Telemall
Chelsel aikel kmal meringel el taem ra klengar, e sel le klou a rengud e el merael bedul uchei, e a omekungil klisichel Osobel a mo meskau a llomes, klemedengei, budech, ma urunguled.
Sera March 22, 2016, ruchei er a eai el klok er a tutau, e a teblong el dub a ulebuu ra skozio ra Brussels. A Elder Richard Norby, Elder Mason Wells, me a Elder Joseph Empey a uleltak er a Sister Fanny Clain el mora skozi el ngara omerollel el mora mission er a Cleveland, Ohio. Okedei me a terung el chad a mlad, e a rokui el misionari a miltemall.
Ng kel kmal mle klou el telemall el misionari a Elder Richard Norby, el 66 a rekil, el ngara mission ngii me a bechil, er a Sister Pam Norby.
A Elder Norby a milsaod el kirel tial taem:
“Ak mle mereched, el mo medengei el kmo ngera dilubech.
“Ak millasm el remurt el chemiis, eng di ak di moriou. … Ak milsa tial katur ochik el klou el telemall. A kulmes a kora mechedelekelk el uaia bedengel a chat ra ikal teblong el chimak. Ak mlo melubet er ngii, e mlo medengei el uasa tial bedengek a mla medul. Tial bechelelu el bilek a di bekerkard ra rasech ra telemall el ngara ulekek.
“A uldesuek a mlo medengei el kmo ngera ngarngii, tial [mle] mesisiich el uldasu: … a Osobel a medengei el kmo ak ngarker, e ngara mla duubech, e [uangera] teletelek er tiaikid el taem.”1
Ng mle meringel aikel sils ruriul el mora Richard Norby ma bechil, ra Pam. Ng mle kirel a bedengel di chelellakl, e betook el botk a blorngii, ma baiking, e rrau a rengul el uase ngera mo duubech.
A Richard Norby a silobel, ng di klengar ngii a dimlak bo losisiu. Uriul ra eru ma tedobech el rak ruriul, eng dirk merael a medengel mo ungil; el ngarngii a brace ra ochil; e ngodech a lorael el diak el uai ngii ra ngaramong ra lengara skozio ra Brussels Airport.
Tia ngera meng duubech el mora Richard ma Pam Norby?2 Te kmal mesisiich loltirakl a telbilir. Uchei ra mission er tir, e te mla mesiou ra mlo merek el mission ra Ivory Coast e mekerulii a ungil telungalek. Ng sebechel a chad el melekoi el kmo, “Ng diak lungil! Ng diak el melemalt! Te uldersii a klengar tir el kirel ebangkelio ra Jesus Kristo; tiang sebechel duubech el mortir?”
Tial Klengar
Meng uaisei el telengtengil a kakerous, a kerreor, ma duubech el ringel ma ongarm, el mora bedenged ma rengud, a mei er kid el rokui leldu uchul, tia e a klengar.
Tutau er a kumdasu er a re mo mengedecheduch er a kuk di tial ongdibel, ak di mle keberuul el medesuii el kmo a reterung a mle ngarngii a rengelekir ma rengelekir a rengelekir el mla lmuut el mora babeluades. Ng dirkak a mla mochouib a secher ma klengiterreng, e kmal dirk chelechal sandei ea anghel el ngartial beluulechad el betik a rengud er ngii, Sister Barbara Ballard, a mirrael morsel bita el beluu. Ng meral diak bo dobes er a cholechotel a klaumerang er a President Ballard, ng meral diak dobes er a olechotel a klaumera er ngii er chelechal tutau.
Kid osiik a deureng. E soad a budech. Ke de oureng ra beltikereng. Ea Rubak a meskid a kmal betook el klengeltengat. Ng di a obengkel a deureng, e ngarngii a chimol merang el tekoi: ngarngii aikel taem, sikang, sils, ma bebil ra rak el kau a mo ngara klengitelreng.
Chedaol llechukl a olisechakl el kmo kid a mo choremii a mecheuached ma merekos3 e ngarngii a “ultok ra rokui el tekoi.”4 A Jesus a dilu el kmo, [A Demam] a rulii a sils el kirir a remekngit ma remekedung, ma chull el mora remelemalt mar diak el melemalt.”5
A telmellel a reng a diak el bora meteet malechub a chebuul, ma chimol bedengel a klengar, chimol beluu, malechub eng chimol telcheroll. Ng mora rokui el chad e a ikang a telengtengil a klubeled el dengai er tial klengar ra beluulechad.
A re Melemalt Meng Diak a Bol Iiu er Ngii
A klemechek ra chelechal sils a tokubets el mo er tirkel loltirakl a llechul a Dios, oltirakl a yaksok er tir lobengkel a Dios, e, uaia re Norbys malmuut el bebil ra rechad, redil, ma rengalek el ngartial kldibel el meliukl er a beluulechad, a mo chemau a ringel ma ongarm el mei el diak lodengei e kmal meringel.
A ringel a sebechel mei lokiu a di kiul duubech el tekoi malechub eng aksident. Ng sebechel mei lokiu a diak el bleketakl omerellel sechal malechub eng redil bechiil, el tomellii a klengar ra melemalt el buch ma rengalek. A ringel a sebechel mei lokiu a iilkolk ma berraod ra uldasu, secher, kodall ra chad el betik ra rengud, ma klengitelreng ra chedal a telungalek el mla mo diak a klaumera er ngii, klesabisi el diak kobetik ra kldemem; malechub a lmuut el betook el telmellel a reng, ma ringel el “[klengitereng] el mad a diak leues.”6
Kede medengei el kmo a ringel a telengtengil a klengar, eng di sel sbechii er kid, eng sebechel mo mechas a rengud. A lak dodengei, eng di kired el mo kldmokl. A Apostol Petrus a dilu el kmo, “Lak bol ngodech a rengum el kirel a ringel el mo melasm er kau, e bol rrau a rengum el kmo mekngit a mla duubech el mei er kau.”7 A obengkel a klebokel el deureng, ea iilkolk ra ringel ma ongarm a dirrek el seluk ra chelsel a moktek er a Chedam. Aikal ongarm, a uaisei el kmal meringel, ng di ng sebechel klou el osisechakl el mei er kid.8
Sera louchais ra mengasireng el cheldechederir, a Heleman me tirkel 2,060 el ngeasek el soldau er ngii, ng soad tial chedaol llechukl: “Ngokiu a klungiolel a Dios, e mechas a rengmam er ngii, e dirrek el deureng el mora cherrengelel a klsoldau er kemam, eng dimlak a tang er tir el mad ra mekemad.”
Engi tial tekoi a melemolem el kmo: “E dimlak a tae r tir el dimlak el betook a telemall ra bedengel.”9 Derta er tirkel 2,060 a miltemall, me a dersta er kid a mo metemall er a mekemad ra klengar, bedengel, rengud, melechub e ngii el eruong.
A Jesus Kristo Ngii ea Ungil Chedad er a Samaria
Ke le bom kimer—ng diak el iior ra klungel a telemall el mei er kid, e diak el iior ra uchul, a ika ngii di el ker malechub eng ngii di el taem e ngii a di mo duubech, e diak el iior a lekedeb malechub eng kemanget el taem el dengar chelsel, ng di a reng er kid a diak el ngemed. Kid a mo selbechakl e mo kiei e mukeroul ra klaumerang er kid ra Dios.
A Dios a dimlak el beob a rengud el mo cheroid er Ngii. A Rubak e Osobeled, el Jesus Kristo, lokiu sel diak a otechir el sengk ra Tngakireng er Ngii, a dimlak di losebelid ra kodall el beskid, a klausubes ra kngtid, lokiu a ouchelreng, ng dirrek el Ngii a dechor el kldmokl lolsobel er kid ra klengitereng ma ringel ra reng.10
A Osobel a Ungil Chedad ra Samaria,11 Ngii a dilu el kmo Ngii a mlo durokl el mo “omekungil a telemall el reng.”12 El uai ngkel Ungil Chad ra Samaria, e Ngii a mei er kid sel sekum a rebebil chengelakl er kid. Ngii omes er kid el ngara ringel e oba chubechub el kired. Ngii a nguu Chimal lomekungil loiia ra telemall er kid. Ngii a tikeuid, Ngii omekerreu er kid. E Ngii oleker kid, “Mei er ngak . . . ak mo omekungil er [kemiu].”13
Ma [Jesus] a mo ngara [ringel] ma bek el bedengel ongetikaik; … el uchul; … e ngii a [mo] ngmai a rokuiel ringel ma secherir a rchedal. … [ngilai a rokui el ringeled, [el] mui er a klechubechub.”14
Mei, kemiu el chad el ngara ringel;
Mei ra chubechub, e molengit a ngesou.
Mngai a telemall el rengmiu el mei; e mouchais a kngtil a rengmiu.
Ng diak a klengitelreng ra beluulechad el diak el sebechel a babeluades el mkerur.15
Sera le temel sel kot el klou el ringel, ea Rubak a dilu er a Profet Joseph, e a Rubak a dilu er ngii el kmo aikang el rokui a mo meskau a klubelem, e mo klungiolem.”16 Ng mekera ringel a bol klungioled? Chelsel aikel kmal meringel el taem ra klengar, e sel le klou a rengud el merael bedul uchei, e a omekungil klisichel Osobel a mo meskau a llomes, klemedengei, budech, ma chomoureng.17
Ke lem Bo Meterob
Moluluuch loba rengum el rokir. Msisichii a klaumerang er kau ra Jesus Kristo, ra klemrang er Ngii, klechubechub er Ngii. Murrekodel a Tekingel: “A krasia er ngak a sebechel mer kau: e le a klisichek a mecherrungel lokiu a chelitechetuk.”18
Molatk, a ouchelreng a kmal mesisiich el kerul a reng.19 Moltirakl a llach e bom klikiid el kirel a Chedaol Reng e molbedebek el Osobel a mle yaksok, “Ng diak chitau el diak a mengelaod er kau: Ak mei er kau.”20
A budech ra templo a kerul a telemall el reng. Mluut el mora blil a Rubak a le telemall el rengum e ngai a ngklir a re ngara telungalek er kau e bo blecheol el mong. A templo ochotii a kedeb el klengar kid ra beluulechad ra chelsel a kemanget el diak a ulebengelel klengar.21
Momes ruriul, e molatk el kmo kau a mle mesisiich er sel klengar ruchei. Kau a mesisiich el ngelekel a Dios, e okiu a ngesou er Ngii, e kemo mesisiich ra mekemad er tial beluulechad. Ke mla rulii ruchei, e sebechem el muut el rulii.
Momes er medam. A ringel ngar kau ma klengiterreng a meral ngarngii, eng di aikang a diak lolemolem el mora ulebongel.22 A klebesei er kau a mo chouib, le uchul a “Ngelekel [a milkiis] loba omekungil el ngara cheslel a osbekel.”23
A re Norbys a dilu er ngak el kmo, “A ringel a sebechel me oldingel eng di diak el kirir el kiei.”24 A Apostol Paulus a millekoi, “Kede ngara ringel …ng di diak el kirel mo mesaul a rengud; rrau a rengud, ra ringel, odechelakl, leng diak decheloit; cheroid, malechub e detelemall.”25 Kelocha kmal mo mesaul, eng di lak bo meterob.26
A re Norbys a dilu er ngak el kmo, “A ringel a sebechel me oldingel eng di diak el kirir el kiei.” A Apostol Paulus a millekoi, “Kede ngara ringel …ng di diak el kirel mo mesaul a rengud; rrau a rengud, ra ringel, odechelakl, leng diak decheloit; cheroid, malechub e detelemall.”27 Kelocha kmal mo mesaul, eng di lak mkimer.
Chelsel a sesei el bung, e kede mo rongesii a betik ra rengud el profet, el President Russell M. Nelson el chad el mesisiich a klaumera er ngii ra Jesus Kristo, el mui ra ongiil ma budech, el betik a rengul a Dios er ngii eng di diak bol iiu er a telemall.
Sera 1995 e a ngelekel redil ra Emily, el mle dioll, a lebiltik er ngii el smecher ra kasinoma. Ng mlarngii a sils ra deureng ra lochelii a mesisiich a bedengel tolechoi. Eng di a secher el kasinoma liluut, me ngikal ngelekel ra Emily a mlad ra di chelsel erul sandei ruchei ra bol tanjiobi er ngii el mo 37 a rekil, el mlo cheroid ra bechil ma reteim el ngelekir.
Chelsel a klou el ongdibel, ruriul ra lemad a ngelekel, e a President Nelson a ulechais el kmo: “A lengelek ra klengitelreng a ulebengkel a urungulek el ulekum ngarngii a mle sebechek el rulii el kirel a ngelekam. … El omko a kuba klisiich ra okiis ra kodall, e ak locha lmuut el nguu el mei. … [Eng di] a Jesus Kristo olab aika el kiis e mo ousbech el mora Emily … e mora rokui el chad er sel temel a Rubak.”28
Tial mlo merek el buil, ra loldingegl ra Resanto ra Puerto Rico, e lolbedebek er sel mlo merek el meringel eolt, e a President Nelson a milngedecheduch loba beltikereng ma klechubechub:
“[Tiang] a telengtengil a klengar. Ng uchul e kede ngar tiang. Kid a ngar tiang el mle melai ra bedenged e mo ngara omelasm ma skeng. A bebil ra ikal skeng a tekoi el kirel a bedenged, a bebil a reng, e a ringel el kemiu a chelbangel er ngii a di diul melutk a bedengiu ma rengmiu.”29
“Ng dirkak mkimer. Ng smiich a rengmam er kemiu. Kemiu el ungil Santo a mla mo dibus a betook el klikliu, eng di kemiu, a mla tilii a klaumerang er kemiu ra Rubak el Jesus Kristo.”30
“Sel doltirakl a llechul a Dios, e kede mo metik a deureng ra cheslel aikel kote l meringel el teletael.”31
A Rokui el Chiuosech a Di mo Mesuld
Rodam ma rodos, ng yaksok er ngak lekor kemiu el kmo sel bol mesisiich a klaumerang er kemiu ra Rubak el Jesus Kristo e ko mo ngmai a olisiich ma urunguliu a mo mesisiich. Kemiu, a remelemalt, ngkel Omekungil a rengud a mo, er sel Temel ma Teletelel, e mo omekungil a telemall er kemiu.32 Ng diak a cheleuid, odechelakl, ringel, klengitelreng, ongarm, kerior, telemall—el diak el iior ra delechel, diak el iior ra klungel, diak el iior ra ringel—el diak bol ngai ongelaod, budech, ma urunguled er Ngii el chimal a uldars el telemall el chimal a melai er kid el muut el mora Rengedel. Sel sils, e a Apostol Johanes a melekoi, a remelamlt el “tir a [tuobed] ra chelsel a ringel”33 a mo dechor el “bleiull ra becheleleu el bail … er medal a Dios.” A Ngelekel a Sib a mo “kiei el [obengked] … e a Dios a mo smuld a chiuosech ra [medam].”34 Tial sils a mei. Aikang ak sioning el ngara ngklel a Jesus Kristo, amen.