Usen Kiet Efen

Esisit isua ebede, mme ufan mi ema enyene ediye eyen ekekerede Brigham. Enye ama akamana, ema edungode ediongo ke Brigham enyene ndedibe udongo ekotde Hunter Syndrome, emi ekeworode nte ke Brigham edinyene ibio ini ndidu uwem. Usen kiet ke ini Brigham ye ufokemana esie ekekade temple, Brigham ama okot udim iko kiet; ke uyo iba enye ama odoho, “Usen kiet efen.” Ke ndang nsiere usen oro, Brigham ama akpa.

Ami mmekese udi Brigham ekpri ini ifan, ndien kpukpru ini nkade, mmesikere mbanga udim iko oro, “usen kiet efen.” Esikpa mi idem se enye oworode, se enye edinamde ke uwem mi ami ndidiongo ke nnyene mkpasip usen kiet efen ndidu uwem. Ami ndikama nwan mi, ndito mi, ye mmo eken didie? Ndinyene ime ye mfon-ido didie? Ndikama ikpok idem mi didie? Ndiyire didie ke akam nyung nduongore mme nwed Abasi? Nkere nte ke usung kiet mme eken, nyin iyenyene ifiok “usen kiet efen” —ifiok, ke ana ida ini inyenede inam nti nkpo.

Ke Akani Testament imikot mbuk Hezekiah, andikara ke Judah. Prophet Isaiah ama odoho Hezekiah ke Hezekiah omong akpa. Ke ini Hezekiah okokopde iko prophet emi, enye otongo ndibong akam, ekpe-ubok, onyung atua eti-eti. Ke ndo-ndo oro Abasi adian isua Efut ke isua uwem Hezekiah (se ke Isaiah 38:1–5.)

Ekpedoho nyin ke inyene ekpri ibio ini ndidu uwem, nyin nko imekeme ndikpe ubok iyom ediwak usen uwem ke ntak mme nkpo akpanade inam mme ikpinamde ke usung efen.

Ke ikpongde in Abasi, ke oniong Esie, ke enye enyimede ndiyere akam nyin, nkpo kiet anade idiongo edi: nyin iminyene “mfin” ndidu uwem, ndien ukpohode ndida nam usen nyin ofon edi nyin ndinyime ndiwa-idem.

Jehovah Abasi odoho ete, “Sese, idaha emi ekot enye mfin tutu edidi Eyen Owo, ndien ke akpaniko emi edi usen nwa-idem” (D&C 64:23; emphasis added).

Iko emi nwa-idem eda eto iko Latin edide sacer, emi oworode “edisana,” ye facere, emi oworode “ndinam,” ke iko efen ndinam nkpo asana, ndino mmo ukpono.

“Nwa-idem ono edidiong otode heaven” (“Praise to the Man,”Hymns,no. 27).

Ke nsuto usung ke nwa-idem edinam usen uwem nyin enyene iwuk onyung edi edidiong?

Akpa, nwa-idem owo kiet ono nsongo onyung ono ufon ke nkpo iwade-idem ino.

Ke mme isua ebede ke fast Sunday, ekamba anwan kiet ama odok pulpit ndibuana iko ntiense esie. Enye odung ke obio ekerede Iquitos, emi edide Peruvian Amazon. Enye odoho nyin ete otongode ke ini baptism esie, ke utit-uduak imo osuk edi ndibo ewuho eke temple ke Lima Peru. Enye ama ekpe oyoho tithe esie ke akpaniko onyung enim ekpri okuk enye anwanade ke ediwak isua.

Idaresit esie ke ndika temple nyung nkobo ndisana ewuho ewut idem ke mme iko emi: “Mfin ndoho nte ke akpatre mmenyene mbeng-idem ndibe ke veil. Ami ndi nwan enemesit akan ke ofuri ererimbot; mmenim okuk, mbufo idiongoke nte ebihide, nda nka temple, ndien usen itiaba ke akpa-inyang ye hours Efureta ke esit bus, ke akpatre ami mma ndu ke ufok Abasi. Adangante nkokpongde edisana ebiet oro, mma ndoho idem mi, ke kpukpru nwa-idem ekeyomde ami nda ndi temple, ndiyakke nkpo ndomokiet anam mi nda mfefere-mfefere ofuri ediomo namde; ediworo ikpikpu. Emi edi ata akwa ibiong-utom!”

Ami mmekpep nto nwan oro ke owo ndiwa-idem edi anana-mbiet odudu oro akamade edinam ye mkpe-mbiere nyin. Nwa-idem owo kiet akama edinam, ibiong-utom ye ediomi onyung ono ndisana nkpo unwana.

Udiana, nwa-idem inamde ino mbon efen, ye oro mbon efen enamde eno nyin, ono kpukpru owo edidiong.

Ini nkedide eyen ufo nwed ke dental school, inyene okuk ke obio nyin ikefonke. Nsongo-nkpo ama osuhore idaha okuk kpukpru usen.

Mmeti isua emi akanade nsin-enying nda ntongo nsiak-owo-idem; akana nyene kpukpru nkpo utom usiak-idem eyomde mbemiso eda mi ke Semester oro. Ete ye Eka mi ema enim okuk ekeyomde. Edi okon-eyo kiet nkpo ama etibe. Nyin ikaka ndidep mme nkpo utom oro edi ima idikut kpukpru okuk emi akanade nyin ida idep kpukpru nkpo utom oro ekekeme ndidep surgical tweezers iba, —nkpo efen ikeduhe. Ima inyong idi ufok ubok ukpok ye idop esit ke ini ikerede nte ndiyakde semester kiet ke ufoknwed atak. ke ini kiet wap, eka mi odoho, “Taylor, tiene mi; yak iworo.”

Ima isanga iduk isong obio ika ediwak ebiet edepde enyung enyamde okpoho ubok gold. Ima ikesim efe kiet, eka mi ama osio ekpri blue ekpat velvet ke ekpat okuk esie odongode ndiye okpoho itong ubok gold oro ekewetde iko emi, “nno esok edima eyen anwan mi, ete fo ono.” Edi okpoho itong ubok ete eka mi okonode eka mi ke editi usen emana esie kiet. Ndien, ke enyin mi, enye amayam mmo.

Adangante enye okobode okuk, eka mi odoho mi, “Edieke odude nkpo ami nehede ndiongo mbanga, edi ke afo oyom ndidi dentist. Ka kedep kpukpru nkpo utom afo oyomde.” Ke emi, afo eyekere nsuto eyen ufoknwed ami nkedide tongode ke ini oro ka iso? Nkoyom ndidi andifon nkan nyung nkure ukpep-nkpo ke usop koro mma ndiongo akamba ekom urua nwa-idem enye akanamde.

Mma mkpep ke nwa-idem ndima owo nyin enamde eno nyin eno obufa odudu nte mbit-mbit mmong ke ufot desert. Uto nwa-idem oro ono idorenyin ye udong.

OyohoIta, nwa-idem ndomokiet inamde edi ekpri ke edomode ye nwa-idem Eyen Abasi.

Nso idi ekom-urua nkpo nte edima okpoho ubok gold ndidomo ye nwa-idem eke ata Eyen Abasi? Ikeme ndikpono didie anana mbiet nwa-idem oro? Kpukpru usen imekeme nditi ite ise ke inyene usen kiet efen ndidu uwem ye ndinam akpaniko. Amulek amakpep ete: “Edi ntre, okpofon nte mbufo edemere enyung etre isong esit mbufo; sese, idaha emi edi ini ye usen erinyanga mbufo; mmodo, edieke mbufo edikabare esti, enyung etre ndisong esit mbufo, ke ndondo oro, akam ediomo erifak enyesim mbufo” (Alma 34:31). Ke iko efen, edieke nyin inode Abasi nwa-idem ibung-esit ye nnanuaha spirit, eridiong akamba ediomo inemesit eyeworo osu ke uwem nyin usop-usop.

Ediomo erinyanga edi ufang ndikom nwa-idem Jesus Christ. Nte Enye ke idem Esie ayarade, nwa-idem “anam mi, kpasuk Abasi, andikong nkan kpukpru, ndinyek ke ntak ubiak, nyung nsiongo iyip ke kpukpru ndudu idem, ye ndutuho ke obukidem ye spirit—nyung nkere yak nkunwong idot-idot cup, nyung mfuho” (D&C 19:18).

Ndien edi ntak nwa-idem emi, ama asanga ke usung ndutim ata edikabare esit ke idikop nte edibede udop ndudue ye idioknkpo nyin efep. Ke akpaniko, ke itie ubiom-ikpe, but, ubiak, mfuho, edisua idem nyin edidi edisana ekikere, inemesit, idara, ye idorenyin.

Ntre nko, ke ini ikponode inyung ino ekom ke nwa-idem Esie, nyin iyebo ke akwa idaha ata udong ndidi nti ndito Abasi, ndikpong idiok-nkpo, inyung inim ediomo ikan nte ikesinimde.

Ndien, nte Enos ke enye ama okobo edifen ke mme idioknkpo esie, iyekop udong ndiwa-idem inyung iyom ufon ino ndito ete nyin (se ke Enos 1:9). Ndien iyeyime kpukpru “usen kiet efen” ndiyere ikot emi President Howard W. Hunter onode nyin ke enye okodohode ete: “Etre utok, ekuyom ufan ekefrede. Bin eyihe sio yung kpuhore enye ye edinim owo ke akpaniko. … Nno sung-sung iboro. Nno mkparawa uko. Wut nsuk-ibot fo ke iko ye mkpe-ubok. Sio akanga. Tre ndiyene udu. Fen no asua fo. Wut mkpe-ubok. Wana ndise nkpo nnen-nnen. Se ofon mme nkpo oyomde oto owo efen. Kere owo efen kanga. Fon ido. Du sung-sung uwem. Sak imam awak esisit. Wut esit ekom. Ma esen-owo. Nam esit ekpri eyen enem. … Ting ima fo nyung ka iso ting.” (Teachings of Presidents of the Church: Howard W. Hunter [2015], 32; adapted from “What We Think Christmas Is,” McCall’s, Dec. 1959, 82–83).

Yak nyin inam usen nyin oyoho ye udong ye odudu emi nwa-udem nyin ye nwa-idem inode mme ibode ito mbon efen. Ndien ke sanga-sanga usung, yak idara emem emi ye nka-iso idara oro nwa-idem ikpong-ikpong Eyen onode nyin; edi ntre, eting ebanga emem oro ke ini ikotde ke Adam okoduo man owo odu, ndien owo odu—mbufo emedu—man mbufo enyene inemesit (se ke 2 Nephi 2:25). Inemesit oro edi ata inemesit oro nwa-idem ye Atonement Andiyanga Jesus Christ kpot onode.

Akam mi edi yak itiene Enye, yak inim Enye ke akpaniko, yak ima Enye, inyung ikop ima emi Enye akanamde owut oto ke nwa-idem Esie ke kpukpru ini emi inyenede ukeme ndidu uwem ke usen kiet efen. Ke enying Jesus Christ, amen.