Redil ma Omesubel Ebangkelio ra Blai
A Osobel a kot el ngaruchei lokesiu lekor kemiu el kirel a klou el ngerecheliu ra Urerel el mo nguu a osischakl ra ebangkelio ra blai el mo ruchei.
Betik ra renguk lodos er ngak, ng klebokel el kubengkemiu er chelechang. Tia meang el taem ra chelsel a Ikelesia ra Jesus Kristo ra Uriul-klebesei el Santo. A Rubak olecholt a llemesel el mora rechedal a Ikelesia er Ngii el ngara ikel yaksok er Ngii.
Kom lotkii ra loker kmo nguangera klemengetel a omaoch el ralm a lolemolem el diak el klikiid? Ngera el klisiich a tomer ra babeluades? Ng diak el sebechel a di chad el nguu chimal tomer ra omeuachel ra Missouri ra rolel, malechub e lolutii el bedul bab, malechub el tomer ra ngikel Kot el Meisisiich me lak locholt a lotengel a llomes ra babelaudes el mora Ruriul-klebesei el Santo.”1
A tebedechel a omerusel a llemesel a Rubak a ulsiseb er a rechedel a ochebelel a diak el ngemed el klemerang el mora bderrirma chelsel a rengrir a Rechedal. Ngii a mla meketeklii el kmo a rengelekel a Chedam ra Babeluades el redil a kot el mo klou a ngerchelir er tial mengasireng el ureor. A tara olchotel tial ongasireng a sel Ngii omekrael er a profet er Ngii el mo melisiich a osisecheklel ebangkelio er a blai ma chelsel a telungalek.
Kom locha oker el kmo, “Tiang mekerang e rulterir a reblak a rengrir el odos el mo olngeseu ra Rubak lomerk er a llemesel el mora Resanto er Ngii?” A Rubak a meskid a nger el ngara “Telungalek: Chais el mora Beluulechad.” Ko medengei aikal tekoi, eng di kom locha mesa beches el belkul e mtebengar el kmo a Rubak a miles aikal meang el ngeldechel, el ngii a domes er chelechang. Chelsel tial chais, e Ngii a ngiluu a ngerachel el mesterir a rodos el mo kot el sensei ra ebangkelio ra blai lokiu aikakid el tekoi: “A rechedil a kot loungerachel ra ulekerulir a rengalek.”2 Tia uldimukl er ngii a ulekeroul ra klemerang ma llomes ra ebangkelio.
Tial chais a melemolem el kmo: “A rechedam ma rechedil a ngerchelir lolngeseu er a ta me a tang el kaukledem.”3 Te kaingeseu, el tabesul a ngerchelir ra ulekrulel a tekoi ra reng ma omesubel a llomes, e kaukledem e kaingeseu el terung. Ng tabesul a ngerchelir ra chedaol tekoi el kirel osebelir el terung. Ea mera er ngii, ea sechal ma redil a diak el sebechel a chimo er tir el mo suobel e lak a tang.
A leuaisei, e ngera uchul, ma ngelekel a Dios el redil lokiu a tabesul ma klaukledem el teletael a nguu a kot el ngerachel ra ulekeroul lobengkel aikel kot el meklou a belkul suobel el kirir a rokui el ngmai, el llomes ra klemerang el ngara babeluades el mei? Sel kumes er ngii, e tiaikid a dimla teletael loba Rubak ra lekot el mokdubech a telungalek ra beluulechad.
Tiakid okesiu: A Eva a ngii a ngiluu a llomes el mlo medengei el kmo a Adam a kirel kolii a redechel sel kerkerul a llomes el uchul eng mo sebechir loltirakl a rokui el llechul a Dios e mekdebechii a telungalek. Ng diak kudengei el kmo ngera uchul eng mlei er a Eve el kot, eng di a Adam ma Eva a mlo tang ruriul ra lmocholt a llomes ra Adam.
A lmuut el tara okesiu el Rubak ousbech er sel sengk ra ulekeroul loba redil a sel teletael el Ngii a ulebang el melisiich ra rengelekel a Helaman el sechal. Ak kora mo umekikngit el reng sel kunguiu er tial cheldecheduch e kulbedebek ra delak ra ikel tekingel melisiich er ngak er sera ktobed el mora klsoldau.
A Helaman a milluches el kmo:
“Te mla mosisechakl ra rederrir, el kmo lak loumededenger, le Dios a mo mesebechakl er tir.
“E ulechais er ngak a tekingir a rederrir, el kmo: Ng diak ki moumededenger le redelemam a mle medengei.”4
Meng diak kudengei a rokui el uchul ea Rubak a nguu tial oberaod el ngerachel ra ulekeroul el mesterir a reblak a rengrir el odos, eng di a kumerang el kmo ng dirrek lultuil er sel duch er kemiu ra beltikereng. Ngokiu a beltikereng e kom ngaruchei el medengei lousbech a tara rechad ra ikel usbechelliu. Tiaikid a klikiid el beltiekreng ra Kristo el mora chad el momkereu er ngii. Tial klikiid el beltikereng a lochotii a ngellitelel chad el mo omekeroul lolchotel a kmo kom klikiid lokiu a Tngakireng ra Jesus Kristo. Sel kerbai ra Relief Society, el delak a mle okesiul, a meklemesak: “A Klikiid el Beltikereng a Diak Lengemed.”
Me kemiu el ngelekel a Dios el redil, a oba sel duchel mo medengei a lousbech a rebebil ma duch ra beltikereng. Tiaikid, ochoti e rullemiu me ko meduch lorrenges ra odbechel Chedaol Reng. Seikid ea Chedaol Reng a mengetikaik aikel momdasou, ma ikel molekoi, ma ikel moruul el mo olngeseu ra rechad meluchul ea Rubak bo locholt a llomes, klemerang, ma duchelreng el mo er kemiu.
Kemiu el rodos lorrenges er a otor a ngerek a kmal tokbets a basio er kemiu ra klengar. A rebebil a ngeasek el redil el ketengir el ngara tial ongdibel er a redil. A rebebil a ngeasek el redil el mengedmokl er tir el mo olngeseu er sel ngii a soal a Dios el kirir. A rebebil a dirk mlo bechiil e dirkak bo loungalek; e a rebebil a dirk mlo oungalek el chimong malechub eng teru rengelekiu. A rebebil a oungalek ra rengeasek ma rebebil a ngarngii a rengelekir el ngara mission. A rebebil a ngarngii a rengelekir el mla mo mechitechut a klaumera er tir e cheroid ra blai. E a rebebil a di tir el tang el kiei el diak a kldemir. E a rebebil a mla mo mechas.
Eng di, iior ra teletael el mngara chelsel, le kau a tebechedel—klou el telengtengil—a telungalek ra Dios ma telungalek er kau, a le chelechal taem, er tial klengar, malechub sel tara klengar. A ngerchelem ra urerel a Dios a mo omekeroul ra rebetok el Ngelekel ma rechedal a telungalek er kau lultuil ra beltikereng ma klaumera er kau ra Rubak el Jesus Kristo.
A merngelel a ureriru a osiik ra chad lousbech a ngesou, e mekera molngeseu, e oingerang. Ko mousbech a ngesou ra Rubak. Ngii a medengei a rengrir a rebebil, e Ngii a medengei el kmo ng oingerang e a chad a mo kongei. A blakelreng el nglunguchem a ngii a uchul a klungiaol. Ng sebechem lultuil er Ngii lomekrael.
“Ngii a milskid tiakid el tekoi el kmo: molengit ra Chedam loba ngkele er chelsel a klaumerang, e moumerang el uase ked mo ngmai, ea Chedaol Reng, a mo ocholt a rokui el tekoi el meklou a belkul.”5
Obengkel a nglunguuch, a omesubel a chedaol llechukl a mo telengtengil a klisichem lolngeseu. Tiakid a yaksok el kmo: “lak momdasou a bo molekoi el tekoi, e bai mngai a meklou a belkul tekoi locha ra uldesuem, e kau a mo medengei aikel kirem el melekoi el mora rechad.”6
Bo molemolem el meluluuch, molbedebek, e molatk a chedaol tekoi. Kemo ngmai a llomes ra klemerang el mochubel el me er kau e mukeroul ra klisichem el mo olngeseu er a rebebil ra chelsel a telungalek er kau.
Ngar ngii a taem e ke mo omlechesiu el uase ng diak a kmal ngera el merelii lolngeseu. Ng kirem el mo ultuil ra klaumerang e outekangel. A Osobel a mla meskau tiakid el tekoi:
“A leuasiei, e lak bol mesaul a rengum el meruul a ungil, le kau a mengederoder ra dodai ra klou el ureor. Le ngokiu a mekekerei el tekoi e a meklou el tekoi a duubech.
“A Rubak a mengerechir ra blak el reng ma uldasou; e ngike el blak a rengul e olngesaenges a ngmail a klungiaol el mora zion ra uriul taem.”7
Chelechal omngar tiang er chelechal kesus eng olchotel a kmo ng blak a rengum el kongei ra ongtil a Rubak el mo olngeseu er a rebebil. Tia dirrek el kmal klemerang el mora remekekerei el ngar tiang er chelechal kesus. Ke mo medengei el uase ng techang a bo molngeseu er ngii ra telungalek er kau. Alsekum eng blak a rengum el meluluuch, ea ngakl ma mad a me soiseb ra uldesuem. Alsekum e ke meluluuch el kirel a bo moruul ma bom dung, e ke mo melchesuar a nger. Bek el taem el molngesenges, ea klisichem el mo olngeseu a mo meisiich. E kau a mo keldmokl er sel sils sel bo molngeseu ra rengelekem.
A rechedil loungalek ra rengeasek a sebechir el meluluuch el kirel a ngeso el mora gnelekir el sechal malechub a redil el ngii a diak el sal soal lorrenges. Ng sebechem el meluluuch el mo medengei el uase ng techa sebechel a ngelekem el kongei er ngii el mo ngoseuir. A Dios orrenges e ongeer a nglunguchel a subek a rengul chedil, e Ngii odurokl a ngeso.
Osisiu, a mechas el chedil el ngar tiang er chelechal kesus a locha ngara ringel el krir a rengelekel ma rengelkir a rengelekel. Ng sebechem el ngmai a ulekerael ra ikel cheldecheduch el ngara chelsel chedaol llechukl.
Sera taem ra Eva ma Adam, e okiu a Chedam el Israel, e mora rebek el telungalek ra Babier er a Mormon, e ngar ngii a chimol suobel: el kmo ke de mo mekerang el kirel a klengitelren er a rengalek el diak lorrenges: lak bo meterob loubeltikereng.
Ke de oba ungil okesiu ra Osobel ra lolngeseu er tirkel mle medengerenger el ngelekel a Chedam ra Babeluades. Uldimukl er tir me kid a duchul a ringel, ng di chimal Osobel a berrokel el kired.8 Ngii a millekoi ra chelsel a 3 Nephi el kirel a rodam ma rodos er Ngii el Ngii a mla melasem lolngeseu er tir: “Kemiu a rechad … ra blai ra Israel, ng tela el taem el mengudel er kemiu el uaia dechuu el malk el mengudel ra rengelekel er cheungel osebekel, e kulngeseu er kemiu.”9
Kemiu el rodos el ngara bek el teletael ra klengar, ma bek el teletael ra telungalek, ra bek el beluu, a Osobel a kot el ngaruchei lokesiu lekor kemiu el kirel a klou el ngerecheliu ra Urerel el mo nguu a osischakl ra ebangkelio ra blai me a telungalek el mo ruchei.
Ke mo ousbech a dimla ngar kau el dmolech el beltikereng el mo ngmodech a omeruul ma teleael ra telungalek er kau. Tia mo uchul a mesisiich el ulekerulel a chedaol tekoi. Sel moluluuch el kirir a rechedal a telungalek, e ke mo melchesuar a beltikereng er kau ma beltikereng ra Osobel el kirir. Tiang a mo chedaol sengk el kau obang sel mosiik er ngii. A rechedal a telungalek er kau a mo melchesuar sel moluluuch lultuil ra klauemrang.
A telungalek sel bol keldibel e longuiu chedaol llechukl, e kau a locha mla chemuiu e mla meluluuch el kirel me ke keldmokl. Ke mla metik a teletael el moluluuch ma Chedaol reng a mo omekellomes ra uldesuem. Seikid, e sel bol temem el menguiu, ea rechad ra telungalek a melchesuar a beltikereng er kau el mora Dios ma Tekingel. Te mo mukeroul lokiu Ngii ma Chedaol Reng er Ngii.
Osisiu el teletael a sebechel mora ngii di el telungalek alsekum e ko meluluuch e keldmokl el kirel. Ng locha mo kemanget el taem, eng di ongasireng a mo duubech. Ak lotkii a suobel el delak ulsischeklek ra kekerei. Ak dirk medengelii ra uldesuek a lecheklel aikel beluu le blo er ngii a Apostol Paulus. Ak melatk el uase ng milkerang e rullii tiang. E chelechal sils a kmal ngeltengat ra beltikereng er ngii el mo ngkal Apostol.
Ko mo metik a teletael el mo olngeseu el mengisois ra klemrang ra chelsel a delengchekliu ra chelsel a mla moluut el Ikelesia ra Rubak. A dersta er kemiu a mo ngara nglunguuch, e mesuub, e mlebedebek el mo medengelii sel ngerchelem. Eng di tiakid a kudengelii: a dersta er kemiu, a kldemir a rengelekel a Dios el sechal, a mo uchul a ongasireng el tekoi ra omesubel ebangkelio ma klengar el mo orchedii a urerel omengideb ra rechad ra Israel e mo kudmeklii a tleungalek ra Dios el kirel a luut ra Rubak el Jesus Kristo. El ngara chedaol ngklel a Jesus Kristo, amen.