Edisana Ima: Idiongo Ata Nti Mbet eke Jesus Christ

Nyin ima inyung inana President Thomas S. Monson, nko nyin imema inyung inyime President Russell M. Nelson. President Nelson enyene asanga-sanga itie ke esit mi.

Ke ini nketongode ubon ndito, ekpri eyen erenowo nyin, emi edide isua ition, obup eka ke unyong ufoknwed usen kiet ete, “Nsuto utom ke Ete mi anam?” Enye ete ke mme ufan esie ekeneme ebanga utom ete mmo. Kiet ete ke ete edi akwa owo mme polisi, ke ini efen obomde-inua ete ke ete edi etubom ke akamba nka usiakifia

Ke ini ebupde ebanga ete esie, enye ete, “Ete mi anam utom ke ufok computer.” Ekem, kini iboro esie mikenemke mme ufan esie, enye ete, “Yak kanga, ete mi edi akwa owo esede ofuri ererimbot.”

Nkere ke oro ekedi utit nneme oro.

Ndoho nnwan mi nte, “Ini edi emi ndikpep enye mbanga ekikere erinyanga ukpong ye eke akarade ererimbot.”

Nte nyin ikpepde ndito nyin ibanga erinyanga ukpong, ima mmo enyenede eno Ete ke Enyong ye Andiyanga otim okori ke mmo ndifiok ete ke edi ekikere ima. Iko Abasi Jesus Christ okongo ke ima Abasi Ete ye Andinyanga ye nte nyin imade Mmo ye owo efen.

Elder Jeffrey R. Holland ete: “Akpa akambambet ke ofuri nsinsi edi ndima Abasi ke ofuri esit nyin, ukeme, ekikere ye odudu—oro edi akpa akamba mbet. Edi akpa akambaakpanikoke ofuri nsinsi edi ke Abasi amamanyinke ofuri esit, ukeme, ekikere ye odudu Esie. Ima oro edi nsinsi itiat idakisong, nko enyene ndidi itiat idakisong uwem nyin k’usen-k’usen.”¹

Sia ima edide itiat idakisong uwem nyin k’usen-k’usen, edisana ima edi nkpo emi eyomde eto mbet Jesus Christ.

Prophet Mormon ekpep, “Ke ntre, ndito Ete mi, ebong akam ke ofuri esit eno ete, man eyoho ye ima esie, emi enye onode kpukpru mme nti mbet eyen Esie, Jesus Christ.”²

Ima enehede edi ata eti idiongo eti mbet Jesus Christ.

Nti mbet ema ndinwam. Mmo efiok ete ke ndinwam owut ata ima ye enwongo mmo ekenamde ke usen uduok-mmong.³ Mmo isehe mbon emi mmo enyenede ke ufok Abasi, mme ibiong utom ekamade ke obio, mmo enyene akamba udong ndima nyung nnwam Abasi ye owo efen.

Nti mbet ama ndifen. Mmo efiok ete Erisio-isop Andinyanga ofuk kpukpru idiok nkpo ye ndudue nyin kiet kiet. Mmo efiok ke enye ekpe ekom urua “eke kpukpru nkpo.” Ndidi-ofin, okuk ekpede,udori, usin ubok okuk emi asangade ye idioknkpo, ndudue, ibak esine do. Nti mbet esop ndifen-nno enyung esop ndikpe ubok.

Ndima ndito-eka mi irenowo ye iban, edieke oyomde usung edifen, ekukere se owo efen ekenamde mbufo, edi ekere ebanga se Andinyanga akanamde ono mbufo, ndien mbufo eyenyene emem emi otode ke edidiong Erisio-isop esie.

Nti mbet ema ndisuk idem mmo nno Abasi ye emem ke esit mmo. Mmo esuhore idem, ekop item koro mmo emade enye. Enyene oyoho mbuotidem ndinyime uduak esie, idighe ke se anamde ikpong edi ete enye anamde ye ini anamde. Nti mbet ediongo ete ata edidiong edighe se mmo esiyomde edi eti edidiong edi se Abasi onode mmo.

Nti mbet ema Abasi ekan ererimbot nko esongo eda inyekke ke mbuotidem mmo. Mmo esong idem enyung esong eda ke ukpuhore ye ndutime ererimbot. Nti mbet ema ndikpang utong nkop uyo Spirit ye mme prophet nko mmo idutinke ikop uyo ererimbot. Nti mbet ema “ndida ke ndisana ebiet”⁴ enyung enam ebiet mmo edade edi edisana. Ebiet emi mmo edude enyene ndida ima Abasi ye emem esin ke esit owo efen. Nti mbet ema ndikop item Abasi, mmo ekop koro mmo ema Abasi. Nte mmo emade enyung enimde enwongo mmo, esit mmo edemere enyung ekpuho uduot mmo.

Edisana ima edi ata eti idiongo eti mbet Jesus Christ.

Mma nkpep nkpo mbanga edisana ima nto eka mi. Enye ikedighe owo Ufok Abasi nyin.

Usen kiet ke ediwak isua emi ekebede, mma nkese eka mi, emi okodongode cancer. Mma ndiongo ke enye eyekpa, edi mfina mi ekedi ufen emi enye okobode. Nketingke iko ndomo kiet, edi sia enye enehede odiongo mi, enye ete, “Mmofiok se ifinade fi.”

Ke ata mkpaidem, enye obup mi ke mmem-mmen uyo, “Emekeme ndikpep mi ndibong akam? Nyom ndibong akam nno fi. Mmofiok esitongo ke “Edima Ete ke Enyong,’ edi ndien nting nso?”

Nte ntongoke edong ke mben bed esie enye obong akam ono mi, nkop ima emi mme nkopke akpa. Ekedi sung-sung, ata ima. Okposuk edi enye midiongoke ibanga ekikere erinyanga ukpong, enye enyene ke esit esie asanga-sanga ekikere ima, ekikere ima eka enyenede ono eyen esie. Enye okodu ke ubiak, anwana oyom odudu ndibong akam. Edi ami nkenehede nkop uyo esie edi mma nkop ima esie.

Nti nte nkerede, “Didie ke owo ye akwa ubiak obong akam ono owo efen? Enye edi owo oyomde akam.”

Ndien iboro oduk ke esit mi: edisana ima. Enye ama mi eti eti tutu enye efre abanga idemesie. Ke ata okposong ini uwem esie, enye ama mi akan idem esie.

Idahaemi, ndima ndito-eka mi irenowo ye iban, idige se Andinyanga akanam edi emi? Edi ke nsinsi ye anwanga ekikere. Edi ke ufot ini akwa ubiak, ke inwang Gethsemane okoneyo oro, enye ekedi owo oyomde unwam, obo ufen ke usung eke owo mikemeke ndifiok. Ke akpatre, enye efre abanga idemesie onyung obong akam ono nyin tutu enye ekpe ofuri ekom udua. Didie ke enye ekekeme ndinam? Okoto ke edisana ima ono Ete, emi okonode Enye edi, esok nyin. Enye ama Ete Esie ye nyin akan Idemesie.

Enye ekpe utip ono nkpo emi Enye mikanamke. Ekpe ono idioknkpo emi Enye mikeduehe. Ntakha? Edisana ima. Ke ama ekekpe ofuri ekom udua, Enye ama odu ke idaha ndino nyin edidiong ke nkpo se enye ekekpede ekom-udua ono edieke nyin idituade mkpofiok. Ntak emi Enye akawade idem esie-e? Nko, ye ofuri ini ke ntak ata ima.

Edisana ima edi ata idiongo ofuri nti mbet eke Jesus Christ.

President Thomas S. Monson ete: “Yak nyin itongo idahemi, mfin emi, iwut ima ino kpukpru ndito Abasi, mme edi mbon ufokemana nyin, ufan, odiongo, mme ata esen owo. Nte nyin idemede ke kpukpru usenubok, yak inwana ibiere ke esit nyin ndiboro owo ekededi emi ikutde ke usung nyin ke ima ye mfonido.”⁵

Ndito-eka irenowo ye iban, iko Abasi Jesus Christ edi iko Abasi ima. Mkpon-nkan mbet abanga ima. Nte ami, kpukpru abanga ima. Ima eke Ete, emi akawade Eyen Esie ono nyin. Ima eke Andinyanga, emi akawade kpukpru ono nyin. Ima eka ye ete emi ekpenode ndito esie nkpo ekededi. Ima mmo oro enwamde ke usung eke owo mikwe edi Abasi etim ofiok mmo. Ima mmo oro efende ke kpukpru ye ofuri ini. Ima mmo oro enode ekan nte ebode.

Mmema Ete mi ke Enyong. Mma Andinyanga mi. Mma iko Abasi. Mma Ufok Abasi emi. Mma ufokemana mi. Mma utibe uwem emi. Nte ami, kpukpru abanga ima.

Yak usen mfin emi edi editi Eriset Andiyanga, edi usen edidemere ke spirit ono nyin kiet kiet. Yak usen emi edi ntongo oyoho uwem ima ono nyin, “ndisongo uwem nyin k’usen-k’usen.”

Yak esit nyin oyoho ye edisana ima Christ, ata idiongo eti mbet Jesus Christ. Emi edi akam mi ke enying Jesus Christ, amen.