Eriyarare emi enode Ufok Abasi, Eriyarare emi enode Nyin
Ke mme usuen eke edide ke iso, idimemke ndiboho ke ukpeme, ndausung, iberedem, ye akwa odudu Edisana Spirit miduhe.
Ndima ndito-eka mi irenowo ye iban, edi inem ufang ndibuana Easter emi ye mbufo ke Ederi akwa mbono emi. Iduhe nkpo emi ofonde akan nditi ata akpan edinam emi akananam itibeke akpa ke ererimbot emi ke ndikpono akpan-owo emi okodude ke isong emi. Mi ke, Ufok Abasi Jesus Christ eke Latter-day Saints nyin ikpono Enye emi okotongode anana-adanga Erisio-isop Esie ke Inwang Gethsemane. Enye ama onyime ndibo ndutuho ke idioknkpo ye mmemidem nyin owo kiet-kiet, ndutuho emi anamde “iyip oworo ke ofuri ndudu ke idem” Esie.1Ekekong Enye ke cross ke Calvary2 ndien ediset ke oyoho usen ita nte akpa owo emi esetde kotu ndito eke Ete nyin ke Enyong. Ami mmema Enye nyung ndi ntiense nte ke Enye odu uwem! Enye edi adausung ye andikpeme Ufok Abasi Esie.
Kesioho anana-adanga Erisio-isop eke Andifak nyin, iduhe owo nyin ndomokiet emi ekpenyenede idorenyin ndinyong mbine Ete nyin ke Enyong. Kesioho Eriset Esie, akpatre nkpo ekpedi mkpa. Erisio-isop eke Andinyanga nyin anam uwem nsinsi odu ye uwem-unana-mkpa ekem ono ofuri owo.
Oto ke akwa utom Esie ye emem emi Enye onode mme mbet Esie ke ami ye nnwan mi, Wendy ikobo ndongesit ke January 2, 2018, kini emi nyin ikobode iwiwa ikoot phone emi etingde eno nyin ete ke President Thomas S. Monson ama ebe ifep ke mkpa.
Nyin imenehede inana President Monson! Nyin imekpono uwem ye utom Esie. Akwa owo Abasi, enye ama onim akwa uwutnkpo ono ofuri owo emi ekediongoke enye ye Ufok Abasi emi enye akamade.
Ke Sunday, January 14, 2018, ke upper room eke Salt Lake Temple, ema efiak ebono First Presidency ke sung-sung edisana usung emi Abasi okowutde. Ndien ke solemn assembly eke mkpong, mbon Ufok Abasi ke ofuri ererimbot emenede ubok ndisongo edinam emi mme Apostle ekebemde iso enam. Ami ke nsuhore idem mmenem esit ke osongo unyime mbufo.
Ami mmekom mmo eke ami ndade ke afara mmo. Ami mmenam utom ke Eboho mme Apostle Duopeba ke isua Edip-ye-duopenang nyung nehede ndiongo nkani President Ufok Abasi Duop kotu Efurekiet. Ami mmekpeb nkpo awak nto mmo kiet-kiet.
Ami mmekom mme etebom mi nko. Ofuri mme akamba-ete-etebom mi Itiaita ekeduk Ufok Abasi ke Europe. Mme ikpo owo emi kiet-kiet ema enam ofuri nwaidem man edisim Zion. Nte ededi, ke emana emi editienede, idige ofuri mme etebom mi ekesongo eda ntre. Ke ntak oro, ami nkeduhe ke ufokidung emi ekenamde oyoho iko Abasi.
Ami mmekpono ete ye eka mi. Mmo enyene ufon eno mi ndien ema ekpeb mi nti ukpebnkpo. Menehede nkom mmo ke inem uwem ufok emi mmo ekenamde eno mi ye ndito-eka mi. Ke ntre, kpa nte eyeneren, ami mma ndiongo ke nsuk nnana nkpo. Usen kiet ami mma nduk moto nka itie-unyam-nwed eke LDS kiet man nkoyom nwed kiet kabanga Ufok Abasi. Ami mmema ndibo ukpeb mbanga iko Abasi.
Nte ami ndifiokde Word of Wisdom, nkoyom ete ye eka mi enam mbet oro. Ntem, usen kiet kini nkedide ata ekpri eyen, ami ndaha nka mben-esa ufok nyin nyung mbom kpukpru ekpeme okposong min ke isong-itiat! Nkekere ke ete mi mi eyemia mi, edi enye iketingke iko ndomokiet.
Nte ami mkponde nyung ntongo ndifiok akwa uduak eke Ete ke Enyong. Ami nsiwak ndidoho idem mi nte, “Nyomke eno efen kini Ukabade-isua aba! Nyom ndinam sealing ndiana ete ye eka emi kpot.” Edinam emi nkoyomde iketibeke tutu ete ye eka mi edisim isua Anang, edi ema enam oro. Ami mma nkop idaresit ke usen oro,3 ndien ke ofuri usen oro ami mmekop idara eke sealing mmo ye ndiseal mi ndian mmo.
Ke isua 1945, kini nkodude ke medical school, ami mma ndo Dantzel White ke Salt Lake Temple. Ami ye enye ikenyene ndiye ndito-iban usukkiet ye eyeneren kiet. Mfin ufokemana nyin emi ototde aka iso edi kiet kotu akwa idaresit ke uwem mi.
Ke isua 2005, esisit akayak edisim isua Ata ke ndo, edima Dantzel ama ebe efeb. Mfuho mi ama okpon ke ufang isua kiet. Edi etop eke Easter ye enwongo eriset okodong mi esit.
Ekem Abasi ada Wendy Watson osok mi. Nyin ikedian ndo ke Salt Lake Temple ke April 6, 2006. Ami mmema enye! Enye edi sanga-sanga nnwan—edi edidiong ono mi, ono ufokemana nyin, ye Ufok Abasi.
Mme edidiong kiet-kiet edi oto ndiyom nyung nam item Edisana Spirit. President Lorenzo Snow odoho ete ke, “Emi edi akwa ufang ono ofuri mbon Latter-day Saint … ke edi unen nyin ndinyene idiongo Spirit ke ofuri usen uwem nyin.”4
Nkpo kiet emi Spirit awaked ndisin ke ekikere mi tongo nkebo obufa ikoot mi nte President Ufok Abasi edi danga nte Abasi enyimede ndiyarare ekikere ye uduak Esie. Ukeme ndibo eriyarare edi kiet kotu mkpon-nkan eno emi Abasi onode ndito Esie.
Otode ke eriyarare Edisana Spirit, Abasi eyenwam nyin ke ofuri nti edinam nyin. Ke ubet-ufok operation kiet, ami nkeda mkpere owo udongo kiet—mfiokke danga mkpetongo nam utom oro—ekem ndikop nte Edisana Spirit etemede usung ke ekikere mi.5
Ke ndisongo ubiere mi nno Wendy, ami ndoho enye nte, “Ami mmediongo eriyarare ye nte ndibode oro.” Ke mfoniso esie—ndien, nte ami ndikpebde, ke idemesie—enye ama ebemiso oyom onyung obo eriyarare eke idemesie abanga nyin, emi onode enye osongo ndinyime ihn.
Nte member eke Eboho mme Apostle Duopeba, ami nkesibong akam kpukpru usen nyom eriyarare ndien nkom Abasi ke ofuri ini emi Enye etingde iko ke esit ye ekikere mi.
Kere banga utibe-nkpo emi! Ke se ikoot Ufok Abasi nyin ekpedi, nyin imekeme ndibong akam nno Ete nyin ke Enyong inyung ibo ukpeme ye ndausung, ibo ikpan kabanga afanikong ye ndutime, ndien inyene ukeme ndinam nkpo nkure emi nyin mikpikemeke ndinam ke idem nyin. Edieke nyin idinehede ibo Edisana Spirit inyung ikpeb ndikut nyung mfiok uyo Esie, nyin iyebo ndausung ke mkpri ye ikpo nkpo.
Ibighike kini ami nkenade nte mmek mme onoitem mi iba. Ndikere danga ami ndikeme ndimek owo iba nsio kotu irenowo duopeba eke ami mmade nyung mkponode.
Koro ami mmediongo nte ke eti ntuuk okongo ke eti iko emi ikopde, ami ke akam ndisobo iso ye iso ye Apostle kiet-kiet.6 Ekem ami nduk esit ubet-ufok kiet ke temple nkoyom se idi uduak Abasi. Nting iko ntiense nte ke Abasi eketeme mi ete mmek President Dallin H. Oaks ye President Henry B. Eyring ndinam utom nte mme onoitem mi ke First Presidency.
Ke ukem usung oro, nting iko ntiense ke Abasi ekenyime ete ekot Elder Gerrit W. Gong ye Elder Ulisses Soares man emek mmo nte Apostle Esie. Ami mmekom mmo nsin ke asanga-sanga nka utom-unwam emi.
Kini nyin ibohode nte Council eke First Presidency ye Eboho mme Apostle Duopeba, mme ubet eboho nyin akabare edi ubet eriyarare. Spirit Abasi esidu do. Nte nyin ikerede ibanga ikpo mbubehe Ufok Abasi, Apostle kiet-kiet esino inem usung ke nte mmo enehede eting ekikere mmo ewut. Okposuk nte ekpri ukpuhore esidude ke ntongo, ima emi nyin inyenede ino kiet eken odu do kpukpru ini. Nyin ndidiana kiet anwam nyin ndifiok uduak emi Abasi enyenede ono Ufok Abasi. Esie.
Ke esop nyin, unyime itoho ekikere uwak owo! Nyin iyene ndikpang-utong nno kiet eken inyung ineme ye kiet eken tutu nyin idi esit-kiet. Ekem ke nte isimde ofuri unyime, akwa odudu Edisana Spirit osio idem owut! Nyin idifiok se Prophet Joseph Smith okofiokde kini enye ekpebde ete ke, “Oto ke ndibuana ekikere ke nyin inyene odudu ye Abasi.”7 Iduhe owo eke First Presidency ye eke Eboho mme Apostle Duopeba eke edidade ifiok idem esie inam ubiere ino Ufok Abasi!
Ndito-eka irenowo ye iban, didie ke nyin idikabare idi irenowo ye iban—mbiet isungutom Christ—emi Abasi oyomde ete nyin idi? Didie ke nyin idibo iboro ke mbume emi afinade nyin? Edieke akwa ifiok-ukpeb eke Joseph Smith ke Sacred Grove enyenede nkpo ndikpeb nyin, nkpo oro edi ke heaven ama okubore ndien ke Abasi ama eting iko ono ndito Esie.
Prophet Joseph Smith ama owut usung nyin nditiene man ibo iboro mbume nyin. Ke nditiene enwongo James ete edieke nyin inanake eti-ibuot yak ibenge Abasi, ekpri-eren Josph ama obup Ete ke Enyong mbume esie.8 Enye okoyom eriyarare idem esie, ndien ediyom esie ediberede akpatre ini emi.
Ke ukem usung oro, nso ke ediyom mbufo ediberede ino mbufo? Nso eti-ibuot ke mbufo eyom? Nso ke mbufo enehede eyom ndidiongo ye ndifiok? Etiene uwutnkpo Prophet Joseph. Eyom susng-sung ebiet emi mbufo ediwakde ndika. Esuhore idem mbufo kiso Abasi. Etat esit mbufo eno Ete mbufo ke Enyong. Ewongore etiene Enye man ebo iboro ye idongesit.
Ebong akam ebanga mfina, ndik, nam-ndue mbufo ke enying Jesus Christ—ihn, se esit mbufo enehede oyom. Ndien ekem ekpang-utong ekop! Ewet se mbufo ekerede enim. Ewet ekikere mbufo enyung enam nkpo ke nte Spirit etemede mbufo. Nte mbufo efiakde enam nkpo emi k’usen-k’usen, ke ofiong-ke ofiong, ke isua-ke isua, mbufo eye “kori ekesim ndaha eriyarare.” 9
Nte Abasi enehedeoyom nditing iko nno mbufo? Ihn! “Ukem nte owo mikemeke ndinyan ubok esie man etre inyang Missouri ndifehe ke usung esie … nko owo idikemeke nditre Abasi ke ndiyak ifiok nto heaven ndori ke ibuot eke mbon Latter-day Saints.”10
Inaha nte mbufo eyik kabanga se idi akpaniko.11 Inaha nte mbufo eyik Enye emi mbufo ekpebuotde idem. Ke eriyarare idem mbufo, mbufo emekeme ndibo iko ntiense mbufo ete ke Nwed Mormon edi iko Abasi, ke Joseph Smith edi prophet, ndien ke emi edi Ufok Abasi Christ. Kesioho se mbon efen ekpeting mme se ekpenam, iduhe owo emi ekemede ndimen iko ntiense emi okodukde esit ye ekikere mbufo kabanga se idi akpaniko mfeb.
Ami mbenge yak mbufo esanga ebe ndaha mbufo kabanga nkpo Abasi idahaemi man ebo eriyarare idem mbufo, koro Jehovah okonwongo ete “edieke mbufo edibupde, ke mbufo eyebo eriyarare edori ke eriyarare, ebo ifiok edori ke ifiok, man mbufo ediongo ndedibe ye nti nkpo—emi adade idara ye uwem nsinsi edi.”12
Odu ediwak nkpo emi Ete ke Enyong oyomde mbufo ediongo. Nte Elder Neal A. Maxwell ekekpebde ete, “Eke mbon emi enyenede enyin ndikut ye utong ndikop, edi anwanga-anwanga ke Ete ye Eyen ke eyarare nkpo emi ekedipde ererimbot eno mmo!”13
Iduhe nkpo emi esikubore heaven nte ebuana nkori edisana ido, ata nkopitem, ata ediyom, ndikot Nwed Mormon k’usen-k’usen,14 ye ndiwak ndika temple nyung nam utom temple ye eke family history.
Man edi ntre, odu ini emi mbufo esede ete ke eberi heaven. Edi ami nwongo ke nte mbufo ekade iso ndikop item, eno ekom ke ofuri edidiong emi Jehovah onode mbufo, enyung ebet ini Abasi ke ime, eyeno mbufo ifiok ye oniong emi mbufo eyomde. Ofuri edidiong emi Abasi enyenede ono mbufo—mme ekpedi utibe-nkpo—eyedi. Se eriyarare idem mbufo ekemede ndinam nno mbufo edi oro.
Ami mmenim ke ini iso eyeyama. Eyeyoho ye ufang ono nyin kiet-kiet ndikori, nsin unwam, nyung nda iko Abasi nka kpukpru ebiet ke isong. Edi ami mfreke-enyin mbanga usen iso. Nyin idu ke ererimbot mbuaha ye okposong eneni. Ediwak nkpo social media ye mbuk nkpo-ntibe emi ibode ofuri ini etitimere nyin ye ndioi etop. Edieke anade nyin inyene idorenyin ke ndimek kotu ediwak uyo ye mbufiok eke owo emi anwanade ye akpaniko, ana nyin ikpeb ndibo eriyarare.
Jesus Christ, Andinyanga ye Andifak nyin, eyenam ubak ikpo utom Esie idahaemi ye ke ini emi Enye edifiakde idi. Nyin iyekut idiongo utibe-nkpo ete ke Abasi Ete ye Edima Eyen Esie ekara isong emi ke utenge ye ubong. Edi ke mme usen emi edide kiso, idimemke ndisongo nda ke nkpo Abasi ke odudu, ndausung, ye ndongesit Edisana Spirit miduhe.
Ndima ndito-eka mi irenowo ye iban, ami mbenge yak mbufo esin ukeme nkori mbufo ke ndibo eriyarare. Yak Ederi Easter emi edi eti ini ke uwem mbufo. Emek ndinam utom Abasi emi edinamde mbufo enyene idara Edisana Spirit enyung enehede ekop uyo Spirit anwanga ke kpukpru ini.
Ye Moroni, ami mbenge mbufo ke Ederi Easter emi nte “ema nditiene Christ, enyung emum kpukpru nti eno ekama,”15 otongode ke eno Edisana Spirit, emi ekemede onyung edikpuhode uwem mbufo.
Nyin idi mbet Jesus Christ. Ata akpaniko emi Edisana Spirit edidide ntiense ibanga ino mbufo edi ke JesusediChrist, Eyen odu-uwem Abasi. Enye odu uwem! Enye edi Iberedem nyin ye Ete, Uwutnkpo ye Andifak nyin. Ke Ederi Easter emi, nyin imeti nwaidem isop Esie, ata Eriset Esie, ye ifiok-nkpo Abasi Esie.
Emi edi Ufok Abasi Esie, emi Prophet Joseph Smith akafiakde ada edi. Kabanga oro ke ami ndi ntiense mbanga, dian ye ndiwut ima mi nno mbufo owo kiet-kiet, ke edisana enying Jesus Christ, amen.