Te ’imira’a i te ’ite nā roto i te Vārua

E te mau taea’e ’e te mau tuahine here, ’ua parau tāmau noa mai te Fatu ia tātou ’ia « ’imi ho’i i te ’ite ’oia ïa nā roto i te ha’api’i ’e nā roto ho’i i te fa’aro’o ato’a ».¹ E fari’i tātou i te māramarama ’e te hāro’aro’ara’a ’eiaha nā roto noa i te ferurira’a, nā roto ato’a rā i te arata’ira’a ’e te fa’aurura’a a te Vārua Maita’i.

’Aita teie puna hau atu o te ’ite i riro noa nā ’ei tuha’a nō tō’u orara’a.

’Ua ō mai tā’u vahine here ’o Irene ’e ’o vau nei i roto i te ’Ēkālesia e 31 matahiti i teienei, ’a riro ai māua ’ei nā ta’ata fa’aipoipo ’āpī. ’Ua pa’ari māua i Colombia, tau ’āva’e i muri noa mai tō māua fa’aipoipora’a, ’ua ’āfa’i tō’u tōro’a ’ohipa ’ia māua i Heremani. E mea ’āpī roa māua ’e e tīa’ira’a rahi ’e e tītaura’a tā māua ; ’ua riro te reira ’ei tau ’ana’anatae ’e te ’oa’oa nō māua.

Hōho’a

Te tuahine ’e te taea’e Held

’A rōtahi noa ai au i ni’a i tō’u tōro’a ’ohipa, e au ra ia Irene ē e fāri’i māua i te hō’ē huru poro’i nō te ra’i mai ma te ’ite ’ore ē nāhea ’e ahea. I reira, ’ua ha’amata ’oia e vaiiho i te mau ta’ata ho’o ato’a nō te pu’era’a parau pa’ari, te fa’a’ote repo, te buka ’e te mau mātini hāmanira’a mā’a ’e tē vai atu ra ’ia tomo mai iō māua, ma te tīa’i i taua poro’i ōtahi ra.

’I te hō’ē pō, ’ua parau mai ’oia iā’u ē, ’ua pātōtō mai e piti taure’are’a pereue ’ere’ere i tō māua ’ōpani ’e ’ua tae mai te mana’o māramarama ’e te pāpū ’iāna ’ia tomo mai rāua. ’Ua parau mai rāua ē ’ua hina’aro rāua e paraparau iāna nō te Atua, e ho’i mai rā rāua ’ia ho’i ato’a ana’e mai au i te fare. ’O tera ānei te poro’i e tīa’ihia ra ?

’Ua ha’amata rāua i te haere mai e fārerei ia māua ’e ma tā rāua a’o, ’ua tai’o mātou i roto i te mau pāpa’ira’a mo’a ’e ’ua tae mai te hāro’aro’ara’a faufa’a mau o Iesu Mesia ’ei Fa’aora ’e ’ei Ora nō tātou. ’Ua tātarahapa ’oi’oi māua ē ’ua bāpetizohia māua i te pēpera’a, tei riro ’ei fafaura’a mana’o ’ore. Teie rā, ’ia bāpetizo-fa’ahou-hia tē aura’a ra ’o te riro-ato’a-ra’a ïa ’ei melo nō te hō’ē ’ēkālesia ’āpī, e ti’a ïa ia māua nā mua roa ’ia māramarama i te reira.

E nāhea rā ïa māua e ’ite ai ē te mea tā te mau misiōnare i parau ia māua nō ni’a i te Buka a Moromona, nō Iosepha Semita ’e nō te fa’anahora’a nō te fa’aorara’a e parau mau iho ā te reira ? Mai te au i te mau parau a te Fatu, ’ua hāro’aro’a māua ē e ti’a ia māua ’ia « ’ite [i te reira] i tō rātou hotura’a ».² Nō reira, ma te huru pāpū mau, ’ua ha’amata māua i te hi’o haere i te ’Ēkālesia ma te ’imi i te reira mau hotu ma tō māua mata o te ferurira’a. E aha tā māua i ’ite ? ’Oia ho’i, ’ua ’ite mai māua :

• I te mau ta’ata au ’e te ’oa’oa ’e te mau ’utuāfare fa’ahiahia tei hāro’aro’a ē e ti’a ’ia tātou ’ia ’ite i te ’oa’oa i roto i teie orara’a ’e ’eiaha noa i te māuiui ’e te ahoaho.

• Hō’ē ’ēkālesia ’aita te mau feiā fa’atere e aufauhia, ’o te mau melo iho rā te fāri’i i te mau tītaura’a ’e te mau hōpoi’a.

• Hō’ē ’ēkālesia i reira Iesu Mesia ’e te mau ’utuāfare e riro ai ’ei pū nō te mau mea ato’a, i reira te mau melo e ha’apae ai i te mā’a hō’ē taime i te ’āvae ’e e hōro’a i te ō nō te tauturu i te feiā veve ’e te nava’i ’ore, i reira te mau peu mā e fa’aitoitohia ai, e ha’api’ihia ai tātou ’ia ha’apae i te mau mea ataata.

Nō reira :

• ’Ua fa’ahiahia māua i te fa’atumura’ahia i ni’a i te haerera’a i mua o te ta’ata iho, te ha’api’ira’a, te ’ohipa itoito ’e te fa’arava’ira’a iāna iho.

• ’Ua ha’api’i mai māua nō ni’a i te hō’ē fa’anahora’a tōtauturu fa’ahiahia mau.

• ’Ua putapūhia māua e te mau ’āmuira’a rahi ma te mau pehe fa’ahiahia ’e te mau parau tumu pae vārua hōhonu i parauhia nā reira.

I te ’itera’a i teie mau mea ato’a, ’aita māua i ’ite mai i te hō’ē a’e hape i roto i te ’Ēkālesia. Maori, ’ua au roa ’ino māua i te mau mea ato’a tā māua i ’ite. Nō reira, ’aita ā māua i fa’aoti e ’ia bāpetizohia māua, nō te mea ’ua hina’aro māua e ’ite pauroa hou e rave ai.

I roto ato’a i tā māua fa’aotira’a ’ore, ’ua fa’aineine te Fatu ia māua ma te fa’aoroma’i, ’ua ha’api’ipi’i ’oia ia māua ’e ’ua tauturu ia māua ’ia ’ite mai ē e ti’a ia māua ’ia ’apo mai i te hāro’aro’ara’a i te parau mau ’eiaha noa nā roto i te mana’o au o tō tātou ferurira’a, nā roto ato’a rā i te reo hau roa ’e te ha’iha’i mau o te Vārua ’o tē paraparau nei i tō tātou ’ā’au.

’Ua tae mai teie reo ’e te ’āehuehu nō te hope’a i te hō’ē pō i muri a’e e 10 ’āvae ha’api’ipi’ira’a i te ’evanelia, ’ia tai’o ana’e tātou i roto i te Mosia 18 : « ’Ua hina’aro ’outou e tauturu te tahi ’e te tahi ’ia hopoi i tā ’outou hopoi’a… ’ia ha’amahanahana ia rātou i tei au ’ia ha’amahanahanahia… mai te mea i hina’arohia teie e tō ’outou ’ā’au, e aha te mea e ’ore e au ai ia ’outou ’ia bāpetizohia i te i’oa o te Fatu… ? »³

’Ua ō roa teie parau o te Buka a Moromona i roto i tō māua ’ā’au ’e tō māua vārua ’e ’ua fāri’i māua i reira iho ’e ’ua ’ite ē e ’aita atu ā e tumu ’eiaha ’ia bāpetizohia. ’Ua ’ite māua ē te mau hina’aro i fa’ahitihia i roto i teie mau ’īrava ’o te mau hina’aro ïa o tō māua ’ā’au, ’e ’o teie mau ’ohipa te mea faufa’a roa. E mea faufa’a roa te reira, i te hāro’aro’a-noa-ra’a i te mau mea ato’a, ’ua ’ite a’ena ho’i māua i te reira. ’Ua ti’aturi noa māua i ni’a i te rima arata’i o tō tātou Metua here i te Ao ra ’e ’ua ’ite pāpū e tāmau ā ’oia i te arata’i ia māua.

Nō reira, i te reira mahana, ’ua tāpe’ahia te hō’ē tai’o mahana nō tō māua bāpetizora’a, ’e ’aita i maoro roa ’ua bāpetizohia māua, ’ua tae !

Hōho’a

Te bāpetizora’a o elder ’e te tuahine Held

E aha tā tātou e ’apo mai i roto i teie ’ohipa i tupu ?

A tahi, ’ua ’apo mai tātou ē e nehenehe tātou e ti’aturi tā’āto’a i te hō’ē Metua here i te Ao ra, e tamata tāmau nei i te tauturu ia tātou ’ia riro mai te ta’ata tāna i ’ite e riro mai tātou. ’Ua ha’apāpū tātou i te parau mau hōhonu o tāna mau parau ’a nā ’ō ai ’oia « E hōro’a vau i te mau fa’aue i te mau tamari’i a te ta’ata ’e ’ua nā ni’a iho i te fa’aue, ’ua a’o ’e ’ua nā ni’a iho i te a’o, te tahi vāhi iti i ’ō nei, ’e mai reira ho’i ’ei ’ō te tahi vāhi iti ; e ao tō rātou te fa’aro’o i tā’u parau, ’e te hōro’a i te tari’a i tā’u a’o, ’e ha’api’i ho’i rātou i te parau pa’ari ; nō te mea e hōro’a atu ā vau iāna i tei fāri’i mai ra »⁴

’E te piti, ’ua ’apo mai tātou hau atu i tō tātou mana’o au, e nehenehe te tāhi atu fāito nō te ’aitau i te ’ite e hōro’a ’ia tātou i te arata’ira’a ’e te hāro’aro’ara’a. ’O te reo hau ’e te marū o te Vārua Maita’i ’o tē paraparau nei i tō tātou ’ā’au ’e i tō tātou ferurira’a.

Mea au nā’u e fa’aau i teie parau tumu i tō tātou ’ite nō te hi’o. ’Aita tō tātou Metua i te Ra’i i hōro’a ia tātou hō’ē, e piti rā mata pae tino. E nehenehe tātou e ’ite maita’i i te hō’ē noa mata, te piti rā o te mata e hōro’a mai ïa i te tahi atu hi’ora’a ātea. ’Ia ’āmuihia teie nā hi’ora’a ātea i roto i tō tātou roro, e fa’atupu mai te reira i te hō’ē hōho’a e toru fāito o tō tātou arutaimāreva (environnement).

’Oia ato’a, ’ua fāri’i tātou e piti puna ha’amāramaramara’a, nā roto mai i tō tātou ’aravihi i te pae tino ’e te pae vārua. E fa’atupu tō tātou ferurira’a i te hō’ē ’ite nā roto i tō tātou mau rāve’a pae tino ’e tō tātou mana’ora’a. Nā roto rā i te hōro’a o te Vārua Maita’i, ’ua hōro’a ato’a mai te Metua ia tātou i te piti o te hi’ora’a ātea, ’o te reira te mea faufa’a roa a’e ’e te parau mau, nō te mea nō ’ō roa mai te reira iāna ra. Terā rā, e mea pinepine te mau muhumuhu o te Vārua i te hō’ene, ’aita te rahira’a o te ta’ata e ta’a maita’i nei i teie atu puna.

I muri iho, ’ia tū’ati ana’e teie nā ’itera’a ātea i roto i tō tātou vārua, e fa’a’itehia mai te hō’ē hōho’a hope roa nō te vai-mau-ra’a o te mau mea mai tōna vaira’a mau. Nō reira, nā roto i te hi’ora’a ’ātea hau atu a te Vārua Maita’i, vetahi « mau vaira’a mau », tei fa’ata’a-ta’a-’ē-hia i roto i tō tātou hāro’aro’ara’a o te feruria’a, e nehenehe te reira i te hōhora mai e mea hape ’aore rā e mea ha’avare mau. ’A ha’amana’o i te mau parau a Moroni : « E nā roto i te mana o te Vārua Maita’i e ’ite ai outou i te parau mau i te mau mea atoa ra »⁵

I roto i tō’u nā 31 matahiti ’ei melo nō te ’Ēkālesia, ’ua ’ite tāmau vau ē mai te mea e ti’aturi noa tātou i ni’a i tō tātou mana’o au o te ferurira’a ’e mai te mea e huna ’aore rā e tāu’a ’ore tātou i te hāro’aro’ara’a pae vārua ’o tā tātou e nehenehe e fāri’i nā roto i te mau muhumuhura’a ’e i te mau fa’a’itera’a a te Vārua Maita’i, mai te huru ïa ē, tē haere nei tātou nā roto i te orara’a e hō’ē noa mata. ’Ia hi’ohia rā, ’ua hōro’ahia mai e « piti mata » nō tātou. ’O te tū’atira’a ana’e i nā hi’ora’a e piti, tātou e nehenehe ai e fāri’i i te hō’ē hōho’a mau ’e te hope roa nō te mau parau mau ato’a ’e nō te mau mea ato’a tā tātou e ora nei i roto i teie orara’a, ’oia ato’a te hāro’aro’ara’a tā’āto’a ’e te hōhonu o tō tātou hīro’a ta’ata ’e ’o tā tātou fā ’ei mau tamari’i nā te hō’ē Metua here i te Ao ra.

Tē ha’amana’o nei au i te mea tā peresideni Russell M. Nelson i ha’api’i ia tātou ’e hō’ē matahiti i teienei ’a nā ’ō ai ’oia, « i te mau mahana i muri nei, e’ita tātou e ora mai i te pae vārua mai te peu ’aita te mana arata’i ’e te fa’atere ’e te tāmāhanahana ’e te tāmau o te Vārua Maita’i »⁶

’Ua ’apo mai au ma te pāpū maita’i ē :

• E Metua here i te ao ra tō tātou ’e ’ua fāri’i tātou pā’āto’a e haere mai i ni’a i teie fenua ’ei tuha’a nō te hō’e fa’anahora’a hanahana.

• ʼO Iesu te Mesia, tē ’ora nei ’oia ’e ’o ’oia tō tātou Faʼaora ʼe tō tātou Ora.

• ’Ua pi’ihia Iosepha, hō’ē taure’are’a ha’eha’a nō te fa’a’apu, ’e ’ua riro mai ’ei peropheta pūai tei fa’ati’a i teie tau nō te ’īra’a o te mau tau, ma te mau tāviri ato’a, te mana ’e te ha’amanara’a nō te autahu’ara’a mo’a o te Atua

• Te Buka a Moromona ’o te ’ite piti ïa nō Iesu Mesia ’e ’ua fa’ata’ahia te mau ’utuāfare ’ia vai ’āmui noa e a muri noa atu.

• Tē arata’i nei tō tātou Fatu ’o Iesu Mesia i tā tātou ’ēkālesia tei fa’aho’i-fa’ahou-hia mai nā roto i tō tātou peropheta ora, te peresideni Russell M. Nelson i teie mahana

’Ua riro teie mau mea ’e e rave rahi atu ā mau parau mau faufa’a rahi ’ei mau ’ōfa’i hāmani i te pae vārua ’o tā te Atua e tauturu nei iā’u ’ia riro mai. ’E tē tīa’i nei au mā te i’ei’e i te mau ha’api’ira’a ’āpī e rave rahi ’o tāna e hina’aro iā’u---’e ia ’outou---’ia fāri’i ’a haere ai tātou nā roto i teie orara’a fa’ahiahia ’e « ia ’imi ho’i i te ’ite…nā roto i te ha’api’i ’e nā roto ato’a i te fa’aro’o ».

’Ua ’ite au e parau mau teie mau mea ’e tē fa’a’ite pāpū nei nō te reira i e te i’oa o Iesu Mesia, ’āmene.