Roungalek me a Rengalek

A rengalek a kot el mekreos el sengk er a Dios el mei er kid—sel diak a ulebengelel telungalek. Eng di, kede kiei er a taem el betok el redil a diak el sorir mengesechusem er tir er a kldiull me a okerulir a rengalek. Betok el ngeasek el chad a mecherei a tekoi er a chebechiil mo uriul er a tekingel a klechad. A iidisel a chebechiil er a rechad er a Ikelesia a mla mo obdois er a ikal mereko el eru el rak, e a iidisel a cheroll er a Ikelesia a mla ngmanget. A Beluu er a Merikel me a bebil er a beluu a chelbangel er a rekmal mekesai el ngalek el mukeroul el mo meklou el chad el motechir tirkel mla retire el chad er a tara klebesei.¹ Ngarbab er a okeua el basent er a cheroll er a Beluu er a Merikel a mo er a rediak el bechiil chedil. Tirkal ngalek ousbech a ngesou. A dersta er a ikal teletael er chelechal taem a omtok er a chedaol moktek er a Chedam.

A Uriul-klebesei el Santo a medengei el kmo a klechedil a kot el ngarbab el moktek er tir, e ngarbab el deureng er tir. A President Gordon B. Hickley a millekoi el kmo: “A redil a mesa sel kot el klungiolel a klengar tir, me a kot el ngarbab el deureng er a blai me a telungalek. A Dios a milsterir a redil a kmo ngera el chedaol teletael el mocholt lokiu a klisichir, chubechub, budech, klungiaol, kldung, klemerang, me a beltikereng. E a ikal rokui el ungil blekeradel a debetik er sel meral klungiolel me a olchotel er a klechedil.”

Ngii a millemolem, “Sel kot el ngarbab el ngerachel el ngii di el redil a mo kudmeklii a mo omekeroul e olisechakl e oltirakl e mesebechakl er a ulekerulir a rengalek er a llemalt me a klemerang. Ng diak a ngii di el ngerang el mo mengaisisiu er tiang, el diak el iior er a ikel loruul.”²

Rechedil, betik er a renguk el rodos, ng betik a rengmam er kemiu er a ikel moruul el mei er kid el rokui.

Chelsel sel klou a belkul cheldechedechal er a 2015 el dai er ngii a kmo “Ongit el mo er a Rodos er Ngak, ea President Russell M. Nelson a millekoi el kmo:

“A rengedel a Dios a diak el sebechel mecherrungel a lak a redil el tir a meruul a chedaol telbiil e oltirakl, redil el sebechir mengedecheduch loba klisiich me a ngerachel er a Dios!

“Chelechal sils, … e kede ousbech er a redil el medengei el kmo ng mekera doruul a meklou a belkul tekoi lokiu a klaumera er tir e bekeu el mesebechakl er a kldung me a telungalek er tial mui er a mekngit el beluulechad. Kede ousbech er a redil el blak a rengir el mengkar er a rengelekel a Dios er a rael er a telbiil el bedul a diak a ulebengelel klengar; redil el medengei el kmo ng mekera dolai chedaol ocholt, el medengelii a klisichel me a budech el mengai er a chelsel a templo; redil el medengei el kmo ng mekera dotengel a klisiich er a babeluades el mo omecheliu e melisiich er a rengalek me a telungalek; redil el diak el medakt losisechakl.”³

Aikal lomekellomes losisechakl a rokui el ngara chelsel sel “Telungalek: Chais el mo er a Beluulechad,” el tial mla moluut el Ikelesia a lmuut el melisiich a osisechakl me a omeruul el ngii a kmal moktek er a uldesuel Omeob ruchei er a lobeob a beluulechad.

Chelecha e ak mengedecheduch el mo er tirkel ngeasek el teloi er tial seked. Kemiu a rengeasek lodos er ngak, ngultuil er a klemedengei er kemiu er a mla moluut el ebangkelio er a Jesus Kristo, e kemiu a tokubets. A klemedengei er kemiu a mo rullemiu el mo otekangel a ringel sel morael mo meklou. Ko mle mekekerei, e ngara omeruul er a betok el tekoi me a prokuram el mla meskemiu a duch, el uai a omeluches, omengedecheduch, me a omengedmokl. Ke mla mesuub el mo blekongerachel, e mekerang a moutngakl ongetikaik el mo omulak, mengeblad, omerechorech, malechub a usbechellel a rrom me a mekngit el kar.

A tokubets el teleteliu a mlocholt lokiu omesuub er a University of North Carolina er a rengeasek er a Beluu er a Merikel me a klechelid. A simbung el Charlotte Observer a mlar ngii a llechukl el tekoi el kmo “Mormon teens cope best: Study Finds They Top Peers at Handling Adolescence.”[A Rengeasek el Chad er a Mormon a Ungil Loutekangel: Omesuub a kmo Tir a Meduch el Metebechelii a Klengeasek] Tial llechukl a kmo a re “Mormon a meduch el mengeroid er tir er a kengaol, e ungil er a skuul e ungil osengir el kirel a ngara medad el taem.” A tara chad er a omeluches er tial omesuub, el milngedecheduch er a rengeasek el ngeleked, a dilu el kmo, “Aikel bek el ker me a teletael el kemam a ulemes, eng mle bleketakl el kmo: a re Mormons a mle kot.”⁴

Ngera me ko meduch lomtebechel a ringel er a ulekeruliu le mo meklou? Rengeasek el dil, le kemiu el medengelii sel klou el moktek er a deureng er a Demad er a Babeluades. Tia ochotii el kmo kom techang e ngera moktek er a klengar kemiu. A rengeasek el medengelii tiang a ungil mesmechokl a mondai e meduch el melilt er a ungil. Ko medengei el sebechiu el ngmai a ngesou er a Rubak el mo mesisiich er a ikel rokui el ringel er a ulekeruliu.

A dirrek el tara uchul e kom kmal meduch a kemiu el medengei el kmo kom ngelekel a Chedam er a Babeluades el betik a rengul er kemiu. Ak medengei el kmo kom kmal medengelii a chelitekled el “Dearest Children, God Is Near You.” Tiakid sel kot el bades el bla dongitakl er ngii e oumera er ngii:

Ngarngii a eru el suobel er tial bades: A kot, a Chedam er a Babeluades a kmeed er kid e omes er kid a lemellomes me a leklebesei. Ka momtab er ngii! A Dios a betik a rengul er kemiu, e Ngii omes er kemiu. Ongerung, Ngii a semeriar lomekngeltengat er kid sel dolasm el meruul a ungil.” Ng meral ongelaod el mei er kid sel bodechau a sebekereng me a ringel!

Oi, kemiu a rengeasek el dil, kom ngeltengat e klebokel, eng di kemiu a di uaia rokui el ngelekel a Chedam er a Babeluades el kiriu el “melasm el meruul aikel ngii a ungil.”

Ng sebechek el mellach er kemiu er a betok el kakerous el tekoi, eng di ak di mla ngmilt a erung el bo kungedecheduch er kemiu el kirel.

A kot el llach a kirel a cell phones. A omesuub er a Beluu er a Merikel rokir a mla ochotii el kmo tedobech er a rengeasek a choitii a klou el temir el ngara cell phones. Klou er a okeua el basent a kmo ng suebek a rengir sel bol cheroid er a cell phone er tir.⁶ Tia kmal klou er a redil er a bai rsechal. Kemiu el ngeasek lodos er ngak—me kemiu a remeklou el dirrek—komo ngeltengat a bol telekael a ulsbecheliu me a ultiliu er a cell phone.

A ongeru llach a lmuut el kmal klou a belkul. Bo bekokeuii el mo er a rebebil. A blekokeuii a tekoi el betok er a rengeasek er kid a meruul er ngii. A rebebil er a cheldebechel er a rengeasek er a bebil er a basio a mla ochotii a teletael el mei er kid el rokui. Kede mla mukellomes er a omerellir a rengeasek el ngeleked el kirel a blekokeuii el mo er tirkel lousbech a ngesou er a beltikereng. Meng chelsel a betok el teletael, e kemiu a odars aikal ngesou e chotii a beltikereng el mo er a ta me a tang. Aki oureng me a rokui el chad bo loltirakl okesiu er kemiu.

Osisiu el taem, e kede medengei el kmo a cherarou a mengetikaik er kid el rokui el mo diak debekokeuii, e betok a okesiul tiang, el deues er a rengalek me a rengeasek. Aikel melemolem el mekngit lomeruul a dodengei el betok a ngklel, el uaia omecheracheb, mo delbechel e omecheracheb er a chad, malechub e te mo delbechel e ouketui er a tang. Aikal teletael a uchul a ringel el mo er a omtelbasech er a skuul malechub a rsechelei. Kemiu el ngeasek lodos er ngak, ng diak el melemalt er medal a Rubak alsekum eng mekngit a blekerdeled el mo er a rebebil.

Tiakid a tara okesiu. Ak medengelii a tal ngeasek el chad, el chad er a ngodech el beluu e ngara tial Utah, el mlukakou leng mle ngodech, luldimukl sel bebil ra taem el lolekoi a tekoi er a belual. Ngii a mlodechelakl er a rebuik el mlo uchul a ngesechel a rengul eng tilmellii a telemall meng mlo kelebus el okeuid el klebesei e a kabelment a ulemdasu olluut er ngii el mo er a belual. Ng daik kudengei el kmo ngera ngesechel a rengrir tirkal delebchel el ngeasek, el betok er tir a Uriul-klebesei el Santo el uai kemiu, eng di ak mesa telmellel a mekngit el blekerdelir, el chelebuul el teletael el mo er a tara ngelekel a Dios. A mekekerei el mekngit el blekeradel a sebechel mo ngar ngii a telmellel.

Sera krengesii tial cheldecheduch, e a kulmekesiu er ngii el mo er a tekingel a profet er kid, el President Nelson, er a dirk mlomerek el devotional er a rengeasek. Sel ongtil er kemiu el mo olngeseu el mengdibel er a Israel, eng dilu el kmo: “Bom ngodech; bom ngodech er a teletael er a beluulechad. Kemiu me a ngak a medengei el kmo ng kired el mo llomes el mo er a beluulechad. A leuaisei, e a Rubak ousbech er kemiu el mo uaia, e mengedecheduch el uaia, e ngara omeruul el uaia, e oubail el uaia chad loltirakl er a Jesus Kristo.”⁷

Kemiu a rengeasek a President Nelson a mla olengit er kemiu el mo tang e lak el mekngit a blekerdeliu el mo er a ta me a tang. Komo oltirakl osischeklel Osobel el mo olngeseu e oubeltikereng e melatk er a rebebil, el msa chad a bita er a otenged alsekum a chad a rirelii a mekngit el mei er kid.

Chelsel sel klou el ongdibel er sel taem locha betok er kemiu a mla mechell, e a President Gordon B. Hinckley a chilat er a “reklebokel el ngeasek el dil el tir a melasm loltirakl er a ebangkelio.” Ng milsaod er tir, el di uaia omesodek el kiriru:

“Te bekerurau el bedul a ta me a tang. Te osiik el mo melisiich er a ta me a tang. Te chetengakl el mo er a rechad er a blirir me a rekeblirir el tir a tilobed er ngii. Te mochu meklou el redil e mo urrekodel aikal ungil blekeradel er a klengar tir el ngii el blekeradel a lolab el melisiich er tir er chelechang.”⁸

Ngak el mesiungel a Rubak, a dmu er kemiu a rengeasek el dil, a beluulechad er kid ousbech a klungioliu me a beltikereng er kemiu. Bo bekokeuii el mo er a ta me a tang. A Jesus a ulsisechakl er kid el mo kaubeltikereng e mo meruul el mo er a rebebil aikel tekoi el ngii a soad tir a loruul el mei er kid. Me sel dolasm el mo bekokeuii, e kede merael mo kmeed er Ngii me a ungil blekerdelel er a beltikereng.

Rodos er ngak, alsekum e kengara mekngit el teletael—a dil kau el tang malechub e ke teloi er a rechad—e mosiik el mo melodech er kau e dirrek el mongelechel er a rebebil el mo melodech er tir. Tiaikid osischeklek, e meskemiu el mesiungel a Rubak el Jesus Kristo le Chedaol Reng er Ngii a mla subedak el kirek el mengedecheduch er kemiu el kirel tial klou a belkul suobel. Ak ouchais el kirel a Jesus Kristo, el Osobeled, el lulsisechakl er kid el mo kaubeltikelreng el mo er a ta ma tang el uai ngii loubeltikelreng el merkid. Ak meluluuch el kmo kede mo uaisei, loba ngklel a Jesus Kristo, amen.