Molasm, e Molasm, e Molasm

Rodam me a rodos er ngak, ak ngara omereng el saul er a techall el kungedecheduch er kemiu. Tial ongdibel a kmal mla smisichak e meklemesak. A chelitakl me a tekoi el mla medung a mla soiseb er a rengud lokiu Chedaol Reng. Nglunguchek me a ikel bok dung bol delalm er a rengmiu lokiu osisiu el Chedaol Reng.

Betok el rak er a memong, e ak mle kot el counselor er a district president er a beluu er ngebard er a Merikel. Ng betook lolekoi, er ngak, sel ki momekall el mo er a ikal mekekerei el branch, “Hal, alsekum e ngarngii a desa el chad, e a omko kede omes er ngii el uase ngara ringel, eng klou er a tedobech er ngii a klemerang.” Ng dimlak di le klemera el tekoi a lolekoi er ngii, le ak dirrek el mla subii er a chelsel a betook el rak el kmo sel ochur el mlara uldesuel a uaia ble lengariou. Chelechal sils eng soak el melisiich er kemiu er a ikel ringel el mngara chelsel.

A klengar kid er a belulechad a mle mekedmokl lokiu a oubeltikereng el Dios el skeng e uchul a ulekerulel a dersta er kid. Kom dobedebek a tetkingel a Dios el kirir a Rengelekel er a uchelel a Blebelel a beluulechad er a ledu el kmo Tir a mo melasm er kid er a rokui el tekoi el Rubak el Dios a mla dmu er kid.¹

Sera uchelel, e a tial skeng a diak el beot. Ked emo chelbangel a ringel me a ongarm er tial klengar er a tech. Kid el rokui a kiei er a beluulechad el mekemedil a Diablong lomtok er a deureng er kid a kmal mesisiich. A beluulechad me a klengar kau me ea telungalek er kau a uaia lemui er a betook el luldikel me a rraureng.

Ak meskemiu tiakid el klemrang: a oubeltikereng el Dios el ngii a mla meskau aika el skeng a dirrek el mla kudmeklii a teletael el sebechem ngoriakl er ngii. A Chedam er a Babeluades a kmal betik a rengul er kid me ng mla odureklii a Betik er a Rengul Ngelekel Sechal el mo ngosukid.² A Ngelekel Sechal, el Jesus Kristo, a uldersii a klengar Ngii el kired. A Jesus Kristo a chillungel a rokui el kngtid er a Gethsemane me a kerus. Ngii a mlora rokui el klengitelreng, me a ringel, me a telmellel a kngtid me luchul e Ngii bo longelaod e lolisiich er kid er a ikel bek el skeng er a klengar.³

Kom lodkii a Rubak er a ledu er a Remesiugel kmo:

A Chedam me a Ngalek a di tang. Ngii obengkel a Chedam me a Chedam obengkel, e a dekengei er Ngii e ked emo Obengkel me Ngii a obengked.

Ngii a mla dmu el kmo ng obengked, e ungil mengkar a sib, e bedul a Israel. A bo dultuil er tia klaumerang eng diak demukel.⁴

A profet er kid, el President Russell M. Nelson, a dirrek el mla meskid osisu el klemrang. Ng dirrek, el mla smodii a teletael el kid otilii a klaumera er kid e nguu a ngklel a Rubak loiia er a rengud el mo omekrael er kid er a skeng er a klengar.

Ng millekoi el kmo: Kemiu el ngara klengitelreng el telkib el taem, bo molatk el kmo, a klengar a diak el beot. A ringel a bo dechellungel me a klengitelereng a doutekangel er ngii. E molbedebek el kmo a dultuil ‘er a Dios eng diak a diak el sebechel tekoi’ (Lukas 1:37), bo modengei el kmo Ngii a Demam. Kau a sechal malechub e ke redil lulbeob el uai Ngii, e okiu a ungil klengar kau e ke mo ngmai ocholt me a ngesou lultuil er a melemalt el blakereng er kau. Ng sebechem el nguu a chedaol ngklel a Rubak. Ng sebechem el mo mengedecheduch loba chedaol ngklel a Dios (mesa D&C 1:20).”⁵

A tekingel a President Nelson a mekletkid er a yaksok el ngara nglunguuch er a sacrament, el ngii a yaksok el Demad er a Babeluades otireklii alsekum e kede kuk otireklii a yaksok er kid.

Morrenges aika el tekoi: “Dios, el Diak a Ulebengelel Chedam, aki olengit er kau el ngara ngklel a Ngelekem, el Jesus Kristo, el mo omekngeltengat e mkikidii tial blauang el mo er tirkel rokui el mo melai er ngii, me lekelii lomeletekir er a bedengel a Ngelekem, el le sioning lekor kau, e Dios, el Diak a Ulebengelel Chedam, el kmo ng meral ngarngii er a rengrir a mo nguu a ngklel a Ngelekel, e mo blechoel melbedebek er ngii e mo oltirakl a llechul el ngii a mla mesterir; me a Chedaol Reng er ngii bol blechoel lobengterir. Amen.”⁶

Bek el taem el dedlii a tekoi el amen sel lolekoie r tial nglunguuch el kired, e kede tibir el kmo sel denguu a blauang eng blak a rengud el mo nguu a chedaol ngklel a Jesus Kristo, e mo blechoel melbedebek er Ngii, e oltirakl a Llechul. E seikid, e a yaksok el mei er kid a kmo a Chedaol Reng er Ngii a mo blechoel loebengked. Ngokiu aikaikid el yaksok, e a Osobel a ngii a bedud el dedechor ngii e kede selbechakl e diak demedakt er a bek el ses el eolt er a klengar.

Sel kulbedebek a tekoi er a chelsel aikal telbiil me a klengeltengat lobengkel, e ak melatk el kmo ngera belkul sel meral ngarngii er a rengud el mo oba ngklel a Jesus Kristo.

A President Dallin H. Oaks a mesaod el kmo: “Ng klou a belkul el sel dolai er a sacrament eng diak desioning el kmo kede mla nguu a ngklel a Jesus Kristo. Kede sioning el kmo ngar ngii ra rengud el mo melai er ngii. (Mesa D&C 20:77.) Sel klemrang el kmo kede sioning er a blakereng a ochotii el kmo ngarngii a kmo ngerang el kirel duubech ruchei er a demeral nguu a chedaol ngakl.”⁷

Sel tekoi el kmo “ngarngii er a rengud el mo [nguu]” a Ngkelel a ochotii er kid el kmo ng uaisei el ble dekot el nguu a ngekel Osobel sera demetecholb, eng di a nguu a Ngkelel a diak el merekui er a techolbechelid. Ng kired el melemolem loureor el di oba Ngkelel er a klengar kid el rokir, luldimukl sel domkebeches a telbiil el deruul ra temel a sacrament me a telbiil el deruul er a chedaol templo er a Rubak.

A leuaisei e a eru el meklou a belkul ker el mo er a dersta er kid a kmo “Ngera ikel kuruul el uchul e ak nguu a Ngklel?” me a “Ak mekerang e medengei el km oak merael mo ungil?”

A tekingel a President Nelson a ochotii a tara nger. Ng dilu el kmo ng sebeched el mo oba ngklel a Osobel e sebeched el mengedecheduch el Kirel. Sel dongedecheduch el Kirel, e kede mesiou er Ngii. “Leng mekera chad e medengelii a mastang el dirkak losiou er ngii, meng ngodech el chad er ngii, e cheroid er a uldesuel me a rengul?”⁸

A dongedecheduch el mo er Ngii ultuil er a nglugnuuch lobegkel a klaumerang. Ngokiu a meral ngara rengud el nglunguuch el mora Chedam er a Babeluades el mo medengei el kmo ngera el tekoi a bo dedung el ngoseuir Osobel er a Urerel. Ng kired el kudmeklid el kirel sel yaksok el kmo a letobed er a ngerek me a letobed er a ngerel a mesiungek, meng diosisiu.”⁹

Eng di ngarngii a dirk ruoll ng diak di lultuil er a mengedecheduch el Kirel me a nguu a Ngklel e lemerkong. Ng kirel ngarngii a domelchesiu er a rengud el mo sebeched el mo Mesiungel.

A profet Mormon a silaod aika el domelchesiu tetkoi el nguu a mo uchul e ked emo nguu a Ngklel. Aika uldimukl er ngii a klaumerang, ongiil, me a bliochel el beltikereng, el ngii a klikiid el beltikereng er a Kristo.

A Mormon a silodii el kmo:

“A kumtab e ngarngii a klaumera er kemiu er a Kristo le kemiu el ngariou a rengmiu; le lak a klaumera er kemiu er ngii eng diak mngara ulecherangel er a rechedal a ikelesia er ngii.

“Chelechang, e kemiu el rodam er ngak, ak mengedecheduch er kemiu el kirel a ongiil. Ko mekera e ngarngii a klaumera er kemiu, a lak a urunguliu?

“E ngera komoureng el kirel? A kmal subedemiu el kmo nguu a urunguliu lokiu a tngakireng er a Kristo me a klisichel okiis er a kodall, el mo mekiis el mo nguu a diak a ulebengelel klengar, el klaumerang er kemiu er ngii a uchul loltirakl a yaksok.

“A leuaisei, alsekum a chad oba klaumerang eng kirel ngarngii a urungulel; le lak a klaumerang eng diak a urungulel a chad.

“E ak lmuut, el subedemiu el kmo ng diak el sebechel nguu a klaumerang me a urungulel, a lak el medemedemk, el ngariou a rengul.

“Le lak, e a klaumerang me a urungulel a di klsuul, el diak a ultutelel e rmedal a Dios, ng di tirkel medemdemk e ngariou a rengrir; le alsekum a chad a medemdemk e ngariou a rengul, el kombesar lokiu a klisichel Chedaol Reng el kmo a Jesus a Kristo, eng kirel loba bliochel el beltikereng; le lak loba bliochel el beltikereng eng diak el ngerang; a leuaisei eng kirel mo oba bliochel el beltikereng.”

Uruil er a lesodii a bliochel el beltikereng, e a Mormon a millemolem el melekoi el kmo:

“Eng di a bliochel el beltikereng a klikiid el beltikereng er a Kristo, e outekangel el mora ulebongel; e ngike el mo obang er a uriul klebesei, a mo klungiaol el morngii.

“A leuasiei, e rodam er ngak, moluluuch el mo er a Chedam lolab a rokui el klisichel a rengum, me bo mui er tial beltikereng, el ngii a mla mesterir tirkel rokui el meral loltirakl er a Ngelekel, el Jesus Kristo; me bom ngelekel a Dios; me sel bel dum e ked el mo uai ngii, le kede mo mesang; e mo oba urungulel; e bo deklikiid el uai ngii el klikiid. Amen.”¹⁰

A klaumera er ngak a kmo bo doba ngklel Osobel er a rengud. Betok er kemiu, a merael mo mesisiich a klaumera er kemiu. Ko momelchesiu el ngarngii a urunguliu e omes er medad. E dirrek el komelchesuar a beltikereng er a Kristo el kirir a rebebil me a kemiu.

Ak mesang er a remisionari el meliuekl er a beluulechad. Ak mesa er a rechedal a ikelesia el mengedecheduch er a resechelirir me a rechedal a telungalek er tir el kirel a Ikelesia er a Jesus Kristo er a Uriul-klebesei el Santo. A rsechal, me a redil, me a rengeasek, luldimukl er a rengalk a olngeseu lokiu a beltikereng el kirel Osobel me a retonari er tir.

Sera le kot el tuobed chisel a tekoi er a kerior er a beluulechad, e a rechedal a ikelesia a kudmekelterir el kirel a siik, el bebil er a taem e te mo er a daob, el di tir el mong lolngeseu. Bebil er a taem eng meringel er tir a mengiil mo kldmokl aika el telemall el basio e lebong.

A kumtab e a rebebil er kemiu lorrenges er chelechal sils a omelchesiu el klaumerang me a urunguliu a mla mo mesisiich er a ringel el mngara chelsel. E kemiu a mengercherir el mo omelchesiu er a beltikereng.

Rodam me a rodos, a Rubak olab a techall el kirem el mo melchesuar e ochotii a beltikereng er Ngii. Ng sebechem el meluluuch me a Rubak bo lomekrael er kau el mo oubeltikereng el mo er a kmong techang el Kirel. Ngii onger a nglunguchel a ngariou a rengul chad el uai kau. Ke mo melchesuar a beltikereng er a Dios el kirem me a chad el kau a mesiou er ngii el Kirel. Sel molngeseu er a rengelekel a Dios er a ringel el tir a ngara chelsel, e a ringel el kau a ngara chelsel a mo kebekakl. A klaumera er kau me a urungulem a mo mesisiich.

Ak mla mesa tiaikid el klemerang. Chelsel a klengar ngii el rokir, e a bechik a mla mengedecheduch el kirel a Rubak e mla mesiou el Kirel. A tara bisop er kemam a mle tal du er ngak el kmo, “Ng mechas a renguk. Bek el taem el krenges a chisel a chedal a ward er kid el ngara ringel, e a kurreched el mo olngeseu. Eng di sel kbong, e a bechim a uaia bla loeak kuchei el mong.” Tia kmal klemerang er a ikel rokui el basio el ki bla mkiei er ngii er a ikal merekong el okeim me a elolem el rak.

Chelechang eng sebechel di dmung a sesei el tekoi er a tal sils. A rechad el ngii a betik a rengul er tir a oldingel er ngii lomtechei er a Rubak. Bek el klebesei me a llomes e ak mengitakl lobengkel e meluluuch. Ngak a ngerel a nglungucham. Bebil er a taem e a kurrenges er ngii lombekebok er a ngerel sel ki mongitakl. Ng soal a cheliteklir a rengalek. Sel ngii a kora kmal soal chelitakl a sebechek el kmo ng sel chelitakl el “I’m Trying to Be like Jesus.”¹¹

A kmo ng oingerang, ruriul er a ki mongitakl er a koras er a chelitakl el: “Bom kaubeltikereng el uaia Jesus el betik a rengul er kemiu. Molasm lochotii a blekokeuii er a rokui el moruul,” eng mocha mekekokil, eng di kmal bleketakl el kmo, “Molasm, e molasm, e molasm.” A kumdasou eng mo metik er ngii, er a tara klebesei me Lesang, el kmo a Osobeled a mla loiia Ngklel er a chelsel a rengul e ngii a mla mo uai Ngii. Ngii a mesebechakl er ngii er a ringel er chelechang, el Ngii a dirrek el mo sobecheklau er a ringel el bom chelebangel.

A kuchotii a sioning er ngak el kmo a Osobel a medengelaku e betik a rengul er kau. Ngii a medengelii a ngklem el uai kau el medengelii a Ngklel. Ngii a mdengei a ringel el omngarngii. Ng mla soiseb er a uaingii el tekoi. Ngokiu a Tngakireng er Ngii, e Ngii a mla mo mesisiich er a beluulechad. Ngokiu a blakereng er kau el mo nguu a Ngklel, e ko mo mesebechakl er a rebebil er a ringel. Seikid e kau a mo metik el uase kungil medengelii Osobel e betik a rengum er Ngii. A Ngklele a mo medechel er a rengum e ngara uldesuem. Ngii a ngakl el kau a bo lomekedong er kau er ngii. Ak sioning, lobengkel omereng el saul er a beltikereng me a blekokeuii er Ngii el kirek, me a kirir a rebetik er a renguk, me a dirrek el kau, el ngara ngklel a Jesus Kristo, amen.