Ian Ei Epwe Emwenikichino Ia?
Sia tongeni kefinoch/finiach ika sia nenengeni ekkewe pwan ekkoch minen finata me ekipwichi ian repwe emwenikichino ia.
Ewe kapas allimen Jises Kraist mi niwinsefanito a pesei kich ach sipwe ekiek usun fansoun mwach. A awewei ewe popun manau won fonufan me ennetin ewe manau epwe tapweto. A asukuna ekiek mi murino usun fansoun mwach an epwe emweni ach foffor ikenai.
Ren sokkonon, kich meinisin mi sinei ekkewe aramas ir mi aureki chok ei fansoun: nounano ikenai, pwapwaiti ikenai, me rese aureki fansoun mwach.
Ach fansoun iei me fansoun mwach epwe kon apwapwa ika sipwe soun ekieki fansoun mwach. Nupwen sipwe fori finiach iei, sipwe soun eis, “Ian ei epwe emwenikichino ia?”
I.
Ekkoch finiach sia kefin nefinen fori och mettoch ika esap fori och mettoch. Ua fen rong ew awewe usun ei sokkun kefin non ew mwichen steik non Merika chommong ier a no.
Ewe neni ew nenien college mi ning. Ew mwichen chon sukun mi momot won ewe sipa. Ewe chon afanafan mi awewei ei napanap a apasa pwe ir mi kakaton emon squirrel a men ningoch, wukun mi wumumw a kan kukunou nepopun efoch ira hardwood mi ning. Fan ekkoch a nom won ewe puun, fan ekkoch a tota me tetiw me pwenni popun ewe ira. Nge pwata ena mettoch mi soun fis a einga ew mwichen chon sukun?
Emon sokkun konak mi kokkon won ewe sipa unukur. I ewe mettoch ekkewe chon sukun ra ingeiti, me ewe squirrel i met ewe konak a ingeiti. Iteiten fansoun ewe squirrel ese pwa ren an pwennino epekin ewe ira, ewe konak a ekis tonnaweno me tipen konnono sefan. Iei met a emochu ekkewe chon sukun . Fanafaneno me pwoseno, meser mi mwoch won met ewe mi fis ewe pungun mi mwitir fateno.
Sopwonon, ewe konak a arap ngeni an epwe mweteri ewe squirrel me turufi me non awan. Ew ngasepwichin noninen a fis, me ewe mwichen chon sukun ra mwitir sano me weitau ewe kukkun man seni ewe konak, nge ra mang. Ewe squirrel a mano.
Emon nein chon ewe mwich mi tongeni ita epwe fen auroura ewe squirrel inet ichok ren ar akkanipou pour ika puchoruu, nge ese wor a fori. Ra chok katon nupwen met ir mi sinei epwe fis a kaneto me kaneto. Ese wor a eis, “Ian ei epwe emwenikichino ia?” Nupwen a fis met ir mi apareni, meinisin ra mwitirino ar repwe eppeti pungunon, nge ra mang. Kechiwen niemam ina met chok ra tongeni awora.
Ena ennetin porous ina ew sokkun kapas monomon. A wewe ngeni mettoch kich mi kuna non manauach me manau me nonnomun unukuch. Nupwen sia kuna efeiengaw a arap ngeni aramas ika mettoch kich mi tonger, mi wor rech tufichin kapas ika foffor ika fanananeno. Mi murino sipwe pwisin eisinikich, “Ian ei epwe emwenino ia?” Ian ekewe pungunon mettoch mi mwitir fisme esap ew pisekin atakirikir, ese och ach sipwe chok fanofanono. Mi auchea sipwe awora ourour mi fich ika pesei eppet mi fich nupwen mi chiwen wor fansoun.
Finier kewe ua keran chok awewei mi pachenong ru kefin nefinen fori ekkoch foffor ika esap fori och foffor. Mi kon nap ekkewe kefin nefinen ew foffor ika pwan och. Ekkei mi pachenong kefin nefinen och ika ngaw, nge iei a soun fis ekkewe kefin nefinen ru mettoch mi och. Ikei pwan mi och sipwe eis ian ei epwe emwenino ia. Sia fori chommong kefin nefinen ru mettoch mi och, napengeni mi pachenong ifa usun sipwe anusu ach fansoun. Ese wor ngawan ach nounou urumot won video ika text ika katon tv ika porous won ew cell phone. Nge ew me ew ekkei mi pachenong met sia eita ngeni “opportunity cost,” wewen pwe ika sia awora fansoun ne fori ew mettoch, esap wor ach tufich ne fori pwan ew. Ngang mi sinei pwe ami mi tongeni weweiti pwe mi auchea sipwe ekiekiochu met a tur senikich non ewe fansoun sia fori ew urumot, ina mwo ika mi unusen och.
Ekkoch fansoun a no ua ani ew afanafan itenapan “Och, Murino, Echipwer.” Non ena afanafan ua apasa pwe “ita pokiten och mettoch mi och esap ew popun mi naf om kopwe pwonureta. Chochon mettoch mi och mi tongeni nap seni ewe fansoun mi wor om kopwe apwonurea. Ekkoch mettoch mi murino nap seni och, me ikkei ekkewe mettoch epwe nap ach aparenir me non manauch. … Sipwe nikitano ekkoch mettoch mi och ren ach sipwe fini ekkoch mi murino ika echipwer.”1
Nenengeniochu non watten napanapan. Met epwe fis ngeni fansoun mwach ren finiach sia fori non ei fansoun? Chechemeni auchean ach angei ach sukun, kaeo ewe kapas allim, asofosefani ach pwon ren ach angei ewe sakrament, me no ngeni ewe tempel.
II.
“Ian ei epwe emwenikichino ia?” mi pwan auchea non ach finata ifa usun sipwe etetteni ika ekieki usun pwisin kich. Met mi kon auchea, emon me emon kich I noun Kot mei wor ach tufichin feiochun manau esemuch. Ekkewe ekkoch etetten, mi pachenong angang, sokofesenin aramas, nikinikin aramas, ika sufon, mi mwoch fansoun ika kukkun me non fansoun esemuch. Ousap fini ne etetteni kemi ika ekieki kemi non kinikin mi auku met oua mochen achocho ngeni.
Pwii kana, me fefinei mi katon ika anneani met upwe apasa ikei, ua anean amwo ami mi sinei pwata noumi souemwen a ngeni kemi afanafanan me aurouran met aua awora. Am mi tongei kemi, me Samach won Nang me Noun, Jises Kraist, mi tongeni kemi. Ewe “kokkotun pwapwa mi auchea” ina ar kokkot fan itach (Alma 42:8). Ena kokkot me Ar kewe annuk me angangepin me pwon ra emwenikich ngeni ewe watten pwapwa non ei manau me non ewe manau epwe feito. Am chon angangen ewe Sam me ewe Nau, aiwa aiti me aurour usun ra fen emweni kem me ren ewe Ngun mi Fel. Ese wor met aua mochen mochenim am aupwe kapas ennet me pesei kemi ne fori met Ra fen affata pwe ewe aan ngeni manau esemuch, ewe niffang mi nap seni niffang meinisin an Kot (Doctrine and Covenants 14:7).
III.
Iei pwan ew awewen met epwe fis ngeni fansoun mwach pokiten finiach sia fori non ei fansoun. Ei awewe a wewe ngeni finiach ne fori ew fangeno iei ren an epwe fisioch ew auchean mochenin fansoun mwach.
Non ew mwichen steik non Cali, Colombia, emon fefinach a aporousa ifa usun I me kofotan we ra mochen apupunu non ewe tempel, nge non ena fansoun ewe tempel mi arap ngenir mi towaweno non Peru. Non fansoun nangatam, ra isois nour moni ren mor won pas. Nesoponon ra fiti ewe pas ngeni Bogotá, nge nupwen ra tikeri ikewe, ra kuna pwe meinisin ekkewe sea won ewe pas ngeni Lima, Peru, ra masou. Ra tongeni niwinsefan ngeni imwer nge resap chiwen apupunu ika repwe ne chok apupunu nge esap non ewe tempel. Feiochun, pwe mi pwan wor ew tufichin finata. Ra tongeni fiti ewe pas ngeni Lima ika ir mi mochen mwot epin nefon ewe pas ren ukukun nimu ran me nimu pwin. Ra finata ar repwe fori ei. A apasa pwe a weires, ina mwo ika ekkoch ekkewe chon fitir ra mut ngenir ne mwot won ar kewe sea pwe repwe awenewen epin ewe pas.
Met ua mwar ren me non an kapas ina an ei sister porous pwe I mi kinisou pwe I me punuwan we ra tufich ne no ngeni ewe tempel non ei napanap, pokiten mi siwini napanapen met ir mi mefi usun ewe kapas allim me napanapen met ir mi mefi usun apupunu non ewe tempel. Ewe Samon a efeiochur ren ewe marita a feito seni fangeno. A pwan apareni pwe ar we sai non nimu ran ngeni ewe tempel a apwonueta watten maritan pekin ngunur nap seni ekkewe chommong fansoun ra no ngeni we tempel nge rese fangeno.
Non ekkewe ier seni ena fansoun ua rong ena kapasen pwarata, ua ereki epwe ifa sokofesenin manauen ena pea pupunu ika pwe refen finata pwan ew—nikitano ewe fangeno mi auchea ne apupunu non ewe tempel.
Pwi kana, sia fori chommong finiach non ei manau, ekkoch mi watte me ekkoch mi nikinikin kukkun. Ach nenesefan, sia tongeni kuna watten sokofesenin ekkoch finiach kewe sa fori non manauach. Sia tongeni kefinoch me finiach ika sia nenengeni ekkewe pwan ekkoch minen finata me ekipwichi ian repwe emwenikichino ia. Nupwen sia fori, sipwe tapweno mwirin an Preseten Russell M. Nelson aurour ne poputani ekieki ren nesoponon.2 Ren kich, nesoponon mi chok nom won ewe aanen pwon me non ewe tempel ngeni manau esemuch, ewe niffang mi nap seni niffang meinisin an Kot.
Ua pwarata usun Jises Kraist me usun pungun An Achasefan me ekkoch ennet usun An kapas allim esemuch non iten Jises Kraist, amen.