Enye Emi Ɔyode Tutu Esim Utit, Enye ke Eriyanŋa

Ndima nditɔ eka mi iren ye iban, menem esit ke ndinyene ufaŋ nditiŋ ikɔ nnɔ mbufo.

Ke ediwak isua emi ekebede ami ye ŋwan mi ima ika usɔrɔ nditɔŋwɔŋ ke Church History Museum ke Obio Salt Lake. Ke utit usɔrɔ oro, President Thomas S. Monson ama asaŋa ekpere nyin, ndien nte enye ɔkɔmde nyin ubɔk, enye ɔdɔho ete, “Eyɔ, ndien mbufo eyekan” – akpan ukpep ŋkpo emi esinede akpanikɔ, kpukpru nyin imefiɔk ntre.

Jesus Christ ama ɔdɔhɔ nyin ete: “enye emi ɔyɔde tutu esim utit, enye ke erinyaŋa.”¹

Ndiyɔ ɔwɔrɔ ndisɔŋɔ nda ke akpanikɔ ke abaŋa ibet Abasi usehe idomo, eŋwan, ye  afanikɔŋ.” ²

Mbon emi edude ke spirit akamba akamba ye emi enamde nti utom ekeme ndiduɔ edieke mmɔ miyɔhɔ tutu esim utit. Yak nyin inim ke esit nyin kpukpru ini mme ikɔ emi “Emi iditibeke inɔ mi.”

Ke ini Jesus Christ ekekpepde ŋkpɔ ke Capernaum, ediwak mbet esie ema efiak edem ɔkpɔŋ enye.

“Ndien Jesus Christ ɔdɔhɔ mbet duopeba ete, ndi mbufo nko eyenyɔŋ?”³

Mfin emi, ami menim nte ke Jesus Christ obup kpukpru nyin emi inamde ediomi ye enye ete: “Ndi mbufo nko eyenyɔŋ?”

Akam mi edi yak kpukpru nyin, nte ikerede ibaŋa ini iso ibɔrɔ nte Simeon Peter ite: “Jehovah, anie ke nyin idida ibine? Afo enyene mme ikɔ nsinsi uwem.”⁴

Yak nyin ibuɔtidem kese nyin inimde inyuŋ ifiɔkde. Edieke nyin mikiduhe uwem nyin nte asaŋade ye se nyin ifiɔkde, yak nyin ikpuhɔ. Mme anam idiɔk emi ekade iso ke mme idiɔk ŋkpɔ mmɔ, emi minyuŋ ikabakere esit, eka iso eduɔ eduk idiɔk ŋkpɔ mmɔ, tutu satan ada mmɔ enyene ɔnɔ idem esie, ndien etim abiat ufaŋ mmɔ ndikabare esit, ndinyene mfen-nnɔ, ye ndibɔ kpukpru eridiɔŋ ke abanga nsinsi uwem.

Ami mekop ediwak nta nto mbon efiakde ufɔk Abasi ye mbon efrede ntak mmɔ edude mi ke isɔŋ. Ami mbeŋe mmɔ nte yak ekere ebaŋa enyuŋ enyɔŋ edi, koro ami nkere ke owo ndomo kiet idinyeneke ntak ndifiak edem ke ini Ɔbɔŋ Jesus Christ edidide.

Ke ini nyin ikeduɔkde mmɔŋ, ima inam mme ediomi-ikidige ye owo edi ekedi ye Andinyaŋa, ite ke “iyeda enyiŋ Jesus Christ inɔ [idem nyin], inyuŋ inam ŋkpo inɔ enye tutu esim utit.”⁵

Ndidia udia Ɔbɔŋ edi usuŋ kiet nyin idiɔŋɔde mme nyin iminyene udɔŋ ndinam ŋkpɔ nnɔ enye, odudu spirit nyin, ye nte mbuɔtidem nyin ɔkɔride ke Jesus Christ.

Ndidia udia Ɔbɔŋ edi ata akpan ŋkpɔ emi nyin inamde ke Sunday. Jehovah ama anam ewuhɔ emi aŋwaŋa mme Apostle esie mbem-iso enye akpa. Enye ama anam ukem ukem oro ke America. Enye ɔdɔhɔ nyin ete ke edieke nyin inamde ewuhɔ emi, enye eyedi ntiense ɔnɔ Ete ete ke nyin iyeti Enye kpukpru ini, ndien Enye ɔŋwɔŋɔ ete, ke nyin iyenyene spirit Esie ye nyin kpukpru ini. ⁶

Ke mme ukpep ŋkpɔ Ekpri Alma ekekpepde eyen esie Shiblon, nyin ikut item ye ifiɔk emi edinamde nyin inim mme ewuhɔ nyin:

“Ewut ete ke mbufo imenekere idem mbufo ke ntaŋidem, ekut ete ke mbufo inamke inua ibaŋa ifiɔk ye odudu mbufo

“Enyene uko, edi ukutuk owo, enyuŋ efara idem ke abaŋa udɔŋ mbufo, man mbufo enyene ima. Ekpɔŋ ifu.”⁷

Ke ediwak isua emi ekebede ke ini nkedude ke nduɔk-odudu, nkeyom ndiwat ubom, ndien emi ekedi akpa ini ami ndiwat ubom. Mma nwat ŋwɔrɔ.

Ke ekpri ini ama ekebe, awawa ama anam ubom emi esip. Mma ŋwana eti eti, ye udeŋ ke ubɔk kiet nyuŋ nda ubɔk enyeko mmum ubom, mma nkan ŋwɔŋɔre ubom nnim.

Mma mfiak ŋwana ndiwat ubom emi edi ikebigike enye ama afiak esip. Ami mma ndomo ofuri ukeme mi ata ŋkpewat ubom emi edi nkekemeke, tutu owo kiet emi ekefiɔkde akan mi edidɔhɔ me ete ke ubom mi enyene odudu, ndien ke mmɔŋ otodo oduk enye ndien iyakke mi nkan nwat enye. Ami mma nnuk ubom emi ndian ke mben inyaŋ ndien ke akpanikɔ mma nkut nte ke enye ama enyene odudu.

Ami mekere nte ke usuk ini ke uwem emi nyin iminyene mme idiɔk ŋkpɔ, emi nte ubom mi, miyakke nyin ikori ke spirit.

Edieke nyin ikade iso ke mme idiɔk ŋkpɔ nyin, nyin ifre ibaŋa mme ewuhɔ emi nyin ikenamde ye Abasi, ndien nyin ika iso isip ito mme idiɔk ŋkpɔ emi ke uwem nyin.

Ukem ukem nte mme ndudu oro ke ubom mi, ana nte nyin isiri mme ndudu ke uwem nyin. Usuk idiɔk ŋkpɔ eyeyom utom okpon akan usuk man ikabare esit.

Ndien ana nte nyin ibup idem nyin ite: “Nyin ikere nso ibaŋa Andinyaŋa ye utom Esie? Ndi nyin itie nte Peter ke ini enye ekekaŋde Jesus Christ? Mme ndi nyin imikori ikesim idaha esie ke enye ama ekebɔ “akwa idaha utom” oto Andinyaŋa?⁸

Ana nte nyin idomo ukeme ndinim kpukpru ibet inyuŋ itiŋ enyin ise ubak oro emi ɔsɔŋde nyin ndinim. Abasi eyeda ye nnin, anyaŋa nyin ke ini unana ye ini mmem-idem, ndien edieke nyin inamde se edɔhɔde ete yak nyin inam, Enye eyenam “mmem mmem ŋkpɔ akabare ɔsɔŋ-idem.” ⁹

Nkop-item eyenɔ nyin odudu ndikan idiɔk ŋkpɔ. Ana nte nyin ifiɔk ete ke ndidomo mbuɔtidem nyin oyon ete yak nyin ikop item, usuk ini nyin ifiɔkke se ediwɔrɔde.

Ami nyenɔ usuŋ emi ediŋwamde nyin ndiyɔ tutu esim utit:

1. Bɔŋ akam nyuŋ kot ŋwed Abasi, ke usen ke usen

2. Dia udia Ɔbɔŋ ke eti spirit, ke udua ke udua.

3. Kpe tithe nyuŋ nnɔ fast offering ke ɔffiɔŋ ke ɔffiɔŋ.

4. Kpukpru isua iba—kpukpru isua edieke edide akparawa mme akpara aŋwan—bɔ obufa temple recommend.

5. Ke ofuri eyo uwem nyin nam utom nnɔ Abasi

Yak akpanikɔ emi odude ke gospel odu ke esit nyin, ndien yak nyin isiri ndudu ke uwem nyin emi edikpande nyin ndiwat ke inyaŋ uwem emi.

Ndidu ke Abasi enyene ekɔm urua, ndien nkukure usuŋ ndidu ke enye edi ndikpe ekɔm urua oro.

Esit enem mi koro Andinyaŋa nyin ama ɔyɔ tutu esim utit, anam uwa mkpa erifak esie ofuri ofuri.

Ke nta idiɔk ŋkpɔ nyin, enye ama ɔbɔ ubiak, ukut, ndutuhɔ, mfuhɔ, ye ndik, ndien ke ntak oro enye ɔfiɔk nte aŋwamde nyin, ye nte ɔnɔde nyin odudu man nyin iyɔ inyuŋ ibɔ anyanya emi enimde enɔ mmɔ emi mikpaha mba.

Uwem nyin edi nsio-nsio. Kpukpru nyin iminyene ini afanikɔŋ, ini inemesit, ini ndimek, ini ndikan, ye ini ndifiɔk se akpanade nte nyin inam.

Se uwem nyin ekpededi, ami metie ntiense nte ke Ete ke Heaven ɔdɔhɔ kpukpru ini ete, “Ami mema mbufo, nsɔŋɔ mbufo idem, nyuŋ ndu ye mbufo. Ekukpa mba. Ekabare esit enyuŋ eyɔ ke usuŋ emi ami nwutde mbufo. Ndien ami ndɔhɔ nte ke iyesobo ke obio ubɔŋ celestial.” Ke enyiŋ Jesus Christ, amen.