Mengederoder er a Dodai er a Klou el Ureor

Kid a rechedam me a rechedil er a Zion, a ngar ngii a chedaol el ngercheled el ngosuterir a rengeleked el mo sorir e blak a rengrir el kirel a deureng, llomes, me a klemerang er a ebangkelio er a Jesus Kristo. Sel domekeroul er a rengeleked, e ke de kudmokl a siukang er a rekeblid e toketekii a teletael er a cheldecheduch me a blekeradel er a deleuill er a rechedal a telungalek. Sel dorul el uaisei, e a teletael el dekedmeklii a kirel toketekii a mesiisch, e diak el mesim el klungiaol er a rengeleked el ngii a mo mesterir a klisiich el mo obangel a ringel er a klengar.

Ng betok el rak el telungalek er kemam a ousemeriar er a mla mudelid lomilil el camp er a ikel Rois er a Uintah er a ongos er a Utah. Aki omekall el lluich el mile (32 km) el idudes el rael el mo er tial klebokel el ked, el metongakl a risois er ngii, e ngar ngii a kmal mekelekolt e mechelins el ralm er a omeuachel. Meng bek el rak, el kimolasm el muut el melisiich a meklou a belkul suobel me a osisechakl er a ebangkelio el mo er a rengrir a rengelekam me a rengelekir a rengelekam, e a Susan me a ngak a melekoi er tirkal telolem el ngelekam el sechal me a telungalek er tir el kudmeklii a kedeb el klumech er a suobel el tir omelchesiu eng klou a ultutelel mo remuul a rekeblid el mo ulsirs er a Kristo. Me a ki mokldibel er a diak a rechad er ngii el basio, e te mo ouderta er tir el louchais a klemechir.

siasing/Llecheklel

Klumech el llechukl ra bad

Chelechal rak e a rengelekir a rengelekam a lliluches a tekingir er a bad, ouderstang, el ngmai, el dmakl el kaiuekeed, el uaia lolchotel a mesisiich el dodai er a deuil a reng el klengar. A mle uldimukl er a ikal kellolem el tekingir a sel diak el mengodech, e diak a ulebengelel klemrang el kmo a Jesus Kristo a ngii a kot el saus er a dodai.

A tekingel a Isaiah a kmo, “A leuaisei e a Rubak el Dios a mla dmu el kmo, Chelecha, e ak toketekii a dodai er a Zion, el bad, el mekreos el bad, el meral mesisiich el dodai.”¹ A Jesus Kristo a ngii ngkel saus er a dodai er a Zion. A Jesus Kristo a ulechotii el mo er a Profet Joseph Smith el kmo ng diak el kirel mo mechitechut a rengud er a ungil lomeruul, le kid a mengederoder er a dodai er a klou el ureor. Le ngokiu a mekekerei el tekoi e a meklou el tekoi a duubech.”²

A suobel el mla mosisechakl lokiu a uldelid lomeruul el ki bla mteketekii er a rekeblimam, a locha ko er a kekerei e beot, eng di kmal klou a belkul er a beluulechad er a chelechal sils. Me ngera ikel mekekerei e beot el tekoi, el dekedmokl, eng sebechel uchul a meklou el tekoi er a klengar er a rengeleked?

A Russell M. Nelson a dirk milngedecheduch er a klou el ongdibel er a kmeed er a Toronto, Canada, e kmal ulemeklatk er a rechedam me a rechedil el kirel chedaol ngerchelir lolisechakl er a rengeleked. A tara ngerachel el mildung, e a President Nelson a ulemelekl a ngerchelir kid a roungalek el mo olisechakl er a rengeleked el mo medengelii a uchul e ke de melai er a sacrament, me a klou el ultutelel a lemechell a ngalek er a chelsel a telbiil, me a klou el ultutelel a kedmekled el kirel a ngeiul a patriarchal blessing e ng milngelechel er a rechedam me a rechedil el mo bdelul omengiuel chedaol llechukl er a telungalek.³ Nokiu aikal sekkak, e a betik er a rengud el profet a olengit er kid me ke de mo rulii a blid el mo “cheledaol er a klaumerang.”⁴

Chelsel a Babier er a Mormon, e a Enos a milluches el kirel a dmolech lomereng el saul el blo lolchesuar er a okesiu er a demal el “[ulsisecheklii] er a tekingel, me a dirrek el teletelel me a urerel a Rubak.” Me ngoba klou lomereng el saul e a Enos a millekoi el kmo, “Bol modanges a ngklel a Dios er ngak el kirel.”⁵

Ak mengeluolou aikel mekekerei e beot el uldelid el teletael el kemam a meruul er a chelsel a blimam er a ikal mereko el okedei me a eim el rak ra chebechielam. Betok er a ikal uldelid el teletael a mekekerei e beot, eng di kmal meklou a belkul. El uaia:

• Aikel klebesei el blek dibus er a blai, e ak di mle medengei el kmo ngokiu a ulekrael er a Susan ea kot el klou el ngelekam el sechal a nguu a ngerachel el mo mengetikaik er a telungalek er a omengiuel chedaol llechukl me a nglunguuch.⁶

• A lmut el tara uldelid el teletael––a diak el sebecham el tuobed er a blai, malechub a ki momerek el chadecheduch er a dengua, e lak ki mdu el kmo, “Ng betik a renguk er kau.”

• A klengar kemam a mla mukngeltengat er a ikel sesei el taem el ki mokiu a berrotel el cheldecheduch lobengterir a dersta er tirkal ngelekam el sechal. A kuk tara berrotel el cheldecheduch er a delongelam e a kuleker er a ngelekam el sechal kirel a klemeriar reng er ngii el mo er a mission. Uriul er a cheldechedechemam, eng mlo tellechekl e diak el du el mo ngerang el telkib e mocha okisii a medal e dula el kmo, “Chedam, ke medengei er sera kekerei e domuchel el chadecheduch?” Ak dulang, “choi.” “Meng, “dula el kmo, “Ak mle yaksok er kau el kmo ak mora mission, e kau ma Delak a mle yaksok er ngak el kmo kemiu a mora mission sel bom chuodel.” E kora mlo lmuk el telkib. “Ngar ngii a mondai er kemiu meng diak ko bo er a misson—leng locha sebechek el ngosukemiu?”

Omelekl, a ungil uldelid el teletael er a telungalek luldimukl er ngii a nglunguuch, omengiuel chedaol llechukl, ongdibel er a telungalek, me a ngara miting ra Ikelesia, a uaia le mekekerei e beot el tekoi, eng di ng mekdebechii a beltikereng, omengull, keltalreng, me a selbechakl. Sel blak el reng er kid el meruul, e a rengeleked a mo selbechakl er a ongetikaik er a cherarou el ngara beluulechad er chelechal sils.

Ke de lotkii a ungil losischeklel a Helaman el mora ngelekel sechal: “Molatk el kmo ng dodai er a Osobel, el ngii a Kristo, el Ngelekel a Dios, a kirem el toketekii a klaumera er kau; me sel lemei ongetikaik er a diablong, choi, sel lemei a ses el eolt, choi, a mesisiich el eolt sel sbechii er kau, eng diak a klisichel oteklau el mo er a klengit, le kau el telketokel a dodai er kau, el ngii a mesisiich el dodai, el dechor ngii a chad eng diak el mukel.”⁷

Betok el rak ra memong er ak bisop, e a tal cheodel el chad a ulengit lomes er ngak. Ng milsaod er a bol cheroid er a Ikelesia me a melemalt luldelid el teletael er a rechad er a blil er a lengeasek. Ng milsaod el kirel a ringel el siliseb er a klengar ngii er a losiik er a olekong deureng, el ngii a klsuul el deureng el beluulechad a meskid. Chelecha, el klunga el chad, eng mocha melchsuar, a lebebil eng odbechel Chedaol Reng er a Dios lomekrael er ngii el muut el mo er a ikel suobel, omeruul, lomelchesiu, chedaol tekoi er a lekekekerei. Ng uluchais el mereng a saul er a uldelid el teletael er a rechad er a blil, el dolekoi er ngii er chelechal taem, el uaia lullekoi a tekingel a Enos el kmo: “Bol modanges a ngklel a Dios el kirel.”

A denguu er ngak, e tial luut er ngika el chad el mei er a ebangkelio a uaia betok el teletael el bla deues er a rengelekel a Dios el tir a mo cheroid el telkib el taem, e sola lmuut el mo melbedebek aikel osisechakl me a omeruul er a lengeasek. Chelsel a ikaikid el taem, e ke de sioning a tekingel ngike el milluches er a proverb el millekoi er a rechedam me a rechedil kmo, “Mosischeklii a ngalek er sel kirel merael er ngii: e sel bol klou, eng diak bol cheroid er ngii.”⁸

A rebek el oungalek a mo chelbangel a ringel me a kakerous el teletelel a blakereng me a klisiich sel lomekeroul er a rengelekir. Eng di, sel sekum a roungalek a ultuil er a klaumerang el melemolem lolisechakl er a rengelekir loba, bleketakl el cheldecheduch, me a beltikereng e meruul aikel rokui el sebechir lolngeseu er tir, e te mo chachisois a urngulir el kmo a tane el mla medalem a duubech a risel er a chelsel a rengrir me a uldesuir a rengelekir.

A Moses a mle medengelii a klou el usbechellel a blechebech el osisechakl. Ng milellach el kmo, “Ng mo blak a rengmiu lolisechakl [aikal tekoi] el mo er a rengelekiu, e mengedecheduch er tir sel omngara rekeblimiu me sel morael lobengterir, me sel lekebesengei, me sel obekiis a letutau.”⁹

Ke de mo outubaruach er bita er a rengeleked er a temel a nglunguuch er a telungalek, e blak a rengud lomekerreu er tir lokiu a mesisiich lomengiuel chedaol llechukl, e klou a rengud, e oubeltikereng el mo er tir sel omdak el ngara ongdibel er a telungalek, e dirrek el meluluuch el kirir er a ikel kuk di nglunguched. Ke de meral, lolsingch me a tane el mla medalm bol mokdubech a risel er a chelsel a rengrir me a uldesuir a rengelekam.

A kumerang el kmo ng diak desal suebek a rengud el kmo a rengeleked te mo “medengei aikal rokui” el osisechakl sel demeringel el menguiu chedaol llechukl malechub a ongdibel er a telungalek malechub e kemo er a Mutual me a bebil er a ongdibel er a Ikelesia. Ng diak el kirel kmal suebek a rengud el kmo chelsel aikaikid el taem e te mo medengelii a klou el ultutelel aikal omeruul e bai kired loker el kmo, kemam loungalek, aki ultuil er a klaumerang el blak a rengmam loltirakl er a llechul a Rubak, el mo olisechakl, mengelechel, e kudmokl aikel ngerachel el ngii oltirakl er a ebangkelio er a Jesus Kristo. Ng blakereng lultuil er a klauemra er kid me a doumera er ngii el tekoi el kmo a tara klebesei e a tane el mla medalm er a klengeasek er tir a duubech a risel e merael mo klou.

A tekoi el dosaod, a tekoi el dolisechakl a olchotel a tekoi el mo duubech er a delongeled. Me sel deteket a uldelid lomeruul el ngii olisechakl a osischeklel a Kristo, e a Chedaol Reng a mo sioning el kirel a klemrang er a tekinged e melisiich a tane er a ebangkelio el mla medalem er a rengrir a rengeleked lokiu a blakereng er kid. Aika kuchais el ngara ngklel a Jesus Kristo, amen.