Te maita’i vave o te Atua

E rave rahi matahiti i ma’iri, ’ua haere mai tā māua tamaiti pae matahiti ma te parau ē : « Pāpā, teie tā’u i ’apo mai. Te mea ’oi’oi nō ’oe, e mea maoro roa ïa nō’u ».

’Ia parau te Fatu ’aore rā tāna mau tāvini ē, « Tē fātata mai nei te mahana » ’aore rā « Tē fātata mai nei te tau », e nehenehe roa ïa e parau ē e orara’a tā’āto’a te reira ’aore rā e mea maoro atu ā.¹ Tōna taime, ’e pinepine ato’a tāna tārena, e mea ta’a ’ē ïa i tā tātou. Tītauhia ’ia tīa’i māite. ’Aita ana’e, e’ita e haere ia tātou ’ia fa’atupu ’aore rā ’ia fa’a’ite i tō tātou fa’aro’o i te Atua nō te ora ’e te fa’aorara’a. Tā’u nei rā poro’i i teie mahana, ’oia ho’i, noa atu ā tā tātou tīa’i-māite-ra’a i te Fatu, tē vai ra te tahi mau ha’amaita’ira’a e tae vave ia tātou.

I te harura’ahia Alama ’e tōna mau ta’ata nā te mau ’āti Lamana, ’ua pure rātou ’ia fa’aorahia mai rātou. ’Aita rātou i fa’aora-vave-hia i terā iho taime, ’āre’a rā, ’a tīa’i māite noa ai rātou i te ora, ’ua fa’a’ite mai te Fatu i tōna maita’i nā roto i te tahi mau ha’amaita’ira’a vave. ’Ua tāmaru vave ’oia i te ’ā’au o te mau ’āti Lamana, ’eiaha rātou ’ia taparahi-pohe-hia. ’Ua ha’apūai ato’a ’oia ia Alama ’e tōna mau ta’ata ’e ’ua māmā tā rātou mau hōpoi’a.² I te hope’a, i te fa’aorara’ahia rātou, ’ua haere rātou i Zarahemela, i reira rātou i te fa’ati’ara’a i te ’ohipa i tupu nō rātou i mua i te hō’ē ’āmuira’a tei māere roa. ’Ua fa’ahiahia te mau ta’ata nō Zarahemela i te reira, ’e ’ua « ha’amana’o ho’i rātou i te maita’i [vave] o te Atua ’e tōna ra mana i te fa’aora-a’enei-ra’a ia Alama ’e tōna mau taea’e… i te tītīra’a ho’i, ’ua fa’ateitei atura rātou i tō rātou reo, ’e ha’amaita’i atura i te Atua ra ».³

E noa’a te maita’i vave o te Atua i te mau ta’ata ato’a e pi’i iāna ma te mana’o pāpū ’e te ’ā’au tae roa. ’O rātou ato’a ïa e ti’aoro atu ma te ’oto rahi, i te taime e au ē, e mea ātea ā te fa’aorara’a ’e tē maoro roa ra te māuiui, ’e tē pūai noa atu ra ho’i.

’O te mea ïa i tupu nō te hō’ē peropheta ’āpī tei pohe i te mamae i roto i te piha pōiri ’e te to’eto’e ’e te haumi ho’i ’e i te hope’a ’ua ti’aoro atu ē : « E te Atua, tei hea ra ’oe ? […] E aha te maoro o te tāpe’ara’a o tō ’oe na rima… ? ’Oia, e te Fatu, e aha te maoro… ? »⁴ ’Ei pāhonora’a, ’aita te Fatu i fa’aora vave ia Iosepha, ’ua hōro’a vave atu rā ’oia iāna i te parau nō te hau.⁵

E hōro’a vave ato’a te Atua i te tīa’ira’a nō te fa’aorara’a e tae mai i te hope’a.⁶ Noa atu te mau mea, noa atu te vāhi, i roto ana’e i te Mesia ’e nā roto i te Mesia e noa’a ai te tīa’ira’a ’oa’oa ’e te ’ana’ana i mua ia tātou.⁷ I mua noa mai ia tātou.

Hau atu, ’ua parau ’oia : « E ’ore… ta’u hāmani maita’i ia ’oe e ta’a ’ē. »⁸

Nā ni’a i te mau mea ato’a, e tae vave mai te here o te Atua. Mai ia Paulo, tē fa’a’ite pāpū nei au ē ’aita e mea « e ti’a ’ia fa’ata’a ’ē ia tātou i te aroha o te Atua, i roto i tō tātou Fatu ia Iesu Mesia ra ».⁹ Noa atu ā e fa’ata’a ’ē te hara ia tātou i tōna Vārua nō te hō’ē taime, e’ita e ti’a i te reira ’ia fa’ata’a ’ē ia tātou i te here tāmau ’e te ’oi’oi o te metua hanahana.

Tē vai ra te tahi mau rāve’a ’e mau mauha’a « e ha’amaita’i vave mai ’oia ia [tātou] ».¹⁰ I teienei, nō te ’ite i te pāpūra’a o teie mau parau tumu, e fa’a’ite atu vau i te ’ohipa i tupu nō e piti pupu ta’ata, tō rātou orara’a te fa’a’itera’a nō te maita’i vave o te Atua.

Mai tōna taure’are’ara’a, ’ua fifi ’o Emilie i te mau rā’au fa’atītī. ’Ua tāmata ’oia ē ’ua riro mai ’ei peu ē ’ua mau roa mai ’ei fa’atītīra’a tei ha’avī iāna e rave rahi matahiti, noa atu ā pa’i te tahi mau taime e mea maita’i ’oia. ’Ua huna maita’i Emilie i tōna fifi, i muri iho hoa rā i tōna rirora’a mai ’ei vahine fa’aipoipo ’e ’ei metua vahine.

Te ha’amatara’a ’oia i te ora i te reira ma’i, e ’ere roa atu ïa mai te hō’ē fa’aorara’a mau. E mea nā roto noa ho’i i te hō’ē hi’opo’ara’a mātau i te taote, ē i muri iho, tē fa’ahorohia ra ’oia nā ni’a i te pere’o’o ma’i i te tahi atu pū fāri’ira’a ta’ata ma’i. ’Ua ha’amata ’oia i te ha’ape’ape’a nō tōna ferurira’a i te fa’aāteara’a ’oia ’e tāna mau tamari’i ’e tāna tāne ’e tōna fare.

I taua pō ’ōtahi ra i roto i te piha to’eto’e ’e te pōiri, ’ua viri’ō Emilie iāna i roto i tōna ro’i ma te ta’i. ’Ua topatopa noa tōna ferurira’a ē i te hope’a, nō te rahi roa o te ahoaho, te mata’u ’e te pōiri nene’i o taua piha ra ’e o tōna ato’a ’ā’au, ’ua mana’o roa ’o Emilie ē e pohe ’oia i terā pō. ’Ōna ri’i ana’e.

I roto i terā vaira’a hepohepo, ’ua noa’a mai ia Emilie i te pūai nō te ne’e i te hiti o te ro’i ’e ’ua tūturi ihora i raro. Ma te tāu’a ’ore i te fa’a’etara’a tāna i fa’a’ite i roto i te tahi o tāna mau pure nā mua a’e, ’ua auraro hope Emilie iāna i te Fatu i roto i tōna hepohepo ma te tāparu ē : « E te Atua, ’ua hina’aro vau ia ’oe. E tauturu mai na. ’Aita vau i hina’aro e fa’aea ’o vau ana’e. Tauturu mai na iā’u i teie pō ».

I muri noa mai, mai tāna i rave nō Petero i tahito ra, ’ua toro atu Iesu i tōna rima nō te haru mai i tōna ’ā’au tomo ra.¹¹ Tae mai nei i ni’a ia Emilie te hau māere ’e te itoito ’e te ti’aturi ’e te here. ’Aita fa’ahou e piha to’eto’e, ’ua ’ite mai ’oia ē e ’ere ’o ’ōna ana’e, ’e nō te taime mātāmua mai te 14ra’a o tōna matahiti, ’ua tae mai te mana’o o Emilie ē, e tupu maita’i te mau mea. ’A « ara [ai ’oia] i te Atua ra »,¹² ’ua topa te ta’oto o Emilie, ’ua topa te hau. Tē ’ite nei ïa tātou ē, « ’ia tātarahapa ʼoutou, ʼe ’ia ʼore ’ia faʼa’eta’eta i tō ʼoutou ʼāʼau, e faʼatupu-vave-hia te rāveʼa rahi o te ora nō ʼoutou ».¹³

Hōho’a

E ’utuāfare i te hiero

’Ua ma’iri i te hō’ē tau roa nō te rapa’aura’a ’e te fa’aorara’a hope ia Emilie—tau ’āva’e rapa’aura’a ’e te ha’api’ipi’ira’a ’e te ’āparaura’a, ’e ’ua turuhia ’oia ’e i te tahi mau taime ’ua amo-roa-hia ’oia e tōna maita’i. ’E tē tāmau noa nei te reira maita’i nōna inaha ’ua tomo ’oia i roto i te hiero ’e tāna tāne ’e te mau tamari’i ’ia tā’atihia rātou ē a muri noa atu. Mai te mau ta’ata nō Zarahemela ra, tē ha’amaita’i nei Emilie i te Atua ’a feruri ai ’oia i te maita’i vave o te Atua ’e i tōna mana, i te fa’aorara’a iāna i te tītīra’a.

I teienei, nō roto mai i te orara’a o te tahi atu ta’ata fa’aro’o ’e te itoito. I te 27 nō Tītema 2013 ra, ’ua fāri’i pōpou Alicia Schroeder i tōna mau hoa, ’o Sean ’e ’o Sharla Chilcote, tei haere mai i mua i tōna ’ūputa ma te tīa’i-’ore-hia . ’Ua toro atu Sean, ’o te ’episekōpo ato’a ho’i o Alicia, i tāna niuniu ’āfa’ifa’i ma te parau ē : « Alicia, ’ua here māua ia ’oe. Na ’oe teie niuniu, ’a paraparau. »

’O Mario tei ni’a i te niuniu, tāna tāne. Tei te hō’ē vāhi mo’emo’e ’oia ’e tāna mau tamari’i nō te hō’ē tere pere’o’o hiona tā rātou i tīa’i maoro noa na. ’Ua tupu te hō’ē ’ati rahi. ’Ua pēpē maita’i ’o Mario, ’e ’ua fa’aru’e roa mai tā rāua tamaiti 10 matahiti, ’o Kaleb. I te fa’a’itera’a Mario ia Alicia ma te ta’i ē, ’ua fa’aru’e mai Kaleb, ’ua huru-’ē-hia ’oia ’e ’ua hōriri, e vaira’a tā te hō’ē pae iti noa o tātou i ’ite. ’Ua mata pōiri roa ’oia. ’Ua paruparu roa Alicia i te ’ā’au fāfati, e’ita tāna e nehenehe e haere ’e e paraparau.

Rave a’era te ’episekōpo ’e te tuahine Chilcote iāna nō te fa’ati’a mai iāna. ’Ua ta’i rātou ’e ’ua heva ho’i nō te hō’ē taime. ’Ei reira ’ua ani te ’episekōpo Chilcote e fāri’i ānei Alicia i te hō’ē ha’amaita’ira’a.

Te mea i tupu i muri iho, e mea ta’a ’ore ïa nā tātou mai te mea ’aita tātou i māramarama i te tāra’ehara a Iesu Mesia ’e te maita’i vave o te Atua. ’Ua tu’u marū te ’episekōpo Chilcote i tōna rima i ni’a i te upo’o o Alicia ’e, ma te reo rūrū, ’ua ha’amata ’oia. E piti mea tā Alicia i fa’aro’o, mai te huru ra ē ’o te Atua iho terā e paraparau ra. ’A tahi, ’ua fa’aro’o ’oia i tōna i’oa, Alicia Susan Schroeder. I muri iho, ’ua fa’aro’o ’oia i te ’episekōpo i te fa’ahitira’a i te mana o te Atua mana hope. I terā iho taime—i te fa’ahitira’ahia tōna noa i’oa ’e te mana o te Atua—’ua ’ī roa Alicia i te hau, i te here, i te tāmāhanahanara’a, ’e ’oia ato’a ho’i, i te ’oa’oa e’ita e nehenehe e parau. ’E ’ua vai tāmau noa te reira iāna ra.

Teie rā, e mea pāpū ē, tē vai nei tō Alicia, tō Mario ’e tō te ’utuāfare hevara’a ’e te mihi ia Kaleb. E mea pa’ari mau ā ! ’Ia paraparau vau iāna, e mani’i mai iho ā te roimata o Alicia ’ia parau mai ’oia i tōna here ’e tōna mihi i tāna tamaiti iti. ’E e tāmau noa te roimata ’ia parau ’oia nō te huru o te Fa’aora rahi i turu iāna i roto i te mau taime ato’a o tōna ’ati, ma te ha’amata nā ni’a i tōna maita’i vave i roto i tōna ’oto rahi roa a’e ’e tae roa mai i teienei i te tīa’ira’a māramarama nō te tāhō’ēra’a au roa « tē fātata mai nei te mahana ».

’Ua ’ite au ē, i te tahi taime, e fa’atupu te mau ’ohipa o te orara’a i te ta’a ’ore ’e te tā’ue’uera’a ’e e mea fifi atura ’ia fāri’i, ’ia ’ite ’aore rā ’ia tāpe’a mai i te huru ’ā’au māmā i tae mai ia Emilie ’e Alicia. ’Ua nā roto ato’a mai au i teie huru taime fifi. Tē fa’a’ite pāpū nei au ē, i taua taime ra, ’o tō tātou fa’ahereherera’ahia noa a’e te hō’ē fa’a’itera’a marū ’e te pūai nō te maita’i vave o te Atua. ’A ha’amana’o ē, i te hope’a, ’ua fa’aorahia ’Īserā’ela i tahito ra e « te Atua iho ā tei [fa’aherehere] ia rātou »¹⁴ i terā mahana ’e terā mahana.

Tē hōro’a nei au i tō’u ’itera’a pāpū ē, ’o Iesu Mesia te Fa’aora rahi, ’e nā roto i tōna i’oa, tē parau fafau nei au ē, ’ia fāriu ’outou i ni’a iāna ma te mana’o pāpū ’e te ’ā’au tae roa, e fa’aora mai ’oia ia ’outou i te mau mea ato’a e ha’amata’u i te fa’aiti ’aore rā i te ha’amou i tō ’outou orara’a ’e te ’oa’oa. E maoro a’e paha taua fa’aorara’a ra i te tae mai i tā ’outou e hina’aro—’o te orara’a tā’āto’a paha ’aore rā e mea maoro atu ā. Nō reira, ’ia noa’a ia ’outou te tāmāhanahanara’a, te fa’aitoitora’a ’e te tīa’ira’a, nō te turu ’e nō te ha’apūai ia ’outou ē tae noa atu i taua mahana fa’aorara’a ra, tē ha’afa’ahiahia nei au ’e te fa’a’ite pāpū nei au ia ’outou nō te maita’i vave o te Atua i te i’oa o Iesu Mesia, ’āmene.