Tē rahi ra tōna maita’i
Nō te rahira’a o te mau ha’amaita’ira’a ’o tā te Atua e hina’aro e hōro’a nō tātou, tītauhia ’ia rave tātou i tā tātou tuha’a—te ’ohipa tei fa’atumuhia i ni’a i tō tātou fa’aro’o ia Iesu Mesia.
E au mau taea‘e, e au mau tuahine, ’ua hina’aro tō tātou Metua i te Ao ra ’e Iesu Mesia i te ha’amaita’i ia tātou tāta’itahi.1 Te parau nō te huru e ha’amatara mai, ’ia noa’a te reira mau ha’amaita’ira’a, e tumu parau ïa tei mātutuhia ’e tei ’āparauhia e te mau ’aivāna’a nō ni’a i te Atua e rave rahi tenetere.2 Tē parau nei vetahi ē, e ’āpī tātou i te mau ha’amaita’ira’a ; e fāri’i tātou i te reira nā roto noa i tā tātou mau ’ohipa. Tē mārō nei vetahi ē, ’ua mā’iti a’ena te Atua i te ta’ata tana e ha’amaita’i ’e e aha te ha’amaita’ira’a—’e e’ita e nehenehe e taui i teie mau fa’aotira’a. E fifi e vai ra i roto i nā ti’ara’a to’opiti. E’ita te mau ha’amaita’ira’a o te ra’i e roa’a nā roto i te ha’aputu-rū-ra’a i te mau « rē nō te ’ohipa maita’i », e’ita ato’a nā roto i te tīa’ira’a ’ia tāno tātou i te tāvirira’a nō te mau ha’amaita’ira’a. ’Aita roa atu, e mea ta’a ’ē atu ā te parau mau, e mea tano a’e rā nō te aura’a i rotopū i te hō’ē Metua here i te Ao ra ’e te ta’ata e nehenehe e riro ’ei fatu ’āi’a nāna—’o tātou ïa. Tē fa’a’ite nei te parau mau i fa’aho’ihia mai ē, e’ita roa atu tātou e ’āpī i te mau ha’amaita’ira’a, e mea faufa’a rahi rā tā tātou mau ’ohipa fa’auruhia e te fa’aro’o, i te ha’amatara’a ’e i te roara’a o te taime.3
Nō te feruri nāhea tātou e fāri’i nei i te mau ha’amaita’ira’a nō ’ō mai i te Atua, e fa’aau tātou i te mau ha’amaita’ira’a o te ra’i i te hō’ē pāpa’atuārau rā’au. E feruri tātou i rōpū i te reira, te tahi ma’a hu’ahu’a rā’au ’e te rā’au ri’i nā ni’a iho. I muri iho tē vai ra te mau rā’au tanotano ’e te vahie na’ina’i ’e te mea rarahi. I roto i teie pāpa’atuārau rā’au ’ua nava’i roa te tao’a ’ama ’ia māramarama te ta’ata ’e ’ia māhanahana ho’i e rave rahi mahana. E feruri i pīha’i iho i teie pāpa’atuārau rā’au i te hō’ē noa māti e nehenehe e ’uīhia i te mau vāhi rau.4
Nō te tu’u i te ito e vai ra i roto i taua pāpa’atuārau rā’au ra, tītauhia ’ia ’uī i te māti ’e ’ia tūtu’i i te hu’ahu’a rā’au. E ura ’oi’oi mai te reira ’e e fa’a’ama te reira i te mau vahie rahi a’e. ’Ia ha’amata te reira i te ’ama, e tāmau noa ïa te reira ē pau noa atu te rā’au ’aore rā ’ia ’ere noa atu te auahi i te mata’i.
Te ’uīra’a i te māti ’e te fa’a’amara’a i te hu’ahu’a rā’au, e mau ’ohipa na’ina’i ïa e rave ’o tē ha’amatara i te ito e vai ra i roto i te rā’au.5 E’ita te ’ohipa e tupu maori rā ’ia ’uīhia te māti, noa atu ā te rahi o te pāpa’atuārau rā’au. ’Ia ’uīhia te māti ’aita rā e tu’uhia i ni’a i te hu’ahu’a rā’au, e mea iti noa ïa te fāito māramarama ’e te māhanahana e matara mai ’e e vai noa te ito auahi i roto i te rā’au. Mai te mea ’aita e mata’i i te hō’ē noa a’e taime, e pohe te auahi.
Mai te reira ato’a nō te rahira’a o te mau ha’amaita’ira’a tā te Atua e hina’aro e hōro’a ia tātou, tītauhia ’ia rave tātou i tā tātou tuha’a—te ’ohipa tei fa’atumuhia i ni’a i tō tātou fa’aro’o ia Iesu Mesia. Te fa’aro’o i te Fa’aora, e parau tumu ïa e au i te ’ohipa ’e te mana.6 E ’ohipa nā mua tātou ma te fa’aro’o ’ei reira te mana e tae mai ai—mai te au i te hina’aro ’e te tārena a te Atua. E mea faufa’a roa teie ’āna’ira’a.7 E mea iti roa te ’ohipa e tītauhia e rave hou te mau ha’amaita’ira’a tā tātou e fāri’i i te hope’a.8
’A hi’o na i te ’ohipa i tupu i te haerera’a mai te mau ’ōphi ve’ave’a ’e te rere i rotopū i te ’āti ’Īserā’ela i tahito ra ’a tere ai rātou i te fenua i parauhia ra. E pohe te ta’ata i te hōhoni a te ’ōphi. E ti’a rā i te hō’ē ta’ata tei hōhonihia ’ia ora mai nā roto i te hi’ora’a i te hō’ē ’ōphi veo tā Mose i hāmani ’e i tu’u i ni’a i te hō’ē rā’au roa.9 E aha pa’i te ’ohipa tītauhia nō te hi’o i te hō’ē mea ? Te feiā ato’a i hi’o, ’ua matara ïa nō rātou te mau mana o te ra’i ’e ’ua ora mai rātou. ’Aita i noa’a i te tahi atu mau ’āti ’Īserā’ela i hōhonihia ’ia hi’o i te ’ōphi veo ’e ’ua pohe ihora. ’Ua ’ere paha rātou i te fa’aro’o e hi’o.10 Penei a’e ’aita rātou i ti’aturi e noa’a i te hō’ē ’ohipa ’ōhie mai te reira e fa’atupu i te ora i parauhia ra. ’Aore rā ’ua fa’a’eta’eta rātou i tō rātou ’ā’au ’e ’ua pāto’i i te parau a’o a te peropheta o te Atua.11
E parau tumu mure ’ore te ha’amatarara’a i te mau ha’amaita’ira’a nō ’ō mai i te Atua ra. Mai te mau ’āti ’Īserā’ela i tahito ra, e mea tītau ato’a ’ia fa’a’ohipa tātou i tō tātou fa’aro’o ia Iesu Mesia, ’ia ha’amaita’ihia tātou. ’Ua heheu te Atua ē « tē vai nei te hō’ē ture, ’o tei fa’atumu-mau-roa-hia i roto i te ao ra hou roa te fa’atumura’a o teie nei ao, ’ei ni’a iho i te reira te mau ha’amaita’ira’a ato’a i fa’atumuhia ai—’e ’ia noa’a mai ia tātou te hō’ē ha’amaita’ira’a nō ’ō mai na i te Atua ra, ’ua nā roto ïa i te ha’apa’ora’a i taua ture i fa’atumuhia ai nō te reira ».12 Teienei rā, ’aita ’outou e ’āpī nei i te hō’ē ha’amaita’ira’a—e mea hape terā mana’o—tītauhia rā ’ia ’ohipa ’outou nō te reira. E tae mai tō tātou ora nā roto noa i te mau maita’i ’e te aroha o Iesu Mesia.13 Te rahi o tāna tusia tāra’ehara, ’o te rahi ato’a ïa te pāpa’atuārau rā’au ; ’ia fa’aauhia i tā tātou ’ohipa e rave, e mea piri ïa i te aore. E ’ere rā i te aore, e ’ere i te mea faufa’a ’ore, i roto i te pōiri, ’ia ’ama te hō’ē rā’au māti e ’itehia te reira e rave rahi kilometera. E ’ite-roa-hia ho’i te reira i te ra’i, inaha, tītauhia te mau ’ohipa ri’i nō te fa’aro’o nō te tū’ama i te mea i parauhia e te Atua.14
Nō te fāri’i i te ha’amaita’ira’a tā tātou i hina’aro nō ’ō mai i te Atua, ’a ’ohipa ma te fa’aro’o, ’a ’uī i te māti (e aura’a parau) tei ni’a iho te ha’amaita’ira’a i tā’amuhia. ’Ei hi’ora’a, hō’ē tumu tātou e pure nei, ’o te ha’apāpūra’a ïa i te mau ha’amaita’ira’a tā te Atua i ineine e hō mai maoti tā tātou anira’a.15 ’Ua ti’aoro Alama i te aroha ’e ’ua marū tōna māuiui ; ’aita tōna ’ā’au i ha’amāuiui-fa’ahou-hia i te ha’amana’ora’a i tāna mau hara. ’Ua tāpo’i te ’oa’oa i tōna māuiui—nō te mea noa ’ua ti’aoro ’oia ma te fa’aro’o ia Iesu Mesia.16 Te ito fa’a’ama tītauhia nō tātou, ’o te nava’ira’a ïa te fa’aro’o i te Mesia nō te ani ma te ’ā’au ateate i te Atua nā roto i te pure ’e nō te fāri’i i tōna hina’aro ’e tāna tārena ’ei pāhonora’a.
Pinepine te ito fa’a’ama tītauhia nō te mau ha’amaita’ira’a, ’ua hau atu ïa i te hi’o-noa-ra’a ’aore rā te ani-noa-ra’a ; tītauhia te ’ohipa rave tāmau, fa’ahou ’e fa’ahou ā, ma te fa’aro’o rahi. I te ’āfara’a o te tenetere 19, ’ua arata’i Brigham Young i te hō’ē pupu feiā mo’a nō te hi’ohi’o ’e nō te pārahi i Arizona, e vāhi pāpāmarō nō Marite ’apato’erau. I te tāpaera’a rātou i Arizona, ’ua pau tā rātou pape ’e ’ua mata’u ihora rātou ’o tē pohe rātou. ’Ua tāparu rātou i te tauturu a te Atua. ’Āria, ua mai nei ’e hiona mai nei, ’ua ti’a atura ia rātou ’ia fa’a’ī i tā rātou mau tura pape ’e ’ia fa’ainu ato’a i te mau ’ānimara. Ma te māuruuru ’e te ’ana’anaea, ’ua ho’i rātou i Roto Miti ma te ’oa’oa i te maita’i o te Atua. I te ho’ira’a rātou, ’ua hōro’a rātou i te parau fa’a’ite nō tō rātou tere ia Brigham Young ma te parau ē, e’ita e nehenehe e noho i Arizona.
I te fa’aro’ora’a ia rātou, ’ua ui Brigham Young i te hō’ē ta’ata i roto i te piha i tōna mana’o nō ni’a i te tere ’e te temeio. ’O Daniel W. Jones taua ta’ata ra, ’ua parau poto noa ’oia : « ’Āhani ’o vau terā, e fa’a’ī au i te pape, fa’anu’u atu ā i mua, ’e pure fa’ahou ai ». Tāpe’a a’era te rima o te taea’e Brigham i ni’a i te taea’e Jones ma te parau ē : « ’O teie te ta’ata e fa’atere i te pupu nō muri iho e haere i Arizona ».17
Tātou pā’āto’a tē nehenehe e ha’amana’o i te hō’ē taime ’ua fa’anu’u atu ā tātou ’e ’ua pure fa’ahou ā—’e ’ua tae mai te mau ha’amaita’ira’a. Tē fa’ahōho’a nei te ’ohipa i tupu nō Michael ’e Marian Holmes i teie mau parau tumu. ’Ua tāvini māua Michael ’ei Hitu ’Ahuru ārea. E mea au nā’u ’ia pi’ihia ’oia nō te pure i roto i tā mātou mau rurura’a nō te mea e ’ite-’ōhie-hia tōna fāito pae vārua rahi roa ; ’ua ’ite ’oia nāhea i te paraparau i te Atua. E mea au nā’u ’ia fa’aro’o iāna ’ia pure. I te ’ōmurara’a rā o tō rāua fa’aipoipora’a, ’aita ’o Michael rāua Marian e pure ’e e haere i te purera’a. ’Ua rahi roa tā rāua ’ohipa ’e tā rāua nā tamari’i ri’i e toru ’e tē hō’ē taiete patura’a fare manuia mau. ’Aita Michael i mana’o ē e ta’ata paieti roa ’oia. I te hō’ē pō, ’ua haere mai tō rāua ’episekōpo i tō rāua fare ’e ’ua fa’aitoito ia rāua ’ia ha’amata i te pure.
I te revara’a te ’episekōpo, ’ua fa’aoti a’era Michael rāua Marian e tāmata rāua i te pure. Hou e haere ai e ta’oto, ’ua tūturi rāua i te pae ro’i, ’e, ma te taiā ri’i, ’ua ha’amata ’o Michael. Ma’a parau pure ri’i noa, fa’aea tā’ue a’era ’e nā ’ō atura : « Marian, e’ita e haere iā’u. » ’A ti’a ai ’oia nō te haere atu i rāpae, tāpe’a mai nei Marian i tōna rima, huti ihora iāna i ni’a i tōna turi ’āvae ma te parau ē : « ’Oia, e haere. Tāmata fa’ahou ā ! » I teie fa’aitoitora’a, ’ua fa’aoti ’o Michael i te hō’ē pure poto.
Ha’amata a’era ’o Holmes mā i te pure tāmau. ’Ua fāri’i rāua i te anira’a a tō rātou ta’ata tupu ’ia haere i te purera’a. ’A tomo ai rāua i roto i te piha purera’a ’ua fa’aro’o rāua i te hīmene mātāmua, muhumuhu mai nei te Vārua ia rāua ē : « E parau mau te reira. » I muri iho, ma te ’ite-’ore-hia ’e te ani-’ore-hia, ’ua tauturu Michael i te huti i te fāri’i pehu i rāpae i te fare purera’a. ’A nā reira ai ’oia, ’ua tae mai te mana’o pāpū ē : « ’O teie tō’u fare. »
’Ua fāri’i ’o Michael ’e Marian i te mau pi’ira’a i roto i te ’Ēkālesia ’e ’ua tāvini i roto i tā rāua pāroita ’e te titi. ’Ua tā’atihia rāua ’e ’ua tā’atihia tā rāua e toru tamari’i. ’Ua fānau fa’ahou rāua i te tamari’i, ’ua rae’hia ’ahuru ma piti tamari’i. ’Ua tāvini ’o Holmes mā ’ei peresideni misiōni—e piti taime.
E ’ohipa na’ina’i tā rāua pure ri’i mātāmua, e ’ohipa rā tei ’ī i te fa’aro’o ’e tei tū’ama i te mau ha’amaita’ira’a o te ra’i. ’Ua ha’apa’o ’o Holmes mā i te mau ura auahi fa’aro’o nā roto i te haerera’a i te purera’a ’e te tāvinira’a. Maoti tā rāua pūpūra’a ia rāua ’ei pipi i roto i terā mau matahiti i noa’a ai te auahi ura fa’auru ē tae roa mai i teie mahana.
Teie rā, e mea tītau ’ia fāri’i tāmau noa te auahi i te mata’i ’ia ti’a i te vahie ’ia tu’u i tōna fāito pūai tā’āto’a. Mai tei fa’a’itehia e Michael ’e Marian Holmes, e tītau te fa’aro’o i te Mesia ’ia rave noa i te ’ohipa ’ia ’ama noa te auahi. E tūra’i te mau ’ohipa na’ina’i i tō tātou ’aravihi ’ia haere i ni’a i te ’ē’a nō te fafaura’a ma te arata’i ia tātou i te mau ha’amaita’ira’a rahi roa a’e e ti’a i te Atua ’ia hōro’a. Terā rā, ’ei aura’a parau, e puhi noa mai te mata’i ’ia tāmau noa rā tō tātou ’āvae i te tere. I te tahi taime, tītauhia ’ia hāmani i te hō’ē fana ’e te te’a hou te heheura’a e tae mai ai nō ni’a i te vāhi e ’imi i te mā’a.18 I te tahi taime, tītauhia ’ia hāmani i te mau mauiha’a hou te heheura’a e tae mai ai nō ni’a i te huru e hāmani i te hō’ē pahī.19 I te tahi taime, i raro a’e i te arata’ira’a a te peropheta a te Fatu, tītauhia ’ia ’eu i te tahi ri’i faraoa i te hinu ’e te faraoa ota iti e toe ra ’ia ’ore te fāri’i hinu ’ia pau ’e te hue faraoa ’ia iti.20 ’E i te tahi taime, e hina’aro tātou ’ia « fa’aea noa ’e ’ia ’ite ē [’o te Atua] te Atua », ’e ’ia ti’aturi i tāna tārena.21
’Ia fāri’i noa atu ’outou i te hō’ē ha’amaita’ira’a nō ’ō mai i te Atua, e nehenehe tā ’outou e parau ē, ’ua ha’apa’o ’outou i te ture mure ’ore e fa’atere i te fāri’ira’a i terā ha’amaita’ira’a.22 E ha’amana’o rā ē, te ture tei « fa’atumu-mau-roa-hia », ’aita ïa tō te taime i reira, te aura’a ra, e tae mai te mau ha’amaita’ira’a mai te au i te tārena a te Atua. Noa atu te mau peropheta tahito tei ’imi i tō rātou fare i te ra’i23 ’ua « pohe ana’e… ma te fa’aro’o, ’aita ā i noa’a tei parauhia mai ra, ’ua hi’o rā rātou i taua mau mea ra i te ātea ’ē, ’e ’ua fa’aro’o pāpū ’e ’ua fāri’i māite ».24 Mai te mea ’aita te hō’ē ha’amaita’ira’a tei hina’arohia nō ’ō mai i te Atua i fāri’ihia—’ātīrā ïa—’aita e tītauhia ’ia fa’ateimaha i te ferurira’a i te mana’ora’a e aha atu ā tē rave. E pe’e maoti rā i te a’o a Iosepha Semita ’ia « rave… i te mau mea ato’a i roto i tō [’outou] mana ’ia rave rā ma te ’oa’oa ; ’ei reira e… ti’a noa mai ai, mai te pāpū-roa-ra’a, nō te ’ite i te… fa’a’itera’a mai i [te rima o te Atua] ».25 E mau ha’amaita’ira’a tei fa’ahereherehia nō muri iho, noa atu ā e tamari’i itoito roa nā te Atua.26
’A ono ’āva’e i teienei, ’ua vauvauhia te hō’ē fa’anahora’a fa’atumuhia i ni’a i te ’utuāfare, turuhia e te ’Ēkālesia nō te ’apo mai i te ha’api’ira’a tumu, nō te ha’apūai i te fa’aro’o ’e nō te ha’apūai i te ta’ata hō’ē ’e te mau ’utuāfare. ’Ua parau fafau mai te peresideni Russell M. Nelson ē e ti’a i te mau tauira’a e tauturu ia tātou ’ia oraora mai i te pae vārua, ’ia fa’arahi i tō tātou ’oa’oa i te ’evanelia ’e ’ia fa’ahōhonu i tō tātou fa’afāriura’a i te Metua i te Ao ra ’e ia Iesu Mesia.27 Nā tātou rā e tītau i teie mau ha’amaita’ira’a. Tei ia tātou tāta’itahi te hōpoi’a ’ia ’īriti ’e ’ia tuatāpapa i te Mai, pe’e mai—nō te ta’ata hō’ē ’e te ’utuāfare, nā reira ato’a te mau pāpa’ira’a mo’a ’e te tahi atu mātēria Mai, pe’e mai.28 Tītauhia ’ia ’āparau i te reira e tō tātou ’utuāfare ’e te mau hoa ’e ’ia fa’anaho i ta tātou mahana sābati ’ia ’ama mai te auahi (e aura’a parau). ’Aore rā e nehenehe tātou e vaiiho noa i te mau mātēria i te hō’ē vāhi o tō tātou fare ma te ito i hunahia i roto.
Tē ani nei au ia ’outou ’ia ha’apa’o maita’i ’e ’ia fa’a’ama i te mana o te ra’i nō te fāri’i i te mau ha’amaita’ira’a ta’a ’ē nō ’ō mai i te Atua. ’A fa’a’ohipa i te fa’aro’o nō te ’uī i te māti ’ia ’ama te auahi. ’A tu’u i te mata’i e tītauhia ’a tīa’i māite noa ai i te Fatu. ’Āpiti i teie mau anira’a, tē pure nei au ’ia arata’i ’e ’ia fa’atere te Vārua Maita’i ia ’outou, ’ia ti’a ia ’outou, mai te « ta’ata ha’avare ’ore » ra i roto i te Maseli ra, « tē rahi ra tōna maita’i ».29 Tē fa’a’ite pāpū nei au ē, tē ora nei tō ’outou Metua i te Ao ra ’e tāna Tamaiti here, ’o Iesu Mesia, tē māna’ona’o nei rāua i tō tātou maita’i ’e tē ’oa’oa nei rāua i te ha’amaita’i ia ’outou, i te i’oa o Iesu Mesia, ’āmene.