Eda Edisana Spirit nte Ndausung Mbufo
Ata akamba eno etiene mbon emi ewukde mbuotidem mmo ke Jesus Christ. Eno oro edi Edisana Spirit.
Ke Easter Sunday emi, nyin imekere ibanga Eriset eke Obong Jesus Christ ye eke anwanga udi emi onode kpukpru mme ndito Abasi idorenyin ete ke Christ ama akan mkpa emi eriset mikpiduhe. Ami mmenim ukem nte Apostle Paul ekenimde, nte ke ukem usung emi Abasi akanamde Christ eset ke mkpa [nko] ke [Enye] eyenyung anam ikpokidem [nyin] odu-uwem oto ke Spirit Esie emi odungde ke esit idem [nyin].”1
Ndidu uwem oworo ndinam enyene uwem. Ukem nte Christ akafiakde ono nyin uwem ke nyin ima ikakpa oto ke odudu Eriset Esie, Enye nko ekeme ndino nyin uwem.2 Ke nwed Moses, nyin imekot nte Adam okobode oruk uwem emi ete: “[Adam] ama obo uduok-mmong, ndien Spirit Abasi okosuhore odoro enye, ntre enye akafiak amana ke Spirit, onyung akabare odu-uwem nte eti owo.”3
Utibe eno emi etiene mmo emi ewukde mbuotidem mmo ke Jesus Christ. Eno oro edi Edisana Spirit emi onode nyin se Obufa Testament okotde “ndidu uwem ke Christ.”4 Edi ke ubakini nte nyin imesida eno emi nte nkpo mbubru?
Ndito-eka irenowo ye iban, edi ata nkpo mfoniso ke “ndinyene … Edisana Spirit nte ndausung [nyin],”5 nte emende ewut ke mbuk eke idikopde mi.
Kini Ekong eke Korea, Ensign Frank Blair akanam utom ke ubom-nsungikang emi ekesimende mbon-ekong ke Japan.6 Nsungikang oro ikokponke ikem ndinyene ata chaplain, ntem etubom oro ama okot Brother Blair ete etie nte chaplain, ke enye ama okodungore ese ete ke akparawa emi ekedi eti owo, emi ofuri crew oro ekenehede ekpono.
Ensign Blair ediwet ete: “Akamba oyobio ama osim nsungikang nyin. Ofim okodok 45 feet [14m] high. Ami nkodu ke ukpeme … kini kiet kotu engine nyin ita eketrede ndiwat ndien ema ebo etop ete ke isong ubom ama asiaha. Engine nyin iba okosuk awawat, kiet akawat ke ubak odudu. Nyin ikodu ke ata afanikong.”
Ini emi Ensign Blair okurede utom ukpeme esie ndien ebenge idem ndikide idap etubom ama okong enyin-usung esie. Etubom oro odoho ete, “Mbok nte afo eyebong akam ono nsungikang emi?” Ke ntre, Ensign Blair ama enyime ndinam oro.
Ke ini oro, Ensign Blair ekpekebong akam ete, “Ete ke Enyong, mbok diong nsungikang nyin emi yung kpeme nyin. Edi, enye okobong akam oyom ndifiok mme enyene nkpo se enye akpanam man anwam nsungikang oro ndiboho. Ke ndiboro akam Brother Blair, Edisana Spirit ama eteme enye ete aka etak-ubom, ekenyene nneme ye etubom, onyung obo ukpeb ofon. Enye edikut ke etubom okoyom ndinam engine ita emi okosuhode ewat ke usop. Ensign Blair afiak aka cabin esie man okobong akam.
Enye obong-akam ete, “Nso nkpo ke ami mkpenam man nnwam engines emi?”
Nte iboro, Edisana Spirit eketeme ete ke ana enye asanga akanare nsungikang ese ofon man okut ofuri se itibede. Enye ama afiak ebine etubom man obo unyime asanga akanare nsungikang oro. Ekem, dian ye lifeline emi ekeyitde enye ke isin, enye osuhore oduk aka oyobio mmong oro.
Nte enye adade ke etak-ubom oro, enye edikut mme ikpo propellers kini mmo eworode ke mmong edi kini emi nsungikang osimde iso ofim oyobio. Propeller kiet ekenehede anam utom, ndien akakanare ata usop-usop. Ke enye esede okure, Ensign Blair ama afiak obong-akam. Ata iboro emi enye okobode ekedi ke eti engine kiet emi osuhode akanam ata akwa utom ndien ke ana esuhore uwat esisit. Ntem, enye afiak ebine etubom onyung eting ekikere oro ono enye. Etubom okodu ke mkpaidem, odoho enye ete ke mme engineers ekedoho ete eka-iso ewat ke usop—sia mmo ema esin odudu eno eti engine oro man efehe osop ebe ofim oyobio. Edi, etubom ama emek ndida ekikere eke Ensign Blair ndien osuhore ndiwat eti engine oro. Ke usiere, nsungikang oro ama awat ekesim utit ke ifure.
Ke ufang hour iba efen, eti engine oro ama etre ndiwat fap. Dian ye ubak-odudu emi okosuhode, nsungikang oro ama ebehe sung-sung ekesim mben esuk.
Etubom edidoho Ensign Blair ete, “Edieke nyin mikpikesuhokede engine oro kini emi nyin ikanamde, nyin ikpeketak ke ufot oyobio oro.”
Ke engine oro mikpeduhe, iduhe usung nte ekpewatde. Nsugikang oro ekpekekabare okibi, ndien osip. Etubom ama okom ekpri owo-ekong LDS emi ndien odoho ete ke imo imenim ete ke nditiene ntuuk-spirit eke Ensign Blair ama anyanga nsungikang oro ye mbon crew oro.
Idahaemi mbuk emi enyene se adade ono. Okposuk nte nyin miduakke ndisobo ye oruk idiok ndaha emi, usung odu kabanga danga nyinikepkeme ndibo ndausung Spirit ke kpukpru ini oto ke esit mbuk emi.
Akpa, kabanga eriyarare, ana nyin idu uwem ke usung emi edinwamde nyin ndibo ifiok heaven. Ensign Blair okodu eti ye edisana uwem. Edieke enye ekpekesongde ibuot, enye ikpekenyeneke osongo spirit ke ndibong akam ke nte enye akanamde man nsungikang oro oboho ye ndibo oruk akpan ndausung oro. Ana nyin owo kiet-kiet inam ukeme man uwem nyin odot ye mbet Abasi man otodo Enye ada nyin usung.
Ubakini nyin ikemeke ndibo ntim sprit koro nyin idotke. Editua-mkpofiok ye nkop-item edi usung ke ndifiak mbo ata ntim-spirit. Iko AkaniTestament eke editua-mkpofiok oworo “wongore” ye “fiak wongore.”7 Kini etiede nte ke mbufo emeyom usung ekpong Abasi, mbufo enyene ndinam ubiere ndikpong idiok-ido nyung nse Andinyanga, ke ebiet emi mbufo eyekut nte Enye, anyanare ubok Esie ebet mbufo. Enye oyom ndida mbufo usung, ndien mbufo enyene ndibong akam man efiak ebo ndausung oro.8
Udiana, Ensign Blair ikoyomke ete Jehovah oyo mfina esie. Enye okoyom se enye akpanam man ono unwam. Ukem oro, nyin ikpebup ete, Obong, “Nso nkpo ke nyene ndinam man nno unwam?” Edi, ke nde emi nyin ikpebatde mfina nyin inyung ibong-akam iyom Jehovah ete anam mmo, nyin ikpeyom ediwak nti usung ndibo unwam Abasi man inyime ndinam nte Spirit etemede.
Akpan ukpebnkpo oyoho ita odu ke mbuk Ensign Blair emi. Ndi enye ekpekekeme ndibong-akam ye oruk sung-sung osongo oro edieke enye mikpikeboho ndausung otode Spirit ke akpa ini? Ini afanikong idige ini ediyom eno Edisana Spirit ke mukuyomke enye ke anyan ini ko man oyom usung nte ekpedade enye anam utom. Akparawa emi ekenehede etiene usung emi enye ekesidade ke ediwak ini anam nkpo, kini nte ekedide full-time missionary. Nyin imoyom Edisana Spirit nte ndausung nyin kini nkpo ofonde ye nyin man nyin idifiok uyo Esie kini afanikong.
Ubakowo ekere ete ke nyin ikpeyomke ndausung Spirit k’usen-k’usen sia “ifonke [Abasi] ndino ikpan ke ofuri nkpo,” man nyin ikudi idiok eyen-utom.9 Nte ededi, ekeno iko Abasi emi, esok akpa missionaries emi ekeyomde Joseph Smith obo eriyarare emi mmo ekpekebode ke idem mmo. Ke akpa ufang oro, Jehovah odoho mmo ete eka mission field “ekem mmo eyediomo ke ufot idem mmo ye Abasi.”10
Missionaries emi ekeyom okpokpo eriyarare kabanga uka-isang mmo. Mmo ikekpepke ndiyom ndausung nno idem mmo. Abasi okot edu-uwem emi se enye edi: ifu. Ekeme ndidi mme akpa mbon Ufok Abasi ema enehede enem esit ke ndinyene prophet akpaniko emi akanamde mmo etre ndikpeb danga nte ekpebode eriyarare ke idem mmo. Ndida-ke-idem ke nkpo Abasi edi ndinyene ukeme man okop uyo Abasi otode ke Spirit Esie nno uwem mbufo.
Alma eketeme eyen esie ete “nneme ye Abasi kekpukpruse edinamde.”11 Ndidu uwem ke usung ntem—emi nyin isiwakde ndikot “ndidu uwem oto ke Spirit”—edi akamba unen. Ifure ye akpaniko ye mbunwum spirit odu ke usung oro emi edide ima, idara ye emem.12
Ukeme Ensign Blair ke ndibo eriyarare ama anyanga enye ye mbon nsungikang esie osio ke idiok oyobio. Mme oruk oyobio efen ke ofifime mfin emi. Nke-mbuk Nwed Mormon kabanga tree of life13 ono akwa ndise ke nte idibode ukpeme Abasi ke idiok ererimbot emi. Nkukut emi eting abanga akwa ekim emi eketibede man abiat spirit mbon Ufok Abasi emi ekefiakde etiene Abasi.14
Kini nkerede mbanga nkukut emi, ami ndikut nte ediwak owo esangade ke usung, ubakowo esong-ubok mmo emum iron rod oro, edi ediwak mbon efen eketiene ikpat mbon owo emi ekedude kiso mmo. Akpatre edinam emi owut ekpri ekikere ye nsin-ifik. Mbufo emekeme ndinam nyung nkere se mbon efen enamde ye se enyung ekerede. Emi ekeme ndifon-mma kini idomo miduhe. Edi abianga oyobio ye ekim-nsu isinoho ntot ke ini editibede. Ke mme ini emi, ndifiok uyo Edisana Spirit edi nkpo eke uwem spirit ye mkpa.
Akwa enwongo eke Nephi edi ete ke “owo ekededi emi edikopde uyo Abasi, onyung … anam uyo oro, …iditakke; ndien idomo ye eduat eke andidiok idikanke ida mmo isin ke ekim, man ada mmo aka nsobo.15
Ikemke ke nditiene ikpat-isang eke mbon owo emi edude mbufo kiso. Inaha nte nyin inam inyung ikere se mbon efen enamde ye se enyung ekerede; ana nyin idu uwem emi enyenede ndausung. Ana nyin kiet-kiet ida ubok nyin imum iron rod oro. Ekem nyin iyetiene Abasi ye akwa nsuhore idem, idiongo ete ke Enye “eyeda [nyin] usung ke ubok Esie, onyung oboro akam [nyin].”16 Ke enying Jesus Christ, amen.