Ifure-Ifure ido ye Edisuhore Esit
Ifure-ifure ido edi akpan edu uwem eke Andinyanga ndien eyefiok oro eto edinen iboro, unyime ndisuhore idem, ye akwa mfara-ke-idem.
Ami mmedara ke eti ifet ndimenede ubok nno mme adausung ke ufok Abasi. Nyin imeyene ima ino fi President Nelson, ye mme onoitem fo, inyung inwongo ndino ofuri nsin-ifik man ikeme ndinam uduak Abasi oworo osu. Ndien ami ke ofuri esit mi, mmekom Elder Gong ye Elder Soares nsin ke Eboho mme Apostle Duopeba. Utom mbufo eyediong mme owo ye ufokemana ke ofuri ererimbot, ndien mmeyene udong ndinwam nyung mkpep ye mbufo.
Ami mbenge yak Edisana spirit ekpep onyung anam anwanga nyin nte ikpepde ibanga edisana uduot Andinyanga1 kiet emi kpukpru nyin ikpeyomde ndidu.
Ami nyeno ediwak uwutnkpo emi owutde oruk mbiet ido Christ mbemiso ndiwut mme edu uwem emi nte nkade iso ke etop emi. Mbok eno mkpang-utong ke mme uwutnkpo emi enyung ekere ye ami se idi iboro ke mme mbume emi ndibupde.
Akpa Uwutnkpo. Ekpri Owo Inyene ye Amulek
Ke Obufa Testament, nyin ikpep ibanga nte ekpri owo inyene ekebupde Jesus ntem, “Eti Andkipep, ndinam nso eti nkpo man nnyene nsinsi uwem?”2 Andinyanga odoho enye ete onim mme mbet. Andikpep afiak adian mme nkpo efen emi enye enyenede ndinam nte ekemde ke unana ye ndaha esie.
“Jesus odoho enye ete, Edieke oyomde ndifon mma, ka kanyam se enyenede da no mme ubuene, ndien eyenyene inyene ke heaven, nyung di disanga ye ami.
Edi ke adangaemi akparawa okopde iko oro, enye onyong ye mfuho, koro enye edide owo eke enyenede ediwak inyene.”3
Da domo iboro emi ekpri owo inyene okonode ye se iketibe ye Amulek nte ewetde ke Nwed Mormon. Amulek ekedi owo emi amade utom onyung oforode ye ediwak mbon ufokemana ye mme ufan.3Enye eketing abanga idem esie nte owo emi ekekotde ediwak ini edi iyomke ndikop, owo emi ofiokde nkpo abanga Abasi edi emek nditre utong.4 Nte eti owo, Amulek ekese nkpo ererimbot ukem nte ekpri owo inyene emi etingde ke Obufa Testament.
Okposuk edi nte enye ekesongde esit, Amulek ama anam uyo angel, enyime prophet Alma ndiduk ke ufok esie onyung ono enye udia. Spirit esie ama edemere kini Alma odude ye enye ndien ikoot edikworo gospel ama osim enye. Ndien Amulek ama esin “ofuri gold, silver, ye nsongurua nkpo esie … ke ntak iko Abasi, ndien oruk ye ete ye mme akpa ufan esie [ema] esin enye.”6
Mbufo ekere nsidi ukpuhore ke iboro eke ekpri owo inyene onode ye eke Amulek?
Udiana Uwutnkpo. Pahoran
Kini akamba ekong emi etingde ebanga ke Nwed Mormon, ndiwet mme nwed nyung nno iboro eketibe ke ufot Moroni, etubom mbon ekong Nephi ye Pahoran, akamba ebiere-ikpe ye akama-ukara obio oro. Moroni, emi udim ekong esie ekebode okposong ukut oto unana mme akama ukara edino unwam, ewet nwed ono Pahoran “obiom enye”7 ye mme Adausung mmo ikpe, eting ikot adian mmo ete mfuna mmo edifre enyin, ifu, edisin, kpa ye ndidi mbia.8
Ekpedi mmem-mmem ono Pahoran edikop idiokesit mbanga ndori uyo Moroni, edi enye ikenamke ntre. Enye ekeno sung-sung iboro onyung eting abanga edinwana ye mme andikara obio emi Moroni imenyeneke ifiok ibanga. Ndien Pahoran odoho ntem:
“Sese, ami ndoho fi nte, Moroni ke nkopke inemesit mbanga okposong ukut emi osimde fi, ukpong mmi okop mbom. …
“Afo emebiom mi ikpe ke nwed emi afo ewetde, edi iko iduhe; Ami nyatke esit, edi mmedara mbanga mme ediwak eti ido ke esit fo.”9
Mbufo ekere ete nsidi ntak Pahoran onode sung-sung iboro ke ndori uyo eke Moroni?
Uwutnkpo Oyoha Ita President Russell M. Nelson ye President Henry B. Eyring
Ke akwa mbono eke ofiong itiokiet emi ebede, President Russell M. Nelson eketing abanga se imo ikenamde ke President Thomas S. Monson okodohode ete yak ikpep, ikere ibanga inyung isin ke edinam mme akpaniko emi odude ke Nwed Mormon. Enye okodoho nete “Mmedomo ndinam item emi. Mmenam ibat nkpo mbanga se Nwed Mormon edide, se enye osongode, se enyeesinde, se enyeanamde oworo osu, se enye anamde anwangaye se ayarare. Edise nwed Mormon ke usung emi edi utom emi onode ikike onyung edemere spirit owo. Ami ndoho nte kpukpru owo enam kpa ntre.10
Kpa ntre, President Henry B. Eyring owut ufon emi odude ke uwem esie ke ndinam se president Monson eketingde. Enye odoho ete,
“Mmekot Nwed Mormon kpukpru usen ke akande isua Aba-ye-duop. Ndusuk Ami mkpekere nte item President Monson ekenyene owo efen. Edi, ukem nte ediwak mbufo, Ami nkekop ndongesit emi otode iko prophet enwongo esie onyung anam nnyene edisin ifik. …
“Se itibede ino mi ye kpukpru nyin, ye ami nko, edi ukem se prophet ekewongode. 11
Mbufo ekere ete nso idi ntak emi mme adausung eke Ufok Abasi emi iba esopde ndinam item emi President Monson ekenode?
Idige ekikere mmi ke oruk eti iboro emi Amulek, Pahoran, President Nelson ye President Eyring ekenode edi nkpo emi ekemede ndinam anwanga ke mbiet ido Christ kiet kpot. Ke akpaniko ediwak mbuaha ido ye ifiok anam mmo enyene oyoho ndaha ke spirit nte uwem mme isong-utom inang emi owutde. Edi, Andiyanga ye mme prophet, ema esio ewut ata akpan edu uwem emi kpukpru nyin ikpeyomde ndifiok nyung nam enyene itie ke uwem nyin
Ifure-ifure ido
Mbok se edu-uwem emi Christ emende eting iko abanga Idemesie ke Nwed Abasi emi: “Emen okpono mi ekongo ke itong mbufo enyung ekpebe Mi, koro mmenyene ifure-ifure ido nyung nsuhore idem ke esit; ndien mbufo eyekut nduok-odudu eno ukpong mbufo.”12
Nte ukpebnkpo, Andinyanga emek ifure-ifure ido ke otu mme ido emi Enye ekpetingde nkpo abanga.
Mbiet ukpepnkpo emi odu ke eriyarade emi ekenode Prophet Joseph Smith ke isua 1829. Obong eketing ntem,”Ekpebe Mi, ekpang utong eno iko emi; esanga ke sung–sung Spirit mindien mbufo eyenyene emem ke Ami.”13
Ifure-ifure ido edi akpan akpan edu uwem eke Andifak onyung owut idem esie ke eti edisop ndinam, nsuhore idem ye okposong edifara ke idem. Ido emi anam efiok ofuri –ofuri mme edinam emi Amulek, Pahoran, President Nelson ye President Eyring ekenamde.
Nte uwutnkpo, President Nelson ye President Eyring ekesop ndinam ke eti usung item emi President Monson okonode ete ikot inyung ikpep Nwed Mormon. Okposuk edi erenowo iba emi ekekamade akamba itie ke Ufok Abasi enyung ekot Nwed Abasi ke mme ediwak isua, edinam mmo ikesineke eyighe ye ntang idem.
Amulek ama enyime uduak Abasi, enyime ikoot edikworo iko Abasi, asana eti ebiet-idung ye ebuana mme oruk esie ayak. Ndien edidiong Pahoran ekedi ikike ye okposong edifara ke idem nte enye etingde ono Moroni mme mfina emi odude ke edinwana ye mme andikara obio.
Ke ererimbot mfin emi, mbiet ido Christ eke ifure-ifure ido edi nkpo eke unana ifiok odude. Ifure-ifure ido enyene odudu, idighe mmemmem, enyene uwem, idighe ndobo ndobo, okop uko ikopke ndik, afara ke idem, idiokke itong, enyene ido, idige ama idem ikpong, onyung ofon ido, idige anana ido. Ifure-ifure ido isopke iyaresit, idige mbubik, mme nsongido onyung osop ndikut eti nkpo emi mbon efen enamde.
Okposuk edi nsuhore idem owutde mbere-idem nyin ye Abasi ke edino nyin ukpeme ye unwam, ata akpan nkpo ke ifure-ifure ido edi ndinyene mbengidem ndibo ukpep nto Edisana Spirit ye kpukpru mbon efen eke minyeneke ifiok, ifiokke nwed, inyeneke akpan itie ke ufok Abasi, ye mmo emi abade nte inyeneke se editingde. Eti nte Naaman, etubom ekong Syria ekekande ntangidem esie onyung enyime ke idak nsuhorede idem ndinam se eyen ufok okodohode ete eyen anam item Prophet Elisha, onyung eyere mmong ke Jordan ikatiaba.14 Ifure-ifure ido edi akamba ukpeme ono nnan ntang idem emi otode uworo etop, itie ukpono, odudu, inyene ye nnem-inua.
Ifure-ifure ido—mbiet edu uwem Christ ye Eno eke Spirit.
Ifure-ifure ido edi edu uwem emi inyenede ito udong, eti ndumek ye ndidomo ukeme man efen mme idiok ido nyin15. Enye nko edi eno spirit emi nyin inyeneke unen ndiyom.16 Nte ededi ana nyin inyene iti, ntak emi enode uto edidiong emi; ke ufon ye ke edinwam ndito Abasi.17
Nte nyin idukde ibine inyung itiene Andiyanga, nyin sung-sung idibo ukeme ndikabare ntie nte Enye. Spirit Abasi ono nyin odudu ndinyene mfara-ke-idem inyung inyene iwuk ye sung-sung eti ido. Ndien, ifure-ifure ido edi se nyin idide nte mbet Christ idige se nyin idomode ndinam.
Moses “ekebo ukpepnkpo ke kpukpru oruk ifiok mbon Egypt onyung enyene ukeme editing iko onyung okpon ke edinam.”18 Edi, enye ama enyene ifure-ifure ido akan kpukpru owo emi edude ke ofuri ererimbot.”19 Ifiok esie ye ukeme ekeme ndino enye ntangidem. Edi, edu ye eno eke spirit ifure-ifure ido emi ekediongde enye iyakke ufang ino ntangidem ke uwem esie onyung emenede enye onim nte nkpo-utom ndida nam uduak Abasi oworo osu.
Andikpep nte Uwutnkpo eke Ifure-ifure ido
Ata akamba ye ndiye uwutnkpo eke ifure-ifure ido edi ke uwem Andinyanga ke Idemesie.
Akwa Andifak, emi “ekesuhore oduk ke idak ofuri nkpo”20 onyung obode ufen, iyip oworo Enye, ndien Enye akpa “man eyet kpukpru idiok ido nyin efep,” 21 enehede eyet ukot eke mbet Esie.22 Oruk ifure–ifure ido emi edi akpan edu uwem eke Christ nte eyen-utom ye adausung.
Jesus ekeno ata akamba uwutnkpo eke eti ediyom ndinam ye nsuhore iem nte Enye obode ndutuho ke Gethsamane.
“Ndien ke Enye osimde ebiet oro, Enye odoho [mbet Esie] ete, “Ebong akam mbak mbufo ediduk ke idomo.
“Ndien Enye… oduo ke edong onyung obong akam,
“Odoho ntem, Ete mi, edieke Afo onyimede, yak cup emi ebe okpong Mi, edi yak okudi nte Ami nnyimede; edi yak edi nte Afo onyimede.”23
Ifure-ifure ido Andinyanga ke ndinam nkpo emi enyenede ufon ke nsinsi ye ke idak okposong ndutuho owut nyin kiet-kiet ufon emi odude ke ndimen ifiok Abasi nkan ifiok idem nyin.
Edisongo nda Christ ke nsuhore idem ye akamba mfara-ke-idem edi nkpo mkpaidem ye ukpep ono kpukpru nyin. Nte mbon ekong emi ebemde mme andikpeme temple ye mbon ekong Rome ekade Gethsemane ndimum Jesus, Peter anyan ubok adabare ofut, osibe utong ubokudom eke eyenutom owo akwa oku osio.24 Ndien Jesus anyan ubok otuk owo emi utong enye onyung okop nsong idem.25 Mbok esese nte Enye odiongde mmo emi eyomde ndimum Enye ke ukem odudu Heaven emi ekpenamde mmo ekunyene ukeme ndimum nyung nkong Enye ke cross.
Ekere nko nte edoride Andikpep uyo ke iso Pilate enyung ebiomde Enye ikpe man ekong Enye ke cross.26 Kini etapde Enye eno mkpa, Jesus okodoho ntem, “Mme ese ete nkemeke ndikpe Ete Mi ubok mbo Enye se ibede udim angel duopeba idahaemi?” 27 Edi, “Nsinsi Ebiere-ikpe eke mme odu uwem ye mme akpa-mkpa”28 ke ekebiere ikpe eno ke iso mmo emi emekde enim ke esisit ini. Ndien [Jesus] iboroke baba iko kiet, esin idem akpa andikara eti-eti.”29 Ifure-ifure ido Andiyanga owut idem ke eti iboro, okposong mfara-ke-idem, ye ke editre ndimen akwa odudu Esie nam nkpo nno idem Esie.
Enwongo ye Iko ntiense
Mormon ekewut ke ifure-ifure ido edi usung emi idinyenede ukeme ye eno eke spirit.
“Mmodo, edieke owo enyenede mbuotidem enye enyene ndinyene idorenyin, koro mbuotidem miduhe idorenyin ikemeke ndidu.
“Ndien efen, sese Ami ndoho mbufo nte enye ikemeke ndinyene mbuotidem ye idorenyin ibohoke enye enyene ifure-ifure ido onyung enyene esit mbom.
“Edieke edide ntre, mbuotidem ye idorenyin esie edi ikpikpu, koro Abasi idaha owo baba kiet, ibohoke mbio nsuhore idem ye mbio emem edieke owo osuhore idem onyung enyene mbom ke esit, onyung onyime ke odudu Edisana Spirit ete ke Jesus edi Christ, enye enyene ndinyene ima, koro edieke enye minyeneke ima enye idige nkpo ndomo kiet.”30
Andinyanga okodoho ntem “Ofofon ono mmo eke enyenede ifure-ifure ido koro mmo eyeda isong enyene.”31 Ifure–ifure ido edi ata akpan edisana edu uwem ndien imekeme ndibo nyung nsin ke edu uwem nyin ke ntak Erisio-isop Andinyanga.
Ami nno iko ntiense nte ke Jesus Christ edi andiset ye odu uwem Andifak nyin. Ndien ami nwongo nte ke Enye eyekpeme onyung osongo kpukpru nyin idem nte isangade ke nsuhore idem eke spirit Esie. Ami nno iko ntiense mi mbanga mme akpaniko ye enwongo emi ke enying Obong Jesus Christ, amen.