិញ្ញាណបរិសុទ្ធនៃសេចក្ដីសន្យា ដោយដកស្រង់ពាក្យអែលឌើរ មេលវិន ជី បាឡាដ ថា ៖ «យើងអាចបញ្ឆោតមនុស្ស ប៉ុន្តែយើងមិនអាចបញ្ឆោតព្រះវិញ្ញាណបរិសុទ្ធទេ ហើយពរជ័យរបស់យើង នឹងពុំនៅអស់កល្បទេ លុះត្រាតែពរជ័យទាំងនោះ ត្រូវបានផ្សាភ្ជាប់ដោយព្រះវិញ្ញាណនៃសេចក្ដីសន្យា ។ ព្រះវិញ្ញាណបរិសុទ្ធ គឺជាតួអង្គដែលអានគំនិត និងដួងចិត្តរបស់មនុស្ស ហើយផ្ដល់ការអនុញ្ញាតនៃការផ្សាភ្ជាប់ទៅនឹងពរជ័យ ដែលបានប្រកាសចំពោះពួកគេ ។ ការផ្សាភ្ជាប់នោះ ត្រូវបានចង មានឥទ្ធិពល និងពេញលេញ» ។ 8
នៅពេលបងស្រី អាវរិង និងខ្ញុំ ផ្សាភ្ជាប់នៅក្នុងព្រះវិហារបរិសុទ្ធ ឡូហ្គិន រដ្ឋយូថាហ៍ គ្រានោះខ្ញុំពុំយល់អំពីសារៈសំខាន់នៃការសន្យានោះពេញលេញទេ ។ ខ្ញុំព្យាយាមយល់អំពីអត្ថន័យវាទាំងអស់ ប៉ុន្តែភរិយាខ្ញុំ និងខ្ញុំ បានសម្រេចចិត្តតាំងពីដំបូងនៃអាពាហ៍ពិពាហ៍ជិត 50 ឆ្នាំមកនេះ ដើម្បីអញ្ជើញព្រះវិញ្ញាណបរិសុទ្ធញឹកញាប់ តាមដែលយើងអាចធ្វើបានមកក្នុងជីវិតរស់នៅ និងគ្រួសារយើង ។
ក្នុងនាមជាឪពុកវ័យក្មេង ដែលបានផ្សាភ្ជាប់ក្នុងព្រះវិហារបរិសុទ្ធ និងដែល ដួងចិត្តខ្ញុំបែរទៅភរិយាខ្ញុំ និងគ្រួសារវ័យក្មេងយើង នោះខ្ញុំបានជួបនឹងប្រធាន យ៉ូសែប ហ្វីលឌិង ស៊្មីធ នៅគ្រាដំបូង ។ នៅក្នុងបន្ទប់ក្រុមប្រឹក្សាគណៈប្រធានទីមួយ ដែលខ្ញុំបានអញ្ជើញឲ្យទៅ ធ្វើជាសាក្សីពិតទាំងស្រុងចំពោះខ្ញុំ នៅពេលប្រធាន ហារ៉ូល ប៊ី លីបានសួរខ្ញុំ ចង្អុលទៅប្រធាន ស្ម៊ីធដែលអង្គុយនៅជិតគាត់ ថា «តើអ្នកជឿថា បុរសនេះជាព្យាការីរបស់ព្រះដែរឬទេ?»
ប្រធាន ស្ម៊ីធ ទើបតែដើរចូលក្នុងបន្ទប់ ហើយពុំនិយាយអ្វីទេ។ ខ្ញុំមានអំណរគុណដ៏អស់កល្ប ដែលខ្ញុំអាចឆ្លើយសំណួរ ដោយសារជាអ្វីដែលចាក់ក្នុងដួងចិត្តខ្ញុំថា ៖ «ខ្ញុំដឹងថាគាត់ជាព្យាការី» ។ ហើយខ្ញុំដឹងថាជាការពិត ដូចជាខ្ញុំស្គាល់ព្រះអាទិត្យដែលកំពុងរះដូច្នោះដែរថា គាត់កាន់អំណាចនៃការផ្សាភ្ជាប់របស់បព្វជិតភាពសម្រាប់ផែនដីមូល ។
បទពិសោធន៍នោះ ធ្វើឲ្យពាក្យរបស់ប្រធានស្ម៊ីធ មានអំណាចយ៉ាងខ្លាំងចំពោះខ្ញុំ និងភរិយាខ្ញុំ ពេលនៅសម័យប្រជុំសន្និសីទ ថ្ងៃទី 6 ខែមេសា ឆ្នាំ 1972 ប្រធាន យ៉ូសែប ហ្វីលឌិង ស៊្មីធ បានផ្ដល់ដំបូន្មានដូចខាងក្រោម ៖ «វាគឺជាឆន្ទៈរបស់ព្រះអម្ចាស់ ដើម្បីពង្រឹង និងរក្សាអង្គភាពគ្រួសារ ។ យើងសូមអង្វរដល់ឪពុកឲ្យទទួលភារៈពេញសិទ្ធិរបស់ពួកគេ ធ្វើជាមេគ្រួសារ ។ យើងសុំដល់ម្ដាយឲ្យគាំទ្រ និងជួយដល់ស្វាមីរបស់គេ និងធ្វើជាគំរូដល់កូនៗពួកគេ» ។ 9
អនុញ្ញាតឲ្យខ្ញុំផ្តល់ជាយោបល់ចំនួនបួន អំពីអ្វីដែលឪពុក ជាអ្នកកាន់បព្វជិតភាពអាចធ្វើ ដើម្បីនឹងលើកស្ទួយ និងដឹកនាំគ្រួសារអ្នក ត្រឡប់ទៅរស់នៅជាមួយព្រះវរបិតាសួគ៌ និងព្រះអង្គសង្គ្រោះវិញ។
ទីមួយ ចូរទទួល និងរក្សាសាក្សីពិត ថា កូនសោនៃបព្វជិតភាព គឺមាននៅនឹងយើង ហើយបានកាន់ដោយប្រធានសាសនាចក្រ ។ សូមអធិស្ឋានសម្រាប់រឿងនោះរាល់ថ្ងៃ ។ ចម្លើយនឹងមក ជាមួយនឹងការតាំងចិត្តកាន់តែខ្លាំង ដើម្បីដឹកនាំគ្រួសាររបស់អ្នក ក្នុងអារម្មណ៍នៃក្ដីសង្ឃឹម និងសុភមង្គលកាន់តែខ្លាំងនៅក្នុងការបម្រើរបស់អ្នក ។ អ្នកនឹងកាន់តែរីករាយ និងកាន់តែសុទិដ្ឋិនិយម ជាពរជ័យដ៏អស្ចារ្យសម្រាប់ភរិយា និងគ្រួសារអ្នក ។
តម្រូវការទីពីរ គឺត្រូវស្រឡាញ់ភរិយារបស់អ្នក ។ វានឹងត្រូវការក្ដីជំនឿ និងភាពរាបសារ ដើម្បីដាក់ចំណាប់អារម្មណ៍របស់នាងពីលើចំណាប់អារម្មណ៍ផ្ទាល់ខ្លួនរបស់អ្នក នៅក្នុងពេលលំបាកនៃជីវិត ។ អ្នកមានការទទួលខុសត្រូវ ដើម្បីផ្គត់ផ្គង់ និងចិញ្ចឹមបីបាច់គ្រួសារជាមួយនាង ខណៈដែលអ្នកបម្រើជាមួយគ្នា ។ រឿងនោះ ជួនកាលអាចត្រូវប្រើថាមពល កម្លាំង និង ពេលវេលាទាំងអស់ដែលអ្នកមាន ។ អាយុ និងជម្ងឺ អាចបង្កើនសេចក្ដីត្រូវការរបស់ភរិយាអ្នក ។ បើអ្នកជ្រើសរើសដើម្បីដាក់សុភមង្គលរបស់នាងពីលើសុភមង្គលផ្ទាល់ខ្លួនរបស់អ្នក ខ្ញុំសន្យានឹងអ្នកថា ក្ដីស្រឡាញ់របស់អ្នកចំពោះនាងនឹងកើនឡើង ។
ទីបី ជួយដល់គ្រួសារទាំងមូលឲ្យស្រឡាញ់គ្នាទៅវិញទៅមក ។ ប្រធាន Ezra Taft Benson បានបង្រៀនថា ៖
«ពេលគិតអំពីភាពអស់កល្បជានិច្ច សេចក្ដីសង្គ្រោះ គឺអំពីគ្រួសារ ។ …
«ដែលសំខាន់ជាងនោះ កូនៗចាំបាច់ត្រូវដឹង និងទទួលអារម្មណ៍ថា យើងស្រឡាញ់, គាប់ចិត្ត និងមានអំណរគុណចំពោះពួកគ ។ យើងត្រូវតែប្រាប់ពួកគេជារឿយៗ ។ ជាក់ស្ដែង នេះគឺជាតួនាទីមួយរបស់ឪពុកម្ដាយ គួរបំពេញ ហើយជាញឹកញាប់ ម្ដាយអាចធ្វើវាបានល្អបំផុត» ។ 10
ប៉ុន្តែប្រភពដ៏សំខាន់មួយទៀតចំពោះអារម្មណ៍ទទួលក្ដីស្រឡាញ់នោះ គឺជាក្ដីស្រឡាញ់មកពីកូនៗផ្សេងទៀតក្នុងគ្រួសារ ។ ការមើលថែរបស់បងប្អូនប្រុសស្រីចំពោះគ្នាទៅវិញទៅមក ដោយខ្ជាប់ខ្ជួន នឹងកើតមាន តែពេលមានការខិតខំដោយខ្ជាប់ខ្ជួនមកពីឪពុកម្ដាយ និងជំនួយពីព្រះ ។ អ្នកដឹងរឿងនោះពិត មកពីបទពិសោធន៍ក្នុងគ្រួសារផ្ទាល់ខ្លួនរបស់អ្នក ។ ហើយវាត្រូវបានបញ្ជាក់រាល់ពេលអ្នកអានអំពីជម្លោះគ្រួសារ តាមរយៈលីហៃសុចរិត និងភរិយាគាត់ សារាយ នៅក្នុងកំណត់ត្រាគម្ពីរមរមន ។
ជោគជ័យដែលពួកគេបានទទួល ផ្ដល់ជាការដឹកនាំចំពោះយើង ។ ពួកគេបានបង្រៀនអំពីដំណឹងល្អនៃព្រះយេស៊ូវគ្រីស្ទយ៉ាងល្អ ហើយយ៉ាងខ្ជាប់ខ្ជួន ដើម្បីឲ្យកូនៗ និងកូនចៅខ្លះទៀត នៃកូនចៅពួកគេ មានដួងចិត្តទន់ភ្លន់ចំពោះព្រះ និងចំពោះគ្នាទៅវិញទៅមក ។ ឧទាហរណ៍ នីហ្វៃ និងព្យាការីដទៃទៀត បានសរសេរ និងឈោងទៅជួយដល់សមាជិកគ្រួសារ ដែលជាសត្រូវរបស់ពួកគេ ។ ព្រះវិញ្ញាណបានបន្ទន់ចិត្តមនុស្សរាប់ពាន់ ហើយផ្លាស់ភាពស្អប់ដោយក្ដីស្រឡាញ់ ។
របៀបមួយដើម្បីអ្នកទទួលបានជោគជ័យដូចឪពុកលីហៃ គឺតាមរយៈរបៀបដែលអ្នកដឹកនាំ ការអធិស្ឋានជាគ្រួសារ និងពេលសម្រាប់គ្រួសារ ដូចជារាត្រីជួបជុំក្រុមគ្រួសារ ។ ចូរផ្ដល់ឱកាសដល់កូនឲ្យអធិស្ឋានពេលពួកគេចេះ ឲ្យអធិស្ឋានសម្រាប់គ្នាទៅវិញទៅ មកនៅក្នុងរង្វង់ ដែលត្រូវការពរជ័យ ។ ត្រូវដឹងភ្លាមពេលមានការមិនចុះសម្រុងកើតឡើង ហើយត្រូវស្គាល់ទង្វើនៃការបម្រើដែលគិតតែពីខ្លួនឯង ជាពិសេសចំពោះបងប្អូន ។ នៅពេលពួកគេអធិស្ឋានសម្រាប់ គ្នា ហើយបម្រើគ្នា នោះដួងចិត្តនឹងបានបន្ទន់ ហើយបង្វែទៅរកគ្នា និងទៅឪពុកម្ដាយរបស់ ពួកគេ ។
ឱកាសទីបួន ដើម្បីអាចដឹកនាំគ្រួសារអ្នក តាមរបៀបរបស់ព្រះអម្ចាស់បាន ពេលមានការលត់ ដំ ។ យើងអាចបំពេញកាតព្វកិច្ចរបស់យើង ដើម្បីកែតម្រូវតាមមាគ៌ារបស់ព្រះអម្ចាស់ រួចហើយដឹកនាំពួកគេទៅកាន់ជីវិតអស់កល្បជានិច្ច ។
អ្នកនឹងនឹកចាំពាក្យទាំងឡាយនេះ ប៉ុន្តែអ្នកអាចនឹងមើលមិនឃើញអំណាចរបស់វាក្នុងជីវិតនៃអ្នកកាន់បព្វជិតភាពមិលគីស្សាដែក ដែលកំពុងរៀបចំគ្រួសារគាត់ឲ្យរស់នៅក្នុងសង្គមដូចគ្នា ដែលពួកគេនឹងមាននៅនគរសេឡេស្ទាលនោះទេ ។ អ្នកនៅចាំពាក្យនោះទេ ។ វាជាពាក្យដែលគេស្គាល់ច្រើនថា ៖
«គ្មានអំណាច ឬឥទ្ធិពលណាអាច ឬគប្បីកាន់កាប់ ដោយសារបព្វជិតភាពបានឡើយ លើកលែងតែដោយការលួងលោម ដោយការអត់ធ្មត់ និងការទន់ភ្លន់ និងការស្លូតបូត និងដោយការស្រឡាញ់ស្មោះត្រង់ប៉ុណ្ណោះ
«ដោយចិត្តល្អ និងដោយការចេះដឹងពេញទី ដែលនឹងពង្រីកព្រលឹងឲ្យធំទូលំទូលាយ ដោយឥតលាក់ពុត និងដោយឥតមានឧបាយកលឡើយ --
«ដោយស្ដីបន្ទោសសមពេលសមហេតុ, ដោយការតឹងរឹង កាលណាបានបណ្ដាលដោយព្រះវិញ្ញាណបរិសុទ្ធ ហើយបន្ទាប់មក ដោយបង្ហាញនូវសេចក្ដីស្រឡាញ់ដ៏ច្រើនឡើង ចំពោះអ្នកនោះ ដែលអ្នកបានស្ដីបន្ទោស ក្រែងអ្នកនោះរាប់អ្នកថា ជាខ្មាំងសត្រូវរបស់គេ
«ប្រយោជន៍ឲ្យគេអាចដឹងថាសេចក្ដីស្មោះស្ម័គ្ររបស់អ្នក គឺខ្លាំងជាងចំណងនៃសេចក្ដីស្លាប់» ។ 11
ក្រោយមក មានការសន្យាដ៏មានតម្លៃអស្ចារ្យចំពោះយើង ក្នុងនាមជាឪពុកក្នុងស៊ីយ៉ូនថា ៖ «ព្រះវិញ្ញាណបរិសុទ្ធ នឹងទៅជាគូកនអ្នកជានិច្ច ហើយដំបងពេជ្ររបស់អ្នក ជាដំបងពេជ្រនៃសេចក្ដីសុចរិត និងសេចក្ដីពិត ដែលមិនចេះប្រែប្រួល ហើយអំណាចគ្រប់គ្រងរបស់អ្នក នឹងទៅជាអំណាចគ្រប់គ្រងដ៏នៅអស់កល្បអស់កាលជានិច្ច» ។ 12
នោះជាបទដ្ឋានខ្ពស់មួយសម្រាប់យើង ប៉ុន្តែពេលយើងមានជំនឿ ចេះទប់កំហឹងយើង ហើយបង្ក្រាបអំនួតរបស់យើង នោះព្រះវិញ្ញាណបរិសុទ្ធ ផ្ដល់នូវការអនុញ្ញាតរបស់ទ្រង់ ហើយការសន្យា និងសេចក្ដីសញ្ញាដ៏ពិសិដ្ឋ ក្លាយជាការពិត ។
អ្នកនឹងទទួលជោគជ័យតាមរយៈជំនឿរបស់អ្នកថា ព្រះអម្ចាស់បានបញ្ជូនមកវិញនូវកូនសោនៃបព្វជិតភាពដែលយើងមាននេះ -- ជាមួយនឹងចំណងនៃក្ដីស្រឡាញ់ដ៏ពិតជាមួយភរិយាអ្នក, ដោយជំនួយរបស់ព្រះអម្ចាស់នៅក្នុងការបង្វែចិត្តកូនចៅអ្នកចំពោះគ្នាទៅវិញទៅមក និងចំពោះឪពុកម្ដាយ ហើយក្ដីស្រឡាញ់នោះ ដឹកនាំអ្នកឲ្យកែតម្រូវ និងដាស់តឿនតាមរបៀបមួយដែលអញ្ជើញព្រះវិញ្ញាណ ។
ខ្ញុំដឹងថាព្រះយេស៊ូវ គឺជាព្រះគ្រីស្ទ និងជាព្រះអង្គសង្គ្រោះរបស់យើង ។ ខ្ញុំថ្លែងទីបន្ទាល់ថា ប្រធាន ថូម៉ាស អេស ម៉នសុន កាន់ ហើយអនុវត្តកូនសោទាំងអស់នៃបព្វជិតភាព នៅលើផែនដីសព្វថ្ងៃនេះ ។ ខ្ញុំស្រឡាញ់ ហើយគាំទ្រគាត់ ។ ខ្ញុំស្រឡាញ់ ហើយ អធិស្ឋានសម្រាប់អ្នក ។ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។